Loweman foto — Wan sani di Gado seti nanga sari-ati
„Den siksi foto disi sa dini leki wan presi foe lowe go, so taki ibriwan kiriman di no kiri foe espresi, kan lowe go drape.” — NUMERI 35:15.
1. Fa Gado e si libi èn broedoe paiman?
JEHOVAH GADO e si libisma libi leki wan santa sani. Èn libi de na ini a broedoe (Lefitikus 17:11, 14). Foe dati ede, di Kain, a fosi libisma di ben gebore na grontapoe, ben kiri en brada Abel, a ben tjari broedoe paiman na en tapoe. Foe dati ede, Gado ben taigi Kain: „A broedoe foe joe brada e bari, e kari mi foe a gron.” A broedoe di ben doti a gron na a presi pe a kiri ben pasa, safrisafri ben gi kotoigi, ma tokoe sondro degedege, foe a libi di ben koti sjatoe sondro foe abi sari-atifasi. A broedoe foe Abel ben bari, e kari Gado foe A teki refensi. — Genesis 4:4-11.
2. Fa Jehovah ben poti krakti na tapoe a lespeki di a e lespeki a libi, baka a Froedoe?
2 Baka di a regtfardiki Noa nanga en osofamiri ben komoto na a ark leki sma di ben pasa a Froedoe na heri grontapoe libilibi, dan Gado ben poti krakti na tapoe a lespeki di A abi gi libisma libi. Na a ten dati, Jehovah ben gi libisma na okasi foe njan moro sani, soleki meti ma no foe njan broedoe. A ben gi wan wet toe: „A broedoe foe joe sili mi sa aksi baka. Mi sa aksi en baka foe na anoe foe ibri libi mekisani; èn foe na anoe foe a libisma, foe na anoe foe ibriwan sma di de en brada, mi sa aksi baka a sili foe wan libisma. Iniwan sma di e trowe broedoe foe wan libisma, wan tra sma sa trowe en broedoe, bika na ini a prenki foe en, Gado meki libisma” (Genesis 9:5, 6). Jehovah ben erken a reti foe a moro krosibei famiri foe a sma di dede sondro taki a abi fowtoe na dati, foe kiri a kiriman te a e miti nanga en. — Numeri 35:19.
3. Fa a Wet foe Moses ben poti krakti na tapoe a santa di libi santa?
3 Na ini a Wet di Gado ben gi Israèl nanga jepi foe a profeiti Moses, ala leisi baka, Gado ben poti krakti na tapoe a santa di libi santa. Foe eksempre, Gado ben gi a komando: „Joe no moesoe kiri sma” (Exodus 20:13). Lespeki gi a libi, ben de foe si toe na ini san a Wet foe Moses ben taki foe a dede di abi foe doe nanga wan oema di de nanga bere. A Wet ben taki krinkrin dati efoe na oema noso a pikin foe en di no ben gebore ete, ben kisi mankeri so taki a dede, foe di toe mansma ben feti nanga makandra, dan kroetoebakra ben sa moesoe loekoe a situwâsi èn loekoe efoe sani ben pasa foe espresi, ma a strafoe ben kan de „sili foe sili”, noso libi foe libi (Exodus 21:22-25). Ma tokoe, wan Israèlsma di ben kiri wan sma, ben kan lowe gi den bakapisi foe na ogri sani di a ben doe?
Presi foe lowe go gi kiriman?
