Fa foe loesoe problema na wan switi fasi

NA OGRI di libisma e doe nanga tranga, de so langa kaba leki a libisma famiri srefi. Ogri di e doe nanga tranga de foe feni ini bijbel a fosi tron na ini a kefal foe Kain, a brada foe Abel èn a moro owroe manpikin foe a fosi libisma paar. Di Gado ben feni na ofrandi foe Abel moro boen leki di foe Kain, dan Kain „ben bigin kisi bigi atibron”. Fa Kain ben handri a situwâsi disi? „Kain ben bigin feti nanga en brada Abel èn ben kiri en.” Baka dati a ben de na ini bigi problema nanga Gado (Genesis 4:5, 8-12). Na ogri di Kain ben doe nanga tranga, no ben poeroe a takroe nen di a ben abi na a Kriaman foe en.

Fa wi kan wai pasi gi a waka nanga libi di Kain ben teki foe go gebroiki ogri na skin sei foe loesoe problema?

Foe ogri di e doe nanga tranga, go na wan mi-no-ke fasi

Poti prakseri na tapoe wan man di ben loekoe fa den ben kiri Stefanus, a fosi kresten di den kiri foe en bribi ede, èn a man ben feni en boen taki den doe so (Tori foe den Apostel 7:58; 8:1). A man, Saulus foe Tarsus, no ben agri nanga a relisi foe Stefanus èn a ben horibaka gi a kiri di den ben kiri Stefanus na wan ogri-ati fasi leki wan reti fasi foe tapoe a wroko foe Stefanus. A troe taki kande Saulus no ben doe ogri nanga tranga na ini ala sani foe en libi. Tokoe a ben wani teki ogri di e doe nanga tranga leki wan fasi foe loesoe problema. Wantewante baka a dede foe Stefanus, dan Saulus „ben handri na wan ogri-ati fasi nanga a [kresten] gemeente. A ben broko go na ini a wán oso baka a trawan, ben srepi man èn so srefi oemasma kon na dorosei èn a ben tjari den go poti na doengroe-oso.” — Tori foe den Apostel 8:3.

Soleki fa a bijbel sabiman Albert Barnes e taki, dan a Griki wortoe di vertaal djaso nanga „handri na wan ogri-ati fasi” e sori tapoe a toemoesi ogri fasi fa werdri meti soleki lew nanga wolfoe, kan tjari pori kon. „Saulus”, na so Barnes e tjari kon na krin, „ben rigeri srefisrefi nanga a kerki, neleki wan werdri meti — wan tranga fasi foe taki en, èn dati e sori tapoe a fajafasi nanga na atibronfasi fa a ben froefolgoe den sma.” Di Saulus ben go na Damaskus foe fanga moro bakaman foe Krestes, a ben „wani kiri den disipel foe Masra [Krestes] èn ben sori foe de wan kefar gi den ete”. Di a ben de na pasi, Jesus di ben opo baka, ben taki nanga Saulus, èn dati ben meki Saulus drai en libi kon tron wan troe kresten. — Tori foe den Apostel 9:1-19.

Baka di Saulus drai en libi na so wan fasi, dan a ben kenki a fasi fa a ben handri nanga trawan. Wan sani di ben pasa so wan 16 jari baka dati, e sori taki Saulus ben kenki en libi. Wan groepoe sma ben kon na a gemeente pe Saulus ben de na Antiokia, èn den ben gi den kresten drape tranga foe hori densrefi na a Wet foe Moses. „Wan bigi kesekese” ben kon leki bakapisi foe dati. Saulus, di na a ten dati den ben kon sabi moro boen leki Paulus, ben teki wan sei na ini a kesekese. Soleki fa a sori, dan den ben abi wan fajafaja kesekese. Ma Paulus no ben go doe ogri nanga tranga. Na presi foe dati, a ben agri nanga a bosroiti di a gemeente ben teki foe tjari na afersi gi den apostel nanga owroeman foe a gemeente na Jerusalem. — Tori foe den Apostel 15:1, 2.

Na Jerusalem, agen „foeroe kesekese” ben feni presi na a konmakandra foe den owroeman. Paulus ben wakti te leki „a heri groepoe sma ben kon pî” èn baka dati a ben froeteri foe a kefalek boen wroko di Gado jeje ben doe na mindri den bribisma di no ben besnij. Baka wan takimakandra nanga jepi foe den Boekoe foe bijbel, dan den apostel nanga den owroeman foe Jerusalem ben „kon agri nanga makandra leki wán man”, foe no poti hebi di no de fanowdoe tapoe den bribisma di no ben besnij, ma foe froemane den „foe tan farawe foe sani di òfer leki srakti-ofrandi gi kroektoe gado èn foe broedoe èn foe sani di ben tjokro kiri èn foe hoeroedoe” (Tori foe den Apostel 15:3-29). Foe troe, Paulus ben kenki. A ben leri foe loesoe kesekese sondro foe doe ogri di e doe nanga tranga.

