Ala sma moesoe gi Gado frantiwortoe
„Ibriwan foe wi sa gi Gado frantiwortoe foe ensrefi.” — ROMESMA 14:12.
1. Sortoe skotoe ben poti na a fri di Adam nanga Eva ben abi?
JEHOVAH GADO ben meki wi fosi papa nanga mama, Adam nanga Eva, leki sma nanga wan fri wani. Ala di den ben lagi moro den engel, tokoe den ben de mekisani nanga froestan di ben man teki koni bosroiti (Psalm 8:4, 5). Ma tokoe a fri dati di Gado ben gi den, no ben gi den primisi foe densrefi bosroiti san boen noso san no boen. Den ben moesoe gi a Mekiman foe den frantiwortoe, èn ala den bakapikin foe den ben moesoe gi a frantiwortoe disi.
2. Sortoe frantiwortoe Jehovah sa aksi heri esi, èn foe san ede?
2 Now di wi e doro a heimarki foe a godelowsoe seti foe sani disi, Jehovah sa aksi frantiwortoe na grontapoe. (Teki gersi Romesma 9:28.) Heri esi, sma di no e dini Gado sa moesoe gi Jehovah Gado frantiwortoe, foe di den e foefoeroe den fonten foe grontapoe, den e pori libisma libi, èn spesroetoe foe di den e froefolgoe den foetoeboi foe en. — Openbaring 6:10; 11:18.
3. Sortoe aksi wi sa go loekoe?
3 Foe di wi abi foe doe nanga a serjoesoe froewakti disi, dan a boen foe wi go loekoe fa Jehovah ben handri nanga den mekisani foe en na ini a ten di pasa kaba. Fa bijbel kan jepi wi taki wisrefi gi wi Mekiman wan boen frantiwortoe? Sortoe eksempre kan jepi wi, èn gi sortoewan wi no moesoe waka na dati baka?
Engel moesoe gi frantiwortoe
4. Fa wi doe sabi taki Gado e aksi den engel frantiwortoe foe san den e doe?
4 Den engel na hemel di Jehovah meki, moesoe gi en frantiwortoe toe, neleki fa wi moesoe gi en frantiwortoe. Bifo a Froedoe na ini ten foe Noa, wan toe engel no ben gi jesi èn ben teki libisma skin foe kan abi seks demakandra nanga oemasma. Leki sma nanga wan fri wani, den jeje mekisani disi ben kan teki a bosroiti disi, ma Gado ben aksi den frantiwortoe. Di den trangajesi engel ben drai go baka na hemel kondre, dan Jehovah no ben gi den primisi foe teki a posisi baka di den ben abi biginbigin. A disipel Judas e froeteri wi taki den „kibri den nanga têgo banti na ondro blaka doengroe gi a kroetoe foe a bigi dei”. — Judas 6.
5. Na sortoe fasi Satan nanga den ogri jeje foe en fadon, èn fa a tori sa seti foe a frantiwortoe di den moesoe gi foe di den meki oproeroe?
5 Den trangajesi engel disi, noso ogri jeje, abi Satan Didibri leki den tiriman (Mateus 12:24-26). A godelowsoe engel disi ben meki oproeroe kontrari en Mekiman èn ben tjalensi a reti di Jehovah abi foe de Soeverein. Satan ben meki wi fosi papa nanga mama doe sondoe, èn te foe kaba, disi ben abi leki bakapisi taki te nanga langa, den dede (Genesis 3:1-7, 17-19). Ala di Jehovah ben gi Satan primisi foe kon na hemel wan pisi ten ete, tokoe a bijbel boekoe Openbaring ben taki na fesi taki na Gado en reti ten den ben sa fringi a godelowsoe sma disi go na a kontren foe grontapoe. Boeweisi e sori taki disi ben pasa sjatoe baka di Jesus Krestes ben kisi Kownoekondre makti na ini 1914. Te foe kaba, Didibri nanga den ogri jeje foe en sa go na ini têgo pori. Te na afersi foe a soevereiniteit sa kisi wan loesoe te foe kaba, dan a frantiwortoe foe na oproeroe sa gi kaba na wan reti fasi. — Job 1:6-12; 2:1-7; Openbaring 12:7-9; 20:10.
