A ròl di pokoe e plèi na ini a disiten anbegi

SINGI na wan presenti foe Gado. Te wi e opo wi sten foe singi, dan dati kan tjari prisiri kon gi wi èn gi wi Mekiman. Nanga jepi foe singi wi kan sori den firi foe wi, efoe na sari firi noso prisiri firi. Moro ete, wi kan sori wi lobi, wi anbegi, èn prèise gi Jehovah, a Mekiman foe singi.

Moro foeroe foe den so wan drihondro presi na ini bijbel pe den e taki foe pokoe, abi foe doe nanga na anbegi foe Jehovah. Singi abi foe doe toe nanga prisiri — no wawan a prisiri foe den sma di e singi, ma so srefi prisiri foe a sei foe Jehovah. A psalm singiman ben skrifi: „Meki den singi gi en. . . . Bika Jehovah e prisiri nanga en pipel.” — Psalm 149:3, 4.

Ma o prenspari singi de na ini a disiten anbegi? Fa a pipel foe Jehovah na ini a ten disi kan plisi en te den e opo den sten foe singi? Sortoe ròl pokoe moesoe plèi na ini a troe anbegi? Te wi e ondrosoekoe a historia foe pokoe na ini anbegi, dan dati sa jepi wi foe piki den aksi disi.

A fositen ròl foe pokoe na ini na anbegi

A fosi presi pe bijbel e taki foe pokoe, no abi spesroetoe foe doe nanga na anbegi foe Jehovah. Na Genesis 4:21, den e gi Jubal a grani foe de a sma di kande feni den fosi preisani foe meki pokoe, noso kande a ben de a sma di ben bigin nanga wan wroko foe prei pokoe. Ma pokoe ben de wan pisi foe na anbegi foe Jehovah, srefi bifo a ben meki libisma. Wan lo bijbelvertaling e taki dati engel e singi. Job 38:7 e froeteri foe den engel di e bari nanga prisiri èn „bari wan prisiri babari foe di den ben agri”. Foe dati ede, bijbel e gi wi reide foe bribi taki singi na ini na anbegi foe Jehovah, ben de wan gwenti langa ten bifo libisma ben kon de.

Son historia skrifiman taki dati a pokoe foe den fositen Hebrewsma ben de melodie wawan, sondro taki den ben prei pokoe na ini harmonie di ben e horibaka gi a melodie. Ma den ben kan prei moro leki wán noot nomo na a srefi ten na tapoe a harpoe, wan preisani di den e kari moro foeroe na ini bijbel. Den sma di ben prei wan harpoe ben moesoe si a harmonie di ben kan kon te den ben moksi difrenti toon na tapoe a preisani. Na presi taki a pokoe foe den ben de wan sempel sani, tweifri no de taki a ben de boen fara kaba. Èn te wi e loekoe den poewema èn proza foe den Hebrew Boekoe foe bijbel, dan wi kan taki te foe kaba dati a pokoe foe den Israèlsma ben hei srefisrefi. Ija, a sani di ben meki den skrifi pokoe ben hei srefisrefi moro a sani di ben meki den birti nâsi meki pokoe.

A fasi fa a tempel foe owroeten ben orga, ben meki taki den ben kan abi boen moeilek fasi fa pokoe nanga sten ben seti na ini na anbegi ini a tempel (2 Kroniki 29:27, 28). Joe ben abi „fesiman”, „sabiman foe pokoe”, „sma di ben kisi leri foe singi”, nanga „edeman foe den singiman” (1 Kroniki 15:21; 25:7, 8; Nehemia 12:46). Wan historia skrifiman Curt Sachs ben skrifi o fara a hei koni di den ben abi foe pokoe, ben de: „Den singiman nanga den pokoeman di ben abi foe doe nanga a Tempel na Jerusalem, ben sori taki den ben abi wan hei markitiki foe kisi leri foe pokoe, èn den abi koni, nanga sabi . . . Ala di wi no sabi fa a fositen pokoe dati ben prei, tokoe wi abi nofo boeweisi foe a krakti foe en, a wartifasi, èn a kefalek bekwaamfasi foe en” (The Rise of Music in the Ancient World: East and West, 1943, bladzijde 48, 101, 102). A Singi foe Salomo na wan eksempre foe a koni fasi èn a boen fasi fa Hebrew pokoe ben meki. A de wan tori di de leki wan singi, neleki fa a libretto, noso den wortoe foe wan opera de. Na ini a Hebrew tekst den e kari a singi „A singi foe den singi”, dati wani taki a moro boen singi. Gi den owroeten Hebrewsma, singi ben de wan prenspari pisi foe na anbegi. Èn a ben gi den na okasi foe sori den boen firi foe den na ini a prèise di den ben prèise Jehovah.

