A boskopu di wi musu meki bekènti

„FREDE A TRU GADO ÈN HORI DEN KOMANDO FU EN”

LANGA bifo Krestes kon na grontapu, dan Yehovah ben fruteri a getrow man Abraham fu wan sani di seti fu meki „ala den pipel fu grontapu” blesi densrefi (Gen. 22:18). Gado ben meki Salomo skrifi sosrefi fu wan prenspari sani di ala libisma musu du: „Frede a tru Gado èn hori den komando fu en. Bika disi na a heri plekti fu libisma” (Preik. 12:13). Ma fa ala sma na ini ala kondre ben o leri den sani disi?

Aladi ala ten wan tu sma ben de di ben bribi Gado wortu, toku Bijbel e sori taki a wroko fu preiki a bun nyunsu fayafaya na heri grontapu so taki sma fu ala kondre yere dati, na wan sani di musu pasa na ini „a dei fu Masra”. A „dei” disi ben bigin na ini 1914 (Openb. 1:10). Fu a ten disi, Openbaring 14:6, 7 ben taki na fesi taki wan prenspari boskopu ben o fruteri na ala sei na ondro a tiri fu den engel, èn „ibri kondre nanga lo nanga tongo nanga pipel” ben o yere a boskopu disi. Den ben o kisi a deki-ati: „Frede Gado èn gi en glori, bika a yuru doro fu a tyari krutu kon, èn fu dati ede, anbegi a Sma di meki hemel nanga grontapu nanga se nanga den watra fonten.” Na a wani fu Gado taki a boskopu disi musu tyari go gi ala sma. Wi abi wan bigi grani fu abi wan prati na a wroko dati.

„A tru Gado.” Di Yehovah ben taki „unu na mi kotoigi”, dan a ben du dati na wan ten di trawan ben e tweifri na a reti di Gado abi fu tiri (Yes. 43:10). A boskopu di wi musu fruteri, a no wan boskopu pe wi e fruteri trawan taki den musu abi wan kerki pe den e go, noso taki den musu bribi na ini wan gado. Na presi fu dati, den musu kisi na okasi fu leri taki a Mekiman fu hemel nanga grontapu na a wan-enkri tru Gado (Yes. 45:5, 18, 21, 22; Yoh. 17:3). Soso a tru Gado kan fruteri soifri san o pasa na ini a ten di e kon. Wi abi a grani fu sori trawan taki, fu di Yehovah wortu kon tru na ini a ten di pasa, dati meki wi kan de seiker taki ala sani di a pramisi wi gi a ten di e kon, sa kon tru tu.​—Yos. 23:14; Yes. 55:10, 11.

A no de fu taki, dati wi e preiki gi furu sma di e anbegi tra gado noso di no e anbegi nowan enkri gado. Efu wi wani taki den arki wi, dan kande wi sa musu bigin taki fu wan sani di e hari a prakseri fu wi nanga di fu den. Wi kan leri furu fu na eksempre di skrifi na Tori fu den Apostel 17:22-31. Luku taki aladi na apostel Paulus ben luku bun san a taki èn fa a taki dati, toku a ben sori krinkrin taki ala sma abi wan frantwortu na a Gado di de a Mekiman fu hemel nanga grontapu.

Meki sma kon sabi Gado en nen. No misi fu meki sma kon sabi a nen fu a tru Gado. Yehovah lobi a nen fu en (Ex. 3:15; Yes. 42:8). A wani taki ala sma musu sabi a nen dati. A ben sorgu taki a glori nen disi skrifi moro leki 7000 tron na ini Bijbel. Wi abi a frantwortu fu meki sma kon sabi disi.​—Deut. 4:35.

Iniwan sma di wani feni libi na ini a ten di e kon, sa musu sabi Yehovah èn a sa musu kari en na ini bribi (Yoèl 2:32; Mal. 3:16; 2 Tes. 1:8). Toku, furu sma no sabi Yehovah. Furu fu den sma disi na sma di e taki dati den e anbegi a Gado fu Bijbel. Srefi efu den abi wan Bijbel, den e leisi en, dan toku a kan taki den no sabi a nen fu Gado, fu di a nen dati no de fu feni na ini furu fu den bijbelvertaling fu a ten disi. A wan-enkri sani di wan tu sma sabi fu a nen Yehovah, na taki den kerki fesiman fu den taigi den fu no gebroiki a nen dati.

