Singi prèisesingi gi Jehovah
„Meki mi singi gi Jehovah, bika a meki kon hei.” — EXODUS 15:1.
1. Sortoe eigifasi foe Jehovah e gi wi reide foe prèise en?
TINADRI tron Psalm 150 e gi a komando foe prèise Jehovah noso Jah. A lasti vers e taki: „Ala sani di e bro — meki a prèise Jah. Prèise Jah, oen pipel!” Leki Kotoigi foe Jehovah, wi sabi taki Jehovah de warti foe kisi a prèise foe wi. En na a Universeel Soeverein, a Moro Heiwan, a Kownoe foe têgo, a Mekiman foe wi, a Sma di e doe boen gi wi. Sma no de di kan marki densrefi nanga en, na en wawan de so, joe no kan teki en gersi nanga trawan, a no abi en speri na no wan fasi. A abi ala koni, a de almakti, a de volmaakti ini retidoe, èn en na a persoon foe lobi. A boen moro ala tra sma; a de loyaal (Lukas 18:19; Openbaring 15:3, 4). A warti foe kisi a prèise foe wi? A warti en srefisrefi!
2. Sortoe reide wi abi foe sori taki wi de Jehovah tangi?
2 Jehovah warti no foe kisi soso na anbegi nanga a prèise foe wi, ma so srefi a tangi foe wi gi ala sani di a doe gi wi. En na a Giman foe „ibri boen presenti nanga ibri volmaakti kado” (Jakobus 1:17). En na a Fonten foe ala libi (Psalm 36:9). Ala sani di wi e njan boen foe den leki memre foe a libisma ras, komoto na en, bika en na wi Gran Mekiman (Jesaja 42:5). En na a Giman toe foe ala den jeje blesi di wi e kisi nanga jepi foe en jeje, en organisâsi, nanga en Wortoe. Wi kisi pardon foe sondoe tapoe a gron foe a gi di a ben gi en Manpikin leki wan froeloesoe-ofrandi gi wi (Johanes 3:16). Wi abi a Kownoekondre howpoe foe ’njoen hemel nanga wan njoen grontapoe pe regtfardikifasi sa tan na ini’ (2 Petrus 3:13). Wi abi boen demakandra nanga kresten-kompe (Romesma 1:11, 12). Wi abi a grani nanga blesi foe de den Kotoigi foe en (Jesaja 43:10-12). Èn wi abi a bigi grani foe begi (Mateus 6:9-13). Foe troe, wi abi foeroe reide foe taigi Jehovah tangi!
Fasi fa wi kan prèise Jehovah
3. Na sortoe difrenti fasi wi kan prèise Jehovah èn sori taki wi de en tangi?
3 Fa wi, leki foetoeboi di gi wisrefi na Jehovah, kan prèise en èn sori taki wi ati e firi tangi? Wi kan doe dati, foe di wi e teki prati ini a kresten diniwroko: e gi kotoigi oso-foe-oso, e meki gobaka, e hori bijbelstudie, èn e teki prati na a stratiwroko. Wi kan prèise en toe, foe di wi e gi kotoigi na tra okasi, awinsi oten wan okasi opo. Dan agen wi kan prèise Jehovah nanga na opregti fasi fa wi e tjari wisrefi, srefi nanga a krin èn bescheide fasi fa wi e weri wi krosi èn fa wi e sorgoe gi wisrefi. Foeroetron den Kotoigi foe Jehovah ben kisi prèise foe di den de wan eksempre ini den afersi disi. Boiti dati, wi kan prèise Jehovah èn taigi en tangi nanga jepi foe begi. — Loekoe 1 Kroniki 29:10-13.
4. San na wán foe den moro moi fasi fa wi kan prèise wi lobi hemel Tata?
4 Moro fara, wán foe den moro moi fasi fa wi kan prèise wi lobi hemel Tata, na foe gi en nanga den boenfasi foe en glori nanga jepi foe moi Kownoekondre singi. Foeroe pokoeman nanga mekiman foe pokoe e agri, taki a moro moi sani foe meki pokoe, na a libisma sten. Den meester foe klasiek pokoe kisi a firi foe skrifi operapokoe, foe di so foeroe satisfaksi de te den e arki a sten foe wan libisma di e singi.