A Manpikin foe Gado moesoe gi frantiwortoe
6. Fa Jesus e si a frantiwortoe di ensrefi moesoe gi en Tata?
6 Na troetroe wan boen eksempre di a Manpikin foe Gado, Jesus Krestes, gi! Leki wan volmaakti man di ben de a srefi leki Adam, Jesus ben prisiri foe doe a wani foe Gado. A ben prisiri toe taki den ben aksi en frantiwortoe foe di a ben libi akroederi a wet foe Jehovah. A ben fiti taki a psalm singiman ben taki foe en na fesi: „Mi prisiri foe doe joe wani, o mi Gado, èn joe wet de na ini den inisei pisi foe mi.” — Psalm 40:8; Hebrewsma 10:6-9.
7. Foe san ede Jesus ben kan taki den wortoe di skrifi na Johanes 17:4, 5, di a ben begi tapoe a neti foe en dede?
7 Ala di Jesus ben ondrofeni bita-ati gens, tokoe a ben doe Gado wani èn ben hori en soifri retifasi te leki a dede na wan pina-oedoe. Na so a ben pai a loesoe-paiman foe froeloesoe a libisma famiri foe a sondoe foe Adam di abi dede leki bakapisi (Mateus 20:28). Dati meki, a neti di Jesus dede, a ben kan begi nanga ala froetrow: „Mi gi joe glori na grontapoe, foe di mi kaba a wroko di joe gi mi foe doe. Foe dati ede, Tata, gi mi glori na joe sei nanga a glori di mi ben abi na joe sei bifo grontapoe ben de” (Johanes 17:4, 5). Jesus ben kan taigi en hemel Tata den wortoe disi, foe di a ben man kakafoetoe heri boen gi a tesi foe gi frantiwortoe, èn Gado ben feni en boen.
8. (a) Fa Paulus ben sori taki wi moesoe gi Jehovah Gado frantiwortoe foe wisrefi? (b) San sa jepi wi foe meki Gado feni wi boen?
8 Wi no de volmaakti, leki a volmaakti man Jesus Krestes. Tokoe wi moesoe gi Gado frantiwortoe. Na apostel Paulus ben taki: „Foe san ede oenoe e kroetoe a brada foe oenoe? Noso foe san ede oenoe e wisiwasi so srefi a brada foe oenoe? Bika wi alamala sa tanapoe na fesi a kroetoestoeroe foe Gado; bika a skrifi na ini boekoe: ’„So langa mi e libi,” na so Jehovah e taki, „ibri kindi sa boigi ensrefi gi mi, èn ibri tongo sa erken Gado krinkrin.”’ Dan na so, ibriwan foe wi sa moesoe gi Gado frantiwortoe foe ensrefi” (Romesma 14:10-12). Foe meki wi kan doe disi èn taki Jehovah feni wi boen, dan na wan lobi-ati fasi a gi wi wan konsensi, so srefi en Wortoe, bijbel, di a meki sma skrifi en, èn disi moesoe tjari wi na ini sani di wi e taki èn e doe (Romesma 2:14, 15; 2 Timoteus 3:16, 17). Te wi e gebroiki ala den sani di Jehovah seti na jejefasi, èn e doe san wi konsensi, di kisi leri foe bijbel e taki dan dati sa jepi wi foe Gado feni wi boen (Mateus 24:45-47). Jehovah en santa jeje, noso wroko krakti, na wan tra fonten foe krakti nanga tiri. Efoe wi e handri akroederi a fasi fa a jeje e tiri wi èn fa wi konsensi, di kisi leri foe bijbel e tjari wi, dan wi e sori taki wi no ’e wisiwasi Gado’ di wi moesoe gi frantiwortoe foe ala den sani di wi e doe. — 1 Tesalonikasma 4:3-8; 1 Petrus 3:16, 21.
