Jezus libi nanga diniwroko

Johannes ben mankeri bribi?

JOHANNES na Dopoeman, di sidon now sowan wán jari na ini doengr’oso e kisi na njoensoe foe na opobaka foe na manpikin foe na weduwe ini Naïn. Ma Johannes wani jere langalanga foe Jezus san disi wani taki, èn foe dat’ede meki ai seni toe foe en discipel foe kon sabi fa a de: „Joe de a wan di moe kon, ofoe wi abi wan trawan foe ferwakti?”

Dati kande gersi wan freemde aksi, kande foedi Johannes ben si dati Gado jeje ben saka kon tapoe Jezus èn ben jere a sten foe Gado di ben feni Jezus boen di Johannes ben dopoe en, pikinmoro toe jari psa kaba. Kande son sma e si na aksi foe Johannes dati en bribi ben kon swaki. Ma dati no ben de so. Jezus no ben sa prijse Johannes so leki fa a ben doe na a okasi disi, efoe Johannes ben kon degedege ini bribi. Ma foe san-ede Johannes e poti na aksi disi?

Kande Johannes soso wani foe jere foe na mofo foe Jezus dati a de a Messias. Disi ben sa tranga Johannes srefsrefi, di e dré gwe na ini na doengr’oso. Ma agersi dati moro de a baka na aksi foe Johannes. A de troe dati a wani sabi efoe wan tra sma e kon ete, wan sma di e waka a baka Jezus, di sa meki ala sani kon troe di na Messias ben sa doe akroederi den sani san ben taki a fesi.

Den bijbel profétitori di Johannes ben sabi, e taki dati a salfoewan foe Gado ben sa de wan kownoe, wan sma di ben sa fri tra sma. Tokoe Johannes de ete na ini doengr’oso, aladi Jezus dopoe foeroe moen psa kaba. A de krin dati Johannes e aksi Jezus soboen: ’Joe de a sma di e opo a kownoekondre foe Gado leki wan makti di joe kan si ofoe wi moe wakti na tapoe wan tra sma, di e waka na joe baka, di sa meki ala profétitori di abi foe doe nanga na glori foe na Messias kontroe?’

Na presi foe taigi den discipel foe Johannes: ’A no de foe taki dati mi de na sma, di sa kon!’ dan Jezus ini asrefi joeroe dati e gi wan aparti demonstratie foedi ai dresi wan bigi nomroe foe sma foe ala sortoe foe siki nanga kwaal. Dan ai taigi den discipel: „Go, taigi Johannes san joe ben si èn jere: den brenisma e si baka, lanwan e waka, dan gwasiwan kon krin èn den dofoewan e jere, den dedewan e kisi opobaka èn den pôti sma e kon jere a boen njoensoe. Èn kolokoe a sma de di no e naki foetoe na mi.”

Nanga tra wortoe, foedi na ini na aksi foe Johannes kande na ferwakti de na ini dati Jezus ben sa doe moro leki san a e doe, soleki foe meki Johannes srefi kon fri, Jezus e taigi Johannes dati a no moe ferwakti moro leki disi.

Te Johannes discipel e waka gwe, Jezus e taki nanga den ipi sma èn e ferteri den dati Johannes de na „boskopoeman foe Jehovah” di Maleachi 3:1 e taki foe en, èn dati a de ooktoe na proféti Elia di Maleachi 4:5, 6 ben taki foe en na fesi. Na so a e opo Johannes èn a e poti en tapoe wan lin nanga ala proféti di ben libi bifo en, foedi ai taki:

„Foe troe mi taigi oenoe: A mindri den di gebore foe oema, no wan moro bigi wan ben wiki kon leki Johannes a Dopoeman; ma a moro mindriwan na ini a kownoekondre foe hemel de moro bigi leki en. Foe sensi den dé foe Johannes na Dopoeman te leki now a kownoekondre foe hemel de a marki na san sma e poesoe go èn den sma di e poesoe go e graboe en.”

Jezus e tjari kon a krin dati Johannes no e kon na ini na kownoekondre, foedi wan mendriwan di de drape de moro bigi leki Johannes. Johannes ben sreka a pasi gi Jezus, ma ai dede bifo Jezus ben poti wan zegelmarki na tapoe na ferbontoe, ofoe na kroederi nanga en discipel sodati den sa de kompe tiriman nanga en ini a kownoekondre. Foe dat’ede meki Jezus e taki dati Johannes no sa de na ini na hemel kownoekondre. Johannes na a tra sé sa de wan grontapoe onderdaan foe Gado Kownoekondre. Lukas 7:18-30; Mattéus 11:2-15.

◆ Foe san-ede Johannes aksi efoe Jezus de a wan di moe kon ofoe den moe ferwakti wan trawan?

◆ Sortoe profétitori Johannes ben meki kon troe leki fa Jezus ben taki?

◆ Foe san-ede Johannes na Dopoeman no sa de nanga Jezus na ini hemel?