Joe sa de getrow leki Elia?
„Mi e seni a profeiti Elia kon gi oenoe, fosi Jehovah en bigi dei di e gi frede, e kon.” — MALEAKI 4:5.
1. Sortoe moeilek ten e kon, baka di Israèl de na ini a Pramisi Kondre so wan 500 jari kaba?
„WAN kondre pe merki nanga oni e lon” (Exodus 3:7, 8). Dati na san Jehovah Gado ben gi den Israèlsma, baka di a ben fri den foe a katibo foe Egipti na ini a di foe 16 jarihondro b.G.T. Ma loekoe! Feifi jarihondro pasa kaba, èn now a tin-lo kownoekondre foe Israèl de na ini wan tranga angriten. A moeilek foe feni groen grasi. Den meti e dede, èn dri nanga afoe jari langa no wan alen no fadon (1 Kownoe 18:5; Lukas 4:25). Fa a rampoe disi doe kon?
2. San meki wan moeilek ten doe kon na ini a heri kondre Israèl?
2 A moeilek ten disi kon foe di sma fadon komoto na bribi. Kownoe Akab, di ben pasa a Wet foe Gado, ben trow nanga Iseibèl, wan Kanan kownoe-oemapikin, èn a gi en pasi foe tjari a Ba-âl anbegi kon na ini Israèl. Moro ogri ete, Akab bow wan tempel gi a falsi gado disi na ini Samaria, a granfoto. Ija, sma kori den Israèlsma meki den bribi taki a Ba-âl anbegi sa meki den kisi froktoe bogobogo! Ma soleki fa Jehovah warskow, dan a kefar de now, taki den sa ’dede gowe foe a boen kondre foe den’. — Deuteronomium 7:3, 4; 11:16, 17; 1 Kownoe 16:30-33.
Wan toemoesi aparti tesi foe boeweisi soema na Gado
3. Fa a profeiti Elia e poti prakseri na tapoe a troetroe problema foe Israèl?
3 Te na angriten e bigin, dan Gado en getrow profeiti Elia, e taigi kownoe Akab: „So troetroe leki Jehovah, a Gado foe Israèl e libi, a wan di mi e tanapoe na en fesi, no wan dow noso alen no sa fadon na ini den jari disi, boiti na tapoe a komando foe mi wortoe!” (1 Kownoe 17:1) Baka di a kownoe ondrofeni a takroe kontroe foe a bariwroko disi, a e taki dati Elia e tjari rampoe kon na tapoe Israèl. Ma Elia e piki taki na foe Akab nanga na oso foe en ede meki den sani disi pasa, foe di den fadon komoto na bribi èn den tron Ba-âl anbegiman. Foe seti a tori, a profeiti foe Jehovah e gi kownoe Akab tranga foe tjari heri Israèl kon makandra na a bergi Karmel nanga den 450 profeiti foe Ba-âl èn nanga den 400 profeiti foe a santa postoe. Akab nanga den borgoe foe en e kon makandra drape, kande foe di den e howpoe taki na okasi sa tjari wan kaba kon na a dreiten. Ma Elia e poti prakseri na tapoe a tori di de moro serjoesoe. „O langa” a e aksi, „oenoe sa tan tingatinga na tapoe toe difrenti prakseri? Efoe Jehovah na a troe Gado, dan go waka na en baka; ma efoe a de Ba-âl, dan go waka na en baka.” Den Israèlsma no sabi san foe taki. — 1 Kownoe 18:18-21.
4. Nanga san Elia e kon foe piki na aksi soema na Gado?
4 Foeroe jari kaba den Israèlsma proeberi foe moksi na anbegi foe Jehovah nanga a Ba-âl bribi. Foe piki na tapoe na aksi soema na Gado, Elia e kon nanga wan strei. A sa sreka wan jongoe mankaw leki srakti-ofrandi, èn den profeiti foe Ba-âl sa sreka wan trawan. Dan Elia e taki: „Oenoe moesoe kari a nen foe oen gado, èn mi foe mi sei, sa kari a nen foe Jehovah; èn a moesoe pasa taki a troe Gado di e gi piki nanga jepi foe faja, en na a troe Gado” (1 Kownoe 18:23, 24). Proeberi foe si na ini joe prakseri, fa wan faja e komoto na hemel leki piki na tapoe wan begi!
