Pruberi fu fiti a takimakandra na a situwâsi fu sma
Te wi e broko wi ede nanga sma na wan opregti fasi, dan dati sa meki wi du muiti fu frustan san den abi fanowdu èn a sa meki wi sori den fa a Kownukondre sa lusu ala den problema di den abi (Fil. 2:4). Furu preikiman abi bun bakapisi te den e fiti a takimakandra fu den na ini difrenti situwâsi, fu di den e aksi na ososma fa a e denki fu wan fu den prenki fu a Paradijs di de fu feni na ini den publikâsi fu wi. Yu kan feni wan tu fu den prenki na ini den buku di wi kari na ini a faki na a reti-anusei fu a bladzijde disi. Yu kan du disi te yu e gebroiki wan fu den eksempre disi fu bigin wan takimakandra:
◼ „Yu denki taki oiti wi sa si a libisma famiri libi na ini so wan situwâsi di de fu si na tapu a prenki disi?”
◼ „Wi alamala ben sa wani taki den pikin fu wi man libi na ini so wan grontapu di de fu si na tapu a prenki disi. San yu denki taki yu musu du fu libi na ini so wan grontapu?”
◼ „A prenki disi na wan eksempre di e sori wi fa grontapu o de te a wani fu Gado e pasa na grontapu soleki fa a e pasa na hemel. Yu e si wan sani na tapu a prenki di de tra fasi leki a libi di wi e libi na ini a ten disi?”
◼ „Yu ben sa wani libi na ini so wan situwâsi di de fu si na tapu a prenki disi? [Gi a sma na okasi fu piki.] Yu denki taki a sani disi sa pasa na ini a pisi ten di wi de na libi?”
Arki bun san a sma e piki yu, èn pruberi fu kon frustan fa en e denki fu a tori fu di yu e poti wán, noso tu aksi gi en na wan switi fasi. Efu son sma e taki dati den no wani libi na ini a situwâsi di a prenki e sori, noso taki den no e bribi taki so wan sani o pasa trutru, dan no denki wantronso taki a sma no wani sabi noti fu a tori disi. Aksi den na wan koni fasi fu san ede den e denki so. Kande a piki fu den o sori taki den e broko den ede trutru taki wan lusu no sa kon na den problema fu a libisma famiri.—Esek. 9:4.
Te yu kon frustan fu sortu sani na ososma e broko en ede, dan fiti yusrefi na dati fu di yu o hori wan takimakandra fu a tori dati. Poti prakseri na a pisi fu a Kownukondre boskopu di e taki fu den sani di a sma abi fanowdu. Sori na ososma wán, noso tu bijbeltekst di abi fu du nanga den sani di e gi a sma broko-ede. (Luku wan tu eksempre na ini a faki na a reti-anusei.) Meki a sma srefi si san Gado Wortu e taki fu a tori. Efu a sma e sori taki a wani sabi moro, dan pristeri en a publikâsi èn seti sani fu go baka na en. Meki a sma angri fu kon sabi moro, fu di yu e taki moro fara fu a pisi tori di unu ben taki a fosi leisi.
[Faki na tapu bladzijde 6]
Publikâsi pe yu kan feni prenki fu a Paradijs
Leriman-buku: bladzijde 251-254
Sabi-buku: bladzijde 4, 5, 188, 189
San Gado e aksi-brochure: bladzijde 11, 13
Anbegi Gado-buku: bladzijde 92, 93
[Faki na tapu bladzijde 6]
Sma e broko den ede nanga den tori disi
A firi di sma e firi brokosaka
A problema fu feni oso; problema na moni sei
Dede nanga row
Kruktudu, nanga krukafasi
Nofo èn gosontu nyanyan no de
Ogridu; ogri di sma e du nanga tranga
Orloku nanga terrorisme
Pôtifasi, a kwinsi di sma e kwinsi trawan
Siki di sma abi
Sma e du ogri nanga meti
Sma e krutu trawan na fesi, èn sma no abi den srefi reti
Sma e pori grontapu
Sma no e tyari densrefi moro na wan fasi di fiti
Tirimakti di no e tiri bun