Kakafoetoe gi gwenti foe handri na wan ogri-ati fasi

„Wan srafoe foe Masra no abi foe feti,” na so Paulus ben froemane baka ten, „ma a moesoe abi switifasi gi ala sma, bekwaam foe gi leri, e hori ensrefi te ogri e miti en, e gi leri na wan safri-ati fasi na den wan di no wani arki” (2 Timoteus 2:24, 25). Paulus ben gi Timoteus, wan moro jongoe owroeman, tranga foe handri moeilek afersi na wan safri fasi sondro foe broeja. Paulus ben si sani fa den de troetroe. A ben sabi taki ati foe sma ben kan kon faja, srefi na mindri kresten (Tori foe den Apostel 15:37-41). A ben sabi heri boen foe san ede a ben gi leki rai: „Kisi atibron èn tokoe no sondoe; no meki son dongo ala di joe de na ini wan atibron fasi” (Efeisesma 4:26). Te wan sma dwengi ensrefi te en ati e bron, sondro foe a lasi ensrefi na ini a atibron foe en, dan dati na a joisti fasi foe handri nanga den sortoe firi dati. Ma fa wan sma kan doe disi?

Na ini a ten disi, a no de makriki foe dwengi joesrefi te joe ati e bron. „Foe soekoe trobi, dati de na modo now”, Dr. Deborah Prothrow-Stith di de wan ondro-driktoro foe a Harvard School of Public Health, ben taki. „Foe taki en leti, den eigifasi foe feni en nanga makandra — soleki negosi, skeki, firi gi trawan, gi sma pardon — na eigifasi di sma gwenti taki dati na bobosjaki abi den.” Tokoe, den eigifasi dati na eigifasi foe man-nengre, èn den de wan sroto foe dwengi wisrefi foe no go doe ogri di e doe nanga tranga èn di kan koekoe inisei foe wi.

Di Paulus ben tron wan kresten, a ben leri wan moro boen fasi foe handri te sma abi difrenti prakseri foe wan tori. A fasi dati ben abi en gron tapoe den leri foe bijbel. Leki wan sabiman di kisi leri na ini a djoe bribi, Paulus ben sabi den Hebrew Boekoe foe bijbel. A ben moesoe foe sabi den sortoe tekst soleki: „No kisi bigi-ai gi a man foe tranga ogridoe, èn no teki no wan foe den pasi foe en.” „A man di no e ati-bron esi, moro boen leki wan tranga man, èn a man di man dwengi en jeje [moro boen] leki a wan di e teki wan foto abra.” „Neleki wan foto di den broko go na ini, sondro wan skotoe, na so a man de di no man dwengi en jeje” (Odo 3:31; 16:32; 25:28). Tokoe, a sabi dati no ben tapoe Paulus, bifo a ben drai en libi, foe go doe den kresten ogri na wan ogri-ati fasi (Galasiasma 1:13, 14). Ma san ben jepi Paulus, leki wan kresten, foe go taki-go-taki-kon nanga sma èn foe overtoigi sma, na presi foe doe tranga ogri foe loesoe afersi di ben de kontrari makandra èn pe foeroe firi foe sma ben de ini a tori?

Paulus ben gi wi wan sroto di a ben taki: „Tron sma di e waka baka mi, neleki fa mi e waka na Krestes baka” (1 Korentesma 11:1). Paulus ben abi boen foeroe warderi gi den sani di Jesus Krestes ben doe gi en (1 Timoteus 1:13, 14). Krestes ben tron a model foe Paulus waka na en baka. A ben sabi fa Jesus ben pina gi a boen foe a sondoe libisma famiri (Hebrewsma 2:18; 5:8-10). Paulus ben kan taki nanga reti dati a profeititori foe Jesaja di ben taki foe a Mesias ben kon troe na ini Jesus: „A ben kon hebi gi en, èn a ben meki den kwinsi en; tokoe a no ben sa opo en mofo. Neleki wan skapoe den ben tjari en go foe srakti; èn neleki wan oema-skapoe di kon babaw na fesi den sma di e sker en wiwiri, na so a no ben opo en mofo toe” (Jesaja 53:7). Na apostel Petrus ben skrifi: „Te den ben skempi en [Jesus], a no ben skempi den baka. Te a ben pina, a no ben pramisi den foe doe den ogri, ma a ben tan saka ensrefi na ondro a wan di e kroetoe sma na wan regtfardiki fasi.” — 1 Petrus 2:23, 24.

A warderi di Paulus ben abi gi a fasi fa Jesus Krestes ben handri nanga span situwâsi, ben boeweigi Paulus foe kenki. A ben kan froemane den kompe bribiman foe en: „Tan froedrage makandra en gi makandra pardon na wan fri fasi efoe a wan abi wan sani foe kragi foe a trawan. Soleki fa Jehovah gi oenoe pardon na wan fri fasi, na so oenoe moesoe doe toe” (Kolosesma 3:13). A no de nofo foe erken nomo taki a no de fanowdoe foe doe tranga ogri. Warderi gi den sani di Jehovah nanga Jesus Krestes doe gi wi, e jepi wi foe kisi a sani di de fanowdoe foe boeweigi wi foe wini a gwenti di wi abi foe doe ogri nanga tranga.