A singi di den fosi jarihondro kresten ben singi

Pokoe ben tan abi wan faste presi na ini na anbegi foe den fositen kresten. Boiti taki den ben abi den Psalm di Gado ben meki sma skrifi, a gersi taki densrefi ben meki njoen pokoe nanga poewema gi na anbegi, èn nanga dati den ben poti na eksempre fa foe meki krestensingi na ini a ten disi (Efeisesma 5:19). A boekoe The History of Music foe Waldo Selden Pratt, e froeklari: „Den fositen kresten ben abi a gwenti foe singi na poebliki èn te den ben de den wawan foe anbegi. Gi den djoe di ben drai den libi, disi ben de gwenti di den ben tan doe foe a snoga. . . . Boiti den Psalm na ini Hebrewtongo . . , a njoen bribi ben abi a gwenti foe meki njoen prèisesingi gi Gado doronomo, èn ini a bigin a ben sori taki den ben meki den leki rapsodie.”a

Di Jesus ben seti na Avondmaal foe Masra, dan en nanga den apostel foe en ben singi Hallelsingi kande, èn na so fasi a ben poti krakti na tapoe a waarde foe singi (Mateus 26:26-30). Disi ben de prèisesingi gi Jehovah di ben skrifi na ini den Psalm èn di den ben singi foe a Paskafesa ede. — Psalm 113-118.

A krakti di falsi anbegi ben abi

Na ini den so-kari Mindri Jarihondro, kerkipokoe ben kon de noti moro leki sari singi. Na wan sani foe 200 G.T., Clement foe Aleksandria ben taki: „Wi abi wán sani fanowdoe nomo foe prei pokoe: a switi wortoe foe anbegi, wi no abi harpoe noso dron noso froiti noso trompeti fanowdoe.” Den ben poti wet, di ben meki sma meki kerkipokoe soso nanga sten. Sma ben kon sabi a fasi disi foe singi leki wan singi tapoe wán toon noso singi nanga sten nomo. „Mendri leki 40 jari na baka di den ben opo Constantinopel, a Konmakandra foe Laodisea (A.D. 367) ben tapoe a gebroiki foe preisani èn foe den gemeente te den begi èn singi. Pokoe foe den Ortodòks-sma ben de soso nanga sten”, na so a boekoe Our Musical Heritage e taki. (Na wi skrifi den wortoe skoinsi.) Den wet disi no ben abi den gron tapoe a fositen krestendom.

Na ini a ten foe den Mindri Jarihondro, bijbel ben de moro foeroe wan boekoe di a gewoon pipel no ben sabi èn no ben man kisi. Den kresten di ben prefoeroe foe abi wan bijbel gi densrefi noso foe leisi en, ben kisi froefolgoe èn sma ben kiri den srefi. Foe dati ede, a no de foe froewondroe taki a gwenti foe singi prèisesingi gi Gado, moro foeroe ben lasi gowe na ini a doengroe pisiten dati. Èn boiti dati, efoe a gewoon pipel no ben man abi bijbel, dan fa den ben sa sabi taki wan di foe tin pisi foe heri bijbel na singi? Soema ben sa froeteri den taki Gado ben komanderi den anbegiman foe en foe „singi wan njoen singi gi Jehovah, a prèise foe en na ini a gemeente foe den loyaalwan”? — Psalm 149:1.

Na organisâsi foe Jehovah doe foeroe foe poti pokoe nanga singi na den joisti presi baka na ini na anbegi. Foe eksempre, a tijdschrift Zion’s Watch Tower foe 1 februari 1896, ben abi soso singi na ini. A ben abi leki nen „Zion’s Glad Songs of the Morning” (Den prisiri mamanten singi foe a bigin foe Sion).

