Leri Tra Sma fu Gi Densrefi Wini
1 Yehovah wani, taki ala sma musu gi densrefi wini (Yes. 48:17). A sabi san e gi wi trutru koloku. Na opregti wani fu en de taki libisma musu wai pasi gi rampu èn musu nyan bun fu a libi, fu di den e poti prakseri na tapu den komando fu en. Wi e gi wisrefi furu wini efu wi e libi na a fasi di Gado wani (Ps. 34:8). Fa wi kan leri trawan fu du a srefi sani?
2 San Na a Sani Di Sma Wani? Sortu broko-ede den sma na ini yu birti abi? ¿Den no e broko den ede nanga a seikerfasi fu den oso fu den, o tranga a trowlibi fu den de, a tamara fu den pikin fu den, èn tra srefi sortu sani? ¿Te den abi problema, dan pe den e go fu kisi yepi? Kande den e frutrow tapu densrefi, tapu programa di e gi bun rai, noso tapu a tiri fu trawan. Ala di den e du dati, furu fu den e bruya fu di den idea fa den kan gi densrefi wini, e kenki ibri leisi èn den no e wroko bun. Wi musu overtoigi den taki a tiri di a Wortu fu Gado e gi, de moro bun srefisrefi (Ps. 119:98). Wi kan du disi fu di wi e sori den fa den kan meki den libi kon moro betre srefi now, efu den e du muiti fu studeri Bijbel èn efu den e du san a e taki.—2 Tim. 3:16, 17.
3 Osofamiri Libi Di Kon Moro Betre: No furu sma e frustan o boen a rai na Efeisesma 5:22–6:4, di Gado meki sma skrifi nanga yepi fu en santa yeye, e wroko fu lusu osofamiri problema. Disi ben de so nanga wan trowpaar di ben bosroiti taki den ben sa broko-trow, baka di den ben trow tin yari kaba. Ma wan bijbelstudie ben bigin nanga a wefi, di ben kisi leri fu Bijbel di abi fu du nanga a trowlibi. Heri esi a masra ben si den kenki di a wefi ben meki fu di a ben gebroiki Bijbel gronprakseri, èn a ben bigin studeri tu. Baka ten a ben taki: „Now wi feni a fondamenti fu wan trutru koloku osofamiri libi.”
4 Trutru Marki na ini a Libi: Di wan yongu sma di ben gebroiki drugs ben suku yepi na den Kotoigi, dan den ben leri en taki Yehovah e broko en ede nanga en persoonlijk. A ben taki: ’Mi ben leri taki a Kriaman abi wan sani na prakseri nanga libisma èn taki a o gi têgo libi na den wan di A feni bun. Yu no man frustan o koloku mi ben firi fu a sani disi ede. Now mi abi wan bun gosontu, wan korostu firi, èn wan krosibei matifasi nanga Gado.’
5 Ibriwan sma kan kisi wini fu a praktisch yepi di wi kan feni na ini a Wortu fu Gado. Fu di wi e gebroiki en leki wan tirilin gi wi, dan wi e sori taki a tru, taki a pasi fu Yehovah de hei srefisrefi moro leki den pasi fu grontapu (Ps. 116:12). A de wan grani gi wi fu tyari a boskopu disi abra gi tra sma, èn fu leri den fa den kan gi densrefi wini. Te wi e du dati, dan wi sa si furu tumusi moi bakapisi.