Gi joesrefi abra — Na soema?

„Ala sani di Jehovah taki, wi wani foe doe èn wi sa gi jesi.” — EXODUS 24:7.

1, 2. (a) Na sortoe sani wan toe sma e gi densrefi foe dini den? (b) A de so, taki soso den sma di abi tranga banti nanga relisi kan gi densrefi abra na Gado?

INI februari 1945, den piloot foe a Zero legre-opolani foe a Yatabe Opolani Legre foe Japan, ben kon makandra na ini wan zaal. Den ben gi ibriwan foe den piloot wan pisi papira na tapoe san den ben moesoe skrifi efoe den ben sa wani gi densrefi foe de wan memre foe a kamikaze fetigroepoe. „Mi ben prakseri taki disi ben de wan kari di mi ben kisi foe gado foe òfer misrefi ini wan ten pe a heri kondre ben de ini bigi nowtoe”, na so wan ofsiri di ben de drape na a ten dati ben taki. „Foe di den firi foe mi ben poesoe mi foe gi misrefi foe doe a wroko, meki mi gi mi nen.” A ben kisi leri foe wroko nanga wan Ohka (wan raket opolani di wan piloot e frei foe kiri ensrefi nanga tra sma) èn foe frei en go fadon panja na tapoe wan fetisipi foe den feanti. Ma na orlokoe ben kaba bifo a ben abi na okasi foe frei na opolani dati èn foe dede na so wan fasi gi a kondre nanga gi a kèiser foe en. Di Japan ben lasi a feti, dan a bribi foe en ini a kèiser ben broko na pisipisi.

² Wan ten a ben de so, taki foeroe sma na Japan ben gi densrefi na a dini foe a kèiser, foe di den ben denki taki a ben de wan gado di de na libi. Na tra kondre, a ben de so fosi èn a de so ete, taki tra sani de na san sma e gi densrefi foe dini den. Miljoenmiljoen sma e gi densrefi na a dini foe Maria, Boeda, noso tra gado — èn foeroetron den e gebroiki popki leki simbôl foe den. Foe di den T.V.-preikiman e taki na wan konifasi èn na wan fasi di e wroko na tapoe na ati foe sma, meki son sma e gi a moni foe den, di den wroko nanga foeroe moeiti, na den T.V.-preikiman disi. Disi den e doe foe horibaka gi den nanga den heri ati, èn a de a srefi leki te wan sma e gi ensrefi na wan tra sma foe dini en. Baka a feti, Japansma di ben sari foe di den froewakti foe den no ben kon troe, ben soekoe wan njoen sani na san den ben kan gi den libi abra. Gi son wan foe den, wroko ben kon tron a sani dati. Na den Owstoesei noso Westsei kondre, foeroe sma e gi densrefi abra foe kisi moro foeroe goedoe. Jongoesma e meki sma di e meki pokoe, kon tron a moro prenspari sani na ini a libi foe den, èn den e waka na baka a fasi fa den sma disi e libi. Na ini a ten disi, moro foeroe sma tron anbegiman foe densrefi, foe di den e meki den lostoe foe den tron a sani na san den e gi densrefi foe anbegi den (Filipisma 3:19; 2 Timoteus 3:2). Ma den sortoe sani noso sma disi, warti foe sma gi densrefi nanga den heri sili foe anbegi den?

3. Fa wan toe sani na san sma gi densrefi foe dini den, ben sori foe de sani di no warti noti?

³ Te sma di e anbegi popki kon sabi fa sani de troetroe, dan den e sari foe si taki den froewakti foe den no kon troe. A gi di sma e gi densrefi na a anbegi foe popki, abi leki bakapisi taki den e lasi-ati, foe di den kon froestan taki den popki na noti moro leki „a wroko foe den anoe foe libisma” (Psalm 115:4). Te den sjen tori foe den pôpi preikiman e kon na doro, dan opregtisma e sari foe di den sma disi no ben doe san den ben froewakti. Di a „swaki” ekonomia ben kon na wan kaba, dan den wrokoman ben broeja te den ben kon si taki den ben de na tapoe a lijst foe den wan di lasi wroko. Di a no ben go boen wan pisi ten na ekonomia sei, no so langa pasa, dan dati ben de wan rampoe gi den anbegiman foe Mamon, a gado foe Goedoe. Den paiman di sma ben poti na den tapoe nanga a howpoe foe meki foeroe moni, ben tron wan hebi gi den foe di a no gersi leki den sa man pai a paiman baka. (Mateus 6:24, foetoewortoe.) Te den rock pokoeman di sma e si leki gado, nanga tra sma di e gi show, dede noso safrisafri no de so pôpi moro, dan den anbegiman foe den e firi taki den sma disi gowe libi den. Èn den wan di libi na wan fasi foe satisferi den eigi lostoe nomo, foeroetron e koti bita froktoe. — Galasiasma 6:7.

