Tru Kresten mag gi grani na a fraga? Den mag go stem? Den mag du tra wroko gi lanti na presi fu go na ini a legre?

Tru Kresten mag gi grani na a fraga? Yehovah Kotoigi e bribi taki te sma e boigi gi wan fraga, noso te den e gi grani na wan fraga, èn te den e singi a kondresingi, dan dati na wan fasi fu anbegi. Na so wan fasi den sma disi e sori taki den no e si Gado leki den frulusuman, ma den e si a kondre, noso den tiriman fu den leki den frulusuman (Yesaya 43:11; 1 Korentesma 10:14; 1 Yohanes 5:21). Wan fu den tiriman dati ben de Kownu Nebukadnesar fu owruten Babilon. A kownu disi ben wani sori a pipel fu en o furu makti a abi èn o furu a lobi a bribi fu en. Fu dati ede, a meki sma bow wan bigi popki, èn a taigi a pipel fu boigi gi a popki disi te poku ben e prei. Yu kan agersi a poku disi nanga wan kondresingi. Ma dri Hebrewsma, Sadrak, Meisak, nanga Abedneikow, no ben wani boigi gi a popki, aladi den ben kan kisi dedestrafu.​—Danièl, kapitel 3.

Na ini a ten disi, „sma di lobi a kondre fu den e gi grani na a fraga fu a kondre fu den”, na so historia skrifiman Carlton Hayes ben skrifi. A skrifiman disi ben taki moro fara: „Mansma e puru den ati na den ede te a fraga e pasa. Puwema skrifiman e skrifi puwema fu gi grani na a fraga, èn pikin-nengre e singi gi a fraga.” Sma di lobi a kondre fu den, e sori a lobi dati tapu spesrutu dei, soleki 25 november. Den sma disi e gi grani tu na „santawan èn na sma di feti gi a kondre”. Na wan seremonia di ben hori na ini Brasyonkondre, a presidenti fu a Hei Srudati Krutubangi ben taki: „Sma e anbegi a fraga . . . neleki fa den e anbegi a kondre fu den.” Iya, „neleki a kroisi, a fraga na wan santa sani”, na so wan buku e taki (The Encyclopedia Americana).

Wan moro nyunwan fu a buku disi e taki dati a singi di sma e singi te den e opo a fraga, „na fu sori taki den lobi a kondre fu den, èn fu begi gado fu tiri èn fu kibri den sma nanga den tiriman fu a kondre”. Dati meki wi kan frustan fu san ede Yehovah Kotoigi e si den sani dati di sma e du fu gi grani na a fraga nanga a kondre fu den, leki wan fasi fu anbegi. Luku san wan buku e taki fu pikin fu Yehovah Kotoigi na ini Amerkankondre, di no ben wani gi grani na a fraga, noso sweri taki den o tan horibaka gi a kondre fu den. A buku e taki: „A Hei Krutubangi srefi, sori na ini difrenti krutu-afersi taki den aladei gwenti disi abi fu du nanga anbegi” (The American Character).

Aladi a pipel fu Yehovah no e teki prati na den sani disi di no e kruderi nanga Bijbel, toku den e lespeki den sma di e du dati. Den sabi taki a fraga na wan sani fu a kondre, èn taki „den tiriman” di a kondre poti, e dini leki „futuboi fu Gado” (Romesma 13:1-4). Fu dati ede, Yehovah Kotoigi e gi yesi na a rai di den kisi fu begi „gi kownu èn gi ala bigiman fu kondre”. Ma hori na prakseri taki wi e du dati „so taki wi kan libi wan tiri libi sondro dyugudyugu, aladi wi e dini Gado fayafaya èn na wan seryusu fasi na ini ala sani”.​—1 Timoteyus 2:2.

