Gado wani taki wi de koloku èn taki wi e libi fu têgo na ini freide na wan paradijs na grontapu!

Kande yu e denki: ’A sani dati kan?’ Bijbel e taki dati Gado Kownukondre o meki dati pasa. Gado wani taki ala sma kon sabi san na a Kownukondre dati èn den sani di A o du gi wi.​—Psalm 37:11, 29; Yesaya 9:7.

Gado wani taki wi kisi wini.

Neleki fa wan bun papa wani taki sani go bun nanga den pikin fu en, na so wi hemel Tata wani taki wi de koloku fu têgo (Yesaya 48:17, 18). A pramisi taki „a sma di e du a wani fu Gado o tan fu têgo”.​—1 Yohanes 2:17.

Gado wani taki wi waka den pasi fu en.

Bijbel e taki dati wi Mekiman wani „leri wi san na den pasi fu en” so taki wi kan „waka den pasi dati” (Yesaya 2:2, 3). Gado orga ’wan pipel di musu tyari en nen’ èn den e meki sma na heri grontapu kon sabi a wani fu en.​—Tori fu den apostel 15:14.

Gado wani taki wi anbegi en leki wán man.

A soifri anbegi fu Yehovah no e prati sma, ma a e meki den de wán fu di den abi lobi trutru (Yohanes 13:35). Suma na den sma na ini a ten disi di e leri mansma nanga umasma na ala sei fa den musu dini Gado leki wán man? Wi e gi yu a kari fu kon sabi dati nanga yepi fu a brochure disi.

Omeni Yehovah Kotoigi yu sabi? Sonwan fu wi na birtisma fu yu, sma di e wroko nanga yu, noso sma di de na a srefi skoro leki yu. Kande wi ben taki nanga yu fu Bijbel. Suma na wi trutru, èn fu san ede wi e fruteri ala sma fu a bribi fu wi?

Wi de neleki ala tra sma. Wi na fu difrenti kulturu, wi e du difrenti wroko, sonwan fu wi kisi heiskoro leri, èn trawan no kisi so furu skoroleri. Sonwan fu wi ben de na ini wan tra kerki fosi, èn trawan no ben bribi na ini Gado. Ma fosi wi tron Kotoigi, wi alamala ben teki ten fu studeri den leri fu Bijbel finifini (Tori fu den apostel 17:11). Wi ben bribi den sani di wi leri èn baka dati wi teki a bosroiti fu dini Yehovah Gado.

Wi kisi wini di wi studeri Bijbel. Neleki ala tra sma, wi abi problema èn wi abi swakifasi. Ma fu di wi e du muiti fu du san Bijbel e leri wi, meki a libi fu wi kon moro bun (Psalm 128:1, 2). Disi na wan sani fu san ede wi e fruteri tra sma den bun sani di wi leri na ini Bijbel.

Wi e hori wisrefi na den wèt fu Gado. Den wèt disi di skrifi na ini Bijbel bun gi wi, den e meki taki wi e lespeki trawan, den e meki wi du san reti èn den e meki wi sori switifasi gi trawan. Den wèt disi e yepi wi fu si sani na wan bun fasi, fu wroko tranga na ini a libimakandra, den e meki taki wánfasi de na ini wi osofamiri èn den e meki wi tyari wisrefi na wan fasi di fiti. Fu di wi e bribi taki „Gado no lobi a wan sma moro a trawan”, meki wi de leki wan famiri fu brada nanga sisa na heri grontapu, awansi fu sortu ras noso kondre wi de. Aladi wi de neleki ala tra sma, toku wi na wan pipel di de aparti.​—Tori fu den apostel 4:13; 10:34, 35.

• Na sortu fasi Yehovah Kotoigi de a srefi neleki tra sma?

• Sortu fasi den Kotoigi kon abi fu di den studeri Bijbel?

Furu sma e denki taki Yehovah Kotoigi na a nen fu wan nyun kerki. Ma moro leki 2700 yari pasa, Bijbel ben kari den futuboi fu a wan-enkri tru Gado, en „kotoigi” (Yesaya 43:10-12). Teleki 1931, sma ben sabi wi leki Bijbel Ondrosukuman. Fu san ede wi teki a nen Yehovah Kotoigi?

A nen e meki sma kon sabi a Gado fu wi. Soleki fa owruten dokumenti e sori, dan a nen fu Gado, Yehovah, skrifi moro leki seibi dusun tron na ini Bijbel. Na ini furu vertaling den puru a nen disi èn den poti Masra noso Gado. Ma a tru Gado ben meki Moses kon sabi en nen, Yehovah, di a ben taki: „Disi na mi nen fu ala ten” (Eksodes 3:15). Na so wan fasi a sori taki a no de a srefi leki ala den falsi gado. Wi e prisiri fu tyari a santa nen fu Gado.

A nen e sori sortu wroko wi e du. Bun furu sma fu owruten, soleki a reti-ati man Abel, ben de kotoigi fu di den ben fruteri sma taki den e bribi na ini Yehovah. Na ini den hondrohondro yari di pasa, Noa, Abraham, Sara, Moses, David, nanga trawan ben de wan tu fu den ’someni kotoigi di de neleki wan bigi wolku’ (Hebrewsma 11:4–12:1). Neleki fa wan sma di de wan kotoigi na ini wan krutu-afersi e taki gi wan sma di no du ogri, na so wi no e meki noti tapu wi fu meki sma kon sabi den tru tori di abi fu du nanga wi Gado.

Wi e teki na eksempre fu Yesus. Bijbel e kari en „a kotoigi di de fu frutrow èn di e taki san tru” (Openbaring 3:14). Yesus srefi ben taki dati a ’meki sma kon sabi Gado nen’ èn a ben tan ’fruteri sma den tru tori’ di abi fu du nanga Gado (Yohanes 17:26; 18:37). Fu dati ede den trutru bakaman fu Krestes musu tyari a nen fu Yehovah èn den musu meki sma kon sabi a nen dati. Yehovah Kotoigi e meki muiti fu du a sani disi.

• Fu san ede den Bijbel Ondrosukuman teki a nen Yehovah Kotoigi?

• O langa kaba Yehovah abi kotoigi na grontapu?

• Suma na a moro prenspari Kotoigi fu Yehovah?