4. Sortoe presi foe lowe go ben de na ini a ten di pasa, boiti Israèl?
4 Na tra nâsi boiti a nâsi Israèl, kiriman nanga tra ogrisma ben kisi na okasi foe lowe go na presi pe den ben kan kisi kibri. Disi ben de so na den presi soleki a tempel foe na oema-gado Artemis na Efeise foe owroeten. Foe wan toe tra srefi sortoe presi leki a dati, wan verslag e taki: „Son santa presi ben de presi di ben meki taki moro ogrisma e kon; èn foeroetron a ben kon de fanowdoe foe skotoe a nomroe foe den presi foe lowe go. Na Athene soso wan toe foe den presi disi nomo, a wet ben si leki presi pe sma ben kan lowe go (foe eksempre, a tempel foe Theseus gi srafoe); na a ten foe Tiberius den gemeente foe den ogrisma na ini den santa presi, ben kon de so kefarlek taki soso wan toe foto nomo ben kisi a reti foe abi presi pe sma ben kan lowe go (na ini a jari 22)” (The Jewish Encyclopedia, 1909, Pisi II, bladzijde 256). Baka dati, den kerki foe krestenhèit ben kon tron presi foe lowe go na ini, ma disi ben poeroe a makti foe lanti poti natapoe denpriester èn a ben wroko teige a joisti fasi foe doe san reti. Foe di sma ben meki fowtoe gebroiki foe den kerki presi foe lowe go na ini, dati meki, te foe kaba den ben tapoe den presi disi toe.
5. Sortoe boeweisi de taki a Wet no ben gi pasi taki wan sma di ben sori wan mi-no-ke-fasi, kan kisi pardon te wan sma dede?
5 Na mindri den Israèlsma, den kiriman di ben kiri foe espresi, no ben kisi na okasi foe lowe go na wan spesroetoe presi. Srefi wan Leifi priester di ben dini na a altari foe Gado, ben moesoe kisi dedestrafoe efoe a ben kiri wan sma na wan triki fasi (Exodus 21:12-14). Boiti dati, a Wet no ben gi pasi taki wan sma di ben sori wan mi-no-ke-fasi, kan kisi pardon te wan sma dede foe en ede. Foe eksempre, wan man ben moesoe meki wan pikin skotoe gi a plata daki foe a njoen oso foe en. Noso, a famiri na ini na oso ben sa kisi broedoe paiman efoe wan tra sma ben fadon foe a daki foe na oso èn dede (Deuteronomium 22:8). Moro fara, efoe wan sma ben abi wan boeroekaw di abi a gwenti foe naki sma nanga en toetoe èn sma ben warskow en foe dati ma a no ben loekoe a boeroekaw foe en so taki a boeroekaw kiri wan sma, dan a sma di ben abi a boeroekaw ben abi broedoe paiman èn a ben kan kisi dedestrafoe (Exodus 21:28-32). Te wan sma ben sa kiri wan foefoeroeman, dan a ben sa abi broedoe paiman efoe a ben kiri en na deiten te a ben kan si a foefoeroeman krinkrin èn ben kan sabi soema na a foefoeroeman, èn disi e gi moro boeweisi taki Gado e si libi leki wan diri sani (Exodus 22:2, 3). A de krin, taki den markitiki foe Gado di de na ini volmaakti balansi, no ben gi pasi foe wan sma kiri wan trawan foe di a wani kiri en èn tokoe no kisi dedestrafoe.
6. Fa a wet foe ’libi foe libi’ ben fiti na ini fositen Israèl?
6 Efoe wan sma ben kiri wan tra sma na Israèl foe owroeten, dan refensi ben moesoe teki gi a broedoe foe a sma di dede. A wet foe ’libi foe libi’ ben fiti boen te „a sma di e teki refensi gi broedoe”, ben kiri a kiriman toe (Numeri 35:19). A sma di e teki refensi, ben de wan man-nengre foe a moro krosibei famiri foe a sma di den ben kiri. Ma fa a de nanga den kiriman di no ben kiri foe espresi?