Den moesoe gi frantiwortoe leki nâsi
9. Soema ben de den Edomsma, èn san ben pasa nanga den foe a fasi ede fa den ben handri nanga Israèl?
9 Jehovah e aksi nâsi frantiwortoe (Jeremia 25:12-14; Sefanja 3:6, 7). Loekoe na owroe kownoekondre Edom, di ben de zuidsei foe a Dede Se èn noordsei foe a Se foe Akaba. Den Edomsma ben de wan Semitis pipel, di ben de krosibei famiri foe den Israèlsma. Ala di a fositen tata foe den Edomsma ben de Esau, a granpikin foe Abraham, tokoe den no ben gi den Israèlsma primisi foe waka pasa na ini Edom na tapoe „a kownoe pasi” di den Israèlsma ben de na pasi e go na a Pramisi Kondre (Numeri 20:14-21). Na ini ala den jarihondro, a feantifasi foe Edom ben tron wan krinkrin bita-atifasi gi Israèl. Te foe kaba, den Edomsma ben moesoe gi frantiwortoe foe san den ben doe foe gi den Babilonsma tranga foe pori Jerusalem na ini 607 b.G.T. (Psalm 137:7). Na ini a di foe siksi jarihondro b.G.T., den legre foe Babilon na ondro a tiri foe kownoe Nabonidus ben wini Edom, èn a ben tron wan broko pranasi, soleki fa Jehovah ben bosroiti. — Jeremia 49:20; Obadja 9-11.
10. Fa den Moabsma ben handri nanga den Israèlsma, èn fa Gado ben aksi Moab frantiwortoe?
10 Nanga Moab a no ben waka moro boen. A kownoekondre foe Moab ben de noordsei foe Edom èn owstoesei foe a Dede Se. Bifo den Israèlsma ben go na a Pramisi Kondre, den Moabsma no ben handri na wan switi fasi nanga den, èn a de krin taki den ben gi den brede nanga njanjan soso foe kisi wini foe dati na monisei (Deuteronomium 23:3, 4). Kownoe Balak foe Moab ben joeroe a profeiti Bileam foe floekoe Israèl, èn den ben gebroiki oemasma foe Moab foe kori den mansma foe Israèl foe doe hoeroedoe èn foe anbegi kroektoe gado (Numeri 22:2-8; 25:1-9). Ma Jehovah ben si taki Moab no ben wani si Israèl na ai. Soleki fa profeititori ben taki, dan Moab ben kisi pori foe na anoe foe den Babilonsma (Jeremia 9:25, 26; Sefanja 2:8-11). Ija, Gado ben aksi Moab frantiwortoe.
11. Leki sortoe foto, Moab nanga Amon ben tron, èn san bijbel profeititori e sori foe a disiten godelowsoe seti foe sani?
11 A no soso Moab, ma Amon toe ben moesoe gi Gado frantiwortoe. Jehovah ben taki na fesi: „Moab srefi sa tron neleki Sodom, èn den manpikin foe Amon neleki Gomora, wan presi pe krasiwiwiri de, èn wan sowtoe peti, èn wan leigi presi di no boen foe sma libi na ini, ija, te ten di no skotoe” (Sefanja 2:9). Den kondre Moab nanga Amon ben kisi pori, neleki fa Gado ben pori den foto Sodom nanga Gomora. Soleki fa a Geological Society of London e taki, dan ondrosoekoeman e taki dati den feni a presi pe Sodom nanga Gomora di ben kisi pori, ben de na a owstoesei sesjoro foe a Dede Se. Iniwan boeweisi foe disi di wi kan froetrow èn di den sa feni ete, kan horibaka nomo gi bijbel profeititori di e sori taki Jehovah Gado sa aksi a disiten godelowsoe seti foe sani frantiwortoe toe. — 2 Petrus 3:6-12.
