Sori switifasi gi trawan—Fu di yu e broko yu ede nanga den
1 Wan uma di ben denki takru fu den Kotoigi fosi, e fruteri san ben pasa di a miti wan Yehovah Kotoigi fu a fosi leisi: „Mi no man memre moro fu san wi ben taki, ma san mi e memre ete na a fasi fa na uma ben sori switifasi nanga lespeki. Trutru mi ben lobi a fasi fa na uma ben e tyari ensrefi.” Den sortu sani disi di sma e taki fu Kotoigi, e tyari kon na krin o prenspari a de fu sori taki wi e broko wi ede trutru nanga den sma di wi e preiki gi.—Fil. 2:4.
2 Lobi abi switifasi: Wan fasi fa wi kan sori lobi gi trawan, na te wi abi switifasi (1 Kor. 13:4). Wan sma di abi switifasi e broko en ede nanga a tanbun fu trawan, èn a e suku fu du sani di kan yepi trawan. A no de fu taki dati a preikiwroko na wan fasi fa wi e sori switifasi. Ma te wi e broko wi ede trutru nanga sma, dan wi sa du moro leki fu preiki nomo gi den. A switifasi nanga den bun maniri di wi e sori, a fasi fa wi e arki, den sani di wi e taki èn a fasi fa wi e taki den sani, èn srefi a fasi fa wi e poti wi fesi te wi e taki nanga sma, iya, a heri fasi fa wi e handri nanga den, o sori taki wi e broko wi ede trutru nanga den.—Mat. 8:2, 3.
3 Te wi e broko wi ede nanga sma na wan lobi-ati fasi, dan dati o meki tu taki wi sa yepi den te dati de fanowdu. Wan pionier di ben e preiki oso fu oso, ben miti wan owru uma di no ben abi masra moro. Di na uma kon frustan taki a brada na wan Kotoigi, dan wantewante a taigi a brada fu gowe. Na uma ben taki dati na a momenti di a brada naki na a doro, a ben de na tapu wan trapu na ini a kukru e feti fu poti wan lampu. „Yu kan kisi mankeri te yu e du dati yu wawan”, na so a brada taigi en. Na uma kari a brada kon na inisei, èn baka di a brada kenki a lampu, a gowe. Syatu baka dati, a manpikin fu na uma kon luku fa a ben go nanga en, èn na uma taigi a manpikin fu en san ben pasa. A manpikin ben feni disi so wan bigi sani taki a go suku a brada fu taigi en tangi gi san a du. A sani disi ben meki den kon abi wan moi takimakandra, èn bakaten a manpikin bigin fu studeri Bijbel.
4 Te wi abi switifasi, dan wi e sori a srefi lobi di Yehovah e sori gi sma, èn wi e moi a Kownukondre boskopu tu. Fu dati ede, meki a de so taki ala ten ’wi e buweisi taki wi na dinari fu Gado fu di wi abi switifasi’.—2 Kor. 6:4, 6.