5. Foe sortoe reide ede wi moesoe teki a singi di wi e singi Kownoekondre singi, na wan serjoesoe fasi?
5 A moesoe foe de so taki Jehovah e prisiri foe arki te libisma e singi, spesroetoe te den e singi prèisesingi nanga singi foe tangi! Foe troe dan, wi moesoe teki a singi di wi e singi Kownoekondre singi na den difrenti demakandra foe wi na wan serjoesoe fasi — na gemeente konmakandra, kringkonmakandra, spesroetoe deikonmakandra, distriktkongres, nanga den internationaalkongres. A singiboekoe foe wi lai nanga singi di troetroe moi srefisrefi, èn ala ten baka, sma foe dorosei ben prèise a moi foe den. Omoro wi e kisi a firi foe singi Kownoekondre singi, omoro wi e gi trawan prisiri èn wi e meki wisrefi abi wini foe den.
A singi foe prèisesingi gi Jehovah ini bijbel ten
6. Fa den Israèlsma ben sori warderi gi a froeloesoe foe den na a Redi Se?
6 A Wortoe foe Gado e froeteri wi, taki Moses nanga den tra Israèlsma ben singi winisingi foe di den ben froeloesoe foe a legre foe Farao na a Redi Se. A singi foe den ben bigin nanga den wortoe: „Meki mi singi gi Jehovah, bika a meki kon hei. A ben trowe na asi nanga en tjariman go ini a se. Mi tranga nanga mi makti na Jah, foe di na en sorgoe gi mi kibri. Disi na mi Gado, èn mi sa prèise en” (Exodus 15:1, 2). Wi man prakseri boen omeni faja nanga prisiri den Israèlsma ben abi di den ben singi den wortoe dati, baka di den ben kisi froeloesoe na wan wondroefasi!
7. Sortoe tra spesroetoe kefal foe den Israèlsma di ben prèise Jehovah ini singi, ben skrifi poti ini den Hebrew Boekoe foe bijbel?
7 Wi e leisi ini 1 Kroniki 16:1, 4-36, taki den ben prèise Jehovah nanga a singi di den ben singi èn nanga den sani di de foe meki pokoe, di David ben tjari na Ark go na Jerusalem. Dati ben de foe troe wan prisiri ten. Di kownoe Salomo ben gi a tempel na Jerusalem abra na Gado, dan wan singi foe prèisesingi makandra nanga sani di de foe meki pokoe, ben de gi Jehovah toe. Wi e leisi ini 2 Kroniki 5:13, 14: „Na so a pasa, taki so esi leki den man di ben bro tapoe den trompeti nanga den singiman ben de leki wán man foe meki den jere a babari foe prèise Jehovah èn foe taigi en tangi, èn so esi leki den opo a babari nanga den trompeti èn nanga den djendjen èn nanga sani di de foe meki pokoe èn nanga a prèise di den e prèise Jehovah, ’bika a boen, foe di en lobi boen-atifasi de te ten di no skotoe’, dan na oso srefi ben foeroe nanga a wolkoe, na oso foe Jehovah srefi, èn foe a wolkoe ede, den priester no ben man tan tanapoe foe wroko; bika a glori foe Jehovah ben foeroe na oso foe a troe Gado.” San dati e sori? Taki Jehovah ben arki a moi prèise singi disi di den ben prèise en èn a ben prisiri nanga dati toe, so leki fa a wolkoe foe Gado ben sori. Baka ten, toe groepoe singiman ben singi na a ten foe na inwijding foe den skotoe foe Jerusalem, ini den dei foe Nehemia. — Nehemia 12:27-42.
8. San e sori taki den Israèlsma ben teki a singi foe den na wan serjoesoe fasi?
8 Te joe loekoe en fini, dan singi ben de so wan prenspari pisi foe na anbegi na a tempel, taki den ben poti 4000 Leifisma spesroetoe foe doe diniwroko di abi foe doe nanga pokoe (1 Kroniki 23:4, 5). Den disi ben o jepi den singiman. Pokoe, spesroetoe singiman, ben abi wan prenspari presi ini na anbegi, no spesroetoe foe meki den kon sabi den moro prenspari afersi foe a Wet, ma foe gi a joisti firi foe anbegi. A ben jepi den Israèlsma foe anbegi Jehovah na wan fajafaja fasi. Loekoe den sani di den ben sreka finifini na fesi èn a prakseri di den ben poti na tapoe a sani disi: „A nomroe foe den makandra nanga den brada foe den di ben kisi leri foe singi gi Jehovah, den alamala sabiman foe pokoe, ben kon de toe hondro aititenti na aiti” (1 Kroniki 25:7). Loekoe o serjoesoe den ben teki a singi foe prèisesingi gi Jehovah. Den ben kisi leri foe singi èn den ben de sabiman foe pokoe!