12. San ben taki na fesi foe wan djoe fikapisi, ala di Israèl ben moesoe gi Gado frantiwortoe foe den sondoe foe en?
12 Ala di Jehovah ben gi Israèl foeroe grani, tokoe den ben moesoe gi Gado frantiwortoe foe den sondoe foe den. Di Jesus Krestes ben kon na a nâsi Israèl, dan a moro bigi pisi foe den ben drai den baka gi en. Soso wan fikapisi ben sori bribi èn ben tron en bakaman. Paulus ben fiti son profeititori na a djoe fikapisi disi di a ben skrifi: „Jesaja e bari kari foe Israèl: ’Awinsi a nomroe foe den manpikin foe Israèl ben de leki a santi foe se, tokoe na a fikapisi di sa kisi froeloesoe. Bika Jehovah sa aksi frantiwortoe na grontapoe, di a sa tjari kon na wan kaba èn sa meki en kon moro sjatoe.’ So srefi, neleki fa Jesaja ben taki kaba: ’Efoe Jehovah foe den legre no ben libi wan siri gi wi, dan wi ben sa tron neleki Sodom, èn wi ben sa de a srefi leki Gomora’” (Romesma 9:27-29; Jesaja 1:9; 10:22, 23). Na apostel ben kari na eksempre foe den 7000 sma na ini a ten foe Elia di no ben boigi gi Ba-al, èn baka dati a ben taki: „Dati meki, na so fasi, wan fikapisi kon de foe si toe na ini a pisi ten disi, foe di [Gado] ben froekisi den foe no-froedini boen-atifasi ede” (Romesma 11:5). A fikapisi dati ben de sma di densrefi ben moesoe gi Gado frantiwortoe.
Eksempre foe sma di densrefi ben moesoe gi frantiwortoe
13. San ben pasa nanga Kain di Gado ben aksi en frantiwortoe foe a kiri di a ben kiri en brada Abel?
13 Bijbel e kari foeroe kefal foe sma di densrefi ben moesoe gi Jehovah Gado frantiwortoe. Teki Kain, a fosi gebore manpikin foe Adam, foe eksempre. En nanga en brada Abel ben tjari srakti-ofrandi gi Jehovah. Gado ben feni a srakti-ofrandi foe Abel boen, ma di foe Kain a no ben feni boen. Di Gado ben aksi Kain frantiwortoe foe a kiri di a ben kiri en brada na wan ogri-ati fasi, dan sondro wan-enkri firi Kain ben taigi Gado: „Na mi moesoe loekoe mi brada?” Foe a sondoe foe en, meki Kain ben seni go na „a kondre foe Loweman, na a owstoesei foe Eden”. A no ben sori troetroe berow gi na ogri di a ben doe, èn a ben sari soso foe a reti strafoe di a ben kisi. — Genesis 4:3-16.
14. Fa a frantiwortoe di wan sma srefi moesoe gi Gado, ben kon na krin ini a kefal foe a granpriester Eli nanga den manpikin foe en?
14 Taki a sma srefi moesoe gi Gado frantiwortoe, de foe si toe ini a kefal foe Eli, a granpriester foe Israèl. En manpikin, Hofni nanga Pinehas, ben de sma di ben poti na wroko leki priester ma „den ben handri na wan onregtfardiki fasi nanga sma, èn den no ben abi lespeki gi Gado, gi no wan enkri godelowsoefasi den no ben tapoe densrefi foe doe dati”, na so a historia skrifiman Josephus e taki. Den „man [disi] di no ben warti noti”, no ben erken Jehovah, den ben tjari densrefi na wan fasi di ben pori a santafasi foe sani, èn den ben doe bigi hoeroedoe (1 Samuèl 1:3; 2:12-17, 22-25). Eli, leki a papa foe den èn a granpriester foe Israèl, ben abi a plekti foe gi den tranga leri, ma a ben piri-ai nomo gi den na wan safri fasi. Eli ’ben tan gi moro grani na den manpikin foe en leki na Jehovah’ (1 Samuèl 2:29). Strafoe ben kon na tapoe na oso foe Eli. Ala toe manpikin dede a srefi dei di a papa foe den dede, èn a priester famirilin foe den ben koti poeroe krinkrin te foe kaba. Na so fasi a tori ben seti. — 1 Samuèl 3:13, 14; 4:11, 17, 18.
