Kisi njoen krakti, no weri
„A e gi krakti na a wan di weri, èn na a sma di de sondro dynamis energie a gi tranga dorodoro psa marki.” — JESAJA 40:29.
1, 2. Fa joe ben kan teki wan eksempre foe sori san kristensma abi a srefi nanga wan marathon strélonman?
TAPOE wan oktober mamanten na ini 1984 wan ipi ma foe so wan 16.000 sma di ben teki prati na wan lon psa den strati foe New York foe lon a marathon foe a foto disi. Na laatste strépi ben de so wan 42,2 kilometer moro fara. Na ongewoon waran dréten dé dati ben abi leki marki wan faja di pikinmoro e meki joe stek èn foeroe watra na ini na loktoe den ben kostoe foeroe energie foe den strélonman èn di ben de leki wan tesi gi na hori-doro foe den. Na strélon ben de srefi gi den moro boen strélonman wan sani di ben weri den arefsrefi. Foeroe lonman ben weri èn no ben man moro; pikinmoro toedoesoen foe den no ben doro na laatste strépi. Den sma di wel ben man doro na laatste strépi, ben wini toemsi moeilek omstandigheid.
2 Kristensma ooktoe e teki prati na wan strélon. Na prijs? Tégo libi. Èn netleki na marathon strélonman, dan den moe span densrefi na wan kraktifasi te leki den doro na finish, na laatste strépi. Den abi horidoro fanowdoe. Den moe tan tranga èn sorgoe dati den no kon weri. Na strélon foe wi foe a libi no de leki wan sjatoe pasi foe lon, ma a de morofoeroe wan langa pasi foe lon. Paulus ben taigi kompe-kristen na ini Korinte: „Oenoe no sabi dati den strélonman na ini wan strélon alamala e lon tranga, ma dati soso wán e kisi na prijs? Lon so, dati joe man kisi en” (1 Korinte 9:24). Na fasi fa kristensma e lon a strélon, e go makandra nanga bigi moeiti. — Lukas 13:24.
3. Fa wawan kristensma kan go doro na ini wan krakti tempo te doro na laatste marki?
3 Ma kande joe e aksi joesrefi: ’Soema e horidoro foe go doro na ini na tempo dati te den doro na laatste marki?’ No wan sma foe wi kan doe disi na ini wi égi krakti. Efoe wi wani wini na prijs, dan wi moe kisi krakti foe na Fonten foe dynamis energie, Jehovah Gado. — Job 36:22; Psalm 108:13.
Jehovah — na Fonten foe dynamis energie
4. Foe san-ede wi kan poti fertrow na ini Jehovah makti foe hori baka gi en dienstknegti, soleki na proféti Jesaja e taki?
4 Degedege no de na ini, dati Jehovah kan hori baka gi en dienstknegti. Nanga mofo foe en proféti Jesaja na Almaktiwan ben taki foe en makti di no abi skotoe èn foe en makti wroko di wi no kan teki gersi nanga noti. „Opo joe ai go na tapoesé èn loekoe”, a e taki. „Soema ben meki den sani disi? A de na Sma di e tjari a legre foe den srefi na a nomroe foe den, di e kari den srefi na den nen. Foe na dynamis energie di psa marki ede, èn foe di a de tranga ini krakti, no wan foe den e mankeri . . . Joe no ben kon sabi en ete? Jehovah, na Mekiman foe den oekoe foe na grontapoe, de a Gado di de foe ten sondro marki. A no e weri èn a no a skinbroko. Wan diki doro foe miti a gron foe en ferstan no de.” — Jesaja 40:26-28.
5, 6. (a) Gi wantoe eksempre foe Jehovah dynamis energie?
5 Foe pe sani e kaba èn te go doro pe sani no abi kaba, alape Jehovah makti di a meki sani de foe si kefarlek bigi! Loekoe pikinso den bowston di meki ala sani, èn wi toe — den atoom. Den de so pikin dati wan dropoe watra abi wán hondro triljoen. Ma moro ferwondroe a de dati na inisé ini den kern foe den atoom nofo energie de, ini wan geval, foe meki wan explosie kon di krakti nofo foe naki na ini a gron wan olo opo di dipi 32 sodro èn di bradi sowan 400 meter.