9. Sortoe krakti den e poti na tapoe singi ini den Kresten Griki Boekoe foe bijbel?
9 San wi e si ini a fosi jarihondro foe wi gewoon teri? Na a neti di den ben tori Jesus, dan nanga someni prenspari sani na en ede, tokoe Jesus ben firi a fanowdoe ete foe tapoe a Paska di a ben hori èn a Memrefesa foe en dede di a ben seti, nanga a singi foe prèisesingi gi Jehovah (Mateus 26:30). So srefi wi e leisi taki na „wan sani foe mindri neti”, Paulus nanga Silas, baka di den ben kisi fonfon èn ben poti na doengroe-oso, „ben e begi èn ben e prèise Gado nanga jepi foe singi; ija, den strafoeman ben jere den”. — Tori foe den Apostel 16:25.
Singi prèisesingi — Wan prenspari pisi foe wi anbegi
10. Sortoe komando a Wortoe foe Gado e gi foe prèise en ini singi?
10 Joe e firi kande, taki a singi foe Kownoekondre singi no de prenspari nofo gi joe foe poti prakseri na tapoe en nanga joe heri ati? Efoe a de so, joe no moesoe ondrosoekoe a tori baka dan, nanga ini joe prakseri o prenspari Jehovah Gado nanga Jesus Krestes e si a singi foe prèisesingi? We, a Wortoe foe Gado foeroe nanga komando foe prèise Jehovah èn foe singi prèisesingi gi en! Foe eksempre, ini Jesaja 42:10 wi e leisi: „Singi wan njoen singi gi Jehovah, a prèise foe en foe a kaba pisi foe grontapoe, oenoe di e saka go na a se èn na a sani di e foeroe en, oenoe tabiki èn oenoe di e tan na tapoe den”. — Loekoe toe Psalm 96:1; 98:1.
11. Sortoe froemane Paulus ben gi ini a tori foe singi?
11 Na apostel Paulus ben sabi, taki singi ben kan opo den firi foe wi, dati meki a ben froemane wi toe tron ini a tori. Wi e leisi ini Efeisesma 5:18, 19: „Tan kon foeroe nanga jeje, taki nanga makandra nanga jepi foe psalm nanga prèisesingi gi Gado nanga jeje singi, singi èn tjari oensrefi nanga pokoe ini oen ati gi Jehovah.” Èn ini Kolosesma 3:16 wi e leisi: „Meki a wortoe foe a Krestes tan foeroe ini oenoe, nanga ala koni. Tan leri èn froemane makandra nanga psalm, prèisesingi gi Gado, jeje singi nanga switifasi, singi gi Jehovah ini oen ati.”
12. Sortoe eksempre wi abi foe den singi foe wi, di e jepi wi foe leri èn froemane makandra?
12 Loekoe taki ini ala toe kefal, Paulus e sori ibritron baka tapoe singi, te a e kari ’psalm, prèisesingi gi Gado, jeje singi, singi nanga pokoe ini oen ati’. So srefi a e bigin foe taki den sani di a wani taigi den Kolosesma, foe di a e taki dati nanga jepi foe den sani disi wi kan „leri èn froemane makandra”. Èn dati wi e doe foe troe, so leki fa wi kan si na den titel srefi foe den singi foe wi — „Ala sma, prèise Jehovah!” (nomroe 5), „Tanapoe kánkan, sondro foe fadon!” (nomroe 10), „Prisiri foe a Kownoekondre howpoe ede!” (nomroe 16), „No frede den!” (nomroe 27), „Prèise Jehovah, wi Gado!” (nomroe 100), foe gi soso wan toe eksempre.
13. Fa „a getrow nanga koni srafoe” ben sori o prenspari a singi foe singi de, leki wan pisi foe na anbegi foe wi?
13 Ini akroederi nanga den komando disi, „a getrow nanga koni srafoe” seti sani taki den konmakandra foe wi — gemeente konmakandra, kringkonmakandra, spesroetoe deikonmakandra, distriktkongres, nanga internationaal kongres — e bigin èn e tapoe nanga a singi foe Kownoekondre singi (Mateus 24:45). Boiti dati, den poti singi tapoe a schema, foe singi na tapoe tra momenti foe den konmakandra disi. Foe di wi gwenti foe bigin den konmakandra foe wi nanga a singi foe wan Kownoekondre singi, a no de so dan taki wi moesoe doro biten, froekoe nofo foe teki prati ini a pisi dati foe wi anbegi? Èn foe di den konmakandra e tapoe nanga singi, a no de so dan taki wi moesoe tan te na a lasti singi nanga a begi di e waka wantewante baka dati?