4. San e boeweigi sma foe gi den libi abra na sani di no warti noti?

⁴ San e boeweigi sma foe gi densrefi abra na den soso sani disi? A de moro foeroe a jeje foe a grontapoe na ondro Satan Didibri (Efeisesma 2:2, 3). A krakti di a jeje disi abi na tapoe sma de foe si na difrenti fasi. Kande den famiri-gwenti foe wan sma di a ben kisi foe den fosi papa nanga mama foe en, ben abi krakti na en tapoe. A leri nanga a kweki di wan sma kisi kan abi wan tranga krakti na tapoe a fasi fa a e prakseri. Na algemeen firi di de na ini a wrokope kan poesoe „sma di e feti na baka a wroko foe wan bedrijf”, foe den tron srafoe foe a wroko foe den, èn dati kan de wan kefar gi a libi foe den. A fasi foe grontapoe foe feti na baka goedoe nomo, e wiki a lostoe di sma abi foe wani moro. Na ati foe foeroe sma pori èn a e boeweigi den foe gi densrefi na den eigi gridi lostoe. Den no e ondrosoekoe efoe den sani disi di sma e feti na den baka, e froedini taki den e gi densrefi na den.

Wan nâsi di gi ensrefi abra

5. Sortoe gi di sma ben gi densrefi abra na Jehovah, ben feni presi moro leki 3500 jari pasa?

⁵ Moro leki 3500 jari pasa, wan nâsi ben feni wan sani na san den ben kan gi densrefi èn di ben warti moro foeroe leki den tra sani. Den ben gi densrefi abra na a Soeverein Gado, Jehovah. Na ini a sabana foe Sinai, a nâsi Israèl, leki wan groepoe, ben froeklari taki den gi densrefi abra na Gado.

6. San a nen foe Gado ben moesoe wani taki gi den Israèlsma?

⁶ San ben boeweigi den Israèlsma foe handri na a fasi disi? Di den ben de ini katibo na Egipti, Jehovah ben gi Moses a komando foe tjari den go foe kon fri. Moses ben aksi fa a ben moesoe taigi den, soema na a Gado di ben seni en, èn Gado ben meki Moses kon sabi en leki „Mi sa sori foe de san mi sa sori foe de”. A ben komanderi Moses foe taigi den manpikin foe Israèl: „Mi sa sori foe de seni mi go na oenoe” (Exodus 3:13, 14). Den wortoe disi ben sori taki Jehovah e tron ibri sani di de fanowdoe so taki a kan doe san a abi na prakseri. A ben o meki den kon sabi en leki a Sma di e meki pramisi kon troe, na wan fasi di den fosi tata foe den Israèlsma noiti no ben sabi. — Exodus 6:2, 3.

7, 8. Sortoe boeweisi den Israèlsma ben abi taki Jehovah ben de wan Gado di warti foe den gi densrefi na a dini foe en?

⁷ Den Israèlsma ben si a pina di den tin plaag ben pina a kondre Egipti nanga a pipel foe a kondre (Psalm 78:44-51). Baka dati, kande moro leki dri miljoen foe den, so srefi oemasma nanga pikin-nengre, gowe esi-esi èn na wan gewoon fasi foe a kondre Gosen ini wán neti, èn disi foe ensrefi ben de wan deki-atifasi foe handri (Exodus 12:37, 38). Baka dati, na a Redi Se, Jehovah ben meki den kon sabi en leki „wan mansma foe feti” di a ben fri en pipel foe den sroedati legre foe Farao, foe di A ben prati a se foe meki den Israèlsma pasa èn baka ten a ben tapoe en foe soengoe den Egiptisma di ben lon na den baka foe kisi den. Leki wan bakapisi foe dati, „Israèl ben kon si toe a bigi anoe di Jehovah ben gebroiki teige den Egiptisma; èn a pipel ben bigin abi frede gi Jehovah èn den ben bigin bribi ini Jehovah”. — Exodus 14:31; 15:3; Psalm 136:10-15.