6 Loekoe na a tra sé foe na bigi foe sani pikinso na son. Na kefarlek bigi kernonfoe di e wegi miljardmiljard ton, e gi waran na a son systema foe wi. A e kisi brandstof foe na energie di e kon foe den kefarlek pikin atoom. Aladi ala a libi na grontapoe — bon, meti nanga libisma — e anga foe na energie di na kefarlek bigi hemel krakti centrale disi e gi, dan soso wan pikinso hoeveelheid foe na energie foe na son e kon troetroe na grontapoe. Na astronoom Fred Hoyle e skrifi na ini en boekoe Astronomy: „A kefarlek pikin pisi foe son-energie di e doro na grontapoe — èn den e schat en tapoe sowan wán di foe twentibiljoen foe ala energie — de so wan 100.000 tron moro bigi leki ala energie di den e gebroiki na ini den industrie foe na grontapoe.”
7. Fa wi kan prakseri foe Jehovah, baka te wi go denki foe na makti di a ben sori na ini en mekiwroko?
7 Tokoe a son de soso wan foe den miljardmiljard ster di na merkipasi foe wi abi — èn dan a de ete soso wan mindri sortoe ster. Boiti foe dati, dan den astronoom e taki dati naar schatting sowan wan hondro miljard merkipasi sistema de ini na universum di libisma sabi. A sani disi e dangra a ferstan foe oenoe, a no so? A no de wan ferwondroe sani dati na man Job baka di a ben go denki foe fa Jehovah ben ’bradi na hemel’ ben taki dati Gado e doe „bigi sani di no de foe joe doro a gron, èn wondroe sani sondro nomroe”. — Job 9:8-10.
Jehovah kan gi joe krakti
8. (a) Soema wawan kan kisi tranga dorodoro foe Jehovah krakti, èn foe san-ede? (b) Fa na pramisi na ini Jesaja 40:29-31 de wan sani di e tranga bribi?
8 Troe anbegiman foe Jehovah kan go fri èn dorodoro na a fonten disi foe dynamis energie di ben meki na universum èn di e hori na universum na libi. Den dienstknegti foe Jehovah ’kan kon meki tron makti krakti nanga jepi foe en jeje’, sondro foe den frede foe wan mankeri foe energie (Efese 3:16; Psalm 84:4, 5). Ija, wi kan wini na strélon foe a libi wawan efoe wi abi na fertrow sondro foe poti kondisi dati Gado makti anoe kan tjari wi psa na laatste strepi nanga krakti di no wan sma kan tapoe. A kan gi wi krakti. Na proféti Jesaja ben taki foe Jehovah: „A e gi na sma di weri krakti, èn a sma sondro dynamis energie a e gi tranga dorodoro psa marki. Boi sa kan weri èn de nanga brokoskin, èn jongoeman srefi sondro mankeri sa naki foetoe fadon, ma a sma di e howpoe tapoe Jehovah, sa kisi njoen krakti. Den sa opo fré nanga fré leki aka. Den sa lon èn no kon weri, den sa koiri èn no weri” (Jesaja 40:29-31). Soso wawan te wi lési den wortoe disi, dan wi jeje kan kisi faja!
9. Fa Jehovah kan jepi joe efoe joe moe kakafoetoe gi problema di gersi bergi?
9 Te joe tanapoe na fesi problema di gersi taki joe no kan psa den èn di de leki wan kefar foe tapoe na faja foe joe gi na troe anbegi, kande joe e firi joesrefi pikin èn leki noti. Ma no lasi howpoe. Go na joe Almakti hemel Tata. A e gi tranga ’na ala sma di e howpoe tapoe en’. Na Mekiman foe na atoom no kan gi en pipel dynamis energie di krakti nofo foe ’poeroe’ den bergi dati? Dati kan foe troe! — Markus 11:23.