Wan sani di Jehovah seti nanga sari-ati
7. Sortoe sani Gado ben seti gi den kiriman di no ben kiri foe espresi?
7 Gi den kiriman di no ben kiri foe espresi, na wan lobi fasi Gado ben seti den loweman foto. Na ini a tori disi, Moses ben kisi foe jere: „Taki nanga den manpikin foe Israèl, èn joe moesoe taigi den: ’Oenoe e koti a Jordan abra foe go na a kondre Kanan. Èn oenoe moesoe teki foto di fiti gi oenoe. Leki loweman foto den sa dini gi oenoe, èn drape a kiriman di no ben kiri foe espresi, moesoe lowe go. Èn den foto disi moesoe dini gi oenoe leki wan presi foe lowe go na ini teige a sma di e teki refensi gi broedoe, so taki a kiriman no dede bifo a e tanapoe fesi a konmakandra di moesoe kroetoe en. Èn den foto di oenoe sa gi, den siksi loweman foto, sa de foe oenoe gebroiki den. Dri foto oenoe sa gi na disi sei foe a Jordan, èn dri foto oenoe sa gi na a kondre Kanan. Leki loweman foto den sa dini . . . so taki ibriwan kiriman di no ben kiri foe espresi, kan lowe go drape.’” — Numeri 35:9-15.
8. Pe den loweman foto ben de, èn fa den kiriman di no ben kiri foe espresi, ben kisi jepi foe doro den foto dati?
8 Di den Israèlsma ben go na a Pramisi Kondre, den ben gi jesi èn den ben seti siksi loweman foto. Dri foe den foto disi — Kedes, Sikem, nanga Hebron — ben de na a westsei foe a Jordan Liba. Na a owstoesei foe a Jordan Liba, ben de den loweman foto soleki Golan, Ramot, nanga Bezer. Den siksi loweman foto ben de makriki foe feni tapoe pasi di ben de boenboen pasi. Pe a ben fiti, dan na wan toe presi tapoe den pasi, wan toe marki ben de pe a wortoe „lowe” ben skrifi na tapoe. Den marki disi ben sori sma pe a loweman foto ben de, èn a kiriman di no ben kiri foe espresi, ben lon gi en libi go na a moro krosibei loweman foto. Drape a ben kan feni kibri foe a sma di e teki refensi gi broedoe. — Josua 20:2-9.
9. Foe san ede Jehovah ben seti den loweman foto, èn soema ben kan kisi wini foe den foto disi?
9 Foe san ede Gado ben seti loweman foto? Gado ben seti den foto disi so taki a kondre no ben sa kon doti nanga broedoe foe sma di no abi fowtoe, so taki broedoe paiman no ben sa kon tapoe a pipel (Deuteronomium 19:10). Soema ben kan kisi wini foe den loweman foto? A Wet ben taki: „Gi den manpikin foe Israèl èn gi den freimde sma di e tan drape èn gi den sma di ben kon foe tan na den mindri, den siksi foto disi sa dini leki wan presi foe lowe go, so taki ibriwan kiriman di no ben kiri foe espresi, kan lowe go drape” (Numeri 35:15). So boen, foe de sondro foe teki sma partij èn foe abi a marki foe dini regtfardikifasi ala di Jehovah e sori sari-atifasi, A ben taigi den Israèlsma foe poti loweman foto na wan sei gi den kiriman di no ben kiri foe espresi. Den sma disi ben de (1) Israèlsma, (2) freimde sma na Israèl, noso (3) sma foe tra kondre di ben kon foe tan na a kondre.
10. Foe san ede wi kan taki dati den loweman foto ben de wan sani di Gado ben seti nanga sari-ati?
10 A de warti foe si toe taki srefi efoe wan sma ben de wan kiriman di no ben kiri foe espresi, a ben moesoe kisi dedestrafoe na ondro a wet foe Gado: „Iniwan sma di e trowe broedoe foe wan libisma, wan tra libisma sa trowe en broedoe baka.” Foe dati ede, a ben de soso foe wan sani di Jehovah seti nanga sari-ati, meki wan kiriman di no ben kiri foe espresi, ben kan lowe go na wán foe den loweman foto. Soleki fa a sori, dan a pipel moro foeroe ben firi gi ibriwan sma di ben lowe gi a sma di e teki refensi gi broedoe, foe di a heri pipel ben froestan taki densrefi ben kan doe wan srefi sortoe sani sondro foe den wani dati èn dan den ben sa abi wan presi foe lowe go èn den ben sa abi sari-atifasi fanowdoe.
