Kibri a papira disi

Wan tu takimakandra di yu kan gebroiki na ini a preikiwroko

Gebroiki den eksempre di e kon now fu sreka yusrefi gi den takimakandra di yu o hori fu pristeri den publikâsi di wi musu pristeri na ini a mun.

A moro bigi man di oiti ben libi

„Na a ten fu Kresneti, furu sma e prakseri fu Yesus. Ma fu di so furu takru sani e pasa na heri grontapu, meki son sma kan aksi densrefi efu Yesus trutru e broko en ede nanga wi. Fa yu e denki fu dati?” Gi a sma na okasi fu piki. Opo a buku na kapitel 24, èn taki syatu fu san ede Yesus ben kon na grontapu. Baka dati, leisi Yohanes 15:13, aladi yu e poti prakseri na a trutru lobi di Yesus abi gi sma.

„Te wan sma e taki fu Yesus Krestes, dan furu sma e prakseri fu en leki wan beibi, noso leki wan man di e nyan pina èn di de fu dede. A denki di den abi fu Yesus, abi fu du soso nanga a ten di a gebore èn di a dede. Furu tron sma no e poti prakseri na den tumusi moi sani di a ben taki èn di a ben du na ini a libi fu en. A sani di Yesus ben du, abi krakti tapu ibriwan sma di oiti libi na a grontapu disi. Fu dati ede a de tumusi prenspari taki wi e leri so furu leki wi man fu den tumusi moi sani di a ben du gi wi.” Leisi Yohanes 17:3. Luku a fosi bladzijde fu a bigin pisi na ini a Moro bigi man-buku, èn leisi a di fu fo paragraaf.

Anbegi a wan-enkri tru Gado

„Pe yu denki taki wi kan go suku yepi te wi e kisi fu du nanga den broko-ede fu a libi? [Gi a sma na okasi fu piki. Baka dati, leisi Romesma 15:4.] Luku taki a bijbeltekst disi di skrifi nanga yepi fu a santa yeye, e leri wi, e trowstu wi, èn e gi wi howpu di man gi wi krakti fu pasa den problema dati. A buku disi e sori na wan tu moi fasi fa wi kan kisi moro wini te wi e leisi Bijbel.” Poti prakseri na den fo penti di skrifi na tapu bladzijde 30.

„Sensi a ten di Yesus ben de na grontapu, furu sma e begi taki a Kownukondre fu Gado musu kon. Oiti yu aksi yusrefi san a o wani taki gi a libisma famiri te a Kownukondre dati kon? [Gi a sma na okasi fu piki. Leisi baka dati Danièl 2:44.] A buku disi e sori san na a Kownukondre fu Gado, san a Kownukondre o du, èn fa wi kan kisi wini fu a regtfardiki tiri fu a Kownukondre.” Luku a prenki na tapu bladzijde 92 nanga 93.

Kon krosibei na Yehovah

„Furu sma di e bribi na ini Gado, ben sa wani kon moro krosibei na en. Yu sabi taki Gado e gi wi a kari fu kon krosibei na en? [Leisi Yakobus 4:8.] A buku disi meki fu yepi sma kon krosibei na Gado, fu di den e gebroiki den eigi Bijbel.” Leisi paragraaf 1 na tapu bladzijde 16.

„Na ini a ten disi bun furu kruktudu de. A de neleki fa a skrifi dyaso. [Leisi Preikiman 8:9b.] Furu sma e aksi densrefi efu Gado e broko en ede nanga wi trutru. [Leisi den bigin wortu fu paragraaf 4 na tapu bladzijde 119.] A kapitel disi e tyari kon na krin fu san ede Gado gi pasi taki kruktudu de fu wan pisi ten.”

Sabi di e tjari joe go na têgo libi

„Efu yu ben kisi a kari fu libi na so wan tumusi moi presi soleki fa a de fu si na tapu a prenki dyaso, dan yu ben o teki a kari dati? [Sori a sma a prenki na tapu bladzijde 4 nanga 5, èn gi a sma na okasi fu piki.] Luku san a Wortu fu Gado e taki fu a moro prenspari sani di wan sma musu du fu libi fu têgo na so wan presi. [Leisi Yohanes 17:3.] A buku disi sa yepi yu fu kisi a sabi di o tyari yu go na têgo libi.” Seti sani so taki yu kan go baka na a sma fu taki fu den fosi feifi paragraaf fu kapitel 1.

