Gebroiki a koni di yu abi fu taki wan tra tongo fu yepi moro sma
1 Soleki fa Openbaring 14:6 e taki, dan ’na engel di e frei na mindrisei fu hemel’ e meki têgo bun nyunsu bekènti „gi ibri nâsi nanga lo nanga tongo nanga pipel”. Na engel disi e sori go na a grupu fu boskopuman fu hemel di wi no man si. Den engel disi e tiri na organisâsi fu Yehovah di wi man si na grontapu. Yu kan gebroiki a koni di yu abi fu taki wan tra tongo fu wroko makandra nanga den engel fu yepi moro sma?
2 Now a e sori taki moro nanga moro sma na ini Sranan e taki wan tra tongo. Fu eksempre, na ini wan tu kontren furu Brasyonsma nanga Haitisma e libi na makandra. Tra grupu sma, soleki sma di e taki Sneisitongo nanga Spanyorotongo e libi na ala sei fu Sranan. Fa wi kan yepi den sma di e taki wan tra tongo? Nownowde wan Potogisi grupu de kaba di e kon makandra ibri sonde mamanten na ini wan fu den gebow pe gemeente Combé de. A grupu disi e yepi spesrutu den sma di wani sabi moro, ma di e taki soso Potogisitongo noso Spanyorotongo. A grupu di e taki Yanpaneisitongo e hori wan konmakandra tu leisi na ini wan mun na ini a Kownukondre zaal fu gemeente Combé. Na ini a Kownukondre zaal fu gemeente West, wan grupu fu dofusma e hori publiki konmakandra tapu a fosi sonde fu ibri mun. Sosrefi wan tu Haitisma de di wani sabi moro èn di e kon doronomo na den konmakandra fu gemeente Garnizoenspad nanga Pontbuiten. No solanga pasa wan tu sma fu den grupu disi tron preikiman fu a bun nyunsu! Sobun, disi e sori taki furu sma de na ini Sranan di e taki wan tra tongo èn di wani sabi moro.
3 Fu san ede a de prenspari fu taki nanga wan sma na ini en eigi tongo? Wan ondrofenitori fu wan sisa e sori krin fu san ede a de prenspari. Wan uma di e taki Sneisitongo ben kisi den tijdschrift doronomo fu wan sisa di e taki Ingrisitongo, ma na uma disi no ben wani studeri Bijbel di a sisa ben aksi en wan tu leisi. Ma wan tra sisa, di ben e leri Sneisitongo, gi en wan buku di skrifi na ini en eigi tongo. Na uma disi teki a buku wantewante èn a ben wani studeri Bijbel. Disi ben pasa fu di a tra sisa meki muiti fu taki wan tu wortu na ini a tongo fu a Sneisi-uma.—Teki gersi Tori fu den Apostel 22:2.
4 Yu e taki wan tra tongo bun, boiti Bakratongo, noso Ingrisitongo? Yu man èn yu wani froisi go na wan tra presi pe moro preikiman de fanowdu di e taki wan spesrutu tongo? Fu san ede yu no e taki nanga den owruman fu yu gemeente fu a tori disi? Efu den denki taki yu man du disi, dan yu kan skrifi wan brifi go na a bijkantoro èn den owruman musu skrifi wan brifi sosrefi pe den e sori taki yu abi a koni fu man taki a spesrutu tongo dati. Wi wani taki nanga ala sma fu a boskopu di skrifi na ini Openbaring 14:7, di e taki: „Frede Gado èn gi en glori.” Yu man gebroiki a koni di yu abi fu taki wan tra tongo fu di yu e yepi moro sma? Leki bakapisi fu dati yu sa abi furu prisiri èn yu sa kisi furu blesi.—Odo 10:22.