15. Foe san ede Jonatan, a manpikin foe kownoe Saul, ben kisi pai?
15 Wan heri tra eksempre ben de na eksempre di Jonatan, a manpikin foe kownoe Saul, ben gi. Sjatoe baka di David ben kiri Goliat, dan „a sili foe Jonatan ben kon tai ensrefi tranga na a sili foe David”, èn den ben sroto wan froebontoe foe matifasi (1 Samuèl 18:1, 3). Kande Jonatan ben si taki a jeje foe Gado ben gowe libi Saul, ma a faja di ensrefi ben abi gi a troe anbegi no ben kon swaki (1 Samuèl 16:14). Noiti a warderi di Jonatan ben abi gi a makti di David ben kisi foe Gado, ben kon swaki. Jonatan ben froestan taki a ben moesoe gi Gado frantiwortoe, èn Jehovah ben pai en gi na opregti fasi foe en foe di a ben gi en a djaranti taki en famirilin ben o tan foeroe geslakti. — 1 Kroniki 8:33-40.
Frantiwortoe moesoe gi na ini a kresten gemeente
16. Soema ben de Titus, èn foe san ede wi kan taki dati a ben gi Gado wan boen frantiwortoe foe ensrefi?
16 Den kresten Griki Boekoe foe bijbel e taki boen foe foeroe mansma nanga oemasma di ben gi wan boen frantiwortoe foe densrefi. Foe eksempre, joe ben abi a Griki kresten di ben nen Titus. Sma taki dati a ben tron wan kresten na a ten di Paulus ben teki en fosi zending waka na Siprus. Foe di djoe nanga proselietsma foe Siprus kande ben de na Jerusalem na a ten foe a Pinksterfesa foe 33 G.T., meki a kresten bribi doro na èilanti sjatoe baka dati kande (Tori foe den Apostel 11:19). Ma tokoe Titus ben sori foe de wan foe Paulus getrow kompe wrokoman. A ben go nanga Paulus èn nanga Barnabas foe teki waka go na Jerusalem wan sani foe 49 G.T., di a prenspari tori foe a besnijdenis ben seti. Taki den no ben besnij Titus, ben horibaka gi san Paulus ben taki dati sma di drai den libi teki a kresten bribi, no ben sa moesoe de na ondro a Wet foe Moses (Galasiasma 2:1-3). Den Boekoe foe bijbel e taki foe a toemoesi boen diniwroko foe Titus, èn Gado ben meki Paulus skrifi Titus wan brifi srefi na ondro krakti foe santa jeje (2 Korentesma 7:6; Titus 1:1-4). Soleki fa a sori dan te na a kaba srefi foe Titus en waka nanga libi na grontapoe, a ben tan gi Gado wan boen frantiwortoe foe ensrefi.
17. Sortoe frantiwortoe Timoteus ben gi foe ensrefi, èn sortoe krakti na eksempre disi kan abi na wi tapoe?
17 Timoteus ben de wan tra sma di ben de fajafaja èn di ben gi Jehovah Gado wan boen frantiwortoe foe ensrefi. Ala di Timoteus ben abi problema pikinso nanga en gosontoe, tokoe a ben sori ’bribi sondro hoigrifasi’ èn a ’ben wroko nanga Paulus leki wan srafoe foe meki a boen njoensoe bekènti’. Foe dati ede na apostel ben kan taigi kompe kresten na Filipi: „Mi no abi no wan tra sma di abi wan jejefasi leki di foe [Timoteus], di troetroe sa sorgoe gi den sani di abi foe doe nanga oenoe” (2 Timoteus 1:5; Filipisma 2:20, 22; 1 Timoteus 5:23). Te wi e kisi foe doe nanga libisma swakifasi nanga tra tesi, dan wi so srefi kan abi wan bribi di no e hoigri èn kan gi Gado wan boen frantiwortoe foe wisrefi.