5. Fa a e kon na krin taki na anbegi foe Ba-âl no abi no wan enkri waarde?
5 Elia e aksi den Ba-âl profeiti foe bigin. Den e sreka wan mankaw foe tjari dati leki srakti-ofrandi èn den e poti en na tapoe na altari. Dan den e tingatinga na lontoe na altari, ala di den e begi: „O Ba-âl, piki wi!” Disi e go doro „foe mamanten te go miti bakadina”. „Kari moro tranga,” Elia e dreigi den. Ba-âl moesoe e doe wan toemoesi prenspari sani, noso „kande a e sribi èn oenoe moesoe wiki en!” Sjatoe baka dati den profeiti foe Ba-âl e doe leki lawman. Loekoe! Den e koti densrefi nanga nefi, èn broedoe e lon komoto na den soro foe den. Èn wán babari e kon te ala den 450 sma e bigin bari moro tranga! Ma no wan piki no e kon. — 1 Kownoe 18:26-29.
6. Sortoe sani Elia e sreka gi a tesi di sa boeweisi soema na Gado?
6 Now Elia e kisi na okasi. A e bow na altari foe Jehovah baka, a e meki wan gotro na en lontoe, èn a e sreka a srakti-ofrandi. Dan a e meki den kanti watra go na tapoe na oedoe nanga a srakti-ofrandi. Den e kanti twarfoe bigi watrakan nanga watra go na tapoe na altari te leki a gotro srefi kon foeroe. Joe kan prakseri taki sma de na ini span te Elia e begi: „O Jehovah, a Gado foe Abraham, Isak nanga Israèl, meki sma kon sabi tide taki joe na Gado na ini Israèl èn mi na joe foetoeboi èn taki na foe joe wortoe ede meki mi doe ala den sani disi. Piki mi, o Jehovah, piki mi, so taki a pipel disi kan sabi taki joe, Jehovah, na a troe Gado èn joesrefi tjari na ati foe den kon baka.” — 1 Kownoe 18:30-37.
7, 8. (a) Fa Jehovah e piki na tapoe a begi foe Elia? (b) San na a bakapisi di e kon foe den sani di pasa na tapoe a bergi Karmel?
7 Leki wan piki na tapoe a begi foe Elia, ’a faja foe Jehovah e fadon komopo na hemel èn a e njan a srakti-ofrandi foe en, na oedoe, den ston, èn a doti foe gron èn a e leki a watra na ini a gotro’. A pipel e fadon go na tapoe den fesi èn den e taki: „Jehovah na a troe Gado! Jehovah na a troe Gado!” (1 Kownoe 18:38, 39) Nanga wan fasti bosroiti Elia e doe wan sani now. A e gi a komando: „Graboe den profeiti foe Ba-âl! No meki no wan foe den lowe!” Baka te den srakti den na ini a lagi presi foe Kison, dan doengroe wolkoe e foeroe a loktoe. Ai, te foe kaba, wan bigi alen e tjari wan kaba kon na a dreiten! — 1 Kownoe 18:40-45; teki gersi Deuteronomium 13:1-5.
8 Fa a de wan bigi dei! Jehovah wini a toemoesi aparti tesi disi di e boeweisi soema na Gado. Boiti dati, den sani disi e meki taki na ati foe foeroe Israèlsma e kon baka na Gado. Na so èn na tra fasi toe, Elia e sori foe de getrow leki wan profeiti, èn ensrefi abi foeroe foe doe nanga a profeititori.
„A profeiti Elia” di moesoe kon ete?
9. San den ben taki na fesi na ini Maleaki 4:5, 6?
9 Baka ten, Jehovah ben meki Maleaki taki na fesi: „Loekoe! Mi e seni a profeiti Elia kon gi oenoe, fosi Jehovah en bigi dei di e gi frede, e kon. Èn a moesoe tjari na ati foe papa kon baka na manpikin, èn na ati foe manpikin kon baka na papa; so taki mi no sa kon èn e naki grontapoe troetroe foe di mi e gi en abra na pori” (Maleaki 4:5, 6). Elia ben libi so wan 500 jari bifo den wortoe dati ben taki. Foe di disi ben de wan profeititori, dan den djoe foe a fosi jarihondro G.T. ben froewakti taki Elia ben o kon foe meki en kon troe. — Mateus 17:10.
