„Jehovah na mi jepiman”
1 Di Jesus ben gi komando na den fosi disipel foe en, a ben taigi den: „Loekoe! Mi e seni oenoe go leki skapoe na mindri wolfoe” (Mat. 10:16). Disi ben meki taki den ben kon frede èn taki den ben stòp foe preiki? Nôno. Den ben teki a fasi foe denki di na apostel Paulus ben abi baka ten, di a ben taigi kompe kresten: „Hori ati èn taki: ’Jehovah na mi jepiman; mi no sa frede. San wan sma kan doe mi?’” (Hebr. 13:6) Den ben prisiri taki sma ben feni den warti foe kisi sjen foe Jesus nen ede, èn den ben tan go doro sondro foe stòp foe gi leri èn foe meki a boen njoensoe bekènti. — Tori. 5:41, 42.
2 Na ini a ten disi, a preikiwroko di e doe na heri grontapoe de na ini en lasti pisi. Neleki fa Jesus ben taki na fesi, dan wi kon tron sma di no wan nâsi no wani si na ai (Mat. 24:9). Den ben gens èn spotoe a preikiwroko foe wi, èn na son presi foe grontapoe, den tapoe a wroko srefi. Efoe wi no ben abi nofo bribi, dan wi ben kan kon frede. Ma foe di wi sabi taki Jehovah na wi jepiman, dan dati e gi wi kowroe-ati èn e gi wi krakti foe horidoro.
3 Deki-ati na wan eigifasi di e sori taki wan sma tranga, taki a no abi frede, èn taki a abi man-ati. A de heri tra fasi leki a frede di wan sma frede, a froeleigi di wan sma froeleigi, noso a abi di a no abi deki-ati. Den disipel foe Jesus ala ten abi deki-ati fanowdoe foe kan horidoro. Deki-ati de prenspari efoe wi no wani taki a fasi foe denki èn den doe foe wan grontapoe di de na ini feantifasi nanga Gado, e meki wi lasi-ati. A e gi wi deki-ati srefisrefi, te wi e prakseri foe a heri boen eksempre foe Jesus, wan sma di wini grontapoe! (Joh. 16:33) Memre so srefi den apostel di, ala di den ben kisi hebi tesi, tokoe ben taki sondro frede: „Wi moesoe gi jesi na Gado leki tiriman moro leki na libisma.” — Tori. 5:29.
4 Wi no de den sortoe sma di e degedege: Wi moesoe meki moeiti foe tan abi wan positief fasi foe denki foe a wroko foe wi (Hebr. 10:39). Hori na prakseri ala ten taki na Jehovah e seni wi, leki wan fasi foe sori en lobi èn sari-ati gi a heri libisma famiri. Noiti a no e aksi den foetoeboi foe en foe doe wan sani di no abi wan boen marki. Ala wroko di wi kisi foe doe, te foe kaba sa de gi a boen foe den wan di lobi Gado. — Rom. 8:28.
5 Wan positief fasi foe si sani sa jepi wi foe tan soekoe den wan di wi kan teki gersi nanga skapoe, na ini wi gebied. Te wi e si a mi-no-ke fasi foe sma, dan dati kan sori taki den abi broko-ede èn taki den e lasi-ati. Meki a lobi di wi abi poesoe wi foe sori sari-ati nanga pasensi. Ibri leisi te wi e libi poeblikâsi na baka noso te wi e si taki wan sma e sori pikinso belangstelling nomo, dan a marki foe wi moesoe de foe meki wan gobaka wantewante èn foe wiki a belangstelling moro. Noiti wi no moesoe denki taki wi no abi a bekwaamfasi foe bigin wan bijbelstudie, noso taki wi no man hori en na wan boen fasi. Na presi foe dati, doronomo èn na ondro begi wi moesoe soekoe a jepi nanga a tiri foe Jehovah, nanga a froetrow taki a sa jepi wi.
6 Wi e bribi serjoesoe taki Jehovah sa sorgoe taki a wroko disi sa doro en kaba. (Teki gersi Filipisma 1:6.) A froetrow di wi e froetrow dorodoro tapoe Jehovah leki wi jepiman e gi wi krakti, so taki wi „no [e] tapoe foe doe san boen”. — Gal. 6:9.