Toe sroto gi wan trowlibi di e tan foe ala ten

1, 2. (a) Foe o langa a trowlibi ben meki foe tan? (b) Fa disi kan?

DI GADO ben tjari a fosi man nanga oema kon na wán na ini a trowlibi, dan noti ben sori taki a wánfasi ben o de gi wan pisi ten nomo. Adam nanga Eva ben moesoe de makandra den heri libi langa (Genesis 2:24). A markitiki foe Gado gi wan krin trowlibi na, te wán man nanga wán oema e kon de wán. Soso tegoe seks hoeroedoe na a sei foe wán noso ala toe patna e gi a bijbel gron foe brokotrow èn di e gi na okasi foe trow baka. — Mateus 5:32.

² A kan, taki toe sma e libi nanga makandra na ini kolokoe gi wan langa pisi ten? Ija, èn bijbel e gi toe toemoesi prenspari penti, noso sroto, di e jepi foe meki taki disi kan. Efoe a masra nanga a wefi e gebroiki den sroto disi, dan den sa opo a doro go na kolokoe nanga foeroe blesi. San na den sroto disi?

A FOSI SROTO

3. Sortoe dri fasi foe lobi den trowpatna moesoe kweki?

³ A fosi sroto na lobi. A de moi foe si taki na ini bijbel den e taki foe difrenti sortoe lobi. Wán na wan waran, persoonlijk lobi gi wan sma, a sortoe lobi di de na mindri krosibei mati (Johanes 11:3). Wan trawan na a lobi di e gro na mindri memre foe wan osofamiri (Romesma 12:10). Wan di foe dri, na a lobi di wan man abi gi wan oema noso di wan oema abi gi wan man (Odo 5:15-20). A no de foe taki, dati man nanga oema moesoe kweki ala den sortoe lobi disi. Ma wan di foe fo sortoe lobi de, di de moro prenspari leki den trawan.

4. San na wan di foe fo sortoe lobi?

⁴ Na ini a fosi tongo foe den Griki Boekoe foe bijbel, a wortoe gi a di foe fo sortoe lobi disi na aʹga·pe. A wortoe dati gebroiki na ini 1 Johanes 4:8, pe den e taigi wi: „Gado na lobi.” Foe troe, „wi lobi, bika [Gado] ben lobi wi fosi” (1 Johanes 4:19). Wan kresten e kweki so wan lobi na a fosi presi gi Jehovah Gado èn baka dati gi en kompe libisma (Markus 12:29-31). A wortoe aʹga·pe gebroiki toe na ini Efeisesma 5:2, di e taki: „Tan waka na ini lobi, neleki fa Krestes ben lobi oenoe toe èn ben gi ensrefi abra foe oenoe ede.” Jesus ben taki dati a sortoe lobi disi ben sa meki sma kon sabi den troe bakaman foe en: „Nanga disi ala sma sa sabi taki oenoe na mi disipel, efoe oenoe abi lobi [aʹga·pe] na oen mindri” (Johanes 13:35). Loekoe toe fa den e gebroiki aʹga·pe na ini 1 Korentesma 13:13: „Den dri disi e tan abra now, bribi, howpoe nanga lobi; ma a moro bigiwan foe den na lobi [aʹga·pe].”

5, 6. (a) Foe san ede lobi bigi moro leki bribi nanga howpoe? (b) San na wan toe reide foe san ede lobi sa jepi foe meki wan trowlibi tan foe ala ten?

⁵ San e meki taki na aʹga·pe lobi disi bigi moro leki bribi nanga howpoe? Na gronprakseri e tiri en — boen gronprakseri — di de foe feni na ini a Wortoe foe Gado (Psalm 119:105). A de a broko di wan sma e broko en ede gi tra sma sondro foe prakseri ensrefi nomo, foe doe gi tra sma san reti èn boen na a fasi fa Gado e si en, awansi a sma di e kisi dati e froedini en ofoe no. So wan lobi e meki taki trowpatna man foe waka na baka a bijbel rai: „Tan froedrage makandra èn gi makandra pardon na wan fri fasi efoe a wan abi wan sani foe kragi foe a trawan. Soleki fa Jehovah gi oenoe pardon na wan fri fasi, na so oenoe moesoe doe toe” (Kolosesma 3:13). Trowpatna di abi lobi, abi èn e kweki „tranga lobi [aʹga·pe] gi [makandra], bika lobi e tapoe wan lo sondoe” (1 Petrus 4:8). Loekoe taki lobi e tapoe fowtoe. A no e poeroe den krinkrin, foe di no wan onvolmaakti sma kan de fri foe fowtoe. — Psalm 130:3, 4; Jakobus 3:2.