Lowe foe kisi kibri
11. Na Israèl foe owroeten, san wan sma ben kan doe efoe a ben kiri wan kompe wrokoman sondro taki a ben abi fowtoe na dati?
11 Wan agersitori kan jepi joe foe meki joe warderi gro gi a sani di Gado seti nanga sari-ati foe sma ben kan lowe. Prakseri taki joe ben de wan sma di ben koti oedoe na Israèl foe owroeten. Kon meki wi taki dati na ede foe na aksi ben frei komoto èn a ben naki wan kompe wrokoman kiri. San joe ben o doe? We, a Wet ben seti sani gi a situwâsi disi. Sondro tweifri, joe ben o meki gebroiki foe a sani disi di Gado seti: „Na so a de nanga a kiriman di kan lowe go [na wan loweman foto] èn di moesoe tan na libi: Te a e naki en kompe sondro taki a sabi dati èn a no ben de wan sma di no ben wani si en na ai bifo dati; noso te a e go na boesi nanga en kompe foe koti oedoe, èn a poti en anoe na loktoe foe kapoe a bon nanga en aksi, èn na isri loesoe foe na oedoe foe na aksi, èn a naki en kompe so taki a dede, dan ensrefi moesoe lowe go na wán foe den foto disi èn a moesoe tan na libi” (Deuteronomium 19:4, 5). Tokoe, srefi efoe joe ben doro wan loweman foto, dan joe no ben sa de fri foe ala frantiwortoe di joe abi foe den sani di ben pasa.
12. Fa sani ben waka te wan kiriman di no ben kiri foe espresi, ben doro wan loweman foto?
12 Ala di den sma drape ben lobi foe teki joe na a foto foe den, tokoe joe ben sa moesoe froeteri den owroeman di ben de na a doro foe a loweman foto, san ben pasa. Baka te joe kon na a foto, den ben sa seni joe go baka foe kisi kroetoe foe den owroeman di e teki presi gi a gemeente foe Israèl di de na den doro foe a foto èn di abi a frantiwortoe foe kroetoe sani na ini a kontren pe joe ben kiri a sma. Drape joe ben sa abi na okasi foe sori taki joe no abi fowtoe.
Te den kiriman ben kisi kroetoe
13, 14. San na wan toe sani di den owroeman ben sa wani sabi srefisrefi, te den ben kroetoe wan kiriman?
13 Na ini a pisi ten te joe e kisi kroetoe foe den owroeman na a doro foe a foto di abi a frantiwortoe foe kroetoe sani na ini a kontren, sondro tweifri joe ben sa de nanga tangi foe si taki den ben poti foeroe krakti tapoe a fasi fa joe ben tjari joesrefi fosi. Den owroeman ben sa loekoe finifini fa joe matifasi ben de nanga a sma di joe kiri. Joe no ben wani si a man na ai, joe ben go kibri foe wakti en, èn ben naki en kiri foe espresi? Efoe dati de so, dan den owroeman ben sa moesoe gi joe na a sma di e teki refensi gi broedoe, èn joe ben sa dede. Den frantiwortoe man disi ben sa froestan boen san a Wet e aksi, taki ’oenoe moesoe poeroe a fowtoe foe a broedoe foe wan sma di no abi fowtoe, komoto na Israèl’ (Deuteronomium 19:11-13). Na a srefi fasi, na ini wan kroetoe afersi na ini a ten disi, kresten owroeman moesoe sabi boen san den Boekoe foe bijbel e taki, èn den moesoe handri akroederi dati, ala di den e hori na prakseri fa wan sma di meki wan fowtoe, ben si sani èn fa a ben tjari ensrefi fosi.
