No misi a marki foe a fri di Gado gi
„Pe na jeje foe Jehovah de, drape fri de.” — 2 KORENTESMA 3:17.
1. Foe san ede Jesaja 65:13, 14 e fiti Jehovah Kotoigi?
JEHOVAH na a Gado foe fri. Èn fa a fri di Gado gi de wan blesi! Foe di den dienstknekti foe en, di gi densrefi abra na en, abi so wan fri, den wortoe disi foe a Soeverein Masra Jehovah e fiti den: „Loekoe! Mi eigi knekti sa njan, ma oenoe oensrefi sa pina foe angri. Loekoe! Mi eigi knekti sa dringi, ma oenoe oensrefi sa pina foe drei watra. Loekoe! Mi eigi knekti sa prisiri, ma oenoe oensrefi sa sjen. Loekoe! Mi eigi knekti sa bari wan prisiri-babari foe a boen-atifasi foe den, ma oenoe oensrefi sa bari tranga foe a pen ini joe ati èn joe sa bari wan sari krei bika foe wan dorodoro brokofasi foe jeje.” — Jesaja 65:13, 14.
2. Foe san ede a e go boen na jejefasi nanga Jehovah en pipel?
2 Gado en pipel e njanboen foe a toemoesi boen jeje fasi disi, bika a jeje noso a wroko krakti foe Gado e tiri den. Na apostel Paulus ben taki: „Jehovah na a Jeje; èn pe a jeje foe Jehovah de, drape fri de” (2 Korentesma 3:17). San na a marki foe na fri di Gado gi? Èn san den e aksi foe wi, foe wi kan gebroiki en dorodoro?
Na fri di Gado abi
3. Sortoe fri Gado abi, èn foe san ede?
3 Jehovah wawan abi dorodoro fri. No wan foe en mekisani kan skotoe a fri foe en, bika en na a Almakti Gado èn na Universeel Soeverein. Neleki fa a getrow man Job ben taki, „soema kan kakafoetoe gi en? Soema sa taigi en, ‘San joe e doe?’” (Job 9:12) Na a srefi fasi, a Babilonis kownoe Nebukadnesar ben moesoe taki: „No wan sma de di kan hori ai tapoe na anoe foe Gado noso di kan taigi en, ‘San joe ben doe?’” — Danièl 4:35.
4. Fa Jehovah e skotoe a fri foe en?
4 Ma, Jehovah en eigi regtfardiki gronprakseri e skotoe a dorodoro fri foe en. Disi ben kon krin na fesi di Abraham ben sori taki a ben broko-ede nanga den sma di ben libi ini Sodom èn ben aksi: „Na Kroetoeman foe a heri grontapoe no e go doe san joisti?” Na piki foe Gado ben sori dati a e erken a frantiwortoe foe doe san joisti. A no ben o pori Sodom efoe soso wàn regtfardiki sma ben de, di ben libi drape (Genesis 18:22-33). Gado e skotoe a fri foe en so srefi, bika a lobi èn koni foe en e hori en foe no atibron esi-esi èn a e oefen foe dwengi ensrefi. — Jesaja 42:14.
Den skotoe foe a fri foe libisma
5. San na wan toe sani di e skotoe a fri foe libisma?
5 Ala di Jehovah abi dorodoro fri, ala trawan e handri na ini den skotoe di, a fasi fa den de, den konifasi èn a birti pe den e libi, so boen leki den sani so leki na skotoe libiten foe now di den sondoe libisma abi. Gado ben meki sma nanga volmaakti fri foe ben kan libi na ini a kontren di Jehovah ben sreka gi den. Difrenti reide de san ede a fri foe libisma skotoe èn no de dorodoro.
6. Sortoe krakti a frantiwortoe di wi moesoe gi Gado, abi tapoe a fri foe wi?
6 Na a fosi presi, a fri foe libisma skotoe bika Gado ben meki sma foe doe En wani. Jehovah ‘warti foe kisi a glori èn a grani èn a krakti, bika en meki ala sani èn foe en wani ede, meki den ben de èn joe ben meki den’ (Openbaring 4:11). So boen libisma moesoe gi frantiwortoe na a Mekiman foe en, di nanga reti ben meki wet nanga jepi foe san libisma kan kisi tiri. Ini Israèl foe owroeten a ondro a Wet foe Moses, Gado ben taki dati ibriwan sma di ben gebroiki en nen na wan kroektoe fasi noso ben broko a Sabat Wet, ben moesoe dede (Exodus 20:7; 31:14, 15; Levitikus 24:13-16; Numeri 15:32-36). Ala di wi leki kresten no de ondro a Wet, a fri foe wi skotoe bika wi moesoe gi frantiwortoe na Jehovah, di de wi Kroetoeman, Giman foe wet èn Kownoe. — Jesaja 33:22; Romesma 14:12.
