Jehovah e tiri nanga sari-ati

NA INI a heri historia, foeroe libisma tiriman gebroiki den makti nanga tranga sondro foe abi firi gi a pina foe den borgoe foe den. Ma Jehovah ben sori taki a kan pasa wan heri tra fasi foe di a ben froekisi wan nâsi — Israèl — èn ben tiri a nâsi dati na wan sari-ati fasi.

Di den Israèlsma ben de srafoe ete na ini owroeten Egipti, Jehovah ben jere fa den ben e begi foe kisi jepi. „Na ini ala den benawtoe foe den, a ben benawtoe en toe. . . . Na ini en lobi nanga en sari-ati ensrefi bai den baka” (Jesaja 63:9). Jehovah ben froeloesoe Israèl, ben gi den njanjan nanga jepi foe wan wondroe èn ben tjari den go na ini wan kondre gi densrefi.

A sari-ati fasi foe Jehovah ben de foe si toe na ini den wet di a ben gi a nâsi disi. A ben gi den Israèlsma a komando foe handri na wan sari-ati fasi nanga pikin sondro papa nanga mama, weduwe, nanga freimdesma di ben libi na den mindri. Den no ben moesoe mesbroiki den malengriwan na wan oneerlijk fasi.

A Wet ben aksi taki sma ben moesoe abi sari-ati gi den wan di ben de na nowtoe. Den pôtisma ben kan go piki njanjan baka a kotiwroko. Paiman no ben teri moro na a Sabadei (a di foe seibi) jari. Ala gron di ben go abra foe papa na tapoe pikin, ma di ben seri, sma ben moesoe gi baka na ini a Bigi Prisiri (a di foe 50) jari. Ancient Israel—Its Life and Institutions e froeteri: „Na Israèl, joe no ben abi wan troetroe difrenti na mindri groepoe ini a libimakandra, soleki fa dati de na ini a ten disi.” „Bigin bigin foe a seti dati, ala den Israèlsma ben abi a srefi fasi foe libi na ekonomia sei na a wán noso tra fasi.” — Lefitikus 25:10; Deuteronomium 15:12-14; 24:17-22; 27:18.

Waka baka na eksempre di Jehovah e gi ini a tori foe sari-ati

A sari-ati foe Gado e gi den foetoeboi foe en krakti. Foe eksempre, na ini a heri historia, wan toe njoen kownoe kiri den memre foe a kownoe famiri di ben de na den fesi, èn di ben tan na libi. Ma Jehovah en foetoeboi David no ben doe disi. Baka a dede foe kownoe Saul, David ben gi kibri na Mefibosèt, di ben de Saul en granpikin nanga erfgenaam di ben tan na libi. „A kownoe ben sari Mefibosèt, a manpikin foe Saul.” — 2 Samuèl 21:7.

No wan tra libisma waka baka na eksempre di Jehovah gi ini a tori foe sari-ati leki fa Jesus ben doe dati. Foeroe foe den wondroe foe en a ben doe foe di a ben abi a sari-ati foe Gado. Na wán okasi wan gwasiman ben begi en tangitangi: „Efoe joe wani nomo, joe kan meki mi kon krin.” Jesus ben sari a man, a ben fasi en èn a ben taki: „Mi wani. Kon krin” (Markus 1:40-42). Wan tra leisi, bigi ipi sma ben waka na Jesus baka. Na mindri foe a broeja di ben de, Jesus ben poti prakseri na tapoe toe breniman di ben bari: „’Masra, sari foe wi, Manpikin foe David’ . . . Jesus, di ben sari nanga den, ben fasi den ai, èn wantronwantron den ben man si baka.” — Mateus 20:29-34.

Den ipi-ipi sma no ben kowroe den firi di Jesus ben abi gi tra sma. Foe di den no ben njan wan pisi ten kaba, meki a ben taki wan leisi: „Mi e sari den ipi-ipi sma.” Dati meki a ben gi den njanjan nanga jepi foe wan wondroe (Markus 8:1-8). Te Jesus ben e teki waka, dan a no ben gi leri nomo na den ipi-ipi sma, ma a ben poti prakseri toe na tapoe san den ben abi fanowdoe (Mateus 9:35, 36). Baka so wan waka, Jesus nanga den disipel foe en no ben abi no wan fri ten srefi foe njan wan njanjan. Bijbeltori e froeteri wi: „Dati meki den ben gowe na ini boto foe go na wan tiri presi foe de den wawan. Ma sma ben si den e gowe èn foeroe sma ben kon sabi dati, èn foe ala den foto den ben lon nanga foetoe go drape makandra èn den ben doro drape fosi den. We, di a ben komoto, a ben si wan bigi ipi, ma a ben kisi sari nanga den, bika den ben de leki skapoe sondro wan skapoeman. Èn a ben bigin leri den foeroe sani.” — Markus 6:31-34.

