Joe e njanboen foe persoonlijk studie?
IBRI oprègti foetoeboi foe Gado ben o prisiri foe gi wan moi pisi foe en ten gi persoonlijk bijbelstudie (Psalm 1:1, 2). Tokoe, foeroe sma e feni taki foe di foeroe sani e teki a ten nanga a krakti foe den, meki den abi moeiti foe gebroiki a ten nanga a krakti gi persoonlijk studie so leki den ben sa wani.
Ma, foe go moro fara leki fajafaja foetoeboi foe Gado, dan alamala moesoe meki a prisiri nanga a krakti foe den kon njoen baka, dei foe dei, foe di den e feni njoen noso moro dipi tori foe a waarheid foe Gado Wortoe. Den bijbel waarheid di ben naki joe ati jari pasa, kande no e naki joe ati so foeroe moro nownow. Foe dati ede, a boen, a de prenspari srefi, taki wi e tan doe moeiti èn taki wi sabi foe san ede wi e doe moeiti, foe kisi tra inibere tori foe a waarheid, so taki wi e tan gi wisrefi deki-ati na jejefasi.
Fa den fositen man foe bribi, ben meki densrefi kon tranga na jejefasi nanga jepi foe persoonlijk studie foe Gado Wortoe? Fa wan toe foe den foetoeboi foe Jehovah ini a ten disi, e meki a persoonlijk studie foe den kon tron wan moro prisiri sani èn wan sani di e pai? Fa den e kisi pai foe den moeiti foe den?
Den ben meki den krakti kon njoen baka nanga jepi foe persoonlijk studie
Kownoe Josia foe Juda ben bigin a feti foe en teige afkodrei, nanga moro bigi faja, baka di a ben meki sma leisi gi en ’a boekoe foe a wet foe Jehovah di komoto na a anoe foe Moses’. A no de foe taki, dati disi no ben de a fosi leisi, taki a ben loekoe a pisi disi foe a Wortoe foe Gado; ma di a jere a boskopoe langalanga foe a fositen pisi foe bijbel boekoe di den ben skrifi nanga anoe, dan Josia ben kisi deki-ati ini a feti di a ben feti gi a troe anbegi. — 2 Kroniki 34:14-19.
A profeiti Danièl ben abi a koni foe si ’a nomroe foe den jari gi a kontroe foe a pori di den pori Jerusalem krinkrin’ èn a pori di Jerusalem ben sa pori seiker, èn disi no ben de so wawan foe di a ben leisi a boekoe Jeremia, ma sosrefi foe di a ben leisi „den boekoe”. So leki fa a sori, dan den boekoe disi ben abi na ini toe den boekoe leki Lefitikus (26:34, 35), Jesaja (44:26-28), Hosea (14:4-7), nanga Amos (9:13-15). San a ben kisi leki wan djaranti nanga jepi foe a fajafaja studie foe en foe den bijbel boekoe, ben meki taki a man disi di ben gi ensrefi na a dini foe Gado, ben soekoe Gado nanga fajafaja begi. A begi di a ben begi nanga faja, ben meki en kisi piki nanga moro sani di ben tjari kon na krin gi en èn a djaranti di a ben kisi di abi foe doe nanga a foto Jerusalem nanga a pipel foe Danièl. — Danièl, kapitel 9.
Josia di ben doe „san ben de reti ini na ai foe Jehovah”, nanga Danièl di ben de „wan sma di Gado wani sote”, efoe joe loekoe en boen, dan den no ben de tra fasi leki wi ini a ten disi (2 Kownoe 22:2; Danièl 9:23). A persoonlijk moeiti di den ben doe, foe di den ben wani foe studeri den Boekoe foe bijbel di ben de foe kisi ini a ten dati, ben meki taki Danièl nanga Josia ben gro kon moro lepi na jejefasi èn ben jepi den foe njanboen foe wan moro tranga banti nanga Gado. A srefi sani wi kan taki foe tra fositen foetoeboi foe Jehovah, so leki Jefta, a psalm singiman foe na oso foe Asaf, Nehemia, nanga Stefanus. Ala den sma disi ben boeweisi taki den ben studeri persoonlijk a pisi foe bijbel di ben de foe kisi ini a ten foe den. — Kroetoebakra 11:14-27; Psalm 79, 80; Nehemia 1:8-10; 8:9-12; 13:29-31; Tori foe den Apostel 6:15–7:53.
