„Tan waka na mi baka”

1-3. (a) Na sortu fasi Yesus gowe libi den apostel fu en, èn fu san ede dati no ben de a kaba fu a tori fu Yesus? (b) Fu san ede wi musu sabi san Yesus du sensi di a go baka na hemel?

ERFU man e tanapu makandra na tapu wan bergi. Den alamala e luku wan tra man di tanapu drape. A fasi fa den e luku a man disi e sori taki den lobi en srefisrefi, èn taki den e lespeki en. A man disi di gersi wan libisma, na Yesus di kisi wan opobaka, èn di tron a moro makti yeye manpikin fu Yehovah baka. Yesus meki den apostel fu en kon makandra na tapu na Olèifbergi fu miti en fu a lasti leisi.

² A bergi disi, de na a owstusei fu Yerusalem, abrasei fu a Kidron-lagipresi. A musu de so taki Yesus e memre furu sani di ben pasa na a presi disi. A foto Betania, pe Yesus ben gi Lasarus wan opobaka, de na wan sei fu a bergi disi. Wan tu wiki pasa, di Yesus rèi go ini Yerusalem leki kownu, a ben komoto fu Betfage di de na ini a birti. A kan taki a dyari fu Getseimanei de na tapu Olèifbergi tu. Drape Yesus ben de na ini den lasti muilek yuru fosi sma kon grabu en. Now, na tapu a srefi bergi disi, Yesus e sreka fu gowe libi den moro bun mati fu en, èn den bakaman fu en. A e taki na wan switi fasi nanga den, fosi a gowe. Baka dati a e bigin opo go na hemel! Den apostel e tanapu drape sondro fu dribi èn den e luku fa den lobi Masra e opo go na loktu. Te fu kaba, wan wolku e tapu en so taki den no man si en moro.​—Tori fu den Apostel 1:6-12.

³ Den apostel ben breiti fu si Yesus baka, ma den ben sari tu taki a ben o gowe libi den. Yu e si dati leki wan sari tori? Nôno, a no wan sari tori. Fu taki en leti, soleki fa tu engel e taigi den apostel now, dan a tori fu Yesus no kaba ete (Tori fu den Apostel 1:10, 11). Na furu difrenti fasi, a opo di Yesus opo go na hemel, na a bigin nomo. Gado Wortu e fruteri wi san pasa nanga Yesus, baka di a opo go na hemel. A de prenspari taki wi sabi san Yesus du sensi di a go baka na hemel. Fu san ede? Memre taki Yesus ben taigi Petrus: „Tan waka na mi baka” (Yohanes 21:19, 22). Wi alamala musu gi yesi na a komando dati, no fu wan pisi ten nomo, ma wi heri libi langa. Fu man du dati, wi musu frustan san wi Masra e du now, èn sortu frantwortu a kisi na ini hemel.

A libi fu Yesus sensi di a go baka na hemel

4. Fa Bijbel ben taki na fesi san ben o pasa na ini hemel baka di Yesus drai go baka drape?

⁴ Bijbel no e fruteri san pasa di Yesus doro baka na hemel, a no e fruteri fu a switikon di a kisi, èn fa en nanga en Tata ben prisiri fu de makandra baka. Ma Bijbel ben taki na fesi san ben o pasa syatu baka te Yesus go na hemel. Soleki fa wi sabi, dan moro leki 1500 yari langa, den Dyu ben si fa wan santa seremonia ben hori. Tapu wán dei ibri yari, a granpriester ben e go na ini a Moro Santa Presi fu a tempel fu aksi pardon fu sondu. Tapu a dei dati, a granpriester ben e teki a brudu fu den ofrandi di den ben tyari, fu natinati a presi na fesi na ark fu a frubontu. Na a dei dati a granpriester ben e prenki a Mesias. A sani di a seremonia disi ben prenki, Yesus du wán leisi di a drai go baka na hemel, èn a no ben abi fu du dati moro. A kon na fesi Yehovah na ini hemel, a moro santa presi di de, èn a pristeri en Tata a waarde fu a frulusu-ofrandi fu en (Hebrewsma 9:11, 12, 24). Yehovah teki dati?

5, 6. (a) San e sori taki Yehovah ben teki a frulusu-ofrandi fu Krestes? (b) Suma e kisi wini fu a lusu-paiman èn na sortu fasi?