⁸ Ma a ben gersi leki den no ben abi nofo boeweisi ete foe san a nen foe Gado wani taki, dati meki den Israèlsma ben kragi teige Jehovah èn teige Moses, a sma di ben teki presi gi Jehovah, foe di njanjan nanga watra no ben de nofo. Jehovah ben seni kwartel, a ben meki mana fadon komoto na hemel, èn a ben meki watra spoiti komoto na wan klipston na Meriba (Exodus 16:2-5, 12-15, 31; 17:2-7). Jehovah ben fri den Israèlsma toe foe a feti di den Amaleksma ben feti nanga den (Exodus 17:8-13). Den Israèlsma no ben man taki srefisrefi taki san Jehovah ben taigi Moses baka ten, no ben troe: „Jehovah, Jehovah, wan Gado di abi sari-atifasi nanga switifasi, di no e kisi atibron esi-esi èn di abi lobi boen-atifasi nanga waarheid pasa marki, di e kibri lobi boen-atifasi gi doesoendoesoen sma, di e gi pardon foe fowtoe nanga foe a pasa di sma e pasa a wet, nanga foe sondoe” (Exodus 34:6, 7). Foe troe, Jehovah ben boeweisi foe ensrefi taki a warti foe den gi densrefi na a anbegi foe en.

9. Foe san ede Jehovah ben gi den Israèlsma na okasi foe den sori taki den gi densrefi abra na en foe dini en, èn fa den ben piki?

⁹ Ala di Jehovah ben abi a reti foe de eiginari foe den Israèlsma, foe di a ben bai den komoto na Egipti, tokoe leki wan Gado di abi boen-atifasi èn sari-atifasi, a ben gi den na okasi, sondro foe dwengi den, foe sori taki den wani foe dini en (Deuteronomium 7:7, 8; 30:15-20). A ben poti den kondisi toe foe a froebontoe na mindri en nanga den Israèlsma (Exodus 19:3-8; 20:1–23:33). Di Moses ben froeteri den Israèlsma den kondisi disi, den ben froeklari: „Ala sani di Jehovah taki, wi wani foe doe èn wi sa gi jesi” (Exodus 24:3-7). Foe di densrefi teki a bosroiti, sondro foe sma dwengi den, meki den ben tron wan nâsi di gi densrefi abra na a Soeverein Masra Jehovah.

Warderi e meki taki sma e gi densrefi abra

10. Tapoe san a gi di wi e gi wisrefi abra na Jehovah moesoe abi en gron?

¹⁰ Jehovah, a Mekiman, warti ete foe wi gi wisrefi nanga wi heri sili na en (Maleaki 3:6; Mateus 22:37; Openbaring 4:11). Ma a gi di wi e gi wisrefi abra na Gado, no moesoe gron tapoe a bribi di wi e bribi sani esi-esi, wan firi di e pasa gowe esi-esi, noso foe di tra sma e dwengi wi — srefi a papa nanga mama foe wi. A moesoe abi en gron tapoe wan soifri sabi foe a waarheid foe Jehovah, nanga warderi gi den sani di Jehovah doe gi wi (Romesma 10:2; Kolosesma 1:9, 10; 1 Timoteus 2:4). Neleki fa Jehovah ben gi den Israèlsma na okasi, sondro foe dwengi den, foe taki dati den wani gi densrefi abra na en, na so a e gi wi wan okasi, sondro foe dwengi wi, foe gi wisrefi abra na en èn foe meki dati bekènti na poebliki. — 1 Petrus 3:21.