10. Soema ben de na Elia di den ben taki foe en na fesi, èn fa wi doe sabi disi?
10 Dan soema ben de na Elia disi di ben o kon? En nen ben kon na krin di Jesus Krestes ben taki: „Sensi den dei foe Johanes a Dopoeman te leki now, a kownoekondre foe hemel na a marki di sma e doe moeiti foe doro en, èn den sma di e doe moeiti foe doro en, e graboe en hori. Bika den alamala, den Profeiti nanga a Wet, ben taki profeititori te leki Johanes kon; èn efoe oenoe wani teki en: Ensrefi na ’Elia, di moesoe kon’.” Ija, Johanes, a Dopoeman ben de a sma di den ben taki na fesi dati a ben o de a prenki foe Elia (Mateus 11:12-14; Markus 9:11-13). Wan engel ben taigi Johanes papa Sakaria, taki Johanes ben o abi „a jeje nanga a krakti foe Elia” èn a ben o „sreka gi Jehovah wan pipel di de klariklari” (Lukas 1:17). A dopoe di Johanes ben doe, ben de wan fasi fa wan sma ben kan sori na poebliki taki a ben abi berow foe a sondoe di a sondoe teige a Wet, di ben moesoe tjari den djoe go na Krestes (Lukas 3:3-6; Galasiasma 3:24). So boen, a wroko foe Johanes ben de foe ’sreka gi Jehovah wan pipel di ben de klariklari’.
11. San Petrus ben taki na a Pinksterfesa foe a „dei foe Jehovah”, èn o ten a dei dati ben kon?
11 A wroko foe Johanes a Dopoeman leki „Elia”, ben sori taki wan „dei foe Jehovah” ben de krosibei. Na apostel Petrus ben sori toe taki a dei dati, di Gado ben o opo doe wan sani teige den feanti foe en èn taki a ben o kibri a pipel foe en, ben de toemoesi krosibei. A ben tjari kon na krin taki den froewondroe sani di ben pasa na a Pinksterfesa foe 33 G.T., ben de wan kontroe foe a profeititori foe Joèl di ben taki foe a kanti di a jeje foe Gado ben o kanti kon na tapoe sma. Petrus ben sori taki disi ben o pasa bifo „a bigi èn barinen dei foe Jehovah” (Tori foe den Apostel 2:16-21; Joèl 2:28-32). A ben de na ini 70 G.T., taki Jehovah ben meki en Wortoe kon troe foe di a ben meki den legre foe Rome tjari a kroetoe foe en kon na tapoe a nâsi di ben drai en baka gi En Manpikin. — Danièl 9:24-27; Johanes 19:15.
12. (a) San Paulus nanga Petrus ben taki foe a „dei foe Jehovah” di ben de na pasi e kon? (b) Foe san ede a de seiker taki wan sani ben o pasa soleki fa a wroko foe Elia e sori?
12 Ma moro ben o kon ete baka 70 G.T. Na apostel Paulus ben taki dati wan „dei foe Jehovah” di ben o kon, ben o abi foe doe nanga a ten foe Jesus Krestes en denoja. Boiti dati, na apostel Petrus ben taki foe a dei dati ini a tori foe „njoen hemel nanga wan njoen grontapoe” di ben moesoe kon ete (2 Tesalonikasma 2:1, 2; 2 Petrus 3:10-13). Hori na prakseri taki Johanes a Dopoeman ben doe wan wroko di ben gersi di foe Elia, bifo a „dei foe Jehovah” ben kon na ini 70 G.T. Ala den sani disi makandra e sori krin taki ete wan tra sani ben o pasa, soleki fa a wroko di Elia ben doe, ben prenki. San na dati?
Den abi a jeje foe Elia
13, 14. (a) Fa a wroko foe Elia nanga di foe den disiten salfoe kresten, gersi makandra? (b) San den sma foe krestenhèit di ben fadon komoto na bribi, doe?