⁵ Wi e kisi piki tapu na aksi dati, te wi e luku san pasa wan tu dei baka di Yesus go na hemel. Wan pikin grupu fu 120 Kresten ben kon makandra na ini wan sodrokamra na ini Yerusalem. Wantronso wan babari di de leki wan tranga winti, ben de fu yere na ini a heri oso. Ne sani di de neleki pikinpikin faya go sidon na tapu den ede. Santa yeye kon na den tapu èn den bigin taki na ini difrenti tongo (Tori fu den Apostel 2:1-4). A sani disi ben sori taki Gado ben teki wan nyun pipel, na agersi Israel, di ben de „wan spesrutu grupu fu sma”, èn „wan grupu fu priester di o tiri leki kownu”, fu meki a wani fu Gado pasa na grontapu (1 Petrus 2:9). A de krin fu si taki Yehovah Gado ben teki a frulusu-ofrandi fu Krestes èn a ben feni na ofrandi bun. A kisi di den fosi Kresten kisi a santa yeye, ben de wan fu den fosi blesi fu a lusu-paiman.

⁶ Sensi a ten dati, den bakaman fu Krestes na heri grontapu kisi wini fu a lusu-paiman. Awansi wi na memre fu a salfu „pikin ipi” di o tiri makandra nanga Krestes na ini hemel, noso wi na memre fu a grupu fu „tra skapu” di o libi na grontapu te Yesus e tiri, toku wi e kisi wini fu na ofrandi fu en (Lukas 12:32; Yohanes 10:16). Na ofrandi disi e meki taki wi abi howpu èn taki wi e kisi pardon fu wi sondu. Solanga wi „e bribi” na ini a lusu-paiman dati fu di wi e waka baka Yesus ibri dei, wi kan abi wan krin konsensi nanga wan moi howpu gi a ten di e kon.​—Yohanes 3:16.

7. Sortu makti Yesus kisi di a drai go baka na hemel, èn fa yu kan horibaka gi en?

⁷ San Yesus du na ini hemel sensi di a go baka drape? A kisi bun furu makti (Mateyus 28:18). Iya, Yehovah poti en fu tiri a Kresten gemeente, èn a du dati na wan lobi-ati fasi èn na wan reti fasi (Kolosesma 1:13). Soleki fa Bijbel ben taki na fesi, Yesus sorgu taki mansma di man tyari frantwortu e sorgu gi na ipi fu en (Efeisesma 4:8). Fu eksempre, a teki Paulus leki „wan apostel gi den trakondre sma”, èn a seni en fu go preiki a bun nyunsu na farawe kondre (Romesma 11:13; 1 Timoteyus 2:7). Na a kaba fu a fosi yarihondro, Yesus seni boskopu gi seibi gemeente na ini Asia, wan distrikt na ini a kownukondre fu den Romesma. A ben prèise den, a ben gi den rai, èn a ben gi den piri-ai (Openbaring kapitel 2, 3). Yu e si Yesus leki na Ede fu a Kresten gemeente? (Efeisesma 5:23) Fu man tan waka na en baka, yu musu wroko makandra nanga a gemeente pe yu de èn yu musu gi yesi na den wan di e teki fesi.

8, 9. Sortu makti Yesus kisi na ini 1914, èn san dati wani taki gi wi te wi e teki bosroiti?

⁸ Na ini 1914, Yesus kisi moro makti. Na ini a yari dati Yehovah poti en leki Kownu fu a Mesias Kownukondre fu En. Di Yesus bigin tiri, „wan feti bigin na ini hemel”. San ben de a bakapisi? Den fringi Satan nanga den ogri yeye fu en kon na grontapu, èn dati ben de a bigin fu wan ten fu bigi problema. Feti, ogridu, siki, gronseki, nanga angriten di de na ala sei, e memre wi taki Yesus e tiri now na ini hemel. Now Satan na „a tiriman fu a grontapu disi” ete, fu wan ’syatu pisi ten’ (Openbaring 12:7-12; Yohanes 12:31; Mateyus 24:3-7; Lukas 21:11). Ma Yesus e gi sma na heri grontapu na okasi fu teki en leki kownu.

⁹ A de tumusi prenspari taki wi e teki a sei fu a Mesias Kownu. Wi no e suku fu du san na ogri grontapu disi wani, ma na ini ala den bosroiti di wi e teki ibri dei wi e du muiti fu meki a Mesias Kownu feni wi bun. Yesus di de a „Kownu fu den kownu èn Masra fu den masra” e ondrosuku libisma, èn a abi leti fu ati bron, ma a e prisiri tu (Openbaring 19:16). Fu san ede?