⁶ Te wan trowpaar e kweki so wan lobi gi Gado èn gi makandra, dan a trowlibi foe den sa tan foe ala ten èn a sa de kolokoe, bika „lobi no e misi noiti” (1 Korentesma 13:8). Lobi na „wan volmaakti banti foe wánfasi” (Kolosesma 3:14). Efoe joe trow, fa joe nanga joe patna kan kweki a sortoe lobi disi? Leisi a Wortoe foe Gado makandra, èn taki foe en. Ondrosoekoe na eksempre di Jesus ben gi ini a tori foe lobi èn proeberi foe waka na baka na eksempre foe en, foe denki èn foe handri neleki en. Moro fara, fisiti den kresten konmakandra pe wi e kisi leri foe a Wortoe foe Gado. Èn begi foe kisi a jepi foe Gado foe kweki a hei sortoe lobi disi, di de wan froktoe foe Gado en santa jeje. — Odo 3:5, 6; Johanes 17:3; Galasiasma 5:22; Hebrewsma 10:24, 25.

A DI FOE TOE SROTO

7. San na lespeki, èn soema moesoe sori lespeki na ini a trowlibi?

⁷ Efoe toe sma di trow, lobi makandra troetroe, dan den sa abi lespeki toe gi makandra, èn lespeki na a di foe toe sroto gi wan kolokoe trowlibi. Den e taki foe lespeki leki „a poti di sma e poti prakseri na tapoe trawan, èn e gi den grani”. A Wortoe foe Gado e gi ala kresten rai, so srefi masra nanga wefi: „Teki fesi ini a gi di oenoe e gi makandra grani” (Romesma 12:10). Na apostel Petrus ben skrifi: „Oenoe masra, tan libi so srefi na den [oen wefi] akroederi sabi, foe di oenoe e gi den grani leki na wan moro swaki prapi, na oemasma fasi” (1 Petrus 3:7). A wefi e kisi a rai foe „abi dipi lespeki gi en masra” (Efeisesma 5:33). Efoe joe wani gi grani na wan sma, joe e sori switifasi gi a sma dati, joe e lespeki a wartifasi foe en nanga a taki di a e taki fa en e denki, èn joe de klariklari foe doe ibri reidelek sani di a e aksi foe joe.

8-10. San na wan toe fasi fa lespeki sa jepi foe meki wan trowlibi kon tranga èn kolokoe?

⁸ Den wan di wani njan boen foe wan kolokoe trowlibi e sori lespeki gi den patna foe den, foe di den „e hori ai, no soso foe persoonlijk belangstelling ede na tapoe [den] eigi afersi, ma so srefi foe persoonlijk belangstelling ede na tapoe di foe [den patna foe den]” (Filipisma 2:4). Den no e poti prakseri na tapoe san boen gi densrefi nomo — dati ben sa sori taki den e prakseri densrefi nomo. Na presi foe dati, den e poti prakseri na tapoe san boen so srefi gi den patna foe den. Ija, den e poti dati na tapoe a fosi presi.

⁹ Lespeki sa jepi den trowpatna foe erken a difrenti di de ini a fasi fa den e si sani. A no reidelek foe froewakti taki toe sma abi a srefi prakseri na ini ala afersi. Wan sani di prenspari kande gi wan masra, no abi foe de prenspari gi wan wefi, èn wan sani di wan wefi lobi, no abi foe de a srefi sani di wan masra lobi. Ma ibriwan foe den moesoe lespeki den prakseri èn den sani di a trawan e froekisi, so langa leki disi de na inisei den skotoe foe den wet nanga gronprakseri foe Jehovah. (1 Petrus 2:16; teki gersi Fileimon 14.) Moro fara, ibriwan foe den moesoe lespeki a wartifasi foe a trawan, foe di a no e taki sani noso e meki spotoe di e lagi a trawan, awansi te den de den wawan noso pe tra sma de.

¹⁰ Ija, lobi gi Gado èn gi makandra, èn lespeki gi makandra, na toe toemoesi prenspari sroto gi wan boen trowlibi. Fa wi kan gebroiki den na ini wan toe foe den moro prenspari kontren foe a trowlibi?