Fa wi kan meki sma kon sabi a nen fu Gado? Noti no ben o moro bun leki fu sori den dati na ini Bijbel, èn efu a kan, na ini den eigi Bijbel. Na ini wan tu bijbelvertaling di de fu kisi na ini tra tongo, a nen dati de fu feni dusundusun tron. Na ini tra Bijbel baka, a kan taki a nen de fu feni soso na ini Psalm 83:19, Exodus 6:2, nanga Yesaya 26:4. Na ini furu bijbelvertaling den gebroiki tra wortu soleki „Masra” nanga „Gado”, na presi fu skrifi a nen fu Gado. Ma den skrifi den wortu disi na wan spesrutu sortu fasi, fu sori taki na drape a nen fu Gado ben skrifi na ini a tongo di den gebroiki fu skrifi Bijbel fosi. Ma efu wan bijbelvertaling fu a ten disi no abi a nen fu Gado srefisrefi, dan kande yu sa musu du wan tra sani. Kande yu sa musu gebroiki wan moro owru bijbelvertaling di abi a nen na ini, fu sori sma san trawan du nanga a nen fu Gado na ini den bijbelvertaling fu a ten disi. Na ini wan tu kondre yu kan sori sma tapu wan tu kerkisingi di abi a nen fu Gado, noso kande yu kan sori den wan presi pe a nen fu Gado skrifi na tapu.

Srefi gi sma di e anbegi tra gado, wi kan gebroiki Yeremia 10:10-13 heri bun soleki fa a skrifi na ini a Nieuwe-Wereldvertaling. A tekst dati no e kari a nen fu Gado wawan, ma a e fruteri krinkrin tu, suma na en.

No frede fu kari a nen fu Yehovah, so taki yu e go kari soso den wortu leki „Gado” nanga „Masra,” soleki fa Krestenhèit e du. Disi no wani taki dati ibri leisi te yu o taki nanga wan sma, dan yu musu bigin kari a nen fu Gado. Fu di son sma e denki tra fasi fu a nen fu Gado, meki den kan tapu a takimakandra wantewante. Ma te yu nanga a sma e taki kaba fu wan tori, dan no frede fu gebroiki a nen fu Gado.

A de prenspari fu si taki Bijbel e gebroiki a nen fu Gado moro leisi leki den wortu soleki „Masra” nanga „Gado” srefi. Ma awinsi dati de so, toku den man di yepi skrifi Bijbel no ben gebroiki a nen fu Gado na ini ibri pisi tori di den ben skrifi. Ma den ben gebroiki a nen leki fa trawan ben gwenti, sondro fu frede, èn den ben du dati na wan lespeki fasi. Dati na wan bun eksempre di wi kan teki abra tu.

Kon sabi a sma di abi a nen. Aladi a tru taki a nen fu Gado na wan prenspari sani fu a waarheid, toku dati na soso a fosi sani di wan sma musu du fu kon sabi En.

Efu sma wani lobi Yehovah èn efu den wani kari en na ini bribi, dan den musu kon sabi sortu Gado a de. Di Yehovah ben meki Moses kon sabi a nen fu En na tapu a bergi Sinai, dan A ben du moro leki fu kari a wortu „Yehovah” ibri tron baka. Yehovah ben sori Moses tapu wan tu kefalek moi fasi fu En (Ex. 34:6, 7). Dati na wan eksempre di wi kan teki tu.

Awansi yu e preiki gi nyun sma di wani sabi moro, noso awansi yu e hori wan lezing na ini a gemeente, toku te yu e taki fu den blesi fu a Kownukondre, dan sori go na a Gado di e pramisi den sortu blesi disi. Sori den sma san den blesi disi e fruteri wi fu a Gado disi. Te yu e sori go na den komando fu Gado, dan poti krakti tapu fa den komando disi e sori a koni nanga a lobi fu Gado. Meki sma frustan krinkrin taki den sani di Gado e aksi fu wi, no de wan hebi gi wi, ma na presi fu dati, den sani dati Gado e aksi fu wi so taki sani kan waka bun nanga wi (Yes. 48:17, 18; Mika 6:8). Sori fa ibri leisi di Yehovah sori en makti, a ben de krin fu si fa A de, san A wani, èn san A abi na prakseri fu du. Poti prakseri na a fasi fa Yehovah de, èn taki a e sori disi na wan yoisti fasi. Meki trawan yere fa yusrefi e firi fu Yehovah. A lobi di yu abi gi Yehovah, kan yepi trawan kisi a srefi sortu lobi disi tu.

