„Wi No Kan Tapu fu Taki”
1 Yesus Krestes e luku finifini fa a preikiwroko e pasa (Mat. 28:20; Mark. 13:10). Ala di so wan siksi milyun preikiman de di e gi kotoigi na ini 234 kondre, toku wi no musu denki taki a preikiwroko fu wi kaba. Teleki Gado e taki dati a wroko kaba, „wi no kan tapu fu taki” fu den sani di wi leri.—Tori. 4:20.
2 Frutrow Tapu a Yeye fu Gado: Satan e kwinsi wi so furu taki wi e lasi-ati (Openb. 12:17). Wi eigi onvolmaakti skin e gi wi furu problema tu. Den sortu sani disi kan puru wi prakseri fu a tumusi prenspari preikiwroko. Toku, efu wi e frutrow tapu Yehovah, dan en yeye sa yepi wi fu kakafutu gi iniwan problema.
3 Di den ben frufolgu a fosi yarihondro Kresten gemeente hebihebi, dan den brada ben begi Gado fu yepi den fu tan preiki a wortu fu en sondro frede. Yehovah ben piki a begi fu den, fu di a ben gi den en yeye. Boiti dati, a ben meki den kon fayafaya èn a ben meki den kisi a fasti bosroiti tu di ben de fanowdu fu tan preiki go doro. Dati meki den ben go doro fu meki a bun nyunsu bekènti nanga deki-ati, sondro fu tapu.—Tori. 4:29, 31; 5:42.
4 No Frede Sani Di Taki fu Broko Yu Saka: A fasi fa moro furu sma e denki noso den leitori di sma e panya na ala sei, furutron kan meki taki wi e frede. Ma memre den wortu di Petrus nanga den tra apostel ben taki nanga deki-ati na fesi a Sanhedrin, soleki fa skrifi na Tori fu den Apostel 5:29-32. Soleki Gamalièl, a leriman fu Wet ben erken, dan sma no kan tapu a wroko fu Gado. A wroko no e du nanga wi eigi krakti. Gado e horibaka gi a bigi wroko disi èn en wawan kan kaba a wroko disi!—Sak. 4:6.
5 Meki wi begi Yehovah ala dei, fu kisi a yeye fu en di kan yepi wi fu preiki a bun nyunsu fayafaya. Meki wi taki, neleki fa Yeremia ben du, dati a Kownukondre boskopu de leki wan faya di e bron na ini wi bonyo (Yer. 20:9). Wi no kan tapu wi mofo!