Na atibron nanga a prisiri fu a Mesias Kownu

10. Fa Yesus de, ma san e meki taki wi Masra abi leti fu atibron?

¹⁰ Wi Masra na wan koloku sma neleki en Tata (1 Timoteyus 1:11). Di Yesus ben de na grontapu, a no ben e krutu sma doronomo, èn a no ben aksi tumusi furu fu sma. Ma furu sani e pasa na grontapu na ini a ten disi di e meki taki a abi leti fu ati bron. A no de fu taki dati a e ati bron nanga ala den kerki organisâsi di e taki dati den e du san a wani aladi dati no de so. A ben taki na fesi: „A no ala sma di e taigi mi: ’Masra, Masra’, sa go na ini a kownukondre fu hemel, ma na a sma di e du a wani fu mi Tata na hemel sa go na ini. Furu sma sa taigi mi na a dei dati: ’Masra, Masra, a no na ini yu nen wi . . . ben du furu bigi wondru?’ Toku mi sa taigi den krin: Mi no sabi unu kwetikweti! Komoto na mi fesi, un sma di e du kruktudu.”​—Mateyus 7:21-23.

11-13. Fu san ede son sma no man frustan fu san ede Yesus e krutu den sma di e du „furu bigi wondru” na ini en nen? Ma fu san ede a e ati bron? Gi wan eksempre.

¹¹ Furu sma di e kari densrefi Kresten no man frustan san den wortu disi wan taki. Fu san ede Yesus ben o krutu den sma di du „furu bigi wondru” na ini en nen, na so wan fasi? Den kerki fu Krestenhèit horibaka gi organisâsi di e du bun wroko, den yepi pôtisma, den bow ati-oso nanga skoro, èn den du furu tra sani. Meki wi luku wan eksempre di o yepi wi frustan fu san ede Yesus abi leti fu atibron nanga den.

¹² Wan papa nanga wan mama musu go na wan presi farawe. Den no man tyari den pikin go nanga den, sobun den e pai wan uma fu luku den pikin. Den e taigi en nomo: „Sorgu gi den pikin fu wi. Gi den nyanyan, sorgu taki den tan krin èn luku taki ogri no miti den.” Ma te a papa nanga a mama drai kon baka, dan den e skreki srefisrefi fu si taki den pikin e dede fu angri. Den pikin doti, den e sikisiki, èn den e sari. Den e bari kari na uma di musu luku den, ma a no e poti prakseri na den. Fu san ede? We, a tanapu na tapu wan trapu e krin den fensre. A papa nanga a mama e atibron, èn den e aksi en san pasa. Ne na uma e piki: „Luku ala den sani di mi du! Den fensre no krin? Mi meki wan tu sani na ini na oso èn mi du ala den sani dati gi unu!” A papa nanga a mama o breiti fu yere dati? Nôno, kwetikweti! Noiti den no aksi en fu du den wroko dati, ma a wan-enkri sani di den aksi en na fu sorgu gi den pikin. Fu di a weigri fu du san den taigi en, meki den e ati bron srefisrefi.

¹³ Krestenhèit handri na a srefi fasi leki na uma di ben musu luku den pikin. Yesus taigi den wan di ben o teki presi gi en fu gi sma nyanyan na agersifasi. Iya, den ben o leri sma den tru tori fu Gado Wortu, èn den ben o yepi den fu tan krin (Yohanes 21:15-17). Ma Krestenhèit no du a sani disi kwetikweti. Na wan agersi fasi a meki sma dede fu angri, fu di a no e gi den leri, a e bruya den nanga den falsi sani di a e leri, èn a no e poti prakseri na den prenspari tru tori fu Bijbel (Yesaya 65:13; Amos 8:11). Aladi a e pruberi fu meki grontapu kon tron wan moro bun presi, toku dati no gi en a reti fu trangayesi Yesus fu espresi. Te yu e luku en bun, a grontapu sistema fu Satan de neleki wan oso di no bun moro èn di musu broko puru. Gado Wortu e sori krin taki heri esi a grontapu sistema disi fu Satan o kisi pori.​—1 Yohanes 2:15-17.