7, 8. (a) Fa wet na skinfasi e skotoe a fri foe libisma? (b) Sortoe tra wet foe Gado e skotoe a fri foe wi leki libisma?
7 Na a di foe toe presi, a fri foe libisma skotoe foe den wet di Gado gi wi na skinfasi. Foe eksempel, bika foe a wet ede foe a zwaarte kracht (a krakti di e hari ala sani kon na gron), meki wan sma no man djompo komoto foe wan oso di bow go hei ini loktoe sondro foe a doe ensrefi ogri noso kiri ensrefi. A de krin taki den wet di Gado poti na skinfasi gi libisma, e skotoe a fri di den abi foe doe spesroetoe sani.
8 Na a di foe dri presi, a fri foe libisma skotoe foe Gado moreel wet ede. So leki fa a sori, dan joe moesoe foe si a bakapisi foe san Paulus ben skrifi na Galasiasma 6:7, 8: „No kori joesrefi: Gado no e meki sma spotoe en. Bika san wan sma e sai, na dati a sa koti toe; bikasi wan sma di e sai nanga en skin na prakseri, a sa koti porifasi foe en skin, ma na sma di e sai nanga jeje na prakseri sa koti têgo libi foe a jeje.” Sondro tweifri, den wet foe Jehovah Gado na moreel sei e skotoe wi fri toe, ma foe kisi têgo libi dan a de fanowdoe foe wi gi jesi na den.
9. Fa a de di wi de wan pisi foe a libisma libimakandra e skotoe a fri foe wi?
9 Na di foe fo, libisma fri skotoe foe di libisma na wan pisi foe libisma libimakandra. Dati-ede, a kan abi fri so fara nomo dati a fri no e abi krakti na wan onregtfardikifasi tapoe di foe tra sma. Kresten moesoe saka densrefi ondro „den hei tirimakti,” foe lanti èn gi jesi na den so langa leki den no e aksi taki wi pasa den wet foe Gado (Romesma 13:1; Tori foe den Apostel 5:29). Foe eksempel, wi moesoe gi jesi na den wet ini a tori foe pai belasting, o tranga wi e rèi wan oto, nanga so moro fara. Foe di a de so taki wi moesoe gi jesi na den wet disi foe „Ceasar”, dan dati e sori moro fara taki a fri di Gado gi wi no de dorodoro. — Markus 12:17; Romesma 13:7.
Foe san ede fri di skotoe?
10, 11. Foe san ede Jehovah gi libisma fri di skotoe?
10 Foe san ede Gado ben gi libisma fri di skotoe? Wan reide ben de taki na Mekiman ben kan abi mekisani na grontapoe di ben abi froestan èn di ben sa gi en grani nanga glori nanga den toemoesi switi wortoe foe den mofo èn a fasi fa den ben o tjari densrefi. Libisma kan doe disi, ala di den meti no kan. Meti, di na instinkt [di prani ini den] e tjari den, no sabi noti foe na fasi fa den moesoe tjari densrefi na moreelfasi. Joe kan leri wan dagoe foe a no teki wan sani, ma joe no man leri en foe na kroektoe di foefoeroe kroektoe. Wan meti di meki nanga wan fasti libi patron, no man teki bosroiti di e gi glori nanga grani na Gado, ala di libisma kan froekisi na wan fri fasi foe dini en Mekiman foe di a lobi en èn e warderi en.
11 Gado e gi libisma a fri disi toe foe na boen èn kolokoe fasi foe den. Den kan gebroiki a fri foe den di skotoe, foe di den e sori a koni foe meki sani èn abi krin-ede foe prakseri sani, foe doe boen èn wroko makandra. Libisma abi so srefi a fri foe wani sani ini afersi leki sortoe wroko den wani doe èn pe den wani libi. Ini a ten disi, ekonomia nanga politiek situwâsi foeroe tron e skotoe a fri foe wani sani, ma disi kan kon foe a gridifasi foe libisma, no foe a fasi fa Gado ben meki libisma na a bigin.