10. (a) Sortoe sani kan weri kristen strélonman? (b) San Satan wani doe joe?
10 Na a tra sé kande son kristen kon de so weri foe na aladé stré tegen na druk foe na sé foe wan grontapoe di e meki bigi foe poti kristen gronprakseri a wan sé, dati den wani doe en safrisafri ofoe wani foe stop nanga a strélon foe a libi. Siki, moni problema, osofamiri problema, a firi di wan sma e firi taki a de en wawan ofoe tra moeilekheid kan wroko so foe sma lasi ati ooktoe. Èn a lasi foe ati kan meki na krakti foe wan kristen lasi gwe es’esi, net so koemakriki leki wan faja dé kan poeroe na energie foe wan strélonman. Na bigi gensman, Satan Didibri, e gebroiki den sani disi ini wan moeiti foe broko joe soifri-retifasi leki wan dienstknegti foe Jehovah (1 Petrus 5:8). No gi pasi na Didibri foe doe disi! Loekoe na a Mekiman foe den miljardmiljard hemel merkipasi sistema dati, na ini na faste fertrow dati a sa foeroe joe maksin foe jeje energie. Jehovah kan hori baka gi joe. — Psalm 37:17; 54:4.
11. San wi kan leri foe na fasi fa David ben si moeilekheid?
11 Efoe David ben kisi foe doe nanga problema, dan a ben ondrofeni dati Jehovah alaten ben de wan fonten foe njoen krakti. Baka di santa jeje ben gi en njoen krakti, David ben man foe ’kren psa’ ala gens. A ben taki: „Nanga jepi foe joe mi kan lon go tapoe wan foefoeroemanipi. Èn nanga jepi foe mi Gado mi kan kren wan skotoe.” David ben taki ooktoe nanga krakti: „Nanga jepi foe Gado mi sa kisi prenspari krakti, èn ensrefi sa trapoe tapoe wi gensman” (Psalm 18:29; 60:12). Jehovah kan doe disi ooktoe gi joe.
Feti nanga jeje weri
12. (a) Foe san-ede wi moe poeroe jeje weri es’esi a pasi? (b) San de den marki foe jeje weri? (c) Sortoe sani Jehovah ben seti foe gi njoen krakti na den sma di weri na jeje fasi?
12 Den ben marki foe jeje weri es’esi wi moe si èn morofara de es’esi foe kakafoetoe gi den. Foe san-ede? Foe di soso den ’pikinso sma’ di e span densrefi na wan krakti fasi foe psa na smara doro foe go na inisé ofoe den strélonman di e pasa na laatste strépi, e kisi na prijs foe tégo libi (Lukas 13:24; Filippi 3:12, 13). Go loekoe finfini na fokanti na bladzijde 11, di abi leki nen „Wantoe fasi foe feti nanga jeje weri”. Joe e herken wantoe foe den sani na joesrefi ofoe na wan osofamirman? Efoe dati de so, doe wantewante sani foe tjari kenki kon. Hori joe jejefasi na loktoe foe di joe e teki krakti foe den sani di Jehovah ben sorgoe gi.
13, 14. (a) Sortoe eksempre kan meki dati wi jeje krakti kon njoen baka? (b) Fa na rai foe wan foe den dienstknegti foe Jehovah, di e doe dienst jari langa kaba getrow, kan jepi wi foe go doro na ini na strélon?
13 Joe kan kakafoetoe gi den firi foe kon weri te joe e waka baka den eksempre foe den victori dienstknegti foe Gado foe a tori foe bijbel. Foeroe foe den man nanga oema, jongoe nanga owroe — ben hori-doro te na a kaba. Lési foe den na ini den pisi foe bijbel leki Hebrewsma 11:4-40. Na so toe joe abi na ini a ten disi foeroe lobi brada nanga sisa di tan dini Jehovah sondro foe weri.