Meki a diniwroko boeweigi joe
Ini a ten disi, moro foeroe foe den foetoeboi foe Jehovah di ben dini en foeroe jari kaba, abi wan schema gi persoonlijk bijbelstudie. Den ben feni disi wan prenspari sani foe tan na ai na jejefasi èn foe sorgoe dorodoro gi den frantiwortoe di den abi leki kresten. Ma tokoe, foeroe foe den e erken, dati a no de makriki ala ten foe hori balansi ini a gebroiki di den e gebroiki a ten nanga krakti foe den, gi studie nanga tra afersi di den no moesoe poti na wan sei.
Tokoe, foe tan na ai na jejefasi, nanga jepi foe fajafaja persoonlijk studie, de toemoesi prenspari foe handri nanga den fanowdoe ini a kresten diniwroko, pe wi doro moi fara kaba ini a Kownoekondre-preikiwroko na heri grontapoe. Denwan di ati e naki foe den njoen nanga dipi inibere tori foe a Wortoe foe Gado, kan gi piki tapoe a tjalensi foe doro den ati foe sma di e angri. Disi de troe efoe wan sma abi foe wroko na den presi pe a kan froewakti foe fanga foeroe fisi na jejefasi. Ma disi de troe toe te wan sma e horidoro ini kontren di wroko foeroe leisi kaba, pe moro foeroe sma no e ke foe sani di e pasa.
Njan foe Gado Wortoe doronomo
San trawan e doe, kan gi joe idea foe a fasi fa joe ben kan njanboen moro foe a gwenti di joe gwenti foe studeri noso fa joe nanga joe osofamiri ben kan kisi moro wini foe a ten di joe e teki foe studeri. Wán foe den sani di wan foetoeboi foe Gado no wani foe misi, na foe leisi Gado wortoe srefi doronomo. Foeroe sma ben poti leki marki foe no leisi moro mendri leki dri noso fo kapitel foe bijbel ibri wiki. Joe wani leisi a heri bijbel ini wan jari? Dan joe sa de kolokoe te joe e poti moro ten na wan sei foe leisi en, kande wan afoe joeroe wan dei.
Joe leisi a heri bijbel moro leki wan leisi kaba? Foe san ede joe no e poti wan njoen marki, a tra leisi te joe o leisi en? Foe doe en tra fasi, wan kresten oema ben leisi den bijbel boekoe akroederi a fasi fa den ben skrifi a wan baka a trawan. A ben si foeroe sani di ben abi den fondamenti tapoe a background foe san ben pasa fosi èn san ben pasa baka dati èn so moro fara. Dati ben de sani di a ben misi den fosi leisi. Wan tra kresten oema ben leisi a heri bijbel feifi leisi ini den feifi jari di pasa, èn ibri tron a ben leisi en wan tra fasi. A fosi leisi a ben leisi en foe Genesis kon miti Openbaring. A di foe toe leisi, a ben skrifi sjatoe den prenspari penti foe den kapitel gi ensrefi, ini wán noso toe lin ini wan boekoe. Bigin foe a di foe dri jari, a ben bigin nanga wan moro bigi bijbel nanga verwijzing. Fosi, a ben loekoe spesroetoe kruisverwijzing ini a seilin èn baka dati a ben loekoe den foetoewortoe moro fini èn so srefi a bodoi na a appendix. A di foe feifi leisi, a ben gebroiki bijbel karta foe meki a froestan di a kan froestan pe ala den presi de, di skrifi na bijbel, kon moro boen. A kresten oema disi, e taki: „Gi mi, a leisi foe bijbel ben kon tron wan prisiri sani, leki te mi e njan wan njanjan.”