11. San a studeri di wi studeri bijbel tjari kon na krin gi wi ini a tori foe Jehovah?

¹¹ Nanga jepi foe wan studie foe bijbel, wi e kon sabi Gado leki wan sma. A Wortoe foe en e jepi wi foe kon si den eigifasi foe en soleki fa den mekisani e sori dati (Psalm 19:1-4). Foe a Wortoe foe en wi kan si taki a no de wan dangra Dri-wánfasi di sma no man froestan. A no e lasi feti, èn foe dati ede a no abi foe libi a de di a de Gado (Exodus 15:11; 1 Korentesma 8:5, 6; Openbaring 11:17, 18). Bikasi a meki den pramisi foe en kon troe, dan dati e memre wi na san a moi nen foe en, Jehovah, wani taki. En na a Gran Sma di abi wan prakseri (Genesis 2:4, foetoewortoe; Psalm 83:18; Jesaja 46:9-11). Te wi e studeri bijbel, dan wi e kon froestan krin o getrow Jehovah de èn omeni wi kan froetrow tapoe en. — Deuteronomium 7:9; Psalm 19:7, 9; 111:7.

12. (a) San e hari wi go na Jehovah? (b) Fa den troetroe ondrofenitori di ben skrifi ini bijbel e boeweigi wan sma foe wani foe dini Jehovah? (c) Fa joe e firi foe a dini foe Jehovah?

¹² A sani di spesroetoe e hari wi go na Jehovah, na den lobi-ati eigifasi foe en. Bijbel e sori o foeroe lobi a abi, o foeroe pardon a e gi èn o foeroe sari-ati a abi te a e handri nanga libisma. Prakseri foe a fasi fa a ben meki sani waka boen gi Job, baka di Job ben hori en soifri retifasi na wan getrow fasi. Na ondrofenitori foe Job e poti krakti na tapoe, taki „Jehovah safoe srefisrefi na ini firi foe lobi èn a abi sari-atifasi” (Jakobus 5:11; Job 42:12-17). Prakseri foe a fasi fa Jehovah ben handri nanga David di a ben doe soetadoe èn a ben kiri wan sma. Ija, Jehovah de klariklari foe gi pardon foe srefi serjoesoe sondoe, te a sondari e kon na en nanga „wan ati di broko èn di masi” (Psalm 51:3-11, 17). Prakseri foe a fasi fa Jehovah ben handri nanga Saulus foe Tarsus, di fosi ben de wan sma di ben abi a fasti bosroiti foe froefolgoe a pipel foe Gado. Den eksempre disi e poti krakti na tapoe a sari-ati foe Gado èn a wani di a wani na wan switifasi foe gebroiki sma di sori berow (1 Korentesma 15:9; 1 Timoteus 1:15, 16). Paulus ben firi taki nanga froetrow a ben kan gi en heri libi ini a dini foe a lobi-ati Gado disi (Romesma 14:8). Joe e firi a srefi fasi toe?

13. Sortoe bigi fasi foe sori lobi, na a sei foe Jehovah, e dwengi reti-atisma foe gi densrefi abra na en?

¹³ Jehovah ben froeloesoe den Israèlsma foe katibo na Egipti, èn a sreka wan sani gi wi foe froeloesoe wi foe katibo na sondoe nanga dede — a froeloesoe-ofrandi foe Jesus Krestes (Johanes 3:16). Paulus e taki: „Gado e rikomanderi en eigi lobi na wi na ini disi, taki Krestes dede gi wi, ala di wi ben de sondari ete” (Romesma 5:8). A sani disi di Jehovah sreka na wan lobifasi, e dwengi reti-atisma foe gi densrefi abra na Jehovah nanga jepi foe Jesus Krestes. „Bikasi a lobi di Krestes abi e dwengi wi, foe di disi na san wi kroetoe, taki wán man dede gi ala sma; so boen, ala sma ben dede; èn a dede gi ala sma, so taki den wan di e libi, no ben sa libi moro langa gi densrefi, ma gi en di dede gi den èn di ben kisi wan opobaka.” — 2 Korentesma 5:14, 15; Romesma 8:35-39.

14. A sabi wawan di wi abi foe den fasi fa Jehovah ben handri, nofo foe boeweigi wi foe gi wisrefi abra na en? Froeklari dati.