14 Ala di den owroeman foe a foto ben e ondrosoekoe sani na wan switi fasi, tokoe den ben sa wani foe sabi efoe joe ben kiri a sma na wan kibri fasi (Exodus 21:12, 13). Joe ben opo foe go feti nanga en foe wan kibri presi? (Deuteronomium 27:24) A ben de so, taki joe ben ati-bron srefisrefi tapoe a sma, taki joe ben seti sani so foe meki wan triki plan foe kiri en? Efoe dati de so, dan joe ben sa moesoe kisi dedestrafoe (Exodus 21:14). Spesroetoe den owroeman ben sa wani foe sabi efoe joe nanga a sma di joe kiri, ben de na ini feantifasi, noso no ben wani si makandra na ai (Deuteronomium 19:4, 6, 7; Josua 20:5). Kon meki wi taki dati den owroeman ben feni taki joe no abi fowtoe èn ben meki joe drai go baka na a loweman foto. Fa joe ben sa de nanga tangi gi a sari-atifasi di den sori joe!
Libi na a loweman foto
15. Sortoe sani wan kiriman di no ben kiri foe espresi, ben moesoe doe?
15 Wan kiriman di no ben kiri foe espresi, ben moesoe tan na a loweman foto noso tan na ini wan kontren foe no moro leki 1000 el (so wan 440 meter) dorosei foe den skotoe foe a foto (Numeri 35:2-4). Efoe a ben koiri go moro fara leki dati, dan a ben kan miti a sma di e teki refensi gi broedoe. Na ini so wan situwâsi, a sma di e teki refensi, ben kan kiri a kiriman sondro taki a sa kisi strafoe. Ma tra sma no ben sa keti a kiriman now noso ben sa poti en na ini doengroe-oso. Leki wan sma di e tan na ini a loweman foto, a ben moesoe leri fa foe doe wan wroko, a ben moesoe de wan wrokoman, èn a ben moesoe de wan sma di den kan gebroiki na ini a libimakandra drape.
16. (a) O langa a kiriman di no ben kiri foe espresi, ben sa moesoe tan na a loweman foto? (b) Foe san ede wan kiriman ben kan komoto foe a loweman foto te a hei-priester dede?
16 O langa a kiriman di no ben kiri foe espresi, ben sa moesoe tan na a loweman foto? Kande en heri libi langa. Awinsi fa a no fa, a Wet ben taki: „Teleki a hei-priester dede, a moesoe tan na a loweman foto foe en, èn baka a dede foe a hei-priester, a kiriman kan drai go baka na en eigi kondre” (Numeri 35:26-28). Foe san ede a kiriman di no ben kiri foe espresi, ben kisi na okasi foe libi a loweman foto te a hei-priester dede? We, a hei-priester ben de wan foe den moro prenspari sma na ini a nâsi. Foe dati ede, te a hei-priester ben dede, dan dati ben sa de wan sani di ala den lo na Israèl ben sa kon sabi. Ala den sma di lowe go na den loweman foto, ben kan drai go baka na den oso foe den sondro taki den abi foe frede foe miti nanga den sma di e teki refensi gi broedoe. Foe san ede? Bikasi a Wet foe Gado ben taki dati te a hei-priester dede, a sma di e teki refensi no ben sa man kiri a kiriman moro di no ben kiri foe espresi, èn ala sma ben sabi dati. Efoe a man di ben de a moro krosibei famiri ben sa teki refensi baka dati, dan a ben sa de wan kiriman èn te foe kaba a ben sa moesoe kisi dedestrafoe.