EDEMAN-WROKO LEKI DI FOE KRESTES

11. Soema na a edeman na ini a trowlibi, akroederi bijbel?

¹¹ Bijbel e taigi wi taki a man ben meki nanga eigifasi di ben sa meki a de wan boen edeman foe na osofamiri. Leki edeman, a man ben sa abi foe gi frantiwortoe na Jehovah gi a gosontoe foe en wefi nanga den pikin foe en, na jejefasi èn na skin sei. A ben sa moesoe teki bosroiti di de ini balansi èn di e sori san na a wani foe Jehovah èn a sa moesoe de wan boen eksempre ini a fasi fa a e tjari ensrefi fa Gado wani. „Meki den wefi saka densrefi na den masra foe den ondro neleki na Masra, bika wan masra na a edeman foe en wefi, neleki fa Krestes na a edeman foe a gemeente toe” (Efeisesma 5:22, 23). Ma bijbel e taki dati a masra abi wan edeman toe, wan Sma di abi makti na en tapoe. Na apostel Paulus ben skrifi: „Mi wani meki oenoe moesoe sabi, taki na edeman foe ibri man na Krestes; a man foe en sei na a edeman foe na oema; Gado foe en sei na a edeman foe Krestes” (1 Korentesma 11:3). A koni masra e leri fa foe gebroiki en posisi foe de wan edeman, te a e waka na baka na eksempre foe en eigi edeman, Krestes Jesus.

12. Sortoe toemoesi moi eksempre Jesus ben gi na ini a saka di wan sma moesoe saka ensrefi, èn foe en posisi leki edeman?

¹² Jesus srefi abi wan edeman, Jehovah, èn a e saka ensrefi na wan joisti fasi na En ondro. Jesus ben taki: „Mi no e soekoe mi eigi wani, ma a wani foe en di ben seni mi kon” (Johanes 5:30). Disi na wan toemoesi boen eksempre! Jesus na „a fosi geborewan foe ala mekisani” (Kolosesma 1:15). A ben tron a Mesias. Na en ben moesoe de na Edeman foe a gemeente foe den salfoe kresten èn a Kownoe di ben teki gi Gado Kownoekondre, na tapoe ala den engel (Filipisma 2:9-11; Hebrewsma 1:4). Ala di a ben abi so wan hei posisi èn den bigi froewakti disi, tokoe a mansma Jesus no ben grofoe, onreidelek, noso ben aksi toemoesi foeroe foe sma. A no ben de wan ogri tiriman, e memre den disipel foe en ala ten baka taki den ben moesoe gi jesi na en. Jesus ben abi lobi èn a ben abi sari-atifasi, spesroetoe gi den sma di ben kisi kwinsi. A ben taki: „Kon na mi, oen alamala di e wroko tranga èn di abi hebi lai, èn mi sa gi oenoe kowroe-ati. Teki mi tjatjari na oenoe tapoe èn leri foe mi, bika mi abi safrifasi èn sakafasi foe ati, èn oenoe sa feni kowroe-ati gi oen sili. Bika mi tjatjari safoe èn mi lai lekti” (Mateus 11:28-30). A ben de wan prisiri foe de nanga en.

13, 14. Fa wan lobi-ati masra sa gebroiki en posisi leki edeman, te a e waka baka na eksempre foe Jesus?

¹³ A masra di wani wan kolokoe osofamiri libi, sa doe boen foe poti prakseri na tapoe den boen eigifasi foe Jesus. Wan boen masra no grofoe èn a no e tiri leki wan diktator, foe di a e gebroiki en posisi na wan fowtoe fasi foe frede en wefi. Na presi foe dati, a lobi en èn e gi en grani. Efoe Jesus ben „abi sakafasi foe ati”, dan a masra abi moro reide foe abi dati toe, bika tra fasi leki Jesus, a masra e meki fowtoe. Te a e meki fowtoe, dan a wani taki en wefi froestan en. Foe dati ede a masra di abi sakafasi e erken den fowtoe foe en, awansi a ben sa kan de wan moeilek sani foe taki: „Gi mi pardon, joe ben abi leti.” A sa de moro makriki gi wan wefi foe lespeki na edeman-wroko foe wan masra di de bescheiden èn di abi sakafasi, leki di foe wan masra di abi bigifasi èn di tranga-ede. Na a tra sei, a wefi di e sori lespeki, e aksi pardon toe te a fowtoe.

