Go na fesi

DI YU bigin leri fu gebroiki Bijbel gronprakseri na ini yu libi, dan den sani di ben rutu dipi na ini yu soleki a fasi fa yu ben denki, fa yu ben taki, èn fa yu ben du sani, bigin kenki safrisafri. Furu fu den kenki disi, ben feni presi srefi fosi yu go tapu a Theokrasia Diniwroko-skoro. Kande now yu go moi na fesi kaba, taki yu gi yu libi abra na Yehovah. Disi wani taki dati yu no kan go na fesi moro? Dati no de so kwetikweti. A teki di yu e teki dopu, na soso a bigin.

A disipel Timoteyus ben dini leki owruman kaba di Paulus taigi en fu „denki dipi” fu a rai di a ben kisi èn sosrefi fu a grani di a kisi fu du so wan diniwroko. Timoteyus ben musu „teki den [sani disi] krinkrin na ini en”, so taki „ala sma [ben] kan si taki [a e] go na fesi” (1 Tim. 4:12-15). Awansi yu bigin no so langa ete fu waka a pasi fu waarheid, noso awansi yu ondrofeni furu kaba na ini yu libi leki Kresten, toku yu sa musu wani fu go na fesi.

Sabi sani èn kenki fa yu de

Na Efeisesma 3:14-19 wi e leisi taki na apostel Paulus ben begi gi den tra bribiman neleki en, taki den „sa man frustan krin san na a bradi nanga a langa nanga a hei nanga a dipi” fu a waarheid. Fu kan doro disi, dan Yesus ben gi presenti na ini libisma fu den kan gi leri, fu den kan poti sani reti, èn fu den gi a gemeente deki-ati. Efu ala ten wi e prakseri dipi fu a Wortu fu Gado, èn efu bun leriman e yepi wi tu, dan dati kan yepi wi fu „gro” na yeye fasi.​—Ef. 4:11-15.

Efu wi wani gro na yeye fasi, dan wi „musu meki a krakti di e pusu [wi] frustan, kon nyun”. Disi wani taki dati wi musu du furu muiti fu denki ala ten neleki fa Gado nanga Krestes e denki fu sani. Sobun, a wani taki dati wi musu luku doronomo fa den e denki, so taki neleki fa wan sma e „weri wan krosi”, na so wi kan „weri a nyun fasi fa wi musu de” (Ef. 4:23, 24). Fa a de te yu e studeri den Evangelietori? Yu e si den tori disi fu a libi fu Krestes leki wan eksempre di yu kan teki? Yu e pruberi fu si wan tu spesrutu fasi fa Yesus ben de? Yu e meki muiti tu fu teki den fasi disi abra na ini yu eigi libi?​—1 Petr. 2:21.

Den tori di yu e taki nanga trawan, kan sori yu o furu yu go na fesi. Te sma weri a nyun fasi fa den musu de, dan den no e taki leitori moro, den no e taki grofu, den no e taki doti taki, èn den no e taki soso fu sani di no bun. Na presi fu dati, den e taki „sani di bun, so taki den kan gi sma deki-ati . . . ; dan den sma di e arki, kan yere sani di bun gi den” (Ef. 4:25, 26, 29, 31; 5:3, 4; Yud. 16). Den sani di den e taki te den de nanga trawan, èn te den de na den gemeente konmakandra, e sori taki a waarheid e kenki a libi fu den.

Wan tra sani di e sori krin taki yu e go na fesi, na te yu no ’e degedege moro neleki fa winti e naki skwala go na ala sei’ (Ef. 4:14). Fu eksempre, san yu e du te grontapu e dwengi yu fu teki ala sortu nyun denki nanga ala sortu fasi fu meki prisiri? Den sani disi e hari yu so taki yu e gi ten na den, na presi fu yu gi ten na den sani di yu musu du leki Kresten? Efu yu e du dati, dan a kan hori yu na baka fu no go na fesi na yeye fasi. Sobun, a de wan koni sani trutru fu bai ten fu feti baka yeye afersi, a no so?​—Ef. 5:15, 16.