A tumusi prenspari boskopu di ala sma musu yere na ini a ten disi, na wan boskopu di e gi den tranga fu frede Gado. Nanga den sani di wi e taki, wi musu suku fu gi sma deki-ati fu abi so wan frede gi Gado. A frede disi na wan yoisti sortu frede, a e sori taki trutru wan sma abi lespeki gi Yehovah (Ps. 89:7). Te wi abi a frede disi, dan wi e frustan taki Yehovah na a moro hei Krutuman. Wi e frustan tu taki wi sa kisi libi na ini a ten di e kon, soso te A e feni wi bun (Luk. 12:5; Rom. 14:12). Fu dati ede, wi sa abi so wan frede te wi abi dipi lobi gi Gado, èn dati sa meki taki wi sa wani du nomonomo san e plisi en (Deut. 10:12, 13). Frede gi Gado e meki tu taki wi e teige san takru, wi e gi yesi na den komando fu Gado, èn wi e anbegi en nanga wi heri ati (Deut. 5:29; 1 Kron. 28:9; Odo 8:13). Frede gi Gado e kibri wi fu no dini Gado na a wan sei èn lobi sani fu a grontapu na a tra sei.​—1 Yoh. 2:15-17.

A nen fu Gado na „wan tranga toren”. Den sma di trutru kon sabi Yehovah, e kisi bun kibri na en. Disi no de so fu di den e kari a nen fu Gado nomo, noso fu di den kan kari wan tu fasi fa a de. Ma disi de so fu di den e frutrow tapu Yehovah srefi. Odo 18:10 e taki fu den sma disi: „A nen fu Yehovah na wan tranga toren. Na dya a regtfardikiwan e lon go na ini èn e kisi kibri.”

Gebroiki ala den okasi di yu abi fu gi trawan deki-ati fu frutrow tapu Yehovah (Ps. 37:3; Odo 3:5, 6). Efu wan sma e frutrow tapu Yehovah na so wan fasi, dan a e sori taki a e bribi na ini Yehovah èn na ini den pramisi fu en (Hebr. 11:6). Te sma ’e kari a nen fu Yehovah’ fu di den sabi taki Yehovah na a Sma di abi a reti fu tiri, te den lobi den pasi fu en, èn te den e bribi taki trutru frulusu kan kon fu en nomo, dan Gado Wortu e gi wi a dyaranti taki den sma disi sa kisi frulusu (Rom. 10:13, 14). Te yu e gi trawan leri, dan yepi den fu sori a sortu bribi dati na ini ibri sani di den e du na ini a libi.

Furu sma e kisi fu du nanga kefalek bigi problema. A kan, taki den e feni taki den problema fu den no kan lusu moro. Gi den tranga fu leri san na a wani fu Yehovah, fu frutrow tapu en, èn fu du san den e leri (Ps. 25:5). Gi den deki-ati fu begi fayafaya so taki Gado yepi den, èn meki den gi Gado tangi gi den blesi di den e kisi fu en (Fil. 4:6, 7). Disi sa meki taki den no sa leisi wawan san skrifi na ini Bijbel, ma den sa ondrofeni sosrefi fa den pramisi fu Yehovah e kon tru na ini den eigi libi. Te den kon sabi Yehovah na so wan fasi, dan den sa bigin firi a seikerfasi fu di den e frustan san a nen fu Yehovah wani taki.​—Ps. 34:8; Yer. 17:7, 8.

Gebroiki ibri okasi di yu abi fu yepi sma frustan o koni a de fu frede Yehovah leki a tru Gado, èn fu hori den komando fu en.

„GI KOTOIGI FU YESUS”

BAKA di Yesus opo baka, ma bifo a go baka na hemel, dan a ben taigi den disipel fu en san den musu du, di a taki: „Unu sa de kotoigi fu mi . . . te na a moro farawe presi fu grontapu” (Tori. 1:8). Na ini a ten disi, dan Bijbel e taki fu den getrow futuboi fu Gado leki den wan di „abi a wroko fu gi kotoigi fu Yesus” (Openb. 12:17). O faya yu e gi kotoigi fu Yesus?

Furu sma e taki na wan opregti fasi taki den e bribi na ini Yesus, ma den sma disi no sabi notinoti fu a libi di Yesus ben abi bifo a ben tron wan libisma na grontapu. Den no e frustan taki a ben de wan trutru libisma di a ben de na grontapu. Den no e frustan san a wani taki dati Yesus na a Manpikin fu Gado. Den no sabi furu fu a frantwortu di Yesus abi fu meki den sani di Gado abi na prakseri, kon tru. Den no sabi san Yesus e du now, èn den no e frustan san o pasa nanga a libi fu den te Yesus o kenki sani na ini a ten di e kon. Kande den abi a fowtu denki srefi taki Yehovah Kotoigi no e bribi na ini Yesus. Wi abi a grani fu meki sma kon sabi den tru tori fu den afersi disi.