14. Sortoe eksempre wi abi foe singi di den ben teki gi wi programa èn di e fiti a programa?
14 Den teki den singi foe wi konmakandra na wan koni fasi, foe meki den kroederi nanga a programa. Foe eksempre, na tapoe a „Leri foe Gado”-distriktkongres ini 1993, singi nomroe 191, „Meki a waarheid tron wan pisi foe joe” — di e gi kresten deki-ati foe strei teige Satan, grontapoe, nanga na onvolmaakti skin — ben waka wantewante baka den dri lezing di ben taki foe den feanti disi. Na a srefi fasi, singi nomroe 164, „Pikin — warti presenti foe Gado” — di lai nanga froemane gi papa nanga mama — ben waka wantewante baka wan lezing di ben poti krakti na tapoe a plekti di papa nanga mama abi foe leri den pikin foe den. Singi nomroe 70, „De leki Jeremia”, ben kon fesi wan toe lezing di ben gron tapoe den profeititori foe Jeremia. Èn baka wan symposium di ben go foe difrenti fasi foe wi Kownoekondre diniwroko, dan singi 156 ben kon, „Mi wani”, wan singi di abi foeroe foe doe nanga a diniwroko. A srefi sani den e doe te den e teki singi gi a Waktitoren-studie, a Diniwroko-konmakandra, nanga a Theokrâsia diniwroko-skoro. Disi wani taki toe dati, te owroeman e gi poebliki taki èn e sori sortoe singi den sa singi foe bigin a programa, dan den moesoe teki wan singi di e fiti a thema foe a lezing foe den.
15. Na sortoe fasi a fesiman foe a konmakandra kan meki den sma abi moro warderi gi a singi di den moesoe singi?
15 Te a fesiman e meki bekènti sortoe singi den sa singi, dan a kan meki den abi moro warderi gi a singi, foe di a e taki san na a titel noso a thema foe a singi. Wi no e singi nomroe, ma bijbel thema. So srefi a ben sa jepi a gemeente foe abi moro warderi gi a singi, efoe den e kari a tekst di de ondro a titel. Dan ete, a sa boen efoe wan toe sani ben e taki, so leki dati ala sma moesoe kisi a firi foe a singi.
Sori warderi gi a boen-ati foe Jehovah nanga jepi foe singi
16. Fa wi kan kisi a firi foe den singi foe wi?
16 Foe di den wortoe foe wi Kownoekondre singi wani taki foeroe, dan wi moesoe poti prakseri na tapoe den wortoe te wi e singi den. Wi wani kisi a firi foe ibri singi. Sonwan, so leki denwan di e taki foe lobi, wan froktoe foe a jeje, na sani di wi e firi ini wi ati (Galasiasma 5:22). Den disi wi e singi nanga dipi firi èn nanga waran. Trawan e gi prisiri, èn wi moesoe proeberi foe singi den na wan kolokoe fasi. Tokoe trawan na krakti singi, singi di sma e gebroiki te den e waka ini pas, èn den disi wi moesoe singi nanga faja èn tranga froetrow. Tapoe wi Theokrâsia diniwroko-skoro wi e kisi a rai foe sori waran nanga firi, èn so srefi faja, ini den pristeri foe wi. A de srefi moro prenspari foe sori waran, firi, nanga faja, te wi e singi den singi foe wi.
17. (a) Sortoe piri-ai, di ben gi na den Israèlsma di no ben de getrow, wi no ben sa wani meki dati abi foe doe nanga a fasi fa wi e singi? (b) Sortoe bakapisi a sa abi, te wi e teki a froemane di de ini den singi foe wi, na wan serjoesoe fasi?
17 Efoe wi e singi den Kownoekondre singi foe wi nanga wi prakseri na tapoe tra sani, èn no e froestan boen san den wortoe wani taki, dan a no ben sa de so taki wi ben sa de leki den Israèlsma di no ben de getrow, èn di ben kisi piri-ai, bika, a srefi joeroe ten te den ben prèise Gado nanga den mofo-boeba, den ati ben de farawe foe en? (Mateus 15:8) Wi no wani kisi so wan piri-ai gi a fasi fa wi e singi Kownoekondre singi, a no so? Te wi e handri na wan fasi di e sori warderi gi a singi foe wi Kownowkondre singi, dan wi no sa gi soso wisrefi deki-ati, ma so srefi trawan di e sidon krosibei foe wi, srefi den jongoewan. Ija, efoe ala sma di e singi na wi Kownoekondrezaal ben sa teki den froemane di de ini den singi disi na wan serjoesoe fasi, dan disi ben sa de wan tranga deki-ati foe de fajafaja ini a diniwroko èn foe wai pasi gi den trapoe foe ogridoe.