Son faja studenti foe bijbel feni en wan boen sani foe abi wan eksemplaar foe bijbel, di den e gebroiki soso gi persoonlijk studie. Den ben skrifi sjatoe na a seilin ini a bijbel dati moi komentaar, agersitori di e meki sma denki dipi, noso den nomroe foe den bladzijde foe tra poeblikâsi di den kan gebroiki na wan tra ten. Wan foeroeten preikiman e feni en wan switi sani, na a kaba foe ibri moen, foe skrifi ini na eksemplaar di a e gebroiki foe studeri, den njoen penti di a ben leri ini a moen dati. „A loekoe di mi e loekoe go na fesi na den warti joeroe disi foe mi,” na oema e taki, „e jepi mi foe doro tra marki gi a moen moro esi.”
Wan toe koni idea
Joe e firi taki joe schema foeroe nanga fanowdoe foe ala dei nanga foe ala wiki, èn taki joe abi wan toe rai fanowdoe foe gebroiki joe ten di skotoe, moro boen? We, tjari nanga joe, san joe wani foe leisi, èn gebroiki den fri momenti foe joe. Na a oso noso na a presi pe joe gwenti foe studeri, seti den boekoe noso tra materiaal foe studeri, efoe a kan na so wan fasi, taki a de makriki foe teki den te joe abi den fanowdoe. Meki a presi pe joe e studeri tron wan switi presi foe sidon, ma no meki en so switi taki joe e djonko te joe e studeri. Joe abi wan lezing foe hori? Leisi a materiaal so froekoe leki joe man, baka dati meki joe ede kon lai nanga idea te joe e rostoe noso te joe e doe difrenti sortoe wroko na oso.
Trawan kan wroko makandra nanga joe foe gebroiki a ten moro boen, so taki joe nanga den trawan kan kisi wini foe dati. Foe eksempre, joe kan meki wan sma leisi wan makriki sani nanga wan krakti sten gi joe, ala di joe e doe wroko di joe gwenti foe doe, noso te joe e gi a boen sma di e leisi gi joe, te foe dringi. Fa joe e prakseri te ala sma na ini na oso e agri foe tan tiri gi wan pisiten foe doe persoonlijk studie? „Sortoe sani di joe ben leisi a lasti tron, ben meki joe firi boen?” Sontron joe kan hari foe den mati foe joe, den sani di den ben leri, foe di joe e bigin wan takimakandra na so wan fasi.
Joe wani troetroe foe bigin nanga wan toe njoen idea gi a persoonlijk studie foe joe? Joe kan poti wan marki foe omeni ten joe e gebroiki foe studeri, na a srefi fasi fa foeroe sma e poti wan marki foe omeni ten den e gebroiki foe taki nanga trawan foe bijbel. Wan sisa di de wan foeroeten (pionier) preikiman, e poti wan marki foe den joeroe di a wani gebroiki foe studeri èn a e breiti te a e si taki den joeroe di a ben poti na wan sei foe studeri, pikinmoro e doro a marki di a ben poti. Trawan e poeroe ten foe a ten di den e loekoe telefisi èn na so wan fasi den kan abi nofo ten foe studeri. Foeroe sma e froekisi foe studeri wan thema di den e feti na en baka gi wan pisiten, so leki den froktoe foe a jeje, a background foe bijbel boekoe, noso a koni foe gi leri. Sonwan e njanboen foe di den e meki karta foe seti sani di pasa a wan baka a trawan, so leki karta di e sori san den kownoe foe Israèl ben abi foe doe nanga den profeiti, noso den Tori foe den Apostel nanga den brifi foe Paulus.
Jongoewan, joe wani meki joe bribi kon moro tranga? Foe san ede joe no e teki wan poeblikâsi di joe kan studeri finifini na ini joe tra skoro fakansi? Wan jongoe sisa di dopoe kaba èn di ben teki leri na wan hei skoro, ben teki De mens op zoek naar God, wan boekoe di a Waktitoren genoodschap tjari kon na doro. A ben skrifi sjatoe ini wan pikin boekoe, ala den sani di a ben leri foe ibri kapitel. A sani disi ben de wan tjalensi gi a jongoe sisa èn a ben teki moro ten leki san en ben froewakti. Ma, di a ben kaba nanga a heri boekoe, a troe di a bijbel boskopoe de troe, ben naki en ati srefisrefi.