¹⁴ Gado ben meki na oema nanga moi eigifasi di a kan gebroiki foe jepi meki wan kolokoe trowlibi. Wan koni masra sa erken disi èn a no sa tapoe en. Foeroe oemasma abi a firi foe sori moro sari-atifasi èn den firi gi sani moro esi, eigifasi di de fanowdoe foe sorgoe gi wan osofamiri èn foe leri fa foe abi demakandra nanga libisma. A de moro foeroe so, taki a wefi abi moro koni foe meki na oso tron wan switi presi foe libi na ini. A „bekwaam wefi” di Odo kapitel 31 ben skrifi foe en, ben abi foeroe toemoesi moi eigifasi èn heri boen bekwaamfasi, èn en osofamiri ben abi winimarki srefisrefi foe den. Foe san ede? Bika na ati foe en masra „froetrow” en. — Odo 31:10, 11.

15. Fa wan masra kan sori lobi nanga lespeki gi en wefi, leki fa Krestes ben doe?

¹⁵ Na ini son koeltoeroe, toemoesi foeroe krakti e poti na tapoe a posisi foe a masra, so taki srefi efoe wan sma aksi en wan sani, a no de wan lespeki sani. A mag handri nanga en wefi pikinmoro leki wan srafoe. So wan fowtoe fasi foe gebroiki en posisi leki edeman, abi leki bakapisi taki no wawan nanga en wefi a no sa abi wan boen matifasi, ma so srefi nanga Gado. (Teki gersi 1 Johanes 4:20, 21.) Na a tra sei, wan toe masra no e teki fesi, èn den e meki den wefi foe den tiri na osofamiri. A masra di e saka ensrefi na wan joisti fasi na Krestes ondro, no e meki mesbroiki foe en wefi noso e lagi en. Na presi foe dati, a e waka na baka a lobi foe Jesus di no e prakseri ensrefi nomo èn a e doe soleki fa Paulus ben gi leki rai: „Masra, tan lobi a wefi foe oenoe, neleki fa Krestes ben lobi a gemeente toe èn ben gi ensrefi abra gi en” (Efeisesma 5:25). Krestes Jesus ben lobi den bakaman foe en so foeroe taki a ben dede gi den. Wan boen masra sa proeberi foe waka na baka a fasi dati foe no prakseri ensrefi nomo, foe soekoe a boen foe en wefi, na presi foe aksi toemoesi foeroe foe en. Te wan masra e saka ensrefi na Krestes ondro èn e sori lobi nanga lespeki leki di foe Krestes, dan dati sa boeweigi en wefi foe saka ensrefi na en ondro. — Efeisesma 5:28, 29, 33.

A SAKA DI A WEFI MOESOE SAKA ENSREFI

16. Sortoe eigifasi wan wefi moesoe sori na ini en matifasi nanga en masra?

¹⁶ Wan pisi ten baka di Gado meki Adam, „Jehovah Gado ben taki moro fara, taki: ’A no boen taki libisma tan en wawan. Mi e go meki wan jepi gi en, leki wan fitipisi foe en’” (Genesis 2:18). Gado ben meki Eva leki „wan fitipisi”, no leki wan sma di e strei nanga a masra. A trowlibi no ben moesoe de leki wan sipi di abi toe kapten di e strei nanga makandra. A masra ben moesoe gebroiki en posisi leki edeman na wan lobi fasi, èn a wefi ben moesoe sori lobi, lespeki, èn a moesoe sori taki a wani foe saka ensrefi.

17, 18. San na wan toe fasi fa wan wefi kan de wan troetroe jepi gi en masra?

¹⁷ Ma wan boen wefi, a no soso wan wefi nomo di e saka ensrefi. A e proeberi foe de wan troetroe jepi, foe di a e horibaka gi en masra na ini den bosroiti di a masra e teki. A no de foe taki, dati disi de moro makriki gi en te a e agri nanga den bosroiti di a masra teki. Ma srefi te a no e agri nanga en, efoe a e horibaka gi en, dan dati kan jepi taki a bosroiti di a masra teki, abi wan moro boen bakapisi.