14. Sortu wroko e meki Yesus breiti na ini a ten disi, èn fu san ede?

¹⁴ Na a tra sei, Yesus musu fu breiti srefisrefi te a e luku kon na grontapu èn a e si taki milyunmilyun sma e meki disipel, soleki fa a taigi den bakaman fu en fosi a go na hemel (Mateyus 28:19, 20). A de trutru wan bigi grani fu meki a Mesias Kownu prisiri! Meki wi abi a fasti bosroiti fu tan horibaka gi „a getrow èn koni srafu” (Mateyus 24:45). Tra fasi leki den kerki fesiman fu Krestenhèit, den salfu Kresten gi yesi na Krestes fu di den e teki fesi na ini a preikiwroko èn den e tan gi den skapu fu Krestes nyanyan.

15, 16. (a) Fa Yesus e firi te a e si taki sma na ini a ten disi no e sori lobi gi makandra, èn fa wi du sabi dati? (b) San Krestenhèit du taki Yesus e ati bron nanga den?

¹⁵ Wi kan de seiker taki a Kownu e ati bron te a e si taki sma na grontapu no e sori lobi gi makandra na ini a ten disi. Kande wi e memre fa den Fariseiman ben krutu Yesus di a ben dresi sma tapu a Sabatdei. Den ben tranga-ede so te, taki den ben tan hori nomo na san den ben sabi fu a Wet di Gado gi Moses èn fu den wet di den fosi leriman ben meki. Den wondru di Yesus ben e du ben tyari furu wini gi sma! Den wondru disi ben meki taki sma ben e prisiri, den ben kisi frulekti, èn a bribi fu den ben kon moro tranga. Ma den sani dati no ben wani taki noti gi den Fariseiman. Fa Yesus ben denki fu den man disi? Wan leisi, „a luku den nanga atibron, ma a ben sari srefisrefi tu fu di a si taki den no ben abi firi”.​—Markus 3:5.

¹⁶ Na ini a ten disi, Yesus e si moro sani di e meki a „sari srefisrefi”. Den kerki fesiman fu Krestenhèit breni na agersifasi, fu di den e tan hori na gwenti nanga kerkileri di no e kruderi nanga Bijbel. Boiti dati, den ati e bron fu di sma e preiki a bun nyunsu fu Gado Kownukondre. Na ini furu kondre, den kerki fesiman gi sma deki-ati fu frufolgu den Kresten di trutru e du muiti fu preiki a boskopu di Yesus ben preiki (Yohanes 16:2; Openbaring 18:4, 24). Na a srefi ten, den kerki fesiman disi nofo tron e gi den bakaman fu den deki-ati fu go feti èn fu kiri trawan, neleki dati ben o plisi Yesus Krestes!

17. Fa den trutru bakaman fu Yesus e meki a prisiri?

¹⁷ Tra fasi leki dati, trutru bakaman fu Yesus e du muiti fu sori lobi gi sma. Neleki Yesus, den e preiki a bun nyunsu gi „ala sortu sma”, awansi den e kisi gens (1 Timoteyus 2:4). Den e sori trutru lobi gi makandra èn disi na a moro prenspari sani di e sori taki den na bakaman fu Yesus (Yohanes 13:34, 35). Fu di den lobi den Kresten brada nanga sisa fu den èn den e lespeki den, meki den na trutru bakaman fu Yesus. Na disi e meki taki a Mesias Kownu e prisiri!

18. San e meki wi Masra sari, ma fa wi kan meki a prisiri?

¹⁸ Meki wi hori na prakseri tu, taki wi Masra e sari te den bakaman fu en no e horidoro, te den e meki a lobi di den abi gi Yehovah kon kowru, èn te den no e dini en moro (Openbaring 2:4, 5). Ma Yesus e prisiri nanga den wan di e horidoro te na a kaba (Mateyus 24:13). Fu dati ede meki wi tan hori a komando disi fu Krestes na prakseri: „Tan waka na mi baka” (Yohanes 21:19). Meki wi go luku wan tu fu den blesi di a Mesias Kownu o gi den sma di horidoro te na a kaba.

Den blesi di den futuboi fu a Kownu e kisi

19, 20. (a) Sortu blesi wi e kisi nownowde te wi e waka baka Yesus? (b) Fa a waka di wi e waka baka Yesus e yepi wi fu abi wan trutru papa?