13 A wroko foe Elia no wawan ben gersi a wroko di Johanes a Dopoeman ben doe, ma a gersi so srefi a wroko di den salfoe kresten e doe na ini a moeilek ten disi di e tjari wi go na a „dei foe Jehovah” di de na pasi (2 Timoteus 3:1-5). Nanga a jeje nanga krakti di Elia ben abi, den na sma di e horibaka na wan loyaal fasi gi a troe anbegi. Èn fa disi ben de fanowdoe! Baka a dede foe den apostel foe Krestes, sma ben fadon komoto na ini a troe krestendom, neleki fa foeroe sma ben anbegi Ba-âl na ini Israèl na ini den dei foe Elia (2 Petrus 2:1). Sma di ben kari densrefi kresten ben bigin moksi krestendom nanga falsi relisi leri nanga doe. Foe eksempre, den ben teki a heiden leri abra di no de akroederi bijbel èn di e taki dati libisma abi wan sili di no man dede (Preikiman 9:5, 10; Esekièl 18:4). Den sma foe krestenhèit di ben fadon komoto na bribi, tapoe foe gebroiki a nen foe a wan-enkri troe Gado, Jehovah. Na presi foe dati, den e anbegi wan Dri-wánfasi. Den teki a gwenti abra toe di sma di ben anbegi Ba-âl ben abi, taki den e boigi gi popki di sma meki foe Jesus nanga en mama Maria (Romesma 1:23; 1 Johanes 5:21). Ma dati no ben de ala.
14 Sensi a di foe 19 jarihondro, den fesiman foe den kerki foe krestenhèit ben bigin taki dati den e tweifri na foeroe pisi foe bijbel. Foe eksempre, den ben drai den baka gi a Genesis tori di e taki foe a kria di Gado kria sani èn den ben boigi densrefi, foe taki en so, gi na evolutie leri, di den e kari wan „sani foe sabidensi”. Disi de krinkrin kontrari a leri foe Jesus Krestes nanga den apostel foe en (Mateus 19:4, 5; 1 Korentesma 15:47). Ma neleki Jesus nanga den fositen bakaman foe en, den kresten na ini a ten disi di kisi salfoe nanga santa jeje, e hori a bijbel tori di e taki foe a kria di Gado kria sani, hei. — Genesis 1:27.
15, 16. Soema kisi jeje njanjan doronomo, tra fasi leki fa a de nanga krestenhèit, èn nanga jepi foe sortoe sani?
15 Di grontapoe ben kon na ini „a ten foe a kaba”, wan angriten na jejefasi ben teki krestenhèit abra (Danièl 12:4; Amos 8:11, 12). Ma doronomo a pikin groepoe salfoe kresten ben njan boen foe a jeje njanjan di Gado ben gi „na a reti ten”, neleki fa Jehovah ben sorgoe taki Elia ben kisi njanjan na ini na angriten foe en ten (Mateus 24:45; 1 Kownoe 17:6, 13-16). Baka ten, den getrow foetoeboi foe Gado disi, di sma ben sabi fosi leki Internationaal Bijbel Ondrosoekoeman, ben kisi a nen Jehovah Kotoigi akroederi san skrifi na ini bijbel. — Jesaja 43:10.
16 Elia ben libi akroederi a nen foe en, di wani taki „Mi Gado na Jehovah”. A Waktitoren, di de na officieel tijdschrift foe Jehovah en foetoeboi na grontapoe, gebroiki a nen foe Gado doronomo. Foe taki en leti, en di foe toe uitgave (augustus 1879) ben sori taki den abi na overtoigi taki Jehovah ben horibaka gi a tijdschrift. A tijdschrift disi nanga tra poeblikâsi foe a Waktitoren Genootschap, e poeroe kon na doro san na den sani di krestenhèit nanga a tra pisi foe Babilon a Bigiwan, a grontapoemakti foe falsi relisi e leri, sani di no de akroederi bijbel, ala di den poeblikâsi disi e hori a troefasi foe Gado Wortoe, bijbel, hei. — 2 Timoteus 3:16, 17; Openbaring 18:1-5.
Getrow na ondro tesi
17, 18. San Iseibèl ben doe di den ben kiri den profeiti foe Ba-âl, ma fa Elia ben kisi jepi?
