Wi musu abi lobi fu du a diniwroko nanga bun bakapisi

¹ „Un kon na mi, . . . èn mi sa gi unu krakti baka” (Mat. 11:28). A moi sani di Yesus taki ben sori taki a lobi sma trutru. Neleki Yesus, wi leki Kresten preikiman musu sori lobi gi sma di kon weri fu wan grontapu pe lobi no de kwetikweti. Fa wi kan sori lobi te wi e preiki a bun nyunsu?

² Te wi e taki nanga sma: Fu di Yesus ben lobi sma, meki a ben gebroiki ibri okasi fu fruteri den a bun nyunsu (Yoh. 4:7-14). Lobi sa meki taki wi no sa draidrai fu gi kotoigi te wi abi na okasi fu du dati. Wan meisje di abi siksi yari ben gi wan bun kotoigi na wan uma di ben sidon na en sei e wakti datra na datra-oso. Fu san ede a du disi? A meisje taki: „A ben sori leki na uma disi ben abi Yehovah fanowdu.”

³ Wi kan sori trawan taki wi e prakseri den. Wi kan du disi te wi e lafu nanga den èn te wi e taki na wan switi fasi. Wi e sori lobi sosrefi, te wi e arki bun san trawan e taki, te wi e firi gi den, èn te wi e sori taki wi e broko wi ede nanga den trutru (Odo 15:23). Neleki Yesus, wi musu fruteri sma a Kownukondre boskopu di e gi deki-ati, èn wi musu fruteri den taki Yehovah abi lobi nanga sari-ati gi sma.—Mat. 24:14; Luk. 4:18.

⁴ Te wi e du sani gi sma: Te Yesus ben si taki sma ben abi yepi fanowdu, dan a ben du sani wantewante fu yepi den (Mat. 15:32). Wi sosrefi abi okasi kande fu yepi sma na wan lobi-ati fasi te wi e du a diniwroko. Wan sisa ben si fa wan uma ben abi problema fu frustan wan prenspari tori di wan tra sma ben wani fruteri en na telefon. Wi sisa ben de klariklari fu yepi na uma disi fu frustan san a sma ben wani taigi en. Fu di a sisa ben yepi na uma disi na so wan lobi-ati fasi, meki den ben man taki fu Bijbel, èn na uma disi bigin studeri Bijbel. Wan tra ondrofenitori na fu wan brada di ben tyari wan gobaka. A brada ben si fa na ososma ben e feti fu pasa nanga wan bigi foroisi bangi go na ini na oso. A man disi ben breiti di a brada yepi en nanga a bangi. Bakaten a brada bigin studeri Bijbel nanga a man disi na tapu a srefi bangi disi.

⁵ Te wi e du a preikiwroko, dan wi e sori taki wi lobi Gado èn tra sma tu (Mat. 22:36-40). Te wi e sori lobi nanga den sani di wi e taki èn nanga den sani di wi e du, dan reti-atisma sa si taki wi abi a tru bribi.