Na a tra sei, dan trawan no e bribi taki Yesus, soleki fa Bijbel e fruteri fu en, na wan sma di trutru ben libi. Wan tu sma e si Yesus leki wan bigi man nomo. Furu sma no wani denki srefi taki a de a Manpikin fu Gado. Efu wi wani „gi kotoigi fu Yesus” na den sortu sma disi, dan dati wani taki dati wi musu meki furu muiti, wi musu abi pasensi, èn wi musu taki nanga koni.

A no abi trobi san den arkiman fu yu e denki, toku den musu kon sabi Yesus Krestes efu den wani nyan bun fu den sani di Gado seti fu gi libisma têgo libi (Yoh. 17:3). Gado taki krinkrin dati a wani ala sma di e libi fu „erken na fesi ala sma taki Yesus Krestes na Masra”, èn den musu saka densrefi na ondro a makti fu en (Fil. 2:9-11). Sobun, wi no kan wai pasi nomo gi den sma di abi wan kefalek fowtu denki noso di abi wan heri tra denki. Wanwan leisi wi kan taki fri san wi sabi fu Yesus Krestes, srefi na a fosi leisi di wi miti nanga wan sma. Ma tra leisi baka, dan wi musu luku bun san wi e taki fu Yesus so taki wi kan yepi wi arkiman fu bigin abi wan yoisti denki fu en. Kande wi musu denki fu wan tu tra fasi fa wi kan bigin sori sma tapu tra tori fu Yesus Krestes te wi sa go baka na den. Ma toku, kande wi no sa man kari ala sani di abi fu du nanga a tori. Dati wi sa man du soso te wi e hori wan oso-bijbelstudie nanga wan sma.​—1 Tim. 2:3-7.

A kefalek prenspari frantwortu di Yesus abi na ini den sani di Gado abi na prakseri. Wi musu yepi sma frustan dati den no sa man de wan bun mati fu Gado sondro bribi na ini Yesus Krestes, fu di Yesus na “a pasi” èn ’nowan sma e kon na a Tata sondro yepi fu en’ (Yoh. 14:6). Efu wan sma no e frustan a kefalek prenspari frantwortu di Yehovah gi a fosi gebore Manpikin fu en, dan a no sa man frustan Bijbel kwetikweti. Fu san ede? Fu di Yehovah meki en Manpikin de a moro prenspari sma di sa yepi en fu meki ala den sani di A abi na prakseri, kon tru (Kol. 1:17-20). Den profeititori na ini Bijbel abi fu du nanga a tru tori disi (Openb. 19:10). Yesus Krestes na a wan di e meki taki ala den problema kan lusu, dati na den problema di kon fu di Satan opo ensrefi teige Gado èn fu di Adam sondu.​—Hebr. 2:5-9, 14, 15.

Fu frustan a frantwortu di Krestes abi, dan wan sma musu erken taki libisma de na ini wan sari situwâsi pe den no man komoto. Wi alamala gebore na ini sondu. Na fu a sondu disi ede, meki wi kan kisi furu problema na ini wi libi. Ma awansi fa a no fa, te fu kaba, sondu e meki taki wi e dede (Rom. 3:23; 5:12). Te yu e gi kotoigi na trawan, dan taki-go-taki-kon nanga den fu a tori dati. Baka dati, sori taki nanga yepi fu a frulusu-ofrandi fu Yesus Krestes, Yehovah sorgu na wan lobi-ati fasi taki sma kan kon fri fu sondu nanga dede. Ma dati na gi den wan di e poti bribi na ini a frulusu-ofrandi disi (Mark. 10:45; Hebr. 2:9). Disi e opo a pasi gi den fu nyan bun fu têgo libi leki volmaakti libisma (Yoh. 3:16, 36). Wan tra fasi no de fu kisi a libi disi (Tori. 4:12). Leki leriman yu musu du moro leki fu leri trawan den tru tori disi nomo, awansi yu e leri wán sma nomo, noso yu e gi leri na ini a gemeente. De nanga switifasi èn abi pasensi sosrefi te yu e yepi yu arkiman fu de nanga tangi na ati gi san Krestes du gi wi leki wi Frulusuman. Te wan sma de nanga tangi na ati gi a sani disi, dan dati kan abi wan bun krakti tapu a fasi fa a e tyari ensrefi, san a e du, èn sosrefi tapu den sani di a wani doro na ini a libi.​—2 Kor. 5:14, 15.

