Sreka Yu Eigi Tijdschrift Pristeri
1 Wi e warderi den Waktitoren nanga Ontwaakt! tijdschrift, fu di den abi artikel di e kon na a yoisti ten èn di e gi wi bodoi di e taki fu ala sani, fu sani di abi fu du nanga grontapu afersi èn „den dipi sani fu Gado” (1 Kor. 2:10). Wi alamala e memre den furu nyun sani èn sani di e bow wi, di wi leisi na ini den tijdschrift disi di Yehovah e gebroiki fu tyari a waarheid safrisafri kon na krin (Odo 4:18). Wi wani de fayafaya fu prati den so fara leki a man.
2 Ondrosuku Yu Gebied: Sortu sma e libi na ini yu gebied? Efu ala ten den abi furu fu du ini a libi, dan kande a de fanowdu taki yu e sreka wan pristeri di syatu èn di no langabere. Efu yu abi gebied pe den sma no abi so furu fu du ini a libi, dan kande yu kan taki moro sani ini yu pristeri. Efu moro furu fu den ososma e wroko na deiten, dan kande yu kan abi moro bun bakapisi te yu e fisiti den lati na bakadina noso na mofoneti. Kande yu ben kan miti wan tu fu den na deiten te yu e gi kotoigi na strati noso te yu e wroko wenkri fu wenkri. Wan tu preikiman abi bun bakapisi te den e go miti sma na wan informeel fasi na parkeer presi èn na ini den park.
3 Kon Sabi den Tijdschrift Yusrefi: Leisi ibri uitgave wantewante te yu kisi en. Suku den artikel di yu e prakseri taki kande den sa hari den sma na ini yu gebied. Nanga sortu tori den e broko den ede? Suku wan spesrutu penti di yu kan kari fu na artikel di yu wani pristeri. Prakseri fu wan aksi di yu kan poti fu wiki a belangstelling fu sma. Teki wan tekst di e fiti fu leisi gi na ososma efu yu e kisi na okasi gi dati. Prakseri fa yu ben kan poti wan fondamenti gi wan gobaka.
4 Sreka den Bigin Wortu fu Yu: Prakseri bun na fesi sortu wortu yu wani gebroiki fu bigin taki suma na yu, èn fu bigin nanga wan takimakandra. Wan tu sma abi bun bakapisi fu di den bigin na a fasi disi: „Mi leisi wan kefalek moi artikel na ini a tijdschrift disi, èn mi wani prati en nanga tra sma.” Furu sma e bigin nanga wan aksi di e poti prakseri na tapu a penti di den wani taki fu en. Fu eksempre:
5 Te yu e poti krakti na tapu wan artikel di e taki fu a de di ogridu de na ala sei, yu ben kan aksi:
◼ „San musu pasa so taki wi kan sribi te neti sondro fu frede taki wan sma sa kon fufuru wi noso sa du wi ogri?” Fruklari taki yu abi bodoi di e taki fu wan lusu gi a problema disi. Heri esi a lusu disi sa puru ibri tra sortu bruya tu na sociaal sei. Sori go na wan sani na ini a tijdschrift di e gi so wan howpu. Te yu e go baka, dan yu kan poti a prakseri fu na ososma na tapu kapitel 1 fu a Sabi-buku.
6 Te yu e pristeri wan artikel di e taki fu na osofamiri libi, yu ben sa kan taki disi:
◼ „Furu papa nanga mama e feni taki a de wan trutru tyalensi fu kweki wan osofamiri na ini den dei disi. Furu buku skrifi fu a tori disi, ma srefi den sabiman no e agri nanga makandra. ¿Wan sma de di kan gi wi tiri di wi kan frutrow?” Taki fu spesrutu sani fu a tijdschrift nanga a sma, di e sori a koni rai di de fu feni na ini Bijbel. Te yu e meki a gobaka, taki fu a fasi fa den Buku fu Bijbel e prakseri fu a kweki fu pikin, di a Sabi-buku, bladzijde 145-148 e sori.
7 Te yu o poti prakseri tapu wan artikel di e taki fu wan problema na sociaal sei, yu ben kan taki:
◼ „Furu sma e firi taki den de ondro druk bika fu a muilek ten pe wi e libi na ini. ¿Yu e denki taki a ben de a wani fu Gado taki wi musu libi na a fasi disi?” Sori go na wan artikel di e sori fa fu kakafutu gi den problema fu a ten disi noso di e sori wi fu san ede wi kan fruwakti taki wan tamara sa de pe broko-ede no sa de moro. Na a tra fisiti fu yu, taki fu a prenki nanga na ondro-edeprakseri tapu bladzijde 4 nanga 5 fu a Sabi-buku, èn baka dati, bigin wantewante nanga wan oso-bijbelstudie.
8 Fiti Yu Pristeri na a Ososma: Yu sa miti sma di abi belangstelling gi difrenti sani èn di abi difrenti background. Sreka wan pristeri di yu kan fiti na ibri ososma. Sreka yusrefi na so fasi taki yu kan fiti san yu wani taki na wan mansma, wan umasma, wan bigisma, noso wan yongusma. No wan fasti lin de di e sori san yu musu taki. Gebroiki san bun gi yu èn di abi bun bakapisi. Ma de fayafaya, taki sani di komoto na yu ati, èn de wan sma di e arki bun. Den sma di abi a „yoisti yeye” sa si na opregtifasi fu yu èn den sa handri bun na tapu dati.—Tori. 13:48.
9 Yepi Makandra: Te wi e prati idea nanga makandra, dan wi e leri nyun fasi fu taki. Te wi e oefen den pristeri fu wi nanga makandra, dan dati e gi wi ondrofeni nanga frutrow (Odo 27:17). Efu yu e oefen san yu wani taki, yu sa firi moro bun te yu de na a doro fu wan sma. A de prenspari taki papa nanga mama e gebroiki ten fu yepi den pikin fu den fu sreka densrefi, fu arki te den e oefen a pristeri fu den, èn fu gi rai fa den kan du en moro bun. Den nyunwan kan abi winimarki te den e wroko nanga preikiman di abi moro ondrofeni.
10 A no abi fu de muilek fu sreka yu eigi tijdschrift pristeri. A de nomo fanowdu fu abi wan spesrutu sani na prakseri di yu wani taki èn dan fu taki en na wan fasi di e hari sma prakseri. Te yusrefi e bigin du wan sani èn e prakseri fu en na fesi, dan yu kan meki wan bun pristeri èn tra sma sa piki bun na tapu dati.
11 A prati di wi e prati tijdschrift na wan fu den moro prenspari fasi fa wi e prati a Kownukondre boskopu na heri grontapu. Efu yu kan poti A Waktitoren nanga Ontwaakt! na ini den anu fu opregti sma, dan den tijdschrift kan taki gi densrefi. Prakseri ala ten fu a waarde fu den èn fa a boskopu fu den kan kibri libi. A fasi disi „fu du bun èn fu prati sani nanga trawan” na a sani di e plisi Yehovah srefisrefi.—Hebr. 13:16.