18. Soema ben de Lidia, èn sortoe eigifasi a ben sori?
18 Lidia ben de wan oema di ben dini Gado èn soleki fa a sori a ben gi Gado wan boen frantiwortoe foe ensrefi. En nanga en osofamiri ben de wan foe den fosi sma na Europa di ben teki a kresten bribi foe a wroko ede di Paulus ben doe na Filipi, wan sani foe 50 G.T. Kande Lidia, di ben gebore na Tiatira, ben de wan djoe proselietsma, ma a kan taki wan toe djoe nomo ben de drape èn no wan snoga ben de na Filipi. Lidia nanga tra opregti oema ben kon makandra na wan liba di Paulus ben taki nanga den. A bakapisi ben de, taki Lidia ben tron wan kresten èn ben begi Paulus nanga den kompe foe en foe tan nanga en (Tori foe den Apostel 16:12-15). A lobi di Lidia ben lobi foe ontfanga sma boen, na wan marki foe troe kresten.
19. Nanga sortoe boen sani di Dorkas ben doe, a ben gi Gado wan boen frantiwortoe foe ensrefi?
19 Dorkas ben de ete wan tra oema di ben gi Jehovah Gado wan boen frantiwortoe foe ensrefi. Di a dede, dan Petrus ben go na Jope di den disipel di ben e libi drape, ben aksi en foe kon. Den toe man di ben miti Petrus „ben tjari en go na a kamra na sodro; èn ala den weduwe ben kon na en ala di den ben krei èn ben sori foeroe ondrokrosi nanga tapoeseikrosi di Dorkas ben gwenti meki di a ben de nanga den ete”. Dorkas ben tjari kon na libi baka. Ma sma moesoe memre en soso foe di a ben lobi foe gi sani na sma? Nôno. A ben de wan „disipel” èn a de seiker taki ensrefi ben teki prati toe na a wroko foe meki disipel. Kresten oema na ini a ten disi ’e doe boen sani [toe] èn e gi boen foeroe presenti foe sari-ati’. Den e prisiri toe foe abi wan bigi prati na a wroko foe meki a boen njoensoe foe a Kownoekondre bekènti èn foe meki disipel. — Tori foe den Apostel 9:36-42; Mateus 24:14; 28:19, 20.
20. Sortoe aksi wi kan poti gi wisrefi?
20 Bijbel e sori krin taki nâsi èn ibriwan sma persoonlijk moesoe gi a Soeverein Masra Jehovah frantiwortoe (Sefanja 1:7). Efoe wi na sma di gi densrefi abra na Gado, dan wi kan aksi wisrefi foe dati ede: ’Fa mi e si den grani nanga frantiwortoe di Gado gi mi? Sortoe frantiwortoe foe misrefi mi e gi Jehovah Gado nanga Jesus Krestes?’
San joe e piki?
◻ Fa joe ben sa boeweisi taki den engel nanga a Manpikin foe Gado moesoe gi Jehovah frantiwortoe?
◻ Sortoe bijbel eksempre de, foe sori taki Gado e aksi nâsi frantiwortoe?
◻ San bijbel e taki foe a gi di wan sma srefi moesoe gi Gado frantiwortoe?
◻ Soema ben de wan toe foe den sma di bijbel e froeteri taki den ben gi Jehovah Gado wan boen frantiwortoe foe densrefi?
[Prenki na tapoe bladzijde 20]
Jesus Krestes ben gi en hemel Tata wan boen frantiwortoe foe ensrefi
[Prenki na tapoe bladzijde 25]
Neleki Dorkas, kresten oema na ini a ten disi e gi Jehovah Gado wan boen frantiwortoe foe densrefi
[Sma di abi a reti foe a prenki na tapoe bladzijde 23]
A dede foe Abel/The Doré Bible Illustrations/Dover Publications, Inc.