Bakapisi di e tan
17. San ben kan de den bakapisi foe a skotoe di a kiriman di no ben kiri foe espresi, ben skotoe?
17 San ben kan de den bakapisi foe a skotoe di den ben skotoe a kiriman di no ben kiri foe espresi? Den ben memre en taki a ben meki wan sma dede. Soleki fa a sori, dan baka dati a ben sa si libisma libi leki wan santa sani ala ten. Boiti dati, a no ben kan frigiti kwetikweti fa den ben handri nanga en na wan sari-atifasi. Foe di sma ben sori en sari-atifasi, dati meki en ben sa wani sori trawan sari-atifasi toe. A seti di den loweman foto ben seti nanga den skotoe foe den, ben de wan boen sani gi a pipel moro foeroe. Fa so? Seiker a ben moesoe naki na ati foe den, foe si taki den no moesoe abi wan mi-no-ke-fasi gi a libi foe wan libisma. Foe dati ede, a moesoe memre kresten taki den moesoe wai pasi gi wan mi-no-ke-fasi di ben kan meki taki trawan kan kisi mankeri èn dede. Moro fara, so srefi wi moesoe wani sori sari-atifasi te a fiti, te wi e prakseri foe den loweman foto di Gado seti nanga sari-ati. — Jakobus 2:13.
18. Tapoe sortoe fasi a seti di Gado ben seti loweman foto, ben tjari winimarki?
18 A seti di Jehovah Gado ben seti loweman foto, ben tjari winimarki toe, tapoe tra fasi. A pipel no ben opo komte foe sma lon go na baka wan kiriman, foe di den e denki taki a abi fowtoe bifo a kisi kroetoe. Na presi foe dati, a pipel ben si en leki wan sma di no ben kiri wan tra sma foe espresi, èn a pipel ben jepi en foe kisi kibri srefi. Moro fara, a seti gi loweman foto ben de wan heri tra sani leki den sani di seti nojaso foe poti kiriman na ini doengroe-oso, pe den e gebroiki moni foe a pipel foe jepi den kiriman disi èn foeroetron srefi, den kiriman disi e tron moro ogrisma foe di den abi krosibei demakandra nanga tra ogrisma. Na ini den sani di ben seti gi loweman foto, a no ben de fanowdoe foe bow skotoe, sorgoe den, èn meki wan sma hori ai na tapoe den diri skotoe nanga den doengroe-oso di meki nanga isri fensre, pe strafoeman e soekoe foe lowe gowe foeroetron. Te joe loekoe en boen, dan a kiriman ben soekoe a „doengroe-oso” èn a ben tan drape a heri pisiten di a ben moesoe tan drape. A ben moesoe de wan wrokoman toe, èn na so fasi a ben de wan wini gi kompe libisma.
19. Sortoe aksi e opo ede kon na ini a tori foe den loweman foto?
19 Foe troe, den loweman foto di Jehovah ben seti na Israèl foe kibri den kiriman di no ben kiri foe espresi, ben sori Jehovah en sari-atifasi. Seiker, a sani disi di seti, ben meki sma kisi moro lespeki gi a libi. Ma tokoe, den loweman foto foe owroeten wani taki wan sani gi sma di e libi na ini a di foe twenti jarihondro? A kan, taki wi abi broedoe paiman na fesi foe Jehovah Gado èn tokoe wi no sabi taki wi abi en sari-atifasi fanowdoe? Den loweman foto foe Israèl wani taki wan spesroetoe sani gi wi na ini a ten disi?
Fa joe ben sa piki?
◻ Fa Jehovah e si libisma libi?
◻ Sortoe sani Gado ben seti nanga sari-ati gi den kiriman di no ben kiri foe espresi?
◻ Fa wan kiriman ben kan kon na wan loweman foto, èn o langa a ben moesoe tan drape?
◻ San ben kan de den bakapisi foe a skotoe di ben skotoe a kiriman di no ben kiri foe espresi?
[Karta na tapoe bladzijde 22]
Den loweman foto na Israèl ben de tapoe pasi di den ben kan doro makriki
(Efoe joe wani si pe den sani disi skrifi, loekoe a tijdschrift)
KEDES Jordan Liba GOLAN
SIKEM RAMOT
HEBRON BEZER