A kan?

Wán man na Japan ben abi so wan tranga sani fanowdoe foe boeweigi en. En papa, wan sroedati di ben de wan faja-ati sma, ben basi na osofamiri nanga ogri di e doe nanga tranga. Foe di ensrefi ben pina foe ogri di doe nanga tranga èn a ben si fa en mama ben pina na a srefi fasi toe, dati meki ensrefi ben kon kisi na eigifasi foe wan ogriman di e doe ogri nanga tranga. A ben waka nanga toe samoerai feti-owroe di no ben langa a srefi èn di a ben gebroiki foe loesoe problema èn so srefi foe frede sma.

Di en wefi ben bigin studeri bijbel, a ben sidon na a studie, sondro taki a ben si a studie leki wan serjoesoe sani. Ma di a ben leisi wan pikin boekoe di ben abi leki nen A boen njoensoe disi foe a Kownoekondre,a dan dati ben kenki en libi. Foe san ede? „Di mi ben leisi san ben skrifi na ondro den ondro-ede prakseri: ’Krestes Jesus’ nanga ’A Loesoe-paiman’, mi ben firi sjen”, na so a e tjari kon na krin. „Ala di mi ben libi wan ròf libi, tokoe ete mi ben lobi foe sori switifasi na den wan di mi ben kroederi boen nanga den. Mi ben prisiri foe meki den mati foe mi firi kolokoe, ma soso te dati no ben sa gi mi problema nanga mi eigi libi. We, a Manpikin foe Gado, Jesus, ben de klariklari foe gi en libi gi a heri libisma famiri, so srefi den sortoe sma leki mi. Mi ben froewondroe srefisrefi, neleki wan sma ben naki mi nanga wan oedoe amra.”

A ben tapoe foe abi demakandra nanga den fosi mati foe en èn heri-esi a ben skrifi en nen na a theokrasia diniwroko-skoro na ini wan foe den gemeente foe Jehovah Kotoigi. A skoro disi e jepi sma foe kisi a koni foe leri tra sma bijbel. A skoro programa ben tjari winimarki gi a man disi. A e memre: „Di mi ben jongoe, dan doronomo mi ben tapoe skreki gi trawan èn ben doe ogri nanga tranga, bika mi no ben sabi fa foe froeteri trawan fa mi e firi. Di mi ben leri fa foe taigi trawan san mi e prakseri, dan mi ben bigin taki-go-taki-kon nanga den na presi foe doe ogri nanga tranga.”

A man disi ben teki a fasi fa Krestes ben libi, neleki fa Paulus ben doe dati? A ben kisi tesi na tapoe a bribi foe en, di wan sma di ben de wan mati foe en fosi èn di a ben tai nanga en nanga wan sweri foe bradafasi, ben proeberi foe tapoe en foe tron wan kresten. A „mati” foe en ben naki en èn ben kosi Jehovah, a Gado foe en. A man di fosi ben de wan man di ben doe ogri nanga tranga, ben dwengi ensrefi èn a ben aksi a trawan pardon foe di a no ben man hori ensrefi moro na a sweri. A „brada” foe en ben lasi-ati èn ben gowe libi en.

Foe di a man disi di fosi ben e atibron, ben wini a gwenti foe doe ogri nanga tranga, a man disi ben kisi foeroe brada nanga sisa na jejefasi di ben de na ini wánfasi na ini a lobi di den ben lobi Gado nanga a sma na den sei (Kolosesma 3:14). Foe taki en leti, moro leki 20 jari baka di a man disi tron wan kresten di gi ensrefi abra, a e dini now leki wan opziener di e rèis foe Jehovah Kotoigi. Fa a de wan prisiri gi a man disi foe gebroiki bijbel foe sori trawan taki sma di de leki werdri meti, kan leri foe loesoe den kesekese foe den sondro foe doe ogri nanga tranga, neleki fa en ben leri dati! Èn fa a de wan bigi grani gi en foe sori go na a bigi kontroe foe den profeiti wortoe: „Sma no sa doe no wan sortoe ogri èn no sa pori no wan sani na tapoe heri mi santa bergi; bika grontapoe seiker sa kon foeroe nanga a sabi foe Jehovah, soleki fa watra e tapoe se.” — Jesaja 11:9.

Neleki na apostel Paulus èn neleki a man disi di ben doe ogri nanga tranga fosi, joesrefi kan leri fa foe handri na ini situwâsi di e meki joe atibron, e loesoe problema na wan switi fasi. Jehovah Kotoigi na a presi pe joe e libi, sa prisiri foe jepi joe.

[Foetoewortoe]

[Prenspari pisi na tapoe bladzijde 5]

Paulus ben si sani fa den de troetroe. A ben sabi taki sma ati ben kan kon faja, srefi na mindri kresten.

[Prenki na tapoe bladzijde 7]

A warderi di wi e warderi san Gado doe gi wi, e meki wi abi switi matifasi