De ala ten fajafaja foe leri
Moro foeroe foe den foetoeboi foe Jehovah ini a ten disi, nownow kaba abi „foeroe foe doe ini a wroko foe Masra” (1 Korentesma 15:18). Srefi nanga wan njoen schema di joe meki baka èn nanga opregti moeiti, a fasti gwenti di joe abi ini wan wiki foe doe sani, no e kenki foeroe. Tokoe, efoe joe de fajafaja foe leri moro dipi inibere tori foe waarheid èn foe tan hori joesrefi ini akroederi nanga a fasi fa den prakseri foe Jehovah e kon na krin, dan dati sa jepi joe foe kon moro boen ini a gwenti di joe gwenti foe studeri.
A e gi deki-ati foe jere den boen bakapisi di trawan ben kisi, foe di den ben go na fesi ini a fasi fa den e studeri. Wan kresten man, di ben erken taki a ben bigin lasi wan positief fasi foe soekoe moro dipi inibere tori foe waarheid, ben orga a libi foe en, so taki a ben man gi moro foe en fri ten gi persoonlijk studie. „A gi mi prisiri kaba di mi no ben sabi fosi”, a e taki. „Mi e feni taki mi kan taki nanga trawan foe mi bribi nanga moro faja, foe di mi abi a froetrow di e kon bigi moro nanga moro, taki bijbel komoto na Gado. Mi e firi taki mi njanboen, mi de gosontoe na jejefasi, èn mi e feni satisfaksi na a kaba foe ibri dei.”
Wan opziener foe Jehovah Kotoigi di e rèis èn di e fisiti foeroe gemeente, ben taki foe tra wini di sma e wini tapoe a fasi disi: „Denwan di de fajafaja ini den persoonlijk studie, moro foeroe de nanga krakti èn nanga faja ini a fasi fa den e taki. Den e hori kompe moro boen nanga trawan, èn den no e bigin tweifri makriki foe di trawan e taki negatief sani. Te den de ini a velddienst, dan den kan fiti densrefi makriki na den situwâsi èn den de na ai gi den fanowdoe foe den sma di den e miti.”
A e taki foe ete wan penti di sonwan kan hori na prakseri, te den e loekoe a fasi fa den e studeri. „Na den konmakandra te wi e taki makandra foe bijbel, dan foeroe sma abi a gwenti foe leisi a komentaar foe den foe a bladzijde. Den ben sa kisi moro wini, efoe den ben sa prakseri dipi foe a materiaal, fa a abi foe doe nanga den sani di den ben leri bifo, noso fa a abi foe doe nanga den eigi libi.” Joe denki taki joe ben kan go na fesi ini a fasi fa foe studeri?
A profeiti Danièl, baka moro leki 90 jari foe libi, no ben firi taki a ben froestan nofo foe den pasi foe Jehovah. Ini den lasti jari foe en, a ben aksi foe wan afersi di a no ben man froestan so boen: „Oh mi masra, san sa de a lasti pisi foe den sani disi?” (Danièl 12:8) A no de foe taki, dati a faja di a ben tan faja foe leri moro foe a waarheid foe Gado, ben de a sroto gi a toemoesi moi soifri retifasi ini en heri libi, pe foeroe sani ben pasa. — Danièl 7:8, 16, 19, 20.
Ibriwan foe den foetoeboi foe Jehovah abi a srefi serjoesoe frantiwortoe leki Danièl, foe tan tranga leki wan Kotoigi foe Jehovah. Ala ten de fajafaja foe leri foe tan hori joesrefi tranga na jejefasi. Proeberi foe poti wán noso toe njoen sani ini a persoonlijk studie schema foe joe foe ala dei, ala moen, noso ala jari. Loekoe fa Gado sa blesi ibri pikin moeiti di joe sa doe. Ija, njanboen foe joe persoonlijk bijbelstudie èn den bakapisi di a e tjari. — Psalm 107:43.