Gado E Gi Yu a Kari fu Tron En Mati

Gado wani taki yu musu de en mati. Yu prakseri wan leisi kaba taki yu ben kan de wan mati fu a moro bigi Sma di de? Den ben kari Abraham, di ben libi langa ten pasa kaba, a mati fu Gado (Yakobus 2:23). Tra sma di Bijbel e taki fu den, ben de mati fu Gado tu èn den ben kisi furu blesi. Na ini a ten disi, sma fu ala presi na grontapu tron Gado mati. Yu so srefi kan de Gado mati tu.

A moro betre fu de wan mati fu Gado leki fu de wan mati fu iniwan libisma. Gado noiti e broko en loyaal mati saka (Psalm 18:25). A moro betre fu de wan mati fu Gado, leki fu abi gudu. Te wan gudu sma dede, dan a moni fu en e go na trawan. Ma den sma di de Gado mati, abi wan gudu di no wan sma kan puru fu den.​—Mateus 6:19.

Son sma kan pruberi fu tapu yu fu no leri fu Gado moro. Srefi wan tu mati nanga famiriman fu yu kan du disi (Mateus 10:36, 37). Efu trawan e lafu yu noso e pramisi fu du yu ogri, dan aksi yusrefi: ’Suma mi wani plisi — libisma noso Gado?’ Prakseri fu disi: Kande wan sma ben sa taigi yu fu no nyan moro. Yu ben o arki en? Kwetikweti! Yu abi nyanyan fanowdu fu tan na libi. Ma Gado kan meki yu libi fu têgo! So bun, noiti no meki wan sma tapu yu fu leri fa yu kan de wan mati fu Gado.​—Yohanes 17:3.