Wan tra fasi di kan sori taki yu e go na fesi, na a fasi fa yu e handri nanga tra sma. Yu leri fu „sori sari-ati na wan lobi fasi”? Èn sosrefi, yu leri fu gi yu brada nanga sisa ’pardon nanga yu heri ati’?​—Ef. 4:32.

A go di yu e go na fesi fu du sani na a fasi fa Yehovah wani, sa musu de fu si na ini a gemeente, ma sosrefi te yu de na yu oso. A sa musu de krin fu si tu na skoro, na presi pe yu e miti nanga tra sma, èn na yu wrokope (Ef. 5:21–6:9). Efu na ala den okasi disi yu e sori den fasi fa Gado de, èn ala ten yu e pruberi fu du dati moro bun, dan dati sa meki sma si taki yu go na fesi.

Gebroiki a grani di yu kisi

Yehovah meki ibriwan fu wi na so wan fasi taki wi abi a koni fu man du wan tu sani heri bun. A e fruwakti fu wi fu gebroiki den sani dati gi a bun fu trawan, so taki en, leki Gado, sa man sori en bun-ati gi den sma disi nanga yepi fu wi. Na fu dati ede, na apostel Petrus ben skrifi: „Akruderi a grani di ibriwan sma kisi, gebroiki en fu dini makandra leki bun basya fu a bun-ati fu Gado” (1 Petr. 4:10). San yu e du nanga a grani disi?

Petrus e taki moro fara: „Efu wan sma e taki, meki a taki neleki a de den santa wortu fu Gado” (1 Petr. 4:11). A vers disi e sori wi o prenspari a de fu taki soifri san skrifi na ini Gado Wortu, so taki Gado kan kisi glori. A fasi fa yu e taki, musu gi Yehovah glori tu. A leri di yu e kisi tapu a Kresten Diniwroko-skoro, kan yepi yu fu gebroiki a grani di yu kisi fu gi Gado glori nanga a fasi fa yu e yepi trawan. Efu dati na san yu wani, dan fa yu kan sabi efu yu e go na fesi tapu a skoro?

Yu kan denki taki yu go na fesi, fu di yu wroko na furu penti kaba tapu a skoro, èn fu di yu hori furu sortu lezing kaba. Ma na presi fu denki so, dan prakseri o furu a skoro yepi yu fu tyari wan moro bun srakti-ofrandi fu prèise nanga yu mofobuba. A skoro e sreka wi fu kon moro bun na ini a preikiwroko. Sobun aksi yusrefi: ’Mi e sreka misrefi trutru gi san mi o taki na ini a preikiwroko? Mi leri fu sori taki mi wani sabi moro fu den sma di mi e preiki gi? Mi e libi wan aksi na baka gi den sma, so taki mi kan go baka wan tra dei fu taki moro fara nanga den? Efu mi e studeri Bijbel nanga wan sma, dan mi e meki muiti fu kon moro bun leki wan leriman di e doro na ati fu en studenti?’

Te yu e kisi moro grani na ini a diniwroko, dan yu no musu si dati leki a wan-enkri sani di e sori yu taki yu go na fesi. A go di yu e go na fesi, no de fu si na ini a diniwroko di yu kisi. Ma yu sa si taki yu go na fesi, te yu e luku san yu e du nanga a diniwroko disi. Efu yu kisi wan diniwroko pe yu musu gi leri tu, dan aksi yusrefi: ’Mi e gebroiki a koni fu man gi leri trutru? Mi gi leri na so wan fasi taki den sma di e arki mi, kan tyari kenki kon na ini a libi fu den?’