14 George, di e libi na ini na zuidsé foe den Verenigde Staten foe Amerkankondre de wan eksempre foe wan kristen strélonman di no ben kon weri. Baka moro leki féfitenti jari foe tan hori-doro na ini na strélon foe tégo libi, a e go te now ete na wan krakti fasi na fesi. Sortoe rai a abi gi wi:
„Nanga krakti mi ben sa wani taki: Tan getrow na a organisaatsi. Hori na ini prakseri dati Jezus Kristus leki na Sma di Jehovah ben poti e tjari na organisaatsi. Soboen no las’ati efoe wan sma di joe lobi srefsrefi, no tan getrow. Efoe wan sani de di joe no e ferstan dorodoro ofoe di joe kan teki moeilek, fertrow a tapoe dan dati baka wan pisten a sa kon krin. Jehovah organisaatsi tjari oenoe kon so fara. Abi na fertrow dati a sa tjari wi go ini na Njoen Seti foe sani.” — Johannes 6:66-68.
15. San wi moe doe, efoe wi wani meki toemsi moi eksempre gi wi kowroe-ati?
15 Kande wantoe foe den aparti warti sma disi de na ini joe gemeente ofoe joe kan miti den tapoe den kringkomakandra. Taki nanga den. Leri foe den. Boiti foe dati, joe e feni eksempre foe tra getrow wan na ini na Jariboekoe, Na Wachttoren èn tra boekoe foe na Wachttorengenootschap. Lési den tori disi. Go loekoe fa joe kan kisi krakti foe den ondrofeni dati.
Owroeman, de wan jepi di e gi tranga
16. (a) Fa owroeman kan jepi kompekristen foe kisi njoen krakti? (b) Sortoe voorzichtigheid owroeman moe sori efoe den e gi dek’ati nanga rai?
16 Gemeente-owroeman spesroetoe moe loekoe boen dati den jepi memre foe a gemeente di e sori marki foe swakifasi. Na ini Jesaja 35:3 na toemsi moi rai e gi di e kon now: „Tranga den slap anoe èn meki den kindi di e degedege kon faste.” Ma owroeman, fa joe kan doe a porsi foe joe na ini disi? Na ini a fosi presi opo joe ai loekoe boen. Si san de troetroe na oorzaak dati wan sma e go doe en safrisafri. Sori den praktis loesoe foe a bijbel di e fiti precies na a sma di abi en fanowdoe. Ma de voorzichtig. Joe moe gi joe brada dek’ati, no meki a las’ati.a No poti joe konsensi foe dat’ede na ini wan trawan ofoe dwengi wan sma foe teki a loesoe foe joe èn no marki en leki wan kristen di no lepi efoe a no e firi foe teki na fasi fa joe e si sani. Owroeman moe gron den rai nanga dek’ati foe den na tapoe na bijbel. Den no moesoe de na sani di e meki den kompe-strélonman foe den e go doe en moro safrisafri, foe di den owroeman e poti wan bigi nomroe foe gemeente regel di no de fanowdoe tapoe den. — Teki gersi Mattéus 11:28, 29 nanga Mattéus 23:2-4.
17. Fa owroeman kan poeroe den taktik foe Satan a pasi di abi leki marki foe tjari kompe-kristen kon so fara foe doe en safrisafri?
17 Leki bakaman foe Kristus dan owroeman kan gi wan toemsi moi eksempre efoe den de es’esi foe prijse den memre foe a gemeente. Gi den na wan opregtfasi a firi dati den de sma di wi abi fanowdoe èn di wi winsi foe abi. A seti foe Satan de alaten klar’klari foe gi wan kristen na firi dati ai misi. Efoe wi brada di na ini na strélon foe den foe a libi doro a marki disi, dan den no abi sma fanowdoe di moe feni fowtoe tapoe den, ma den abi mati fanowdoe di e gi den a dek’ati foe go na fesi te leki den doro a winimarki. Di foe eksempre wan sisa foe middelbare jari ben moe tapoe nanga pionierwroko, en ati ben angri foe go baka na ini na foeroetendiniwroko. Ma disi ben de wan sani gi en di no ben kan foe na moni-omstandigheid foe en. Aladi wan owroeman ben bedoel en boen, a ben aksi en na tapoe wan fasi di ben de pikinso leki a ben soekoe fowtoe: „Oten joe e go pionier baka?” Na sjatoe piki foe en ben ferwondroe en. „Efoe mi man kan pai na joeroe-oso.” San na owroeman no ben ferstan, ma bakaten ben kon sabi ben de dati a sisa ben kan pionier foe di a man foe en ben wroko nofo moni. Ma di a basi foe en ben teki moro wroko di ben de wan degedege sani gi wan kristen, dan a konsensi foe a man foe en ben go so fara foe soekoe tra wroko. Tapoe a libimarki foe en a ben de toemsi moeilek foe feni wan wroko; foe dat’ede a ben moesoe de tevréde nanga wan wroko di no ben e pai so foeroe; foe dat’ede meki en oema ben moe wroko heri dé.