¹⁸ Wan wefi kan jepi en masra foe de wan boen edeman na tra fasi. A kan sori warderi gi den moeiti di en masra e meki foe teki fesi, na presi foe kroetoekroetoe en noso foe meki en kisi a firi taki noiti a kan plisi en. Te a e handri na wan positief fasi nanga en masra, a moesoe hori na prakseri taki wan „tiri èn safoe jeje . . . warti srefisrefi na ini na ai foe Gado”, no soso na ini na ai foe en masra (1 Petrus 3:3, 4; Kolosesma 3:12). Fa a de te a masra no de na bribi? Awansi a masra de na bribi noso no de na bribi, den Boekoe foe bijbel e gi wefi a deki-ati „foe lobi den masra foe den, foe lobi den pikin foe den, foe de gosontoe ini denki, foe de krin, foe wroko na oso, foe abi boen-ati, foe saka densrefi na den eigi masra ondro, so taki sma no kosi a wortoe foe Gado” (Titus 2:4, 5). Efoe afersi de di abi foe doe nanga a konsensi, dan a sori leki, a masra di no de na bribi, sa lespeki a prakseri foe en wefi efoe a wefi e taki foe dati nanga „safoe fasi nanga dipi lespeki”. Son masra di no de na bribi, [den wefi] ben „wini den sondro wan wortoe, nanga a fasi fa den e tjari densrefi, foe di den si fa oenoe ben tjari oensrefi na wan boen fasi makandra nanga dipi lespeki”. — 1 Petrus 3:1, 2, 15; 1 Korentesma 7:13-16.

19. Fa a de efoe wan masra e aksi en wefi foe pasa a wet foe Gado?

¹⁹ Fa a de efoe wan masra e aksi en wefi foe doe wan sani di Gado e tapoe sma foe doe? Efoe dati de so, dan a wefi moesoe hori na prakseri taki Gado na en moro hei Tiriman. A e teki leki eksempre san den apostel ben doe, di lanti ben aksi den foe pasa a wet foe Gado. Tori foe den Apostel 5:29 e froeteri: „Petrus nanga den tra apostel ben taki: ’Wi moesoe gi jesi na Gado leki tiriman moro leki na libisma.’”

BOEN KOMUNIKÂSI

20. San na wan toemoesi prenspari kontren pe lobi nanga lespeki de toemoesi prenspari?

²⁰ Lobi nanga lespeki de prenspari na ini wan tra kontren foe a trowlibi — komunikâsi. A lobi-ati masra sa taki makandra nanga en foe den wroko foe en wefi, den problema foe en, èn a fasi fa a e prakseri foe difrenti afersi. A wefi abi disi fanowdoe. Wan masra di e teki ten foe taki nanga en wefi èn e arki troetroe na san en wefi e taki, e sori taki a lobi èn e lespeki en (Jakobus 1:19). Wan toe wefi e kragi taki den masra foe den e gebroiki toemoesi pikinso ten foe taki makandra nanga den. Dati na wan sari sani. A troe, taki na ini den ten disi pe foeroe de foe doe, kande den masra e wroko foeroe joeroe dorosei na oso, èn ekonomia situwâsi kan abi leki bakapisi taki wan toe wefi moesoe abi wan grontapoe wroko toe. Ma wan trowpaar moesoe meki ten fri gi makandra. Efoe den no e doe disi, dan a kan taki den no sa abi makandra fanowdoe. A ben kan tjari serjoesoe problema kon efoe den e kisi a firi foe soekoe kompe di abi firi gi den, dorosei foe a seti foe a trowlibi.

21. Fa a taki di wan sma e taki na wan joisti fasi sa jepi foe hori wan trowlibi kolokoe?

²¹ A fasi fa wefi nanga masra e taki nanga makandra, de prenspari. „Switi wortoe . . . switi gi a sili èn de wan dresi gi den bonjo” (Odo 16:24). Awansi wan patna de na bribi noso no, a bijbel rai e fiti: „Meki joe wortoe de ala ten nanga switifasi, a moesoe abi sowtoe na ini”, dati wani taki, a moesoe tesi boen (Kolosesma 4:6). Efoe wan sma abi wan moeilek dei, dan wan toe switi wortoe foe a patna foe en di e sori firi gi en, kan doe foeroe boen. „Leki gowtoe apra na ini solfroe sani di kerfoe nanga anoe, na so wan wortoe de di taki na a joisti ten” (Odo 25:11). A hei foe a sten nanga den sortoe wortoe de toemoesi prenspari. Foe eksempre, na wan fasi di e tanteri èn di gersi wan komando, wan sma kan taigi a trawan: „Tapoe a doro!” Ma den wortoe: „Joe ben sa wani tapoe a doro grantangi?”, di taki na wan switi fasi, èn nanga wan sten di e sori firi gi a trawan, „abi [moro] sowtoe na ini”.

