Gebroiki sani di sma kan si

FU SAN EDE yu musu gebroiki sani di sma kan si te yu e gi leri? Fu di te yu e du dati, dan yu o man gi moro bun leri. Yehovah Gado nanga Yesus Krestes ben gebroiki sani di sma kan si, èn wi kan leri fu den. Te yu e gi leri nanga den wortu di yu e taki, ma na a srefi ten yu e gebroiki sani di den arkiman kan si tu, dan den arkiman e yere san yu e taki, ma den kan si tu san yu e taki. Disi kan yepi yu fu meki den arkiman tan poti prakseri na yu, èn a kan yepi den fu frustan a tori moro bun tu. Te yu e pristeri a bun nyunsu, dan fa yu kan gebroiki sani di sma kan si? Fa yu kan sorgu taki yu e gebroiki den sani disi bun?

Fa den Moro Bigi Leriman ben gebroiki sani di sma kan si. Yehovah ben gebroiki sani di sma kan si èn di den no man frigiti esi, èn disi a ben du fu leri den trutru prenspari sani. Wan neti a ben tyari Abraham go na dorosei, èn a taki: „Grantangi luku go na hemel èn teri den stari, efu yu sa man teri den. . . . Na so yu siri sa tron” (Gen. 15:5). Efu yu e luku na afersi disi leki fa libisma e luku sani, dan a gersi leki a pramisi dati no ben sa man kan. Ma toku a sani dati ben naki na ati fu Abraham èn a ben bribi Yehovah. Na wan tra okasi, dan Yehovah seni Yeremia go na a oso fu wan patu-bakriman. Yehovah meki Yeremia go inisei fu a wrokopresi fu luku fa a patu-bakriman ben meki sani nanga tokotoko. Trutru wan sani fu no frigiti! Na so fasi a Mekiman sori taki a abi moro makti leki libisma (Yer. 18:1-6). Èn fa Yona oiti ben o man frigiti fa Yehovah leri en sari-atifasi nanga yepi fu wan krabasibon? (Yona 4:6-11) Yehovah ben taigi den profeiti fu en srefi taki den ben musu du san ben skrifi na ini a profeiti boskopu fu den, so taki sma ben kan si nanga den eigi ai san na a boskopu. Fu du disi, den profeiti ben musu gebroiki spesrutu wrokosani (1 Kow. 11:29-32; Yer. 27:1-8; Esek. 4:1-17). Den sani fu a tabernakel nanga a tempel, na sani sosrefi di kan yepi wi fu frustan fa sani de trutru na ini hemel (Hebr. 9:9, 23, 24). Gado ben gi furu fisyun tu fu meki sma kon frustan prenspari sani.​—Esek. 1:4-28; 8:2-18; Tori. 10:9-16; 16:9, 10; Openb. 1:1.

Fa Yesus ben gebroiki sani di sma kan si nanga den eigi ai? Di den Fariseiman nanga den sma fu Herodes ben pruberi fu kisi Yesus fu si efu a ben o taki wan sani di no bun, dan Yesus ben aksi den wan pisi moni èn a ben sori den taki wan prenki fu a Kèiser ben de tapu a moni. Baka dati, dan a tyari kon na krin taki den ben musu pai Kèiser san de fu Kèiser, ma den ben musu pai Gado san de fu Gado (Mat. 22:19-21). Di Yesus ben leri sma fa den kan gi Gado grani nanga ala den sani di den abi, dan a sori go na wan pôti uma di ben lasi en masra. Na uma disi ben poti tu sensi nomo di no warti furu, ma den tu sensi dati ben de ala san a ben abi (Luk. 21:1-4). Na wan tra okasi a ben teki wan yongu pikin fu gi wan eksempre fu sakafasi, fu sori taki pikin-nengre no e suku makti nanga biginen (Mat. 18:2-6). Yesus ben sori tu san sakafasi ben wani taki fu di ensrefi ben wasi den futu fu den disipel fu en.​—Yoh. 13:14.

Fasi fa yu kan gebroiki den sani di sma kan si. Wi no de leki Yehovah, taki wi sa man meki sma frustan wi fu di wi e meki den si fisyun. Ma toku, furu prenki de na ini den buku fu Yehovah Kotoigi, èn den prenki disi e yepi sma fu go denki san den e leri. Gebroiki den prenki disi so taki yu kan yepi sma di wani sabi moro, fu den si fa a Paradijs sa de na grontapu soleki fa dati pramisi na ini a Wortu fu Gado. Te yu e hori wan oso-bijbelstudie, dan kande yu kan aksi a studenti fu luku wan prenki di abi fu du nanga a sani fu san yu e taki, èn dan yu kan aksi en fu fruteri yu san a e si. A de moi fu si taki, di Yehovah ben gi a profeiti Amos spesrutu fisyun, dan Yehovah ben aksi en: „San yu e si, Amos?” (Amos 7:7, 8; 8:1, 2) Yu kan poti den srefi sortu aksi tu te yu wani sma go denki fu den prenki di den si èn di e leri den wan sani.

Efu yu skrifi den nomru fu teri wan sani, noso efu yu e gebroiki wan karta di e sori fa prenspari sani pasa baka makandra, dan disi kan yepi sma frustan den profeititori moro bun soleki di fu den „seibi ten” fu Danièl 4:16 nanga di fu den „seibitenti wiki” fu Danièl 9:24. Den sortu karta disi, de fu feni na ini difrenti buku fu wi di wi e gebroiki fu studeri.