18. Fa owroeman kan de „wan jepi di e gi tranga”?
18 Foe na ondrofenitori di de dja na tapsé wi moe si na ini dati owroeman moe draidrai foe gi kompe-kristen rai? Nono. Ma te rai ofoe dek’ati de fanowdoe, dan owroeman moe abi wan opo ai gi den troetroe omstandigheid gi den brada nanga sisa foe den èn no soso loekoe san gersi taki a de so a dorosé (Jakobus 2:15, 16). Tapoe a fasi disi owroeman kan de na ini a gemeente foe den wan „jepi di e gi tranga”. — Kolosse 4:11.
19. San joe kan doe foe jepi pionier foe no kon weri?
19 Moro nanga moro kownoekondreprékiman ben hé na tempo foe den èn de now na ini na gewone pionierdienst. Na prisiri babari foe den sma di e loekoe na sépasi kan gi den marathon strélonman so wan dek’ati dati den e kisi njoen krakti. San joe e doe soboen foe gi dek’ati na den pionier na ini joe gemeente foe kisi na prijs? Doug èn Joanne ben meki foeroetendienst leki na libipasi foe den. A kan de wan sani di e meki joe lasi ati te tra sma e aksi den: „Oten oenoe o bigin nanga wan osofamiri?” ofoe „Oten oenoe o go libi te foe kaba wan geregeld libi?” Ma san e psa te kompe-kotoigi e gi moreel jepi foe di den e taki: „Go doro nanga a boen wroko. Wi bréti foe abi oenoe leki pionier na ini wi gemeente”? We, dan no soso dati joe e meki dati den no kon weri na jejefasi, ma den e kisi jepi foe ’opo fré leki aka’ na ini a pionierdienst foe den! — Teki gersi nanga Jesaja 40:31.
Fa foe kisi njoen krakti
20, 21. Fa son wan di de na ini na foeroetendienst ben kisi njoen krakti?
20 Arki pikinso na a trowpaar disi, Frederick nanga Maria. Den sabi fa den moe kisi njoen krakti. Alatoe e dini leki zendeling na ini wan Mindri-Amerkankondre èn ala toe pasa sébitenti jari kaba. A man ben bigin na ini 1946 nanga en zendingwroko èn na oema na ini 1950. San e jepi den foe go doro na ini Jehovah dienst? Frederick e piki: „Boiti a lobi gi Jehovah èn a lostoe foe jepi tra sma a de fanowdoe foe hori na marki foe tégo libi na ini prakseri.” En oema e piki taki: ’Den pramisi foe Gado ben jepi wi foe go doro’. Fa den e tan farawe foe kon weri? „Awinsi sortoe toewijzing joe abi toe” so a man e gi rai, „abi foeroe foe doe na ini.” A oema e gi na rai „de geregeld na ini na doe foe theokratiswroko” èn ai taki moro fara: „Efoe joe e kon moro owroe, dan joe no kan doe ala sani san joe ben sa kan doe. Dati ben sa kan tergi mi, ma mi e taki en nanga Jehovah na ini begi.” Frederick e tapoe nanga na toemsi moi rai di e kon now: „Wi e aksi Jehovah ala neti na ini begi foe jepi wi.” — 1 Petrus 4:7.