22. Sortoe fasi trowpaar abi fanowdoe foe tan hori wan boen komunikâsi?

²² Boen komunikâsi de moro boen te wortoe taki na wan safoe fasi, te joe e loekoe èn e meki gebaar na wan switi fasi, te boenfasi de, te joe e froestan makandra, èn te safoe fasi de. Te masra nanga wefi e wroko tranga foe tan hori wan boen komunikâsi, dan den ala toe sa firi fri foe taigi makandra foe den fanowdoe foe den, èn den kan de fonten foe trowstoe nanga jepi gi makandra na ini ten foe lasi-ati noso stress. „Taki na wan trowstoe fasi nanga den sili di brokosaka”, na so a Wortoe foe Gado e gi tranga (1 Tesalonikasma 5:14). Ten sa de pe a masra sa brokosaka èn ten pe a wefi sa brokosaka. Den kan „taki na wan trowstoe fasi”, èn bow makandra. — Romesma 15:2.

23, 24. Fa lobi nanga lespeki sa jepi te sma no e agri nanga makandra? Gi wan eksempre.

²³ Trowpatna di e sori lobi nanga lespeki no sa si ibri leisi te den no e agri nanga makandra, leki wan bigi problema. Den sa doe foeroe moeiti foe no abi „bita atibron” gi makandra (Kolosesma 3:19). Den ala toe moesoe memre taki „wan piki, di safoe, e kowroe atibron” (Odo 15:1). Loekoe boen foe no lagi noso kroetoe wan patna di e trowe den firi foe en kon na doro. Na presi foe dati, teki den sortoe fasi disi foe taki, leki wan okasi foe sabi moro boen fa a trawan e prakseri. Nanga makandra oenoe moesoe proeberi foe soekoe wan loesoe gi den kesekese di oenoe abi èn oenoe moesoe teki bosroiti na ini wánfasi.

²⁴ Memre na okasi di Sara ben pristeri en masra, Abraham, wan loesoe gi wan problema èn a loesoe disi no ben de akroederi den firi foe Abraham. Tokoe Gado ben taigi Abraham: „Arki en” (Genesis 21:9-12). Abraham ben doe dati, èn a ben kisi blesi. Na so a de toe, te wan wefi e kon nanga wan prakseri di e difrenti foe san en masra abi na prakseri, awansi fa a no fa, a masra moesoe arki. Na a srefi ten, a wefi no moesoe de a sma di e taki moro foeroe na ini a takimakandra, ma a moesoe arki na san en masra abi foe taki (Odo 25:24). A no ben sa de wan fasi foe sori lobi noso lespeki efoe a masra noso a wefi wani nomonomo taki ala ten sani moesoe doe na a fasi fa en wani.

25. Fa boen komunikâsi sa jepi foe tjari kolokoe kon na ini den moro krobisei afersi foe a trowlibi?

²⁵ Boen komunikâsi de prenspari toe na ini a seks demakandra foe wan trowpaar. Efoe den e prakseri densrefi nomo èn den no man dwengi densrefi, dan dati kan pori a moro krosibei matifasi disi na ini a trowlibi serjoesoe. Wan opo komunikâsi makandra nanga pasensi, de toemoesi prenspari. Te ibriwan foe den e soekoe a kolokoe foe a trawan sondro foe prakseri ensrefi nomo, dan pikinmoro noiti seks de wan serjoesoe problema. Na ini na afersi disi èn na ini tra afersi, „meki ibri sma no tan soekoe en eigi boen, ma di foe a tra sma”. — 1 Korentesma 7:3-5; 10:24.

26. Ala di ibri trowlibi sa abi boen ten nanga takroe ten, fa a sa jepi den trowpaar foe feni kolokoe te den e gi jesi na a Wortoe foe Gado?

²⁶ Toemoesi moi rai a Wortoe foe Gado e gi! Troe, ibri trowlibi sa abi boen ten nanga takroe ten. Ma te den trowpaar e saka densrefi na ondro a fasi fa Jehovah e denki, soleki fa a tjari kon na krin na ini bijbel, èn a matifasi foe den abi en gron na tapoe lobi nanga lespeki, dan den kan abi a froetrow taki a trowlibi foe den sa tan foe ala ten èn a sa de kolokoe. Na so fasi den no sa gi grani na makandra wawan, ma so srefi na a Sma di poti a seti foe a trowlibi, Jehovah Gado.