¹⁴ Tokoe, a sabi di wi abi foe den eigifasi foe Jehovah nanga foe a fasi fa a e handri nanga a libisma famiri, no nofo. Wan persoonlijk warderi gi Jehovah na wan sani di wi moesoe kweki. Fa wi kan doe dati? Foe di wi e fiti a Wortoe foe Gado na ini wi libi èn foe di wisrefi e ondrofeni langalanga taki den gronprakseri di wi feni na ini en Wortoe e wroko boen (Jesaja 48:17). Wi moesoe firi taki Jehovah froeloesoe wi foe a tokotoko foe na ogri grontapoe disi di de na ondro a tiri foe Satan. (Teki gersi 1 Korentesma 6:11.) Ini a feti foe wi foe doe san boen, wi e leri foe froetrow tapoe Jehovah, èn wisrefi e ondrofeni taki Jehovah na a Gado di de na libi, a „Jereman foe begi” (Psalm 62:8; 65:2). Heri-esi wi e firi taki wi de krosibei foe en, èn wi man foe froetrow wi moro dipi firi na en. A waran firi foe lobi gi Jehovah e gro na ini wi. Sondro tweifri, disi sa meki taki wi gi wi libi abra na en.

15. San ben boeweigi wan man, di fosi ben gi ensrefi abra na grontapoe wroko, foe dini Jehovah?

¹⁵ Foeroe sma kon sabi a lobi-ati Gado disi, Jehovah, èn den gi den libi abra foe dini en. Loekoe foe eksempre, wan elektraman di ben abi wan bisnis di ben waka boen. Sontron a ben bigin wroko mamanten èn a ben wroko heri dei te go miti neti, èn feifi joeroe a tra mamanten a ben e kon baka na oso. Baka te a ben rostoe wan joeroe, a ben gowe baka foe doe wan tra wroko. „Mi ben gi misrefi abra na mi wroko”, na so a e memre. Di en wefi ben bigin studeri bijbel, dan a ben bigin foe studeri toe. A e taki: „Ala den gado di mi ben kon sabi te na a ten dati, ben wakti nanga froewakti nomo foe sma dini den, ala di den e doe noti foe gi wi wini. Ma Jehovah fosi ben bigin doe wan sani, èn a ben seni en wan-enkri gebore Manpikin go na grontapoe, san ben de wan bigi persoonlijk ofrandi gi en” (1 Johanes 4:10, 19). Ini wan pisi ten foe tin moen, a man disi ben gi ensrefi abra na Jehovah. Baka dati, a ben poti ala en prakseri na tapoe a dini foe a Gado di de na libi. A ben bigin nanga a foeroeten diniwroko èn a ben froisi foe go dini pe a nowtoe ben moro bigi. Neleki den apostel, a ’ben libi ala sani èn a ben waka baka Jesus’ (Mateus 19:27). Baka toe moen, en nanga en wefi ben kisi a kari foe go dini na a bijkantoro foe a Watch Tower Bible and Tract Society ini a kondre pe den ben libi, so taki a ben kan jepi nanga elektra wroko. Moro leki 20 jari kaba, a e wroko na a bijkantoro èn a e doe a wroko di a lobi — no gi ensrefi, ma gi Jehovah.

Meki a gi di joe gi joesrefi abra na Jehovah, bekènti na poebliki

16. San na wan toe sani di wan sma moesoe doe efoe a wani gi ensrefi abra na Jehovah?

¹⁶ Baka te den jongoewan èn so srefi den owroewan e studeri bijbel wan pisi ten kaba, dan den sa kisi warderi gi Jehovah èn gi den sani di a doe gi den. Disi moesoe boeweigi den foe gi densrefi abra na Gado. Kande joe na wan foe den. Fa joe kan gi joesrefi abra na Jehovah? Baka te joe teki a soifri sabi foe bijbel na ini joe, dan joe moesoe handri akroederi a sabi dati èn joe moesoe sori bribi ini Jehovah nanga Jesus Krestes (Johanes 17:3). Abi berow èn drai joe baka gi ibri sondoe fasi fa joe ben libi fosi (Tori foe den Apostel 3:19). Baka dati, joe sa doro a momenti di joe moesoe gi joesrefi abra na Jehovah, èn dati joe moesoe taki ini begi na Jehovah na wan serjoesoe fasi. Sondro tweifri, a begi disi sa de wan sani di joe no sa frigiti noiti, bikasi a sa de a bigin foe wan njoen matifasi nanga Jehovah.