A no de fu taki, Yesus gi en libi leki wan srakti-ofrandi wán leisi nomo (Hebr. 9:28). Ma nownowde a e dini leki Granpriester. Yepi trawan frustan san disi wani taki. San na den problema di den abi? Den brokosaka, den lasi-ati, noso den e nyan pina? Noso a kan taki tra sma no e libi switi nanga den? Di Yesus ben de wan libisma, dan ala den sani disi ben miti en tu. A sabi fa wi e firi. Leki libisma wi no de volmaakti, fu dati ede wi abi Gado en sari-ati fanowdu. Na so wi e firi trutru? Efu wi e begi Gado fu gi wi pardon tapu a gron fu Yesus en srakti-ofrandi, dan Yesus e tron „wan yepiman na a Tata”. Nanga furu sari-ati, a e ’begi Gado gi wi’ (1 Yoh. 2:1, 2; Rom. 8:34). Nanga yepi fu Yesus en srakti-ofrandi èn nanga yepi fu a wroko di a e du leki Granpriester, wi kan kon na fesi Yehovah en „kownusturu fu bun-ati”, so taki wi kan kisi yepi na a reti ten (Hebr. 4:15, 16). Aladi wi no de volmaakti leki libisma, toku wi kan dini Gado nanga wan krin konsensi fu di Yesus e yepi wi leki Granpriester.​—Hebr. 9:13, 14.

Moro fara, Yesus abi bigi makti leki a wan di Gado poti fu de Edeman fu a Kresten gemeente (Mat. 28:18; Ef. 1:22, 23). Leki Edeman, Yesus e gi wi tiri di de fanowdu èn di e kruderi nanga a wani fu Gado. Te yu e leri trawan, dan yepi den frustan taki na Yesus Krestes, èn nowan libisma, na a Edeman fu a gemeente (Mat. 23:10). A fosi leisi kaba te yu miti nanga sma di wani sabi moro, dan gi den wan kari fu kon na den konmakandra fu a gemeente na ini a birti fu den. Drape den kan si taki wi e studeri Bijbel nanga yepi fu den sani di „a getrow èn koni srafu” gi wi. No sori den nomo suma na a „srafu” disi, ma sori den sosrefi suma na a Masra, so taki den e kon frustan taki Yesus na a edeman (Mat. 24:45-47). Meki den kon sabi den owruman, èn fruteri den taki den owruman disi musu doro den markitiki di skrifi na ini Bijbel (1 Tim. 3:1-7; Tit. 1:5-9). Sori den taki a gemeente no de fu den owruman, ma taki den owruman disi e yepi wi fu waka baka Yesus Krestes (Tori. 20:28; Ef. 4:16; 1 Petr. 5:2, 3). Yepi den sma disi di wani sabi moro, fu frustan taki wan organisâsi de di e orga a wroko na a heri grontapu na ondro Krestes leki edeman.

Fu den Evangelietori, wi e leri taki di Yesus ben kon na ini Yerusalem leti bifo a dede fu en, dan den disipel fu en ben prèise en leki „a Sma di e kon leki Kownu na ini Yehovah nen!” (Luk. 19:38) Te sma e studeri a Bijbel moro fini, dan den e leri taki Yehovah gi Yesus tirimakti noyaso, èn a tirimakti disi abi krakti tapu sma fu ala kondre (Dan. 7:13, 14). Te yu e hori lezing na ini a gemeente, noso te yu e hori oso-bijbelstudie, dan yepi yu arkiman frustan san na a tirimakti fu Yesus, èn yepi den fu de nanga tangi na ati gi disi.

Yepi sma frustan krinkrin taki a fasi fa wi e libi e sori efu wi e bribi trutru taki Yesus Krestes na Kownu, èn efu wi wani saka wisrefi trutru na ondro a tirimakti fu en. Poti prakseri na a wroko di Yesus gi den bakaman fu en fu du, baka di a kisi salfu leki Kownu (Mat. 24:14; 28:18-20). Sori yu arkiman san musu de den moro prenspari sani na ini a libi, soleki fa Yesus leki a Tumusi Bun Raiman, ben taki (Yes. 9:6, 7; Mat. 6:19-34). Poti prakseri na san a Granman fu Vrede taki fu a fasi fa den bakaman fu en ben o de (Mat. 20:25-27; Yoh. 13:35). Luku bun taki yu no feni taki yu na a sma di musu krutu trawan fu di den no e du nofo. Ma na presi fu dati, gi den deki-ati fu go prakseri efu den sani di den e du e sori taki den e saka densrefi na ondro a tirimakti fu Krestes. Te yu e sori den san den musu du, dan sabi taki yu musu du a srefi sani tu.

Poti Krestes leki a fondamenti. Bijbel e agersi a wroko fu meki Kresten disipel nanga a bow di wan sma e bow wan oso tapu wan fondamenti, èn a fondamenti dati na Yesus Krestes (1 Kor. 3:10-15). Fu man du disi, dan yu musu yepi trawan fu den kon sabi Yesus soifri soleki fa Bijbel e taki fu en. Luku bun taki den no e si yu leki a sma di den musu waka na baka (1 Kor. 3:4-7). Poti a prakseri fu yu arkiman na Yesus Krestes.

