No feti baka den „soso sani”

¹ Wan pôpi fasi fu taki nanga makandra tide, na fu seni brifi noso boskopu gi makandra nanga yepi fu computer (E-mail). A kan de wan bun sani fu gebroiki a computer fu fruteri ondrofenitori, èn fu taki nanga famiriman èn sosrefi nanga mati. Ma na sortu fasi a de wan „soso sani” te wi no e gebroiki E-mail na wan yoisti fasi?—Odo 12:11.

² Wan tu warskow te wi e gebroiki E-mail: Son sma e firi taki, te den e kisi san den e kari nyun tori nanga yepi fu E-mail, dan den e feni taki den kan sabi moro bun fa sani e waka na ini na organisâsi fu Yehovah. Den nyun tori disi kan de, ondrofenitori, sani di pasa na Bethel, nyunsu fu rampu noso frufolgu, èn sosrefi tori di fruteri na wan frutrow fasi na a Kownukondre Diniwroko-skoro. A sori leki son sma de fayafaya fu seni den tori disi gi trawan, fu di den wani fu de den fosiwan fu man fruteri a nyunsu disi na den mati.

³ Sontron, den nyunsu nanga den ondrofenitori di sma fruteri no e sori fa den sani pasa trutru. Noso kande, fu meki tori switi, wan sma kan gi trawan wan heri tra denki fu sani. Furu tron den sma di wani de den fosiwan fu fruteri den nyunsu disi, no sabi sani finifini (Odo 29:20). Sontron, awinsi wan tori sori tumusi moi fu bribi, toku sma e fruteri en leki wan span tori. Den tori disi di no e fruteri soifri fa sani pasa, den na „falsi tori” di no e gi sma deki-ati fu dini Gado na wan getrow fasi.—1 Tim. 4:6, 7.

⁴ Te yu e fruteri tori di no de tru, dan yu e tyari a frantwortu tu gi a sari, nanga a bruya di den tori disi kan tyari kon. Di David ben yere a takru boskopu taki sma ben kiri ala den manpikin fu en, dan a „priti en krosi” fu di a ben sari srefisrefi. Ma a ben de so taki, na soso wan fu den manpikin fu en ben dede. Disi ben de wan sari sani kaba, ma fu di sma no ben fruteri a tori leki fa a pasa trutru dan dati ben gi David moro hebi sari (2 Sam. 13:30-33). Iya, wi no wani du nowan sani di kan kori den brada nanga sisa fu wi noso, du wan sani di kan meki den lasi-ati.

⁵ A seti di Gado poti: Hori na prakseri taki wi Tata na hemel seti wan fasi fu man taki nanga wi. A seti na „a getrow èn koni srafu”. A „srafu” dati abi a frantwortu fu bosroiti sortu sani na osofamiri na yeye fasi musu kon sabi èn o ten na „a reti ten” fu den kon sabi dati. A yeye nyanyan disi de fu kisi soso nanga yepi fu a theokrasia organisâsi. Te wi wani sabi sani di wi kan frutrow, dan wi musu suku en soso na a seti di Gado ben seti. Wi no musu suku en nanga yepi fu computer na sma di e go tapu Internet.—Mat. 24:45.

⁶ Internet Web sites: Wi abi wan spesrutu Internet Web site: www.watchtower.org. A site disi nofo fu yepi ala sma di wani sabi sani di abi fu du nanga na organisâsi fu wi. Nowan enkri sma, komte, noso gemeente abi fu sreka sani densrefi fu meki wan Web page fu fruteri tori di abi fu du nanga Yehovah Kotoigi. Son sma poti heri publikâsi fu wi nanga ala den verwijstekst tapu Internet. Den ben pristeri sma sosrefi kopi fu kongres lezing di ben de fu kisi te den e gi wan bijdrage. Awansi sma e aksi moni gi dati efu a no e aksi moni, toku te wan sma e meki kopi fu den publikâsi fu Yehovah Kotoigi èn e prati den gi trawan tapu Internet, dan a sma e pasa den wet di e sori suma abi a reti fu tyari den sani disi kon na doro. Son sma e si a sani disi leki wan fasi fu dini den brada nanga sisa, ma a no de wan bun sani fu du èn den sma musu tapu fu du a sani disi.

⁷ Te wi abi a koni fu man si sani krin èn te wi e gebroiki wi frustan te wi e gebroiki computer fu man kontakti trawan, dan dati e meki taki wi e furu wi prakseri nanga „diri èn prisiri sani di abi waarde”.—Odo 24:4.