17. (a) Foe san ede den owroeman e loekoe den aksi di ben sreka na fesi, nanga den njoenwan di gi densrefi abra na Gado? (b) Sortoe prenspari sani wan sma moesoe doe heri-esi baka te a gi ensrefi abra na Jehovah, èn nanga sortoe marki?

¹⁷ Neleki fa Moses ben froeklari den kondisi na den Israèlsma foe den kan go ini wan froebontoe matifasi nanga Jehovah, na so owroeman ini den gemeente foe Jehovah Kotoigi e jepi den wan di no so langa pasa ben gi densrefi abra na Jehovah, so taki den kan ondrosoekoe soifri san de ini a tori. Den e gebroiki aksi di sreka na fesi, foe kon sabi seiker efoe ibri sma e froestan den gronleri foe bijbel krinkrin èn efoe den e froestan san a wani taki foe de wan Kotoigi foe Jehovah. Dan a e fiti srefisrefi taki baka dati, wan ceremonie moesoe feni presi, foe meki a gi di den gi densrefi abra na Jehovah, bekènti na poebliki. A no de foe taki, dati wan njoen sma di gi ensrefi abra na Jehovah, wani srefisrefi foe meki tra sma kon sabi taki a kon ini a matifasi disi nanga Jehovah, èn a matifasi disi na wan grani. (Teki gersi Jeremia 9:24.) Disi a e doe na wan joisti fasi foe di a e teki dopoe na ini watra, leki wan simbôl foe a gi di a gi ensrefi abra na Jehovah. A doekroen di a e doekroen na ini watra èn a opo di a e opo baka foe a watra, e simboliseer taki a e gowe libi a fasi di a ben libi fosi di a ben soekoe en eigi wini nomo, èn a opo foe libi wan njoen fasi foe libi foe doe a wani foe Gado. A no de wan sakramenti, so srefi a no de wan kerki-gwenti soleki a Shinto gwenti foe misogi, pe den e froewakti taki wan sma moesoe kon krin nanga watra.a Na presi foe dati, dopoe na a meki di wan sma e meki bekènti na poebliki taki a gi ensrefi abra na Jehovah, di a ben doe kaba na ini begi.

18. Foe san ede wi kan abi a froetrow taki a gi di wi gi wisrefi abra na Gado no sa de foe soso?

¹⁸ A serjoesoe okasi disi na wan ondrofeni di a njoen foetoeboi foe Jehovah no kan frigiti, èn a e memre en na a têgo matifasi di a abi now nanga Jehovah. Tra fasi leki a gi di a kamikaze piloot ben gi ensrefi abra na en kondre nanga en kèiser, a gi di wi gi wisrefi abra na Jehovah no sa de wan soso sani, bikasi en na a têgo almakti Gado di e doe ala sani di a abi na prakseri foe doe. En, èn en wawan warti foe wi gi wisrefi nanga wi heri sili na a dini foe en. — Jesaja 55:9-11.

19. Foe sortoe sani wi sa taki na ini na artikel di e kon now?

¹⁹ Ma moro de ini a gi di wan sma e gi ensrefi abra na Gado. Foe eksempre, fa a gi di wi e gi wisrefi abra na Gado abi krakti na tapoe wi aladei libi? Wi sa taki foe disi na ini a tra artikel di e kon now.

[Foetoewortoe]

Joe e memre ete?

◻ Foe san ede a gi di sma e gi densrefi abra na wan sani, soleki fa dati e feni presi na grontapoe, e meki sma sari foe di den froewakti foe den no ben kon troe?

◻ San ben boeweigi den Israèlsma foe gi densrefi abra na Jehovah?

◻ San e boeweigi wi na ini a ten disi foe gi wisrefi abra na Jehovah?

◻ Fa wi e gi wisrefi abra na Gado?

◻ San a dopoe na ini watra wani taki?

[Prenki na tapoe bladzijde 13]

Na Sinai, Israèl e gi ensrefi abra na Jehovah