Efu yu poti a fondamenti bun, dan den studenti sa frustan taki Krestes libi wan eksempre gi wi so taki wi „waka soifri na ini den futumarki fu en” (1 Petr. 2:21). Fu meki yu studenti bow moro fara tapu a fondamenti dati, dan gi den deki-ati fu leisi den Evangelietori. Ma te den e leisi dati, dan den no musu si en leki tru tori fu owruten nomo, ma leki wan eksempre di den kan teki fu waka na baka. Yepi den so taki den memre fa Yesus ben tyari ensrefi èn fa a ben de, èn yepi den sosrefi fu prakseri san den kan du fu dati ede. Gi den deki-ati fu luku fa Yesus ben denki fu en Tata, fa a ben horidoro na ondro tesi, fa a ben saka ensrefi na Gado ondro, èn fa a ben libi nanga tra libisma na ini difrenti situwâsi. Poti krakti tapu a wroko di Yesus ben du na ini en libi. Baka dati, te wan studenti musu teki bosroiti na ini en libi èn a kisi tesi na ini en libi, dan a sa aksi ensrefi: ’San Yesus ben o du na ini so wan situwâsi? A sani san mi o du na ini mi libi, sa sori taki mi e warderi trutru san a du gi mi?’

Te yu e taki nanga a gemeente, dan yu no musu denki taki fu di yu brada nanga sisa abi bribi kaba na ini Yesus, dati meki a no de fanowdu fu poti spesrutu prakseri na Yesus moro. Den sani di yu e taki sa abi moro krakti efu yu e bow go doro tapu a bribi dati. Te yu e taki fu den konmakandra, dan sori fa disi abi fu du nanga Yesus leki Edeman fu a gemeente. Te yu e taki fu a preikiwroko, dan poti prakseri na san ben pusu Yesus di a ben du en preikiwroko. Noyaso Krestes de leki Kownu di e tyari sma kon makandra fu go libilibi na ini a nyun grontapu. Sori san disi abi fu du nanga a preikiwroko di wi e du nownowde.

A de krin taki moro de fanowdu leki fu leri wan tu tru tori nomo fu Yesus. Fu tron wan trutru Kresten, dan sma musu tan poti bribi na ini en èn den musu lobi en trutru. So wan lobi e meki taki wan sma e tan gi yesi (Yoh. 14:15, 21). So wan lobi e meki sma tan tanapu kánkan na ini a bribi te frufolgu e miti den, èn a e meki taki den e tan waka baka Krestes den heri libi langa. A e meki sosrefi taki den e sori taki den na lepi Kresten di ’rutu èn kon stanfaste na tapu a fondamenti’ (Ef. 3:17). So wan fasi fu libi e tyari glori kon gi Yehovah, a Gado nanga a Tata fu Yesus Krestes.

„A BUN NYUNSU DISI FU A KOWNUKONDRE”

DI Yesus ben fruteri finifini fu en denoya èn fu den sani di ben o pasa bifo a grontapu disi e kon na wan kaba, dan a ben taki na fesi: „A bun nyunsu disi fu a kownukondre o preiki na a heri grontapu pe sma e libi, so taki ala kondre kan yere dati, èn dan a kaba o kon.”​—Mat. 24:14.

San na a boskopu disi di sma na ala sei musu kon sabi? A boskopu disi e taki fu a Kownukondre fu san Yesus ben leri wi fu begi Gado, di a taki: „Yu kownukondre musu kon” (Mat. 6:10). Openbaring 11:15 e taki fu disi leki „a kownukondre fu wi Masra [Yehovah] èn fu en Krestes”, bika a tirimakti e komoto fu Yehovah èn a gi dati abra na Krestes leki Kownu. Ma luku taki a boskopu di Yesus ben taigi en bakaman fu meki bekènti noyaso, e go moro fara leki san den bakaman fu en ben preiki na ini a fosi yarihondro. Den ben taigi den sma: „A kownukondre fu Gado kon krosibei na unu” (Luk. 10:9). Na a ten dati, dan Yesus, a wan di Gado ben salfu leki Kownu, ben de nanga den. Ma soleki fa a skrifi na ini Mateyus 24:14, dan Yesus ben taki na fesi dati na heri grontapu, wan tra prenspari sani ben o kon tru fu den sani di Gado abi na prakseri.

