Wan brifi fu a Tiri Skin

Wi lobi brada nanga sisa,

Wi e libi na ini tumusi prenspari ten èn wi de nanga bigi prisiri! A e gi wi prisiri fu wroko makandra nanga unu, lobi brada nanga sisa, fu di wi e ’dini makandra leki wán man’. Iya, noiti ete wi si taki so wan bigi kotoigiwroko du, pe wi e preiki fu wi hemel Tata, Yehovah.—Sef. 3:9; Yoh. 14:12.

Wi breiti taki wi e dini Yehovah, ma disi no wani taki dati wi no abi seryusu problema. Na ini a dienstyari di pasa, sonwan fu unu kisi fu du nanga muilek situwâsi, soleki gronseki, frudu, bigi winti, noso tra rampu di kan meki sma lasi libi (Mat. 24:7). Furu sma di kon swaki fu di den e siki èn den e kon owru, e feti fu horidoro ibri dei. Wi alamala e kisi fu du nanga „banawtu di de leki a hebi pen fu wan uma di de fu kisi en pikin” èn di e kon moro hebi dei fu dei (Mat. 24:8). Na ini wan tu kondre, soleki Armenia, Eritrea, nanga Zuid Korea, furu fu wi brada de na strafu-oso fu a bribi fu den ede.—Mat. 24:9.

San yepi wi fu tan abi wan bun denki fu sani aladi wi de na ini den muilek situwâsi disi? A yaritekst fu 2010 e memre wi na wan prenspari sani. A tekst ben taki: ’Lobi e horidoro awansi san e pasa. Lobi no e kaba noiti’ (1 Kor. 13:7, 8). Iya, a lobi di wi abi gi makandra, èn sosrefi a lobi di wi abi gi Yehovah, e gi wi deki-ati fu horidoro.

Furu sma di e taki dati den na Kresten, e fruwondru fu si taki wi e du a preikiwroko doronomo na heri grontapu. Aladi a kan de so taki den no e agri nanga den sani di wi e bribi èn den sani di wi e leri sma, toku den sani di sonwan fu den si, e meki taki den e taki: „Unu e du a wroko di wi ben musu du!” San na wan sani di e meki taki Yehovah Kotoigi man tan preiki ibri dei? Dati na lobi. Neleki wi hemel Tata, wi sosrefi no wani taki nowan sma kisi pori (2 Petr. 3:9). Wi wani taki ala sma sori berow. Disi de fu si na ini a nyun heimarki fu 7.508.050 preikiman di wi ben abi na ini a dienstyari di pasa. Sortu tra kerki organisâsi abi so furu sma di de klariklari fu go preiki?

Wi e kisi a deki-ati fu tan poti prakseri na a profeititori di Yesaya skrifi èn di e kon tru te na ini a ten fu wi: „Na a kabapisi fu a ten dati, a bergi fu na oso fu Yehovah o tanapu steifi. A o hei pasa den ede fu den bergi, èn a o hei moro den pikin bergi. Na drape ala pipel musu go” (Yes. 2:2-4). Na mindri den ipi-ipi sma di e go na a oso fu Yehovah, 294.368 sma teki dopu na ini a dienstyari di pasa. Wi e gi den sma disi di warti, wan switikon na ini na organisâsi fu wi. Meki a de so taki a Kresten lobi di wi abi, e meki taki wi tan yepi den sma disi fu feti teige wi feanti Satan Didibri.—1 Petr. 5:8, 9.

Noiti ete wi ben abi a heimarki fu 18.706.895 sma di ben kon na a Memrefesa tapu tudewroko 30 maart 2010. Disi e sori taki milyunmilyun sma de ete di kan kon dini Yehovah makandra nanga wi. Wi breiti srefisrefi taki Yehovah no pori na ogri grontapu sistema disi ete! Ma fosi a ten dati doro, a lobi di wi abi e yepi wi fu tan horidoro.—2 Tes. 3:5.

Den „Tan krosibei fu Yehovah!” Distrikt Kongres, di ben hori na heri grontapu na ini 2010, yepi wi fu kisi wan moro bun matifasi nanga wi hemel Tata, Yehovah. Iya, den wortu fu a psalm skrifiman tru, di a taki: „Koloku fu den sma di abi Yehovah leki Gado!” (Ps. 144:15) Awansi san o pasa na ini a ten di e kon, wi de seiker taki te Yehovah de na wi sei, dan wi no abi fu frede noti (Ps. 23:4). Heri esi Yehovah o meki en Manpikin „tyari wan kaba kon na den wroko fu Didibri” (1 Yoh. 3:8). Iya, wi e angri taki a dei dati doro! Ma now wi abi furu wroko fu du ete.—1 Kor. 15:58.

Unu kan abi a dyaranti taki „ala ten” wi e taki fu unu na ini den begi fu wi (Rom. 1:9). Sorgu taki „Gado sa tan lobi unu, aladi unu e wakti teleki wi Masra Yesus Krestes sa sori unu sari-ati, so taki unu kan kisi têgo libi”.—Yud. 21.

Wi lobi un alamala!

Un brada,

A Tiri Skin fu Yehovah Kotoigi