12. Foe san ede a moro bigi pisi foe a libisma famiri de ini katibo?
12 Ala di Jehovah gi libisma foeroe fri, tokoe a bigi nomroe foe libisma ini a ten disi de ini wan katibo di e broeja den. San ben pasa? A fosi libisma paar, Adam nanga Eva, ben misi a marki foe na fri di Gado gi. Den ben pasa a skotoe foe a fri di Gado ben gi den èn ben tjalensi a reti posisi foe Jehovah foe tiri na den tapoe leki a Soeverein Masra, Jehovah (Genesis 3:1-7; Jeremia 10:10; 50:31). Foe di den no ben tevrede foe gebroiki a fri foe den foe gi Gado grani, den ben gebroiki en na wan fasi di ben sori taki den ben soekoe den eigi boen nomo, foe bosroiti densrefi san boen èn san takroe, èn nanga dati den ben horibaka gi Satan ini en oproeroe teige Jehovah. Ma, na presi foe den kisi moro fri, dan Adam nanga Eva di ben de nanga sondoe, ben de ondro hebi skotoe nanga katibo, wan kon moro mendri foe a fri foe den, èn te foe kaba dede. Den baka pikin foe den ben erf a lasi disi di den ben lasi fri. „Bika ala sma ben sondoe èn e misi a glori foe Gado.” „Na paiman foe sondoe na dede.” — Romesma 3:23; 5:12; 6:23.
13. Foe san ede Satan ben man foe meki libisma tron srafoe?
13 Foe na oproeroe ini Eden ede, Adam nanga den bakapikin foe en ben kon de ondro katibo foe Satan Didibri toe. Bika, „a heri grontapoe didon na ini a makti foe na ogriwan”! (1 Johanes 5:19) Bika foe a hei makti nanga koni foe en, meki Satan ben kan kori sma èn meki srafoe foe a heri libisma famiri, di ben kon de freimde sma foe Jehovah Gado. Moro ete, sma di e prakseri densrefi nomo, ben basi den kompe libisma foe a lasi foe den (Preikiman 8:9). So boen, libisma ini algemeen de now ondro katibo foe sondoe nanga dede, foe Satan èn den ogri jeje foe en, èn foe den politiek, ekonomia nanga relisi seti foe sani foe grontapoe.
Troe fri tron wan sani di kan
14. Nanga san a howpoe foe libisma tapoe troe fri abi foe doe?
14 Foe kon fri foe sondoe, dede èn foe Didibri nanga en grontapoe, abi foeroe foe doe nanga a bosroiti foe Gado foe seti a strei-aksi foe na retifasi foe en eigi universeel soevereiniteit. Foe di Satan ben poti na strei-aksi disi, meki Jehovah ben gi en pasi foe tan a libi, neleki fa a ben meki Farao tan libi foe wan pisiten. Disi a ben doe so dati Jehovah ben kan sori en makti dorodoro èn meki en nen bekènti na a heri grontapoe (Exodus 9:15, 16). Heri esi Gado sa regtfardiki ensrefi leki na Universeel Soeverein èn santa a santa nen foe en foe di a e poeroe a pori nen di na oproeroe foe Satan, Adam nanga Eva ben tjari na en tapoe. So boen den sma di e frede Jehovah, sa meki kon fri foe katibo na sondoe èn dede èn den sa tjari den go na ini wan njoen grontapoe foe fri di Gado gi. — Romesma 8:19-23.
15. Sortoe ròl Jesus ben prei ini a meki kon boen baka foe a fri gi a libisma famiri?
15 Foe meki libisma fri baka, Gado seni en Manpikin kon na grontapoe leki wan libisma. Foe di na wan fri fasi a ben gi en volmaakti libisma libi, meki Gado en Manpikin, Jesus Krestes, ben gi na froeloesoe ofrandi, a fondamenti foe meki libisma kon fri (Mateus 20:28). A ben meki so srefi wan boskopoe foe fri bekènti. Na a bigin foe en diniwroko, a ben fiti den wortoe disi tapoe ensrefi: „A jeje foe a Soeverein Masra Jehovah de na mi tapoe, foe di Jehovah ben salfoe mi foe froeteri boen njoensoe na den safri-atiwan. A ben seni mi foe trowstoe den wan di ati broko, foe bari fri gi den wan di den ben teki sroto èn a bradi opo foe den ai srefi gi den strafoeman.” — Jesaja 61:1; Lukas 4:16-21.