18. Sortoe krakti a singi foe Kownoekondre singi ben abi tapoe wan seiker oemasma?
18 Ibritron baka, a singi di wi e singi Kownoekondre singi, e naki na ati foe den doroseisma. A Waktitoren ben tjari a tori disi kon na doro wan leisi: „Dati a singi di wi e singi kan meki sma kisi sabi foe Jehovah Gado, e kon na krin ini wan ondrofenitori foe wan oemasma di ben teki dopoe tapoe a 1973 ’Wini foe Gado’-distrtiktkongres, Yankee Stadion, ini a foto New York. A ben fisiti a Kownoekondrezaal ini en birti foe a fosi tron, en wawan, èn a ben tan na ala toe konmakandra. Di a gemeente ben singi . . . ’Hori joe ai tapoe a prijs!’, dan den wortoe nanga a fasi fa den ben singi ben naki en ati na so wan fasi, taki a ben teki a bosroiti taki disi na a presi pe a ben wani foe de. Baka ten, a ben go na wan foe den Kotoigi èn ben aksi en foe wan bijbelstudie, èn a ben go na fesi te a tron wan kresten Kotoigi foe Jehovah.”
19. Sortoe lasti deki-ati wi e kisi foe singi wi Kownoekondre singi nanga wi heri-ati?
19 Tapoe moro foeroe foe den konmakandra foe wi, te joe teki en gersi nanga tra okasi, dan wan toe okasi nomo de gi den arkiman foe man sori den firi èn a warderi foe den. Ma wi alamala kan sori fa wi e firi foe a boen-ati foe Jehovah, foe di wi e moksi wisrefi nanga wi heri ati na a singi foe Kownoekondre singi. Boiti dati, a no de so taki, te wi e kon makandra, wi abi wan boen firi? So boen, wi moesoe abi a firi foe singi! (Jakobus 5:13) Foe troe, omoro wi e warderi a boen-ati foe Jehovah nanga en no-froedini boen-atifasi, omoro wi sa singi prèisesingi nanga wi heri-ati gi en.
San joe e piki?
◻ San na toe gron reide foe san ede wi moesoe prèise Jehovah?
◻ Na sortoe difrenti fasi wi kan prèise Jehovah?
◻ San na wán foe den moro moi fasi fa wi kan prèise Jehovah?
◻ Sortoe bijbel eksempre foe prèise Jehovah nanga jepi foe singi, wi abi?
◻ Na sortoe fasi wi kan handri foe sori warderi gi a singi foe wi Kownoekondre singi?
[Faki na tapoe bladzijde 9]
Njan boen foe den singi dati!
A e sori taki wan toe sma ben abi pikinso problema foe leri foeroe foe den singi. Ma na tra sei, wan toe gemeente no ben abi bigi problema foe singi moro foeroe foe den singi disi. Kande a wan-enkri sani di de fanowdoe foe kon leri sabi a sani di fosi wi no ben sabi, na foe doe pikinso moro moeiti. Te a gemeente kon sabi den singi disi kaba, dan foeroe tron a e warderi den moro leki den singi di no e aksi moeiti foe leri den. Dan ala sma ini a gemeente kan singi den nanga froetrow. Ija, den kan njan boen foe den singi dati!
[Faki na tapoe bladzijde 10]
Singi Kownoekondre singi na tapoe prisiri demakandra
Wi no moesoe singi Kownoekondre singi na a Kownoekondrezaal wawan. Paulus nanga Silas ben singi prèisesingi gi Jehovah di den ben de na ini strafoe-oso (Tori foe den Apostel 16:25). Èn a disipel Jakobus ben taki: „Wan sma de di abi wan boen firi? Meki a singi prèisesingi gi Gado” (Jakobus 5:13, foetoewortoe). Ala sma abi boen firi na tapoe prisiri demakandra. So boen, foe san ede oenoe no e singi Kownoekondre singi? Disi kan de spesroetoe wan toemoesi moi sani efoe a singi e go makandra nanga a piano noso a gitar. Noso, Kownoekondre singi de tapoe cassette-lolo di prei tapoe piano; foeroe osofamiri foe den Kotoigi abi na album foe den cassette-lolo disi. Den cassette-lolo no boen wawan foe go makandra nanga singi, ma den boen toe foe de leki moi background pokoe.
[Prenki na tapoe bladzijde 6, 7]
Baka di den ben kisi froeloesoe na a Redi Se, den Israèlsma ben sori a prisiri foe den nanga jepi foe singi
[Prenki na tapoe bladzijde 8]
Prisiri singi na wan pisi foe a kresten anbegi ini a ten disi