Taki nanga overtoigi, ma luku bun san yu e taki èn fa yu e taki dati

TE YU e luku bun san yu e taki èn fa yu e taki nanga wan sma, dan dati wani taki dati yu sabi fa fu libi nanga sma sondro fu meki den kisi atibron. Dati wani taki tu dati yu sabi o ten yu musu taki wan sani. Disi no wani taki dati yu no e hori yusrefi na san bun, noso dati yu no e taki fa wan tori de trutru. Te yu e luku bun san yu e taki èn fa yu e taki dati, dan dati no wani taki dati yu frede libisma.​—Odo 29:25.

A froktu fu a yeye na a moro moi sani di kan yepi wi fu luku bun san wi e taki èn fa wi e taki nanga trawan. Fu dati ede, wan sma di lobi trawan no sa wani tanteri den, ma a sa wani fu yepi den. Wan sma di abi switifasi èn di abi safrifasi, e sori switifasi te a e du sani. Wan sma di lobi vrede, e suku fu tron bun mati nanga tra sma èn fu tan bun mati nanga den. Srefi te trawan grofu, toku wan sma di abi langa-pasensi sa tan pî èn a no sa suku trobi nanga den.​—Gal. 5:22, 23.

Ma awansi fa yu e pristeri a boskopu fu Bijbel, toku wan tu sma sa atibron nanga a boskopu. Fu di furu fu den Dyu na ini a fosi yarihondro ben abi wan ogri ati, dati meki Yesus Krestes ben tron gi den ’wan ston di ben meki den naki futu fadon, èn wan klepston di ben meki den kisi atibron’ (1 Petr. 2:7, 8). Yesus ben sori san ben o pasa tu te a ben o preiki fu a Kownukondre, di a ben taki: „Mi kon fu leti wan faya na grontapu” (Luk. 12:49). A boskopu fu Yehovah Kownukondre wani taki tu dati sma musu sabi dati Yehovah na a Mekiman di abi a reti fu tiri ala sani. A sani disi e tan de a moro prenspari tori gi ala libisma. Furu sma no lobi a tori kwetikweti taki heri esi Gado Kownukondre sa puru na ogri fasi fa a grontapu disi seti. Toku, fu di wi e gi yesi na Gado, meki wi e tan preiki. Ma aladi wi e du disi, toku wi e hori a rai disi fu Bijbel na prakseri: „Efu a kan, solanga a e anga fu unu, abi vrede nanga ala sma.”​—Rom. 12:18.

Luku bun san yu e taki èn fa yu e taki te yu e preiki. Wi e taki nanga trawan fu a bribi fu wi na ini furu difrenti situwâsi. A no de fu taki, dati wi e taki fu a bribi fu wi na ini a preikiwroko, ma wi e suku okasi tu fu taki nanga wi famiriman, wi mati na wroko, nanga wi skoromati. Na ini ala den situwâsi disi, wi musu luku bun san wi e taki èn fa wi e taki dati.

Efu wi e pristeri a Kownukondre boskopu na so wan fasi taki trawan e firi taki wi hori wan preiki gi den fu krutu den, dan a kan taki den no sa wani arki wi. Efu sma no aksi yu fu yepi den èn kande den no e firi tu taki den abi yepi fanowdu, dan den kan kisi atibron te yu e sori den taki den no e du sani bun. Fa wi kan sorgu taki den no denki takru fu wi? Efu wi e leri fu kisi a koni fu taki switi nanga den, dan dati kan yepi wi.

Meki muiti fu bigin a takimakandra, fu di yu e taki wan tori di e hari a prakseri fu a tra sma. Efu a sma dati na wan famiriman, wan sma di e wroko nanga yu, noso wan skoromati, dan kande yu sabi kaba sortu tori a lobi. Srefi efu noiti yu miti ete nanga a sma, toku yu kan taki fu wan sani di yu ben yere na a nyunsu noso di yu ben leisi na ini koranti. Furu tron den sortu nyunsu disi na tori di furu sma e prakseri fu den. Te yu e wroko oso fu oso, dan luku bun san yu e si. Te yu e si moimoi sani na ini na oso, pikin-nengre preisani na tapu a dyari lontu na oso, kerki sani, nanga sticker di plak na tapu wan wagi di de na sei na oso, dan disi kan sori yu sortu sani na ososma lobi. Te na ososma kon na a mofodoro, dan arki te a e taki. Den sani di a e taki, kan sori yu taki yu si bun san a lobi èn fa a e denki, noso a kan sori yu taki na wan tra sani a lobi èn taki a abi wan tra denki. Disi sa yepi yu fu sabi san yu musu hori na prakseri te yu o preiki gi en.