¹⁹ A waka di wi e waka baka Yesus, e meki wi abi wan koloku libi nownow kaba. Efu wi e teki Krestes leki wi Masra, fu di wi e teki a tiri fu en nanga na eksempre fu en, dan wi o feni warti sani di sma na grontapu e suku ma di den no man feni. Wi o du wroko di e gi wi prisiri, wi o de leki wán famiri fu Kresten brada nanga sisa di lobi makandra trutru, wi o abi wan krin konsensi, èn wi o abi wan korostu firi. Fu taki en syatu, wi o abi wan koloku libi. Ma wi o kisi moro blesi tu.

²⁰ Yehovah poti Yesus leki wan „Têgo Papa” gi den sma di abi a howpu fu libi fu têgo na grontapu. Yesus kon na ini a presi fu Adam, wi fosi papa, di no handri bun fu di a tyari takru bakapisi kon gi ala den bakapikin fu en (Yesaya 9:6, 7). Te wi e teki Yesus leki wi „Têgo Papa”, fu di wi e poti bribi na ini en, dan wi o abi wan trutru howpu fu libi fu têgo. Boiti dati, wi e kon moro krosibei na Yehovah Gado. Soleki fa wi leri, dan te wi e du muiti fu waka baka na eksempre fu Yesus ibri dei, dan dati na a moro bun fasi fu gi yesi na a komando disi fu Gado: „Waka baka na eksempre fu Gado leki pikin di a lobi.”​—Efeisesma 5:1.

21. Fa den bakaman fu Krestes e skèin leti na ini wan dungru grontapu?

²¹ Te wi e waka baka na eksempre fu Yesus nanga a di fu en Tata Yehovah, dan dati na wan moi grani. Wi e skèin wan brenki leti. Satan e kori milyunmilyun sma na ini a grontapu disi di de na dungru, èn den sma disi e sori den fasi fu en. Ma wi di e waka baka Krestes e skèin a moro krin leti di de, iya, wi e skèin a leti fu den tru tori fu Bijbel, a leti fu den moi Kresten fasi, a leti fu trutru prisiri, vrede, nanga trutru lobi. Na a srefi ten, wi e kon kisi wan moro bun matifasi nanga Yehovah èn dati na a moro bun sani di iniwan sma kan abi.

22, 23. (a) Sortu blesi den sma o kisi di e tan waka baka Yesus? (b) Sortu fasti bosroiti wi musu abi?

²² Prakseri tu san Yehovah wani du gi yu na ini a ten di e kon nanga yepi fu en Mesias Kownu. Heri esi a Kownu dati o feti wan reti feti teige na ogri grontapu sistema fu Satan. Yesus o wini seiker! (Openbaring 19:11-15) Baka dati, Krestes o bigin nanga a Dusun Yari Tiri fu en na grontapu. A tirimakti fu en di de na hemel, o meki ibri libisma di tan gi yesi kisi wini fu a lusu-paiman, èn a o meki den tron sma di no abi nowan sondu. Prakseri fa a o de te yu gosontu dorodoro, yu yongu èn tranga, èn te yu o wroko nanga prisiri makandra nanga tra sma leki wán famiri fu meki a grontapu disi tron wan paradijs! Na a kaba fu a Dusun Yari Tiri, Yesus o gi a tirimakti baka na en Tata (1 Korentesma 15:24). Efu yu e tan waka baka Krestes, dan yu o kisi wan tumusi moi blesi, di yu no man frustan srefi. Dati na taki yu o ’tron pikin fu Gado èn yu o kisi kefalek bigi fri’ (Romesma 8:21). Iya, wi o kisi ala den blesi di Adam nanga Eva ben abi èn di den lasi. Leki manpikin nanga umapikin fu Yehovah dyaso na grontapu, wi o fri fu têgo fu a sondu di Adam tyari kon na wi tapu. Iya, „dede no sa de moro”.​—Openbaring 21:4.

²³ Prakseri a yongu gudu tiriman di wi ben taki fu en na ini Kapitel 1. A no ben teki a kari disi fu Yesus: „Kon nanga mi èn tron wan bakaman fu mi” (Markus 10:17-22). Noiti no meki a fowtu dati! Meki a de so taki yu de fayafaya fu teki a kari fu Yesus èn fu du dati nanga prisiri. Abi a fasti bosroiti tu fu horidoro, èn fu tan waka baka a Tumusi Bun Skapuman ibri dei, dan yusrefi o si fa a o meki ala den sani di Yehovah abi na prakseri kon tru na wan tumusi moi fasi!