Te yu e studeri nanga yu osofamiri èn te yu e taki fu sani soleki a tabernakel, a tempel na ini Yerusalem, nanga a tempel ini a fisyun fu Esekièl, dan na osofamiri fu yu sa man frustan den sani disi moro bun te yu e gebroiki prenki. Den sortu prenki disi yu kan feni na ini Inzicht in de Schrift, na ini a lasti pisi fu a Nieuwe-Wereldvertaling van de Heilige Schrift ​— met studieverwijzingen, èn na ini den difrenti Waktitoren.

Te yu e leisi Bijbel nanga yu osofamiri, den meki bun gebroiki fu karta di e sori fa wan kontren de. Luku finifini sortu pasi Abraham ben waka di a froisi fu Ur go na Haran èn baka dati go te na Bethel. Ondrosuku a pasi di Israel ben waka leki pipel di den ben gowe libi Egepte fu go na a Pramisi Kondre. Luku efu yu man feni den pisi fu a kondre di ibriwan fu den lo fu Israel ben kisi. Luku omeni presi Salomo ben abi ondro en makti leki kownu. Luku sortu pasi Elia teki fu Yisreèl pasa Berseba go te na a gran sabana, di Iseibèl taigi en taki a ben o kiri en (1 Kow. 18:46–19:4). Pruberi fu feni den foto pe Yesus ben preiki. Luku sortu pasi Paulus waka, soleki fa dati skrifi na ini a buku Tori fu den Apostel.

Te yu e gebroiki sani di wan bijbelstudenti kan si, dan dati kan yepi en fu frustan fa a gemeente e wroko. Kande yu kan sori a studenti wan programa fu wan fu den bigi konmakandra, èn fruteri en san wi e leri tapu so wan konmakandra. Di trawan ben go luku a Kownukondre zaal, noso di den ben go luku a bijkantoro fu Yehovah Kotoigi, dan disi ben naki na ati fu furu fu den. Efu yu e tyari sma go luku den sortu presi disi, dan dati kan de wan bun fasi fu puru fowtu denki di sma abi fu a wroko di wi e du. Te yu e sori wan sma a Kownukondre zaal, dan sori en fa a presi disi de tra fasi leki tra kerki pe sma e anbegi Gado. Sori taki a presi no bow fu meki bigi gi trawan, ma taki a bow spesrutu fu gi sma leri. Sori a sma den sani di meki spesrutu gi a preikiwroko fu wi, soleki den presi pe wi kan teki tijdschrift nanga buku fu prati, karta fu a kontren pe wi e preiki, èn den friwani boksu (di de heri tra fasi leki den sani di sma e gebroiki na ini tra kerki fu piki moni).

A Tiri Skin e sorgu taki video e meki tu. Te den video disi de fu kisi na a presi pe yu e tan, dan gebroiki den tu fu yepi sma kisi frutrow na ini Bijbel. Noso gebroiki den fu yepi studenti kon sabi a wroko di Yehovah Kotoigi e du, noso fu gi trawan deki-ati fu libi soifri leki fa Bijbel e leri wi.

Gebroiki sani di ala sma kan si te yu e taki nanga wan bigi grupu fu sma. Te yu e sreka yusrefi bun èn te yu e sorgu taki den sma sa man frustan san den e si, dan yu sa man gi bun leri srefi na wan bigi grupu fu sma. A getrow èn koni srafu grupu e gi wi difrenti sortu sani di sma kan si nanga den eigi ai.

Te wi e studeri A Waktitoren, dan furu tron wi kan feni sani soleki prenki. A brada di e hori a Waktitoren-studie kan gebroiki den prenki disi fu poti krakti tapu prenspari sani. Disi de so tu nanga den buku di wi e gebroiki tapu a Gemeente Bukustudie.

Wan tu schema fu hori publikitaki, seti na so wan fasi taki a takiman kan gebroiki sani di sma kan si nanga den eigi ai, èn a kan gebroiki den sani disi fu sori den arkiman wan spesrutu tori. Ma toku, a ben o moro bun efu a takiman o poti prakseri na san Bijbel srefi e taki, bika furu arkiman sa abi wan Bijbel kaba na ini den anu. Ma efu wanwan leisi a takiman musu gebroiki wan prenki noso wan tra sani di den arkiman kan si, dan a musu sorgu taki den sma di e sidon te na bakasei fu a konmakandra presi, kan si (noso leisi) krin sosrefi san a e sori den. Den sortu sani disi yu no musu gebroiki furu, ma kande wanwan leisi nomo.

Te wi e taki èn te wi e gi leri, dan wi no e sori sma sani di den kan si nanga den eigi ai, nomo fu meki den abi wan prisiriten. Te yu e gebroiki sani di sma kan si, dan a sani disi musu man poti krakti tapu wan spesrutu prenspari tori. Den sortu sani disi di sma kan si, sa bun efu den e yepi den arkiman frustan san yu e taki, noso efu den e gi den arkiman krakti buweisi fu sori o warti den sani de di yu e taki. Efu yu e gebroiki den sani disi bun èn na wan fasi di fiti, dan dati kan naki na ati fu den arkiman so kefalek, taki den sa man memre furu yari ete san den si èn san den leri.

A yere di wan sma man yere èn a si di wan sma man si, na tu sani di de prenspari gi en fu leri wan sani. Memre fa Yehovah nanga Yesus, leki den moro bigi Leriman, ben gebroiki den tu sani disi. Pruberi fu teki na eksempre fu den te yu e meki muiti fu doro na ati fu trawan.