San ben boeweigi Jesus no ben de soso den siki nanga a pôtifasi foe a pipel, ma a fasi fa den ben de na jejefasi. Den fesiman foe den ben mesbroiki den gi den eigi wini, so taki Jesus „ben kisi sari nanga den”. A Griki wortoe gi „ben kisi sari nanga den” wani taki „foe firi fa na inibere e angri foe sani”. Foe troe Jesus ben de wan man di ben abi sari-atifasi!

Sari-ati na ini wan ogri-ati grontapoe

Now Jesus Krestes na a Kownoe foe Jehovah en hemel Kownoekondre. Soleki fa Gado ben doe nanga Israèl foe owroeten, na so a e tiri en pipel nanga sari-ati na ini a ten disi. „’Èn seiker den sa kon de foe mi’, Jehovah foe den legre taki, ’na a dei di mi e meki wan spesroetoe goedoe. Èn mi sa abi sari-ati nanga den.’” — Maleaki 3:17.

Den sma di wani kisi a sari-ati foe Jehovah, moesoe doe san en e doe. A troe taki wi e libi na ini wan grontapoe pe sma abi moro belangstelling foe hori densrefi na a fasi fa den e libi na presi foe jepi sma di de na nowtoe. Sma di abi makti e soekoe wini nofotron, ala di den e tjari wrokoman nanga sma di e bai èn e gebroiki sani foe den kon na ini kefar. Bijbel e taki soifri na ini 2 Timoteus 3:1-4, taki a situwâsi na moreel sei na ini a ten foe wi kiri a sari-ati na ini na ati foe someni sma.

Tokoe wi kan feni okasi kande foe abi sari-ati nanga sma. Wi ben kan gi jepi na den birtisma foe wi te dati de fanowdoe? Wan sma siki di wi ben sa kan go loekoe? Wi ben kan gi deki-ati na den wan di lasi-ati, akroederi a rai: „Gi trowstoe na den sili di broko-saka, jepi den swakiwan”? — 1 Tesalonikasma 5:14.

Sari-ati sa jepi wi so srefi foe no handri na wan grofoe fasi te trawan meki fowtoe. Bijbel e taigi wi: „Poeroe ala takroe bita-atifasi nanga atibron nanga babari nanga skempi taki na oen mindri, makandra nanga ala takroedoe. Ma tron sma di abi switifasi gi makandra, di abi safoe sari-atifasi, èn di e gi makandra pardon na wan fri fasi, neleki fa Gado ben gi oenoe pardon na wan fri fasi nanga jepi foe Krestes.” — Efeisesma 4:31, 32.

Sari-ati sa jepi wi foe no wani gebroiki makti na wan fasi di no boen. Bijbel e taki: „Weri gi oensrefi den safoe firi foe lobi foe sari-ati, boen-atifasi, sakafasi foe jeje, safri-atifasi nanga langa pasensi” (Kolosesma 3:12). Sakafasi foe jeje e meki taki wi kan poti wisrefi na ini a presi foe den wan di de na ondro wi. Foe de nanga sari-ati wani taki foe de nanga sakafasi èn foe de reidelek na presi foe de wan sma di trawan no man plisi makriki. Taki sani moesoe doe boen, no moesoe de wan reide foe handri sma leki den na pisi foe wan masjin nomo. Na ini na osofamiri so srefi, masra di de nanga sari-ati moesoe hori na prakseri taki den wefi foe den na swaki prapi (1 Petrus 3:7). Te wi e prakseri foe na eksempre di Jesus ben gi ini a tori foe sari-ati, dan dati kan jepi wi nanga ala den sani disi.

Foe di Jesus ben abi so dipi firi gi sma di a ben doe en diniwroko na grontapoe, meki wi kan de seiker taki now a de wan Tiriman di abi sari-ati èn a sa tan de dati toe. Psalm 72 e taki na ini wan profeititori foe en: „Meki a den sma foe a pipel di e kisi kwinsi, meki a froeloesoe den manpikin foe a pôtiwan, èn meki a masi a bedrigiman. Èn a sa abi sma di de na en ondro, foe se te go miti se Èn foe a Liba te na den oekoe foe grontapoe. A sa firi sari gi den mofinawan èn gi a pôtiwan, Èn a sa froeloesoe den sili foe den pôtiwan.” — Psalm 72:4, 8, 13.

Gado Wortoe e froeteri na fesi: „Nanga regtfardikifasi a moesoe kroetoe den mofinawan, èn nanga opregtifasi a moesoe gi piri-ai foe den safri-atiwan foe grontapoe ede. . . . A sa kiri a godelowsoewan.” Baka di a profeititori froeteri fa srefi son ogri-ati sma di gersi meti sa kenki a fasi foe den, a e go doro: „Sma no sa doe no wan sortoe ogri èn no sa pori na wan sani na tapoe heri mi santa bergi; bika grontapoe seiker sa kon foeroe nanga a sabi foe Jehovah, soleki fa watra e tapoe se” (Jesaja 11:4-9). Te joe e loekoe en boen, dan a profeititori disi e pramisi taki na heri grontapoe wan libimakandra foe sma sa de di sabi Jehovah èn di e waka baka na eksempre di a e gi ini a tori foe sari-atifasi!