Na ini 1938 a ben de so, taki moro foeroe den no ben singi na den gemeente konmakandra. Ma a koni foe waka na baka na eksempre foe den apostel nanga a tiri foe den, ben wini heri esi. Na a distriktkongres foe 1944, F. W. Franz ben hori a lezing „A singi foe Kownoekondre Diniwroko”. A ben sori taki langa ten bifo Gado ben meki libisma, den hemel libisani foe Gado ben singi prèisesingi gi Jehovah, èn a ben taki: „Gado feni wan sani di fiti èn di e plisi en, te den foetoeboi foe En na grontapoe e opo den sten foe singi troetroe.” Baka di a ben taki finifini foe san ede singi moesoe de na ini na anbegi, a ben meki bekènti taki a Kingdom Service Song Book (Singiboekoe gi a Kownoekondre diniwroko) ben kon na doro foe gebroiki en na den alawiki diniwroko-konmakandra.b Baka dati, na ini december 1944 na Informant (di wi e kari Wi Kownoekondre Dienst now) ben meki bekènti taki tra konmakandra ben sa bigin èn ben sa tapoe toe nanga singi. Ete wan tron, singi ben kon tron wan pisi foe na anbegi foe Jehovah.

’Singi gi Jehovah na ini wi ati’

Den brada foe wi na Owstoe-Europa èn na Afrika di ondrofeni gens nanga froefolgoe foeroe jari, sori wi o warti a de foe singi na wan opregtifasi. Lothar Wagner ben tan seibi jari na ini strafoe nanga no wan tra sma nanga en. Fa a ben horidoro? A e taki: „Wan toe wiki langa mi ben poti prakseri na tapoe den Kownoekondre singi di mi ben memre. Te mi no ben sabi den wortoe soifri, dan mi ben meki wán noso toe couplet gi misrefi. . . . Den Kownoekondre singi foe wi abi foeroe prakseri di e gi wi deki-ati èn di e bow wi!” — 1974 Yearbook of Jehovah’s Witnesses, bladzijde 226-228.

Na ini den feifi jari di den ben sroto Harold King sondro wan tra sma nanga en foe di a ben tan loyaal, a ben gi en trowstoe foe meki èn singi prèisesingi gi Jehovah. Now Jehovah Kotoigi e gebroiki wan toe foe den singi di a ben meki na ini na anbegi foe den. A prisiri di singi e tjari, e jepi wi. Ma a no moesoe de fanowdoe taki wi ondrofeni froefolgoe fosi foe overtoigi wi foe a waarde di prèisesingi gi Gado abi.

A heri pipel foe Jehovah kan feni prisiri na ini singi. Ala di a kan de taki wi abi wan toe sani di e tapoe wi foe taki nanga wortoe san wi e firi, tokoe wi kan taki den firi di wi abi gi Jehovah na wan fri fasi te wi e taki foe den na ini singi. Na apostel Paulus ben sori fa wi kan feni prisiri na ini a singi foe prèisesingi, di a ben froemane den kresten foe tan „taki nanga oensrefi nanga psalm nanga prèisesingi gi Gado nanga jeje singi, èn e singi gi Jehovah ala di a pokoe di de na ini oen ati e tjari oenoe” (Efeisesma 5:19). Te wi ati foeroe nanga sani na jejefasi, dan wi e sori dati na wan krakti fasi na ini singi. So boen, a sroto foe man singi moro boen, na taki wi ati moesoe boen.

Te wi abi wan boen matifasi nanga Jehovah, dan dati e gi wi wan prisiri jeje, di e boeweigi wi foe taki, foe singi, èn foe bari prèise gi Jehovah (Psalm 146:2, 5). Wi e singi nanga wi heri ati foe den sani di e prisiri wi. Èn efoe wi lobi a singi noso den firi di de na ini a singi, dan pikinmoro a de seiker taki wi sa singi a singi nanga troetroe firi.

Wan sma no abi foe singi tranga foe man singi nanga firi. Te wan sma e singi tranga dan dati no wani taki nomonomo dati a e singi boen; èn na so a de toe efoe sma no e jere joe sten. Son sten di abi resonantie foe densrefi, kan de krin moro a di foe wan trawan, ala di a singi safri kande. Wan foe den tjalensi foe singi boen na ini wan groepoe, na foe leri singi leki wán sten. Awansi joe e singi leki wán man noso nanga wán mofo, te joe e singi tranga a srefi leki den wan na joe sei, dan a bakapisi de wan switi singi di de wán. Bescheidenfasi foe kresten èn wan jesi di e arki, e jepi wan sma foe leri singi fajafaja na wan balansi èn tokoe foe no singi toemoesi tranga nanga a sten taki joe no man jere di foe trawan. Ma den wan di sabi singi noso di abi kefalek moi sten noiti moesoe tapoe foe singi tranga. Wan moi sten kan de wan boen jepi te wan gemeente e singi prèisesingi gi Jehovah.