17 A fasi fa den kerki tiriman ben doe di den bere poeroe kon na doro, ben de neleki fa Iseibèl ben doe di a ben kon sabi taki Elia ben kiri den profeiti foe Ba-âl. A ben seni wan boskopoe gi a getrow profeiti foe Jehovah, èn ben sweri taki a ben o meki den kiri Elia. Disi no ben de wan soso pramisi, bika Iseibèl ben kiri foeroe profeiti foe Gado kaba. Foe di Elia ben frede, meki a ben lowe go na a zuid-westsei foe Berseiba. A ben libi a foetoeboi foe en drape, èn a ben go moro fara, te na ini a gran sabana, ala di a ben begi taki a ben wani dede. Ma Jehovah no ben libi a profeiti foe en. Wan engel ben kon na Elia foe sreka en gi wan langa waka go na a bergi Horeb. Na a fasi dati a ben kisi krakti foe teki a waka foe 40 dei di ben langa moro leki 300 kilometer. Na Horeb, Gado ben taki nanga en, baka di a ben sori a makti foe en na wan fasi di e gi lespeki frede, na ini wan bigi winti, wan gronseki, nanga wan faja. Jehovah no ben de na ini den sani disi. Den ben de sani foe sori en santa jeje, noso wroko krakti. Baka dati Jehovah ben taki nanga a profeiti foe en. Prakseri fa na ondrofenitori disi ben tranga Elia (1 Kownoe 19:1-12). Kon wi taki efoe dati pasa nanga wi taki, neleki Elia, wi e kon frede pikinso te feanti foe a troe anbegi e pramisi wi foe doe wi ogri? Na ondrofeni foe en moesoe jepi wi foe froestan taki Jehovah no e libi a pipel foe en. — 1 Samuèl 12:22.
18 Gado ben sori krin taki Elia ben abi wroko foe doe ete leki wan profeiti. Boiti dati, ala di Elia ben denki taki a ben de a wan-enkri anbegiman foe a troe Gado na ini Israèl, tokoe Jehovah ben sori en taki 7000 sma no ben boigi gi Ba-âl. Dan Gado ben seni Elia go doe en wroko baka (1 Kownoe 19:13-18). Neleki fa a ben de nanga Elia, na so feanti foe a troe anbegi e hari kon na wi baka kande. Kande wi e tron sma di trawan e froefolgoe hebi, soleki fa Jesus ben taki na fesi (Johanes 15:17-20). A kan taki son leisi wi e kon frede. Ma wi kan de leki Elia, di ben kisi djaranti foe Gado èn baka dati a ben horidoro getrow na ini a diniwroko foe Jehovah.
19. San den salfoe kresten ben ondrofeni na ini a ten foe a Fosi Grontapoefeti?
19 Foe a hebi froefolgoe ede di ben kon na a ten foe a Fosi Grontapoefeti, meki son salfoe kresten ben broko kindi gi frede èn den ben tapoe foe preiki. Den ben abi a fowtoe prakseri taki a wroko foe den na grontapoe ben kaba. Ma Gado no ben drai en baka gi den. Na presi foe dati, a ben horibaka gi den na wan safri-atifasi, neleki fa a ben sorgoe taki Elia ben kisi njanjan. Neleki Elia, den getrow salfoewan ben meki Gado poti den kon reti baka èn den no ben de inaktief moro. Na ai foe den ben opo, so taki den ben si a bigi grani di den abi foe preiki a Kownoekondre boskopoe.
20. Sortoe grani den sma di de getrow leki Elia, e kisi na ini a ten disi?
20 Na ini Jesus profeititori foe en denoja, a ben tjari a wroko kon na krin di ben o doe na heri grontapoe èn di ben o kon na wan kaba bifo a kaba foe a godelowsoe seti foe sani disi (Mateus 24:14). Na ini a ten disi, salfoe kresten nanga den miljoenmiljoen kompe foe den di e froewakti foe libi na ini wan paradijs grontapoe, e doe a wroko disi. Foe doe a Kownoekondre preikiwroko te leki a kon na wan kaba, na wan grani di den wan kisi di de getrow leki Elia.
De getrow leki Elia
21, 22. (a) Na ini sortoe wroko den salfoe kresten e teki fesi, na ini a ten disi? (b) Nanga sortoe jepi a preikiwroko e doe, èn foe san ede a de fanowdoe?
