Aksi foe leisiman

Di den sroedati foe Saul ben njan meti nanga a broedoe, dan foe san ede den no ben kiri den, ala di dati ben de a strafoe di ben skrifi ini a Wet foe Gado?

Den man disi ben pasa Gado wet ini a tori foe broedoe, ma foe di den ben abi respeki gi broedoe, meki den ben kan abi sari-ati nanga den, ala di den ben moesoe de nanga moro faja foe sori a respeki dati.

Prakseri a situwâsi. Den Israèlsma na ondro kownoe Saul nanga en manpikin Jonatan, ben de ini orlokoe nanga den Filistijnsma. Tapoe wan momenti, di „den man foe Israèl srefi ben de ondro bigi kwinsi” ini a feti, dan Saul esi-esi ben meki wan sweri taki den man foe en no moesoe njan te leki den ben wini a feanti (1 Samuèl 14:24). Heri esi a sweri di Saul ben meki ben tjari wan problema kon.

Den man foe en ben wini wan hebi feti, ma a bigi moeiti ben abi takroe bakapisi. Angri ben kiri den èn den ben weri srefisrefi. San den ben doe ini a toemoesi moeilek situwâsi dati? „Den sma ben bigin trowe densrefi na wan gridi fasi tapoe den sani di den ben wini èn den teki skapoe nanga kaw nanga pikin kaw èn srakti den na tapoe a gron, èn den njan den nanga a broedoe.” — 1 Samuèl 14:32.

Nanga dati den ben pasa a wet foe Gado ini a tori foe broedoe, so leki fa wan toe sma foe Saul ben taigi en, taki: „Loekoe! A pipel e sondoe teige Gado foe di den e njan meti nanga a broedoe” (1 Samuèl 14:33). Ija, a Wet ben taki dati te den ben srakti meti, dan den ben moesoe meki a broedoe lon bifo den ben njan a meti. Gado no ben aksi foe den taki nomonomo den ben moesoe marki efoe ala broedoe ben lon. Den foetoeboi foe en ben kan sori respeki gi san broedoe wani taki, foe di den ben doe san den man foe meki a broedoe lon (Deuteronomium 12:15, 16, 21-25). Den ben kan gebroiki a broedoe foe meti na wan ofrandi fasi na tapoe na altari, ma den no ben mag njan a broedoe. Efoe wan sma ben pasa a wet foe espresi, dan a strafoe di den ben kisi ben de dede, foe di den ben taigi a pipel foe Gado: „Oenoe no mag njan a broedoe foe no wan enkri sortoe meti, foe di a sili foe ibri sortoe meti na en broedoe. Ibriwan sma di e njan dati, sa koti poeroe.” — Lefitikus 17:10-14.

Na foe espresi den sroedati foe Saul ben e pasa a Wet? A ben de so, taki den ben sori foe no abi no wan enkri respeki gi a wet foe Gado ini a tori foe broedoe? — Teki gersi Numeri 15:30.

Wi no moesoe prakseri so. A tori e taki dati den ben ’srakti den meti na tapoe a gron èn den njan den nanga a broedoe’. So boen, kande den ben doe pikinso moeiti foe meki a broedoe lon (Deuteronomium 15:23). Tokoe, den no ben anga den meti di den ben srakti èn den no ben gi nofo ten foe meki a broedoe lon na wan normaal fasi, foe di den ben weri srefisrefi èn angri ben kiri den. Foe di den ben srakti den skapoe nanga den kaw „na tapoe a gron”, meki a ben kan teki moro ten foe meki a broedoe lon. Èn esi-esi den ben koti meti poeroe foe den meti di den ben srakti di kande ben didon na ini broedoe. So boen, srefi efoe den ben abi ini prakseri foe gi jesi na a wet foe Gado, dan tokoe den no ben hori densrefi na dati na wan boen fasi noso na wan fasi di fiti.

A bakapisi ben de taki „a pipel ben njan a meti nanga a broedoe”, wan sani di ben de wan sondoe. Saul ben si disi èn a ben gi a komando foe lolo wan bigi ston kon na en. A ben komanderi den sroedati: „Ibriwan foe oenoe moesoe tjari kon na mi, en mankaw, èn ibriwan en skapoe, èn oenoe moesoe srakti den na a presi disi èn njan den djaso toe, èn oenoe no moesoe sondoe teige Jehovah foe di oenoe e njan meti nanga a broedoe” (1 Samuèl 14:33, 34). Den sroedati di ben fowtoe ben gi jesi, èn „Saul ben bigin bow wan altari gi Jehovah”. — 1 Samuèl 14:35.

Kande a srakti di den ben srakti meti tapoe a ston, ben abi leki bakapisi taki nofo broedoe ben lon. Den no ben mag njan a meti na a presi pe den ben srakti en. Kande Saul gebroiki pikinso foe a broedoe di ben lon tapoe na altari, foe man kisi a sari-ati foe Jehovah gi denwan di ben sondoe. Jehovah ben abi sari-ati nanga den, foe di, so leki fa a sori, a ben sabi sortoe moeiti den sroedati ben doe, ala di den ben weri srefisrefi èn angri ben kiri den. Kande Gado ben prakseri toe taki a sweri di Saul ben meki so gawgaw, ben tjari den man foe en go ini a serjoesoe situwâsi dati.

A tori disi e sori taki, a no foe di wi de ini wan moeilek situwâsi, dan wi no abi foe sori respeki gi a wet foe Gado. A moesoe jepi wi toe foe si taki a de fanowdoe foe prakseri boen fosi wi meki wan sweri, foe di wan sweri di meki toemoesi esi kan tjari problema kon gi wisrefi nanga gi trawan. — Preikiman 5:4-6.