A deki-ati di yu e kisi fu gebroiki yu grani, wani taki tu dati yu no e wakti trawan fu den kon na yu, ma yu e go na den fosi. Fu eksempre, yu e go wroko nanga trawan ini a preikiwroko fosi den kon aksi yu fu wroko nanga den? Yu e suku okasi fu yepi den nyunwan, yonguwan, noso sikiwan na ini yu gemeente? Yu e gi yusrefi fu krin a Kownukondre zaal noso fu yepi na tra fasi tu tapu a kongres nanga den tra bigi konmakandra? Yu kan go na ini a yepi-pionierwroko gi wan tu mun? Yu kan go na ini a gewoon pionierwroko? Yu kan go na wan gemeente di abi yepi fanowdu? Efu yu na wan brada, dan yu e suku fu doro den markitiki fu dinari ini a diniwroko nanga fu owruman soleki fa dati skrifi na ini Bijbel? Te yu wani yepi èn te yu wani teki wroko na yu tapu, dan dati e sori taki yu e go na fesi.​—Ps. 110:3.

Te yu abi furu ondrofeni

Efu yu firi taki yu no man du so furu, fu di yu no ondrofeni furu ete na ini a libi leki wan Kresten, dan no lasi-ati. A Wortu fu Gado kan meki „a sma di no abi ondrofeni kon koni” (Ps. 19:7; 119:130; Odo 1:1-4). Efu wi e gebroiki a rai fu Bijbel na ini wi libi, dan wi e kisi wini fu a volmaakti koni fu Yehovah. A koni dati warti moro leki iniwan tra sani di wi ben sa kan leri fu di wi ondrofeni wan sani nomo. Ma toku a tru, taki te wi e go na fesi na ini a diniwroko fu Yehovah, dan wi e kisi ondrofeni di warti furu. Fa wi kan gebroiki disi bun?

Te wan sma miti wan lo sani kaba na ini a libi, dan a ben kan denki: ’Mi miti nanga a sani disi kaba. Mi sabi san mi musu du.’ Yu denki taki disi na wan koni sani fu denki so? Odo 3:7 e warskow: „No kon koni na ini yu eigi ai.” Efu wi abi ondrofeni, dan a no de fu taki dati wi sa sabi moro bun san fu du te sani miti wi na ini a libi. Ma efu wi e go na fesi na yeye fasi, dan den sani di wi ondrofeni sa musu meki wi frustan bun tu taki wi abi a blesi fu Yehovah fanowdu, efu wi wani taki sani waka bun nanga wi. Sobun, wi no kan taki dati wi e go na fesi soso fu di wi sabi seiker san fu du na ini wan spesrutu situwâsi. Ma te wi de klariklari fu aksi Yehovah fu yepi wi na ini wi libi, dan dati e sori krinkrin taki wi e go na fesi. Wi kan sori taki wi e go na fesi, te wi abi na overtoigi taki noti kan pasa sondro taki Yehovah gi primisi fu dati èn te wi tan frutrow tapu wi hemel Tata leki wan lobi-ati mati fu wi.

Tan langa yusrefi

Aladi na apostel Paulus ben de wan lepi Kresten èn a ben de wan salfu Kresten tu, toku a ben taki fu ensrefi taki a ben musu tan „langa ensrefi” fu doro a marki fu a libi (Fil. 3:13-16). Na so yu e prakseri tu?

O furu yu go na fesi? Efu yu wani si o furu yu gro, dan luku o bun yu weri a nyun sma di yu musu de, o bun yu e saka yusrefi na ondro a reti di Yehovah abi fu tiri, èn o bun yu e gebroiki den grani di yu kisi fu gi glori na Yehovah. Te yu e nyan bun fu a leri tapu a Theokrasia Diniwroko-skoro, dan safrisafri den sani di skrifi na ini Gado Wortu, sa musu de fu si na ini a fasi fa yu e taki èn a fasi fa yu e gi leri. Efu yu wani gro, dan yu musu hori den sani disi na prakseri. Iya, prisiri nanga den sani disi, èn ala sma sa si taki yu e go na fesi.