A profeiti Danièl ben kisi wan fisyun fu a sani disi. Danièl ben si „wan sma di gersi wan manpikin fu libisma”, dati na Yesus Krestes, èn „a Graniwan ini Dei,” dati na Yehovah Gado, di ben gi Yesus „tirimakti nanga wartifasi nanga wan kownukondre, so taki den pipel, den grupu fu ala kondre nanga tongo, den alamala ben sa dini en” (Dan. 7:13, 14). A sani dati di de prenspari gi ala sma, ben pasa na hemel na ini 1914. Baka dati, den ben trowe Didibri nanga den ogri yeye fu en kon na grontapu (Openb. 12:7-10). Na owru grontapu disi ben doro den lasti dei fu en. Ma bifo den puru ala sani fu a grontapu disi krinkrin, dan wi e preiki fosi na heri grontapu taki Yehovah en Kownukondre fu a Mesias e tiri now na hemel. Na ala presi sma e kon sabi disi nownowde. A sani di den e du te den e yere disi, e sori san den e denki fu a Moro Heiwan leki Tiriman na ini „a kownukondre fu libisma”.​—Dan. 4:32.

A tru, taki moro sani musu kon ete, iya, bun furu sani musu kon ete! Teleki now wi e begi, „Yu kownukondre musu kon”, ma wi no e denki taki Gado en Kownukondre musu seti ete na ini a ten di de na wi fesi. Na presi fu dati, wi e begi fu disi fu di wi sabi taki a hemel Kownukondre sa meki profeititori kon tru, soleki den wan di skrifi na Danièl 2:44 nanga Openbaring 21:2-4. A Kownukondre sa kenki grontapu kon tron wan paradijs di sa furu nanga libisma di lobi Gado nanga tra sma. Te wi e preiki „a bun nyunsu disi fu a kownukondre”, dan wi e sori tapu den sani disi di musu kon ete. Ma nanga overtoigi wi e meki ala sma sabi sosrefi taki Yehovah gi ala tirimakti kaba na en Manpikin. Yu e poti krakti tapu a bun nyunsu disi te yu e preiki fu a Kownukondre?

Tyari kon na krin san na a Kownukondre. Fa wi kan sorgu taki wi e preiki fu a Kownukondre fu Gado? Furu moi tori de di wi kan taki nanga sma fu hari a prakseri fu den. Ma te wi e taki, dan a sma musu frustan krin taki a boskopu fu wi na fu a Kownukondre fu Gado.

Wan prenspari sani fu a wroko disi, na a leisi di wi e leisi bijbeltekst di e sori go na a Kownukondre. Te yu e taki fu a Kownukondre, dan luku dati den sma nanga suma yu e taki, e frustan san na a Kownukondre dati. A kan taki yu sa abi fu du moro leki fu taki nomo dati Gado en Kownukondre na wan tirimakti. Wan tu sma kan feni en muilek kande fu prakseri fu wan tirimakti di den no kan si nanga den ai. Kande difrenti fasi de fa yu kan taki-go-taki-kon nanga den. Fu eksempre, kande yu kan taki dati a winti srefi na wan sani di wi no kan si nanga wi ai, ma toku a abi furu krakti tapu wi libi. Wi no kan si a Sma di meki a winti, ma a de krin taki a Sma disi abi bigi makti. Bijbel e taki fu En leki „a têgo Kownu” (1 Tim. 1:17). Noso kande yu kan taki dati na ini wan bigi kondre, furu sma noiti no go na a mamafoto fu a kondre, noso noiti den miti den tiriman fu a kondre srefi. Te den e arki nyunsu, dan den e kon sabi fu den sani disi. Na so a de tu nanga a Bijbel di de fu feni na ini moro leki 2200 tongo. A e fruteri wi fu Gado Kownukondre, èn a e meki wi kon sabi suma kisi a makti èn san a Kownukondre e du noyaso. A Waktitoren di tyari kon na doro na ini furu tongo, moro leki iniwan tra tijdschrift, meki spesrutu fu „Bariwroko gi Yehovah Kownukondre”, soleki fa dati skrifi na fesisei fu a tijdschrift.

Fu yepi sma frustan san na a Kownukondre, dan yu kan kari wan tu sani di sma wani kisi fu den tiriman fu den. Dati na sani soleki seikerfasi na moni sei, vrede, ogridu di no musu pasa moro, ala sma fu ala sortu ras musu abi a srefi reti, ala sma musu man kisi bun skoro èn musu abi wan bun gosontu. Sori den taki na soso Gado en Kownukondre trutru sa meki libisma kisi ala den bun sani disi.​—Ps. 145:16.