Opo a buku na bladzijde 188 nanga 189 pe wan prenki de. Gebroiki den wortu di skrifi na a prenki èn aksi na ososma: „Yu e howpu fu libi na ini a Paradijs te a sabi fu Gado e furu grontapu? [Gi a sma na okasi fu piki. Baka dati, leisi Yesaya 11:9.] A buku disi sa yepi yu fu kon leri sabi san Bijbel e taki fu a Paradijs èn fu den sani di wi kan du fu de drape tu.” Seti sani so taki yu kan go baka na a sma fu taki fu paragraaf 11-16 fu kapitel 1.

San Gado e aksi fu wi?

„Yu denki taki Gado ben wani taki wi ben musu libi nanga so furu problema soleki den wan di wi e miti na ini a ten disi? [Gi a sma na okasi fu piki. Baka dati, leisi Mateyus 6:10.] Oiti yu prakseri san a Kownukondre fu Gado de trutru?” Opo a brochure na les 6, èn leisi den aksi di de na a bigin fu a les. Bigin taki nanga na ososma fu a les, noso seti sani fu go baka na a sma fu taki fu a les.

„Aladi sani e go na fesi na ini a nyun-modo ten disi, toku a libisma famiri e tan pina èn e tan sari fu di den e siki èn e dede. Yu sabi san Yesus o du gi den sikiwan, den owruwan, èn srefi gi den dedewan?” Gi a sma na okasi fu piki. Efu a sma wani sabi a piki tapu na aksi, dan opo a brochure na les 5, èn leisi den aksi fu paragraaf 5 nanga 6. Taki fu den paragraaf, noso seti sani fu go baka na a sma fu taki fu den paragraaf.

Tan na ai!

„Furu sma e broko den ede nanga den seryusu problema di de èn den tumusi ogri sani di e pasa ibri dei. [Taki fu wan eksempre di den sma fu a presi drape sabi.] Yu ben sabi taki den sani disi na wan fu den marki di musu pasa na heri grontapu èn di e sori taki heri esi a tirimakti fu Gado sa teki a makti abra na grontapu? [Gi a sma na okasi fu piki. Baka dati, leisi wan bijbeltekst di fiti, soleki Mateyus 24:3, 7, 8; Lukas 21:7, 10, 11; noso 2 Timoteyus 3:1-5.] A brochure disi e sori fu san ede a de tumusi prenspari fu de na ai so taki wi e si taki den sani di e pasa now, na prenspari sani.”

„Furu sma na ini a ten disi e broko den ede trutru nanga den tumusi ogri sani di e pasa, noso nanga den omeni sani di densrefi e lasi. Son sma e aksi densrefi fu san ede Gado no e du wan sani fu meki den sani disi no pasa moro. Bijbel e gi wi a dyaranti taki heri esi Gado sa du wan sani fu puru libisma na ini a pina di den e pina. [Leisi Openbaring 14:6, 7.] Luku san a krutu di Gado o tyari kon, wani taki gi a libisma famiri. [Leisi 2 Petrus 3:10, 13.] A brochure disi e taki moro fini fu a prenspari tori disi.”

Teki leri fu a Bigi Leriman

„Yu denki taki grontapu ben o de wan moro bun presi efu sma ben o libi akruderi san skrifi dyaso? [Leisi Mateyus 7:12a. Gi a sma na okasi fu piki.] A buku disi e sori wi furu sani di wi kan leri fu a moro bigi leriman di oiti ben libi.” Poti prakseri na den prenki èn na den sani di skrifi na den prenki na ini kapitel 17.

„Na ini a ten disi, furu papa nanga mama e pruberi fu leri den pikin fu den, sani di bun. Yu denki taki a sani disi de prenspari? [Gi a sma na okasi fu piki. Baka dati, leisi Odo 22:6.] Wi e si taki papa nanga mama e kisi a deki-ati fu bigin gi den pikin leri te den yongu ete. A buku disi meki fu yepi den du dati.” Poti prakseri na den prenki èn na den sani di skrifi na ini kapitel 15 noso kapitel 18.

„Furu tron papa nanga mama e fruwondru fu den aksi di den pikin fu den e poti gi den. A no makriki fu gi piki tapu sonwan fu den aksi, a no so? [Gi a sma na okasi fu piki. Baka dati, leisi Efeisesma 6:4.] A buku disi kan yepi papa nanga mama na ini a ten disi fu gi piki tapu den aksi fu den pikin fu den.” Poti prakseri na wan tu fu den prenki, nanga wan tu fu den sani di skrifi na den prenki na ini kapitel 11 nanga 12 noso kapitel 34 te go miti 36.