Gebroiki yu libi na a moro bun fasi!
1 Na a kongres di wi ben abi no so langa pasa, wi ben yere wan lezing tapu sonde mamanten di ben abi a nen: „Yongu sma—Sreka sani gi a ten di de na un fesi makandra nanga Yehovah en organisâsi”. A takiman ben poti den prenspari aksi disi: „Yonguwan—San unu o du nanga un libi? Yu wani abi a moro bun libi di wan sma kan feni? Fa yu sabi san na a moro bun libi? Suma kan sabi san na a moro bun libi?”
2 Grontapusma e taki dati wan sma abi wan kefalek bun libi te a sma dati man satisferi den lostu fu a skin, te a e meki furu moni, te a abi furu gudu, èn te a abi wan kefalek bun wroko. Furu papa nanga mama, leriman nanga tra sma e sori nanga sani di den e taki èn nanga a du fu den, taki den e horibaka gi a denki disi. Ma san grontapusma e si leki „wan bun libi”, no abi noti fu du nanga yeye sani noso nanga a sani di Gado e si leki wan bun libi.—Luk. 12:15; 1 Yoh. 2:15-17.
3 Yehovah Gado sabi san „moro bun” gi wi alamala èn sosrefi gi ala yonguwan. Yehovah e gi unu a rai fu „membre da Soema disi ben meki joe na joe jongoe tem” (Preik. 12:1, Da Bijbel na ini Sranantongo). Yehovah sabi suma na yu, èn a e luku fu si san yu o du nanga yu libi (Ps. 11:4, 5a). Sortu sma a e si te a e luku yu? Furu yonguwan kisi yepi fu den papa nanga mama fu go na ini a preikiwroko èn te fu kaba den ben teki a bosroiti fu gi den libi abra na Yehovah èn teki dopu. Someni yonguwan ben ondrofeni taki a libi fu den kon abi wan marki èn den abi moro prisiri fu di den go na ini a furuten diniwroko, baka di den dopu. Disi na wan marki di yu man doro?
4 Na a kongres wi ben kisi a traktaat di abi leki nen Yonguwan—San unu o du nanga un libi? A no de fu taki dati yu ben leisi en wantewante. Ma yu ben prakseri dan fa yu kan gebroiki a deki-ati nanga den rai di ben tyari kon na fesi na ini a traktaat disi? Na so fasi yu sa poti wan fondamenti di sa yepi yu fu sreka sani makandra nanga Yehovah en organisâsi fu kisi têgo libi (Fil. 2:16; 1 Tim. 6:19). Na ini a nyun grontapu fu Yehovah, yu sa man abi a moro bun libi, èn yu sa abi a grani nanga a howpu fu abi a moro bun libi di yu kan feni, nownow èn sosrefi na ini a ten di de na yu fesi!