Den mag go stem te verkiezing e hori? Tru Kresten e lespeki a reti di sma abi fu stem. Den no e du sani fu gens a verkiezing, èn den e saka densrefi na ondro den sma di a pipel poti leki tiriman. Ma den no e teki sei na ini den politiek afersi fu a kondre pe den e tan (Mateyus 22:21; 1 Petrus 3:16). Son Kresten e tan na ini wan kondre pe sma de fruplekti fu go stem èn pe sma e atibron nanga den wan di no wani go stem. San wan Kresten kan du na ini den sortu situwâsi disi? Hori na prakseri taki Sadrak, Meisak, nanga Abedneikow ben go te na Dura-lagipresi. Wan Kresten di de na ini wan srefi sortu situwâsi, kan bosroiti fu go na a presi pe sma musu stem, efu a konsensi fu en e gi pasi taki a du dati. Ma a musu luku bun taki a no e du sani di ben o sori taki a e teki sei na ini politiek afersi. A musu hori den siksi sani disi na prakseri:

1. Den bakaman fu Yesus „no de wan pisi fu grontapu”.​—Yohanes 15:19.

2. Kresten e teki presi gi Krestes èn gi a Kownukondre fu en.​—Yohanes 18:36; 2 Korentesma 5:20.

3. Ala den memre fu a Kresten gemeente e bribi den srefi leri èn den de wán fu di den abi lobi gi makandra.​—1 Korentesma 1:10; Kolosesma 3:14.

4. Wan sma di e stem gi wan spesrutu tiriman, e tyari frantwortu tu gi den sani di a tiriman dati e du.​—Luku den gronprakseri na ini den tekst disi: 1 Samuel 8:5, 10-18 nanga 1 Timoteyus 5:22.

5. Yehovah ben si taki Israel no ben wani en moro leki Tiriman, fu di den ben wani wan kownu di den ben kan si.​—1 Samuel 8:7.

6. Kresten musu man taki fri fu Gado Kownukondre te den e taki nanga sma, awansi fu sortu politiek partèi den sma disi de.​—Mateyus 24:14; 28:19, 20; Hebrewsma 10:35.

Den mag du tra wroko gi lanti na presi fu go na ini a legre? Na ini son kondre, lanti wani taki den sma di e weigri fu go na ini a legre, musu du wan tra sortu wroko fu wan pisi ten. Te wi musu bosroiti efu wi o du a sortu lantiwroko dati, dan wi musu begi Gado fu a tori disi. Kande wi musu taki fu a tori disi nanga wan lepi Kresten, èn baka te wi kon sabi moro fu a tori, dan wi kan teki wan bosroiti di no e trobi a konsensi fu wi.​—Odo 2:1-5; Filipisma 4:5.

Gado Wortu e taki dati wi musu ’gi yesi na gran lanti èn na den wan di abi makti’, taki wi musu „de klariklari fu du iniwan sani di bun” èn taki wi musu ’fiti wisrefi makriki na trawan’ (Titus 3:1, 2). Aladi wi e hori a sani dati na prakseri, wi kan aksi wisrefi den sani disi: ’Mi ben o teki sei na ini politiek afersi, noso mi ben o teki prati na falsi anbegi, efu mi ben o du a wroko disi?’ (Mika 4:3, 5; 2 Korentesma 6:16, 17). ’Efu mi ben o du a wroko disi, a ben o muilek gi mi fu tyari den Kresten frantwortu fu mi, noso a ben o tapu mi fu tyari den frantwortu dati?’ (Mateyus 28:19, 20; Efeisesma 6:4; Hebrewsma 10:24, 25) Aksi yusrefi tu: ’A wroko dati ben o gi mi na okasi fu du moro na ini a diniwroko, kande fu du a furuten diniwroko srefi?’​—Hebrewsma 6:11, 12.

Efu wan Kresten bosroiti nanga wan krin konsensi taki a o du wan tra wroko gi lanti na presi fu koti strafu, dan tra Kresten musu lespeki a bosroiti di a teki (Romesma 14:10). Ma efu a feni taki a no kan du a wroko dati, dan tra Kresten musu lespeki a bosroiti dati tu.​—1 Korentesma 10:29; 2 Korentesma 1:24.