21 Lavonia de 67 jari èn a de den laatste 20 jari wan gewone pionier. Ini a jari di psa a ben didon tinaféfi dé na at’oso èn den laatste ten ai dringi dresi gi en ati. A dede foe difrenti famirman èn ooktoe foe en man nanga en papa ben aksi foeroe foe en firi. Tokoe a oema e tan span ensrefi. Fa ai kisi njoen krakti? „Dati mi kan abi wan prati dorodoro na a prékiwroko, de troetroe wan jepi”, a e taki, „bika efoe mi kan taki nanga tra sma foe Jehovah, dan disi e jepi mi foe no denki na mi problema èn a e gi vréde foe jeje èn wan prisiri di e meki a libi de warti a moeiti.” A no abi ooktoe na prakseri foe tapoe nanga pionier, ma ai taki: „Te mi e si dati trawan e leri sabi Jehovah nanga den toemsi bigi prakseri foe en, dan disi e gi mi sowan bigi prisiri dati a no e kon a mi srefi foe wani stop nanga pionierwroko.” — Tori foe den Apostel 20:35.
22. San wi moesoe tan doe foe wini na strélon foe na tégo libi?
22 Awinsi na a momenti disi wi kan span wisrefi leki pionier ofoe no, wi alamala kan tan krosbé na a Fonten foe dynamis energie, Jehovah, èn En organisaatsi. Meki wi tan kisi njoen krakti foe di wi e dini wi Gado loyaal. Dan wi kan taki netleki Habakuk: „Jehovah, na Soeverein Masra, de mi libi krakti; èn en sa meki mi foetoe leki di foe den oema dia” (Habakuk 3:19). Na so fasi wi no sa weri ofoe abi brokoskin. Hori na ini prakseri dati na strélon pikinmoro doro en kaba. Na marki pikinmoro doro kaba!
[Foetoewortoe]
a A de wan moi sani foe si dati a wortoe foe gi dek’ati ini Filippi 2:1 nanga Hebrewsma 6:18 abi en roetoe ini wan Griki werkwortoe di abi na betekenis foe „abi krakti tap wan sma a wan switifasi nanga wortoe” ofoe „taki nanga wan sma tapoe wan positief, èn boen fasi”.
Aksi foe loekoe san wi ben leri
◻ Na soema wawan Jehovah e gi dynamis energie fri?
◻ San na wantoe marki foe jeje weri?
◻ Sortoe sani di Jehovah seti kan jepi wi foe kisi njoen krakti?
◻ Fa owroeman nanga trawan na ini a gemeente kan jepi wi foe hori-doro na ini na „strélon”?
[Faki na tapoe bladzijde 11]
Wantoe fasi foe feti nanga jeje weri
Marki foe weri
◻ Mankeri foe dwengi joesrefi na ini gwenti foe njanjan èn dringi èn na feti na baka prisiri.
◻ A lasi foe faja gi na waarheid, wan jeje foe wani abi en makriki
◻ Na denki ini wan langa ten foe serjoesoe sani foe bribi pe joe e degedege na ini
◻ A libi foe gemeente komakandra na wan sé
◻ Pikinso faja nanga prisiri na ini na velddienst
◻ E soekoe fowtoe toemsi na ini owroeman èn na a organisaatsi
Jepi foe hori doro
◻ Begi foe a jepi foe santa jeje — Lukas 11:13; Galacia 5:22, 23; 1 Petrus 4:7
◻ Persoonlek studie — Psalm 1:1, 2
◻ Go denki dipi foe afersi foe na bijbel — Psalm 77:12
◻ Go geregeld na komakandra, kringkomakandra nanga kongres — Nehemia 8:1-3, 8, 10;
◻ Teki prati alaten na a velddienst — Tori foe den Apostel 20:18-21
◻ Jeje jepi foe a sé foe gemeente owroeman, opziener di e waka lontoe — Romeini 1:11, 12; Hebrewsma 13:17
[Prenki na tapoe bladzijde 10]
Jehovah, na Mekiman foe na universum e jepi en kotoigi foe kisi njoen krakti