Du muiti fu meki sma kisi a winsi fu saka densrefi na ondro a Kownukondre pe Yesus Krestes e tiri leki Kownu. Sori tapu den wondru di a ben du fu meki wi si san a sa du leki Kownu na hemel. Taki furu tron fu den moi fasi di Yesus ben sori (Mat. 8:2, 3; 11:28-30). Tyari kon na krin taki Yesus ben gi en libi gi wi èn taki baka dati, Gado ben opo en baka fu libi na ini hemel, pe noiti a kan dede moro. Fu drape Yesus e tiri now leki Kownu.​—Tori. 2:29-35.

Poti krakti tapu a tiri di Gado en Kownukondre e tiri now na hemel. Ma frustan taki a fasi fa grontapu de nownowde, e meki taki furu sma no e si san den ben fruwakti fu si te a Kownukondre fu Gado ben o tiri. Sabi taki na so den sma e denki, èn aksi den efu den sabi san Yesus Krestes ben taki fu den sani di den ben o si te en ben o bigin tiri. Poti krakti tapu wan tu fu den marki fu Yesus en denoya soleki fa dati de fu feni na Mateyus kapitel 24, Markus kapitel 13, nanga Lukas kapitel 21. Baka dati, aksi den fu san ede den sani disi ben o pasa na grontapu te Krestes ben o tron kownu na ini hemel. Meki den luku san skrifi na Openbaring 12:7-10, 12.

Fu gi den wan eksempre fu san Gado Kownukondre e du trutru, dan leisi Mateyus 24:14, èn fruteri fa sma na heri grontapu e kisi leri fu Bijbel nownowde (Yes. 54:13). Fruteri sma fu den difrenti skoro di e gi Yehovah Kotoigi winimarki, èn sori den taki ala den skoro disi e gi leri komoto fu Bijbel, èn sma no abi fu pai moni fu kisi a leri disi. Tyari kon na krin taki boiti dati wi e preiki oso-fu-oso, dan wi e pristeri sma bijbelstudie tu sondro taki den abi fu pai gi dati, èn wi e du disi na ini moro leki 230 kondre. Sortu libisma tirimakti man gi so wan bun leri, no wawan gi den sma fu en kondre, ma sosrefi gi sma fu heri grontapu? Gi sma a kari fu kon na a Kownukondre zaal, fu kon na den bigi konmakandra fu Yehovah Kotoigi, so taki den kan si fa so wan leri abi krakti tapu a libi fu sma.​—Yes. 2:2-4; 32:1, 17; Yoh. 13:35.

Ma yu denki taki a sma sa frustan fa disi abi fu du nanga en eigi libi? Nanga koni yu kan sori a sma fu san ede yu kon na en. Sori en dati yu kon fu taki fu na okasi di ala sma abi fu libi na ondro a Kownukondre fu Gado. Fa den kan du disi? Fu di den e leri san Gado e aksi fu den, èn fu di den e libi soleki fa den e leri nownowde.​—Deut. 30:19, 20; Openb. 22:17.

Yepi trawan fu poti a Kownukondre tapu a fosi presi. Srefi te wan sma teki a Kownukondre boskopu leki wan tru boskopu, dan a musu teki wan tu bosroiti ete. O prenspari Gado Kownukondre sa de na ini en eigi libi? Yesus ben gi den disipel tranga fu „tan suku a kownukondre . . . fosi” (Mat. 6:33). Fa wi kan yepi wi Kresten brada nanga sisa fu du disi? Fu di wisrefi e gi wan bun eksempre, èn fu di wi e taki fu disi te wi abi na okasi. Sontron wi kan du disi tu, fu di wi e aksi wan sma efu a ben denki kaba san a kan du fu sori taki a e suku a Kownukondre fosi. Wi kan fruteri en ondrofenitori sosrefi di e sori san trawan e du. Wi kan fruteri Bijbel tori na so wan fasi taki den tori disi e meki wan sma kisi moro lobi gi Yehovah. Wi kan sori taki a Kownukondre na wan trutru tirimakti noyaso. Wi kan sori o prenspari a de fu preiki fu a Kownukondre. Ma a moro bun sani di wi kan du, a no fu fruteri sma wawan san den musu du, ma na fu wiki a firi na ini den so taki trutru den sa wani du disi.

Sondro tweifri, a prenspari boskopu di wi alamala musu meki bekènti, na wan boskopu di e poti prakseri na a fosi presi na Yehovah Gado, Yesus Krestes, nanga a Kownukondre. Wi musu poti krakti tapu den prenspari tru tori disi te wi e preiki gi sma, te wi e taki na ini wi gemeente, èn na ini wi eigi libi. Te wi e du disi, dan wi e sori trutru taki wi e kisi winimarki fu a leri di wi e kisi tapu wi Theokrasia Diniwroko-skoro.