21 A pikin fikapisi foe troetroe salfoe kresten, di abi a faja leki di foe Elia, teki a frantiwortoe foe den foe sorgoe gi den grontapoe afersi foe Kownoe Jesus Krestes di poti na tapoe kownoestoeroe (Mateus 24:47). Èn moro leki 60 jari now, Gado gebroiki den salfoewan disi foe teki fesi na ini a wroko foe meki disipel foe sma di a gi a toemoesi moi howpoe foe libi foe têgo na ini wan paradijs grontapoe (Mateus 28:19, 20). Den miljoenmiljoen sma disi kan de nanga tangi troetroe taki den wan toe salfoewan di de ete, e sorgoe fajafaja èn na wan getrow fasi gi den frantiwortoe di den abi.
22 Onvolmaakti libisma doe a Kownoekondre preikiwroko disi èn soso nanga a krakti di Jehovah e gi den wan di e froetrow tapoe en nanga jepi foe begi. „Elia ben de wan man nanga den srefi firi leki di foe wi,” na apostel Jakobus ben taki di a ben taki foe na eksempre di a profeiti ben gi ini a tori foe begi, foe sori a krakti di a begi foe wan opregti libisma abi (Jakobus 5:16-18). A no ala ten Elia ben taki profeititori noso ben doe wondroe. A ben abi den srefi firi nanga swakifasi di wi leki libisma abi, ma a ben dini Gado getrow. Foe di wi abi a jepi foe Gado toe èn a e tranga wi, meki wi kan de getrow leki Elia.
23. Foe san ede wi abi boen reide foe tan getrow èn positief?
23 Wi abi nofo boen reide foe de getrow èn positief. Memre taki Johanes a Dopoeman ben doe wan wroko leki di foe Elia bifo a „dei foe Jehovah” ben kon na ini 70 G.T. Na heri grontapoe, den salfoe kresten, di abi a jeje nanga krakti leki di foe Elia, doe wan srefi sortoe wroko di Gado gi. Disi e sori krin taki a bigi „dei foe Jehovah” de krosibei.
San joe ben sa piki?
◻ Fa boeweisi ben gi na tapoe a bergi Karmel taki Jehovah na Gado?
◻ Soema ben de na ’Elia di ben moesoe kon’, èn san a ben doe?
◻ Fa salfoe kresten na ini a ten disi sori taki den abi a jeje foe Elia?
◻ Foe san ede wi man de getrow neleki Elia?
[Faki na tapoe bladzijde 15]
Na sortoe hemel Elia ben opo go?
„A BEN pasa taki di [Elia nanga Elisa] ben e waka go moro fara, ala di den ben e taki, we, loekoe! wan faja fetiwagi èn faja asi, èn den ben prati den toe dati; èn Elia ben opo go na hemel na ini a bigi winti.” — 2 Kownoe 2:11.
San a wortoe „hemel” wani taki ini a kefal disi? Son leisi den e gebroiki a wortoe gi a jeje tanpresi foe Gado nanga den engel manpikin foe en (Mateus 6:9; 18:10). „Hemel” kan sori toe tapoe a troetroe universum (Deuteronomium 4:19). Èn bijbel e gebroiki a wortoe disi foe taki foe a loktoe di de na lontoe grontapoe, pe fowroe e frei èn winti e wai. — Psalm 78:26; Mateus 6:26.
Na sortoewan foe den hemel disi a profeiti Elia ben opo go? Soleki fa a sori, dan na ini a loktoe foe grontapoe, a ben tjari go abra na wan tra presi na grontapoe. Foeroe jari baka dati, Elia ben de na grontapoe ete, bika a ben skrifi wan brifi gi kownoe Joram foe Juda (2 Kroniki 21:1, 12-15). Jesus Krestes ben sori baka ten, taki Elia no ben opo go na a jeje tanpresi foe Jehovah Gado, foe di a ben froeklari: „No wan sma opo go na hemel, boiti a sma di saka kon foe hemel, a Manpikin foe libisma”, dati na Jesus srefi (Johanes 3:13). A pasi foe go na hemel ben opo gi onvolmaakti libisma fosi, baka di Jesus dede, ben kisi wan opobaka èn ben go na hemel. — Johanes 14:2, 3; Hebrewsma 9:24; 10:19, 20.