A singi di wi e singi na den konmakandra foe wi, de wan joisti okasi toe foe singi na ini den fo sten. Den sma di man singi ini harmonie sondro foe gebroiki den noot, noso di kan leisi den harmonie lin na ini a singiboekoe èn di kan singi den, e kisi a deki-ati foe singi makandra toe, foe meki a pokoe kon moro moi.c

Son sma kan taki: ’Mi no kan singi den toon boen’, noso ’A sten foe mi takroe srefisrefi; a e falsi te mi e singi hei.’ So boen, den e draidrai foe singi, srefi na ini a Kownoekondre zaal. Ma a troe foe a tori de taki no wan sma di e singi prèisesingi gi Jehovah e singi „takroe” na ini en ai. Neleki fa wan sma kan meki en sten kon moro boen te a e oefen, èn te a e waka baka den boen rai di den e gi na a theokrasia diniwroko-skoro, na so wan sma kan singi moro boen. Son sma meki a sten foe den kon moro boen soso foe di den singi na ini den neki ala di den ben doe wan wroko. Te joe e singi na ini joe neki, dan dati e jepi foe grati a toon foe a sten. Èn na ten di fiti, dan te wi no de nanga tra sma noso te wi e wroko na wan presi pe wi no ben o hendri tra sma, dan a singi foe Kownoekondre singi na wan heri boen fasi foe oefen a sten èn a de wan jepi foe meki wan sma kon de nanga prisiri, èn kon de nanga kowroe-ati.

Wi kan gi sma a deki-ati toe foe singi wan toe foe den Kownoekondre singi na prisiri demakandra. Foe singi na so wan fasi, makandra nanga wan preisani soleki wan gitara noso piano noso nanga a piano-pokoe foe a Genootschap di poti na tapoe lolo noso CD, e meki den prisiri demakandra foe wi kisi wan jejefasi. A de wan jepi toe foe leri den singi èn foe singi den boen na den gemeente konmakandra.

A Genootschap sorgoe gi pokoe di poti na tapoe lolo noso CD, foe jepi den gemeente foe de fajafaja foe singi na den konmakandra. Te den e prei den lolo noso CD, dan a sma di e wroko na a geluid moesoe loekoe o tranga a geluid de. Efoe a pokoe no tranga nofo, dan a gemeente sa draidrai foe singi tranga kande. Efoe a brada di e wroko na a geluid e singi makandra nanga a gemeente, dan a sa man si te a pokoe e tjari den sma boen efoe no.

Meki pokoe gi Jehovah

Singi e gi wi na okasi foe sori san wi e firi gi a Mekiman foe wi (Psalm 149:1, 3). A no de soso wan firi di e kon wantronso, ma wi kan singi prèisesingi na wan fasi di wi kan dwengi, di de reidelek èn di de wan prisiri. Foe singi den gemeente singi nanga wi heri ati na wan joisti fasi kan sreka wi jeje nanga wi ati gi a programa di e kon baka dati èn a kan poesoe wi foe abi wan moro bigi prati na a anbegi foe Jehovah. Ala di singi abi foeroe krakti na tapoe a firi, tokoe den wortoe kan de wan fasi toe foe gi wi leri. Te, leki wán man èn ini harmonie, wi e sori na a fasi disi san wi e firi, dan na wan safri fasi èn nanga sakafasi wi e sreka na ati foe wi, so taki wi kan kisi leri makandra leki wan pipel di kon makandra. — Teki gersi Psalm 10:17.

Ala ten singi sa de wan pisi foe na anbegi foe Jehovah. Foe dati ede wi abi a froewakti foe abi den firi foe a psalm singiman, foe têgo: „Mi wani prèise Jehovah mi heri libi. Mi wani prei pokoe gi mi Gado, so langa leki mi e de.” — Psalm 146:2.

[Foetoewortoe]

[Faki na tapoe bladzijde 27]

Wan toe rai foe singi moro betre

1. Hori a singiboekoe leti-opo te joe e singi. Disi e jepi wan sma foe hari bro moro leki fa a skin gwenti.

2. Hari wan dipi bro na a bigin foe ibri groepoe wortoe.

3. Te joe e opo a mofo pikinso moro leki fa joe gwenti, dan na a bigin a sten sa kisi foe ensrefi moro volume èn resonantie.

4. Boiti dati, poti a prakseri na tapoe a firi di de na ini a singi di joe e singi.