Na tapu 2 april wi o bigin prati den papira fu kari sma kon na a Memrefesa
1. O ten wi o prati den papira fu gi sma wan kari gi a Memrefesa a yari disi? Fu san ede a wroko disi di wi e du ala yari, de prenspari?
1 Fu 2 april te go miti 17 april, wi o prati den papira fu gi sma wan kari fu kon na a moro prenspari konmakandra fu a yari. Dati na a Memrefesa fu a dede fu Krestes. Na ini a ten di pasa, furu sma di ben wani sabi moro fu Bijbel, ben kon na a Memrefesa. Fu eksempre, tapu a dei fu a Memrefesa, wan uma ben bel a bijkantoro èn a taki: „Didyonsro mi doro na oso, èn mi si wan kari gi a Memrefesa ondro mi doro. Mi wani go, ma mi no sabi seiker o lati a e bigin.” A brada di ben piki a telefon, taigi en pe fu a papira a kan leisi dati. Na a kaba fu a takimakandra na uma pramisi: „Mi o go na a konmakandra fu unu tideneti.”
2. San wi kan taki te wi e gi sma a papira fu kari den kon na a Memrefesa?
2 Fa fu gi sma wan kari: Fu di wi abi wan syatu pisi ten nomo fu wroko a kontren fu wi, meki a moro bun fu hori a takimakandra syatu. Wi kan taki: „Fa yu tan? Wi wani gi yu nanga yu osofamiri wan kari fu kon na wan prenspari konmakandra di e hori ibri yari. A yari disi a o hori tapu sonde 17 april na heri grontapu. [Gi na ososma a papira.] Na a dei dati, wi e memre a dede fu Yesus. Wan Bijbel lezing o hori di o fruklari fa wi kan kisi wini fu a lusu-paiman fu Krestes. Yu no abi fu pai te yu kon drape. A papira disi e sori pe a konmakandra o hori èn o lati a o bigin.”
3. Fa wi kan gi so furu sma leki wi man wan kari gi a Memrefesa?
3 Efu a gemeente fu yu abi wan bigi kontren fu wroko, dan den owruman kan taigi yu fu libi a papira na baka te sma no de na oso. Ma poti a papira na so wan fasi taki sma di e waka pasa no e si en. No frigiti fu gi den gobaka fu yu wan kari, sosrefi yu famiriman, den sma na yu wrokope, sma na skoro, nanga tra sma di yu sabi. Te yu e gi sma wan kari tapu satra nanga sonde, dan yu kan gi den tijdschrift te dati fiti. Yu man dini leki yepipionier na ini april, so taki yu kan abi wan moro bigi prati na a wroko disi di e gi prisiri?
4. Fu san ede wi wani taki den sma di wani sabi moro fu Bijbel, kon na a Memrefesa?
4 Den sma di o kon na a Memrefesa o kisi bun leri trutru! Den o yere fu a bigi lobi di Yehovah sori fu di a seti sani so taki a lusu-paiman pai (Yoh. 3:16). Den o leri fa Gado Kownukondre o tyari blesi kon gi libisma (Yes. 65:21-23). Boiti dati, den o kisi a deki-ati tu fu go na wan fu den dienstyepiman efu den wani kisi Bijbelstudie fu kon leri sabi moro. Wi e begi taki furu reti-ati sma o teki a kari èn kon makandra nanga wi na a Memrefesa!
[Raportu na tapu bladzijde 3-6]
2010 DINIWROKO RAPORTU FU YEHOVAH KOTOIGI NA HERI GRONTAPU
(Luku a Kownukondre diniwroko)