16. Sortoe stap djoe foe a fosi jarihondro ben moesoe doe foe kisi troe fri?
16 Fa sma ben sa man kisi a fri dati? Jesus ben taki: „Efoe oenoe tan ini mi wortoe, dan oenoe de troetroe mi disipel, èn oenoe sa kon sabi a waarheid, èn a waarheid sa meki joe kon fri.” So boen, den bakaman foe Jesus ben kon njanboen now foe wan fri na jejefasi (Johanes 8:31, 32, 36). Moro fara, Jesus ben froeteri a Romen tiriman Pontius Pilatus: „Bika foe disi mi ben gebore, èn foe disi mi ben kon na grontapoe, dati mi ben sa kotoigi foe na waarheid. Ibriwan sma di de na a sei foe a waarheid, e arki mi sten” (Johanes 18:37). Den djoe di ben teki a waarheid so leki fa Jesus Krestes ben preiki èn ben libi akroederi en, ben abi berow foe den sondoe, ben kenki den fowtoe fasi foe libi, ben gi densrefi na Jehovah èn ben teki dopoe neleki fa Jesus ben dopoe (Mateus 3:13-17; Tori foe den Apostel 3:19). Na a fasi disi den ben kon njanboen foe wan fri di skotoe èn di Gado gi.
17. Foe san ede Jehovah gi den dienstknekti foe en fri?
17 Jehovah e gi den loyaal dienstknekti foe en fri, na a fosi presi foe regtfardiki en eigi soevereiniteit, ma so srefi gi a trowstoe noso boen foe den. A ben fri den Israèlsma foe katibo na ini Egipti, so dati den ben man gi en glori leki wan kownoekondre foe priester, den kotoigi foe en (Exodus 19:5, 6; Jesaja 43:10-12). Na a srefi fasi, Jehovah ben tjari en pipel komoto foe katibo ini Babilon, na a fosi presi foe bow en tempel baka èn foe meki a troe anbegi kon boen baka (Esra 1:2-4). Di den katiboman ben poti toemoesi foeroe prakseri na den eigi goedoe na skinfasi, Jehovah ben seni en profeiti Haga-i nanga Sakaria foe memre den, na den froeplekti foe den na fesi foe Gado. Foe di den ben go loekoe a fri di Gado ben gi den na a joisti fasi, dan dati ben abi leki bakapisi taki den ben klari a tempel, so taki Gado kisi glori èn so srefi gi a trowstoe nanga a tan boen foe en pipel.
No misi a marki foe a fri di Gado gi
18. Foe san ede wi kan taki dati den dienstknekti foe Jehovah ini a njoenmodo-ten disi no misi a marki foe a fri foe den di Gado gi?
18 Fa a de nanga den dienstknekti foe Gado ini a njoenmodo-ten disi? Leki wan organisâsi, den no misi a marki foe a fri foe den di Gado gi. Ini den jari 1870, den ben bigin kon fri foe Babilonia kroektoefasi èn feni prisiri ini kresten fri fasi. Disi ben de foe di den tan waka akroederi Odo 4:18 di e taki: „A pasi foe den regtfardikiwan de leki a brenki leti, di e kon moro nanga moro krin te leki na dei kon bigi.” Neleki fa den ben tjari a pipel foe Gado na owroeten go foe wan pisiten ini katibo foe na owroe Babilon, na so Jehovah en dienstknekti ben kon na wan seiker marki foe katibo na Babilon a Bigiwan ini 1918 (Openbaring 17:1, 2, 5). Memre foe a grontapoe makti dati foe falsi relisi ben prisiri di den „toe kotoigi” ben didon dede na jejefasi, na den strati. Ma foe na no-froedini boen-atifasi foe Gado, den salfoe kotoigi foe en ben kon na libi baka ini 1919, foe di na jejefasi den ben kon fri (Openbaring 11:3, 7-11). Foe di den ben gebroiki a fri di Gado ben gi den, dan den ben tron fajafaja kotoigi foe a Moro Heiwan. Dati ede, fa a ben fiti dati, ini 1931, den ben teki na nen Jehovah Kotoigi, na wan toemoesi prisiri fasi! (Jesaja 43:10-12) Spesroetoe sensi 1935, salfoe Kotoigi ben kisi jepi foe „wan bigi ipi,” di e howpoe foe kisi têgo libi na grontapoe. So srefi den no e misi a marki foe a fri foe den di Gado gi. — Openbaring 7:9-17.
19, 20. (a) San na wan fasi, di e hari sma prakseri, fa pipel foe Jehovah ben meki boen gebroiki foe a fri foe den di Gado gi? (b) Na sortoe tra spesroetoe fasi, den Kotoigi foe Jehovah e meki boen gebroiki foe a fri di Gado gi den?
