Lès 13

Fa joe kan feni a troe relisi?

Na ala relisi e plisi Gado, noso soso wán nomo? (1)

Foe san ede someni relisi de di e taki dati den na kresten? (2)

Fa joe kan kon sabi troe kresten? (3-7)

1. Jesus ben bigin nanga wán troe kresten relisi. So boen, na ini a ten disi soso wán groepoe nomo foe troe anbegiman foe Jehovah Gado moesoe de (Johanes 4:23, 24; Efeisesma 4:4, 5). Bijbel e leri taki wan toe sma nomo de na tapoe a smara pasi di e go na libi. — Mateus 7:13, 14.

2. Bijbel ben taki na fesi taki baka a dede foe den apostel, fowtoe leri nanga doe di no fiti kresten, ben sa kon safrisafri na ini a kresten gemeente. Sma ben sa hari bribiman gowe foe waka na den baka, na presi foe waka na baka Krestes (Mateus 7:15, 21-23; Tori foe den Apostel 20:29, 30). Dati meki wi e si someni difrenti relisi di e taki dati den na kresten. Fa wi kan kon sabi troe kresten?

3. A moro aparti marki foe troe kresten de, taki den abi troetroe lobi na den mindri (Johanes 13:34, 35). Den no e kisi leri foe denki taki den moro boen leki sma foe tra ras noso skin kloroe. Den no e kisi leri toe foe no wani si sma foe tra kondre na ai (Tori foe den Apostel 10:34, 35). So boen, den no e teki prati na ini feti. Troe kresten e handri nanga makandra leki brada nanga sisa. — 1 Johanes 4:20, 21.

4. Wan tra marki foe troe relisi de, taki den memre foe en abi wan dipi lespeki gi bijbel. Den e teki bijbel leki a Wortoe foe Gado èn e bribi san a e taki (Johanes 17:17; 2 Timoteus 3:16, 17). Den e handri nanga a Wortoe foe Gado leki wan sani di de moro prenspari leki den prakseri noso gwenti foe libisma (Mateus 15:1-3, 7-9). Den e proeberi foe libi akroederi bijbel na ini na aladei libi foe den. So boen, den no e preiki wan sani èn baka dati e doe wan tra sani. — Titus 1:15, 16.

5. A troe relisi moesoe gi grani na a nen foe Gado toe (Mateus 6:9). Jesus ben meki a nen foe Gado, Jehovah, bekènti na tra sma. Troe kresten moesoe doe a srefi (Johanes 17:6, 26; Romesma 10:13, 14). Soema na den sma na ini joe birti di e froeteri trawan foe a nen foe Gado?

6. Troe kresten moesoe preiki foe a Kownoekondre foe Gado. Jesus ben doe dati. Ala ten a ben taki foe a Kownoekondre (Lukas 8:1). A ben gi den disipel foe en a komando foe preiki a srefi boskopoe disi na heri grontapoe (Mateus 24:14; 28:19, 20). Troe kresten e bribi taki a Kownoekondre foe Gado wawan sa tjari troe vrede nanga seikerfasi kon na a grontapoe disi. — Psalm 146:3-5.

7. Den disipel foe Jesus no moesoe de wan pisi foe na ogri grontapoe disi (Johanes 17:16). Den no e go boemoei nanga den politiek afersi nanga sociaal kesekese foe grontapoe. Den e tan farawe foe a fasi fa sma e tjari densrefi, foe den doe foe den, èn foe den fasi foe den di e doe sma ogri èn di de so foeroe na grontapoe (Jakobus 1:27; 4:4). Joe kan feni wan relisi groepoe na ini joe birti di abi den marki disi foe troe krestendom?

[Prenki na tapoe bladzijde 26, 27]

Troe kresten lobi makandra, e lespeki bijbel èn e preiki foe a Kownoekondre foe Gado