19 Jehovah pipel e gebroiki a fri foe den di Gado gi boen na toe spesroetoe fasi di e hari sma prakseri. Na a wan sei, den e gebroiki a fri, foe tjari densrefi na wan opregti fasi (1 Petrus 2:16). Èn fa sma e taki toemoesi boen foe den! Foe eksempel, wan man ben waka go wan leisi ini wan kownoekondre zaal na Zurich, Switserland, èn ben taki dati a ben wani tron wan kotoigi foe Jehovah. Di den aksi en foe san ede, a ben taki dati en sisa ben de wan kotoigi èn ben sluit uit foe hoeroedoe ede. A ben taki: ‘Dati na a organisâsi di mi wani wroko makandra nanga en — wan di no e froedrage taki sma e tjari densrefi na wan takroe fasi’. Nanga boen reide a New Catholic Encyclopedia e tjari kon a krin taki Jehovah Kotoigi ben meki nen taki den na „wan foe den groepoe di e tjari densrefi moro boen moro wan foe den trawan na grontapoe.”
20 Jehovah Kotoigi e meki so srefi boen gebroiki foe a fri foe den di Gado gi foe di den e doe na ordroe di den ben kisi, foe preiki a boen njoensoe foe a Kownoekondre, neleki fa Jesus ben doe (Mateus 4:17). Nanga den wortoe di den e taki èn den boekoe di den e druk, so srefi oso-foe-oso èn na okasi, den e bariwroko gi Jehovah Kownoekondre. Te den e doe so, den e kisi wini srefisrefi foe di den e tranga a bribi foe den èn e meki a howpoe foe den kon moro krin. Morofara, a wroko disi e sorgoe taki den e kibri densrefi èn so srefi den sma di e arki den (1 Timoteus 4:16). Foe na wroko disi, na boekoe Dynamic Religious Movements e taki: „A ben o de moeilek foe feni memre foe iniwan tra groepoe di e wroko so tranga na a relisi foe den leki fa den Kotoigi e doe.”
21. Sortoe boeweisi de taki Jehovah e blesi a diniwroko foe en pipel?
21 Fa Jehovah e blesi wi te wi e doe moeiti foe doro na marki foe a fri di wi kisi foe Gado! Wi kan si disi ini a velddienst raport foe a jari di pasa — wan heimarki foe moro leki fo miljoen preikiman nanga moro leki tin miljoen sma di fisiti a Memrefesa foe Jesus dede. Ini wan raport, Ierland ben abi 29 heimarki foe preikiman ibri moen; Meksikow ben abi 78 heimarki ini 80 moen; èn Japan ben abi 153 heimarki baka makandra!
Meki boen gebroiki foe a fri foe joe di Gado gi
22. San na a inibere foe son aksi, di e poti wi foe prakseri, di wi kan aksi wisrefi?
22 Ma efoe joe na wan Kotoigi foe Jehovah di gi ensrefi abra, joe e meki gebroiki boen foe a fri di Gado gi joe? Ibriwan foe wi ben kan aksi ensrefi heri boen: ’Mi e loekoe boen foe gebroiki na fri foe mi di Gado gi foe eksempel foe meki mi tan farawe foe meki no wan sma naki foetoe foe di mi e tjari misrefi na wan fowtoe fasi? Mi e gi jesi na den wet foe Ceasar na wan fasi di fiti mi konsensi, ala di mi e poti Gado wet na a fosi presi? Mi e wroko dorodoro nanga den owroeman ini a gemeente? Mi e gebroiki a fri di Gado gi mi dorodoro foe preiki a boen njoensoe? Mi abi ala ten „nofo foe doe ini a wroko foe Masra”? Mi e feti fajafaja baka wan grontapoe wroko ala di mi ben kan gebroiki a fri foe mi di Gado gi moro betre foe di mi e meki mi diniwroko kon moro foeroe, e doe moeiti foe kisi moro bigi frantiwortoe ini a gemeente noso ini a foeroeten dienst?’ — 1 Korentesma 15:58.
23. San wi moesoe doe foe no misi a marki foe fri di Gado gi?
23 Meki wi alamala tesi èn si dati Jehovah boen (Psalm 34:8). Meki wi froetrow na en tapoe, akroederi den wet foe en, èn gi en santa nen glori foe di wi e bari wroko foe en Kownoekondre na wan fajafasi. Hori na prakseri dati den wan di ‘e sai bogobogo sa koti bogobogo’ (2 Korentesma 9:6). Dati ede meki wi doe dienst nanga wi heri ati gi Jehovah èn sori dati wi no ben misi a marki foe a fri foe wi di Gado gi.
Fa joe ben sa piki?
◻ Sortoe fri Gado abi?
◻ Sortoe skotoe na fri foe libisma abi?
◻ Fa den ben meki taki wi ben kan abi troe fri?
◻ San wi moesoe doe foe no misi na marki foe na fri di Gado gi wi?
[Prenki na tapoe bladzijde 19]
Na fri di libisma abi skotoe foe sani leki, na wet foe na zwaarte kracht