Te yu yere kaba fa a sma e denki, dan sori en wan tu sani fu Bijbel noso fu den buku di e taki fu Bijbel, èn di abi fu du nanga a tori di yu nanga en e taki. Ma no meki a de so taki yu wawan e taki doronomo (Preik. 3:7). Efu na ososma wani, dan meki en srefi taki wan sani tu. Du muiti fu kon sabi trutru fa ensrefi e denki. Disi sa yepi yu kon sabi san yu kan taki èn fa yu kan taki dati.

Fosi yu taki wan sani, dan prakseri san a sma o denki te a yere san yu abi fu taki. Odo 16:23 e prèise ’a mofo fu wan koni sma’. A Hebrew wortu di gebroiki dyaso, abi fu du nanga a koni fu man si sani krin, èn koni fu man si sani na fesi. Sobun, te wan sma de nanga koni, dan a e luku bun san a e taki èn san a e du. A sa man du sani na wan koni fasi trutru fu di a e prakseri bun fosi, bifo a e du noso e taki wan sani. Vers 18 fu Odo kapitel 12 e warskow fu no de leki wan sma „di e taki sondro fu denki”, bika „a de neleki a e dyuku sma nanga wan feti-owru”. Yu kan tyari tru tori fu Bijbel kon krin na fesi, sondro fu meki trawan atibron na yu tapu.

Efu yu e sori koni nanga den wortu di yu e gebroiki, dan dati kan yepi fu no meki taki wan sma no wani taki nanga yu moro. Te yu e gebroiki den wortu „a Bijbel” te yu e taki nanga wan sma èn fu dati ede a sma no wani arki yu moro, dan kande yu kan gebroiki tra wortu soleki „den santa sani di skrifi”, noso „wan buku di de fu kisi na ini moro leki 2000 tongo”. Ma efu yu e sori go na a Bijbel, dan yu kan aksi a sma san en e denki fu Bijbel èn te yu e taki moro fara nanga en, dan hori na prakseri san a taki.

Te yu e luku bun san yu e taki èn fa yu e taki en, dan furu tron dati wani taki dati yu musu sabi a yoisti ten fu taki wan sani (Odo 25:11). Kande yu no e agri nanga ala sani di a sma e taki, ma a no de fanowdu fu go haritaki nanga a sma fu ibri sani pe a no e agri nanga Bijbel. No pruberi fu fruteri na ososma ala sani wantronso. Yesus ben taigi den disipel fu en: „Furu sani de di mi musu taigi unu ete, ma unu no man tyari den now.”​—Yoh. 16:12.

Efu a kan, dan nanga yu heri ati yu musu prèise den wan nanga suma yu e taki. Srefi efu na ososma wani haritaki, toku kande yu sa man prèise en fu a fasi fa a e denki. Na apostel Paulus ben du disi di a ben taki nanga den filosofiaman na tapu na Areopagus na Ateine. Den filosofiaman ben „haritaki nanga en”. Fa Paulus ben kan sori den san a ben wani taki sondro fu meki den kisi atibron? Na ini a bigin a ben si den furu altari di den meki gi den gado fu den. Na presi fu Paulus krutu den sma fu Ateine taki den ben du afkodrei, dan a hori den firi fu den na prakseri èn a prèise den fu a tranga bribi di den ben abi. A ben taki: „Mi si taki na ini ala sani moro leki tra sma, a gersi taki unu abi frede gi den gado.” Fu di a taki disi, meki a pasi ben opo gi en fu fruteri den a boskopu di abi fu du nanga a tru Gado. A bakapisi ben de taki wan tu sma ben tron bribiman.​—Tori. 17:18, 22, 34.

Te wan sma e taki dati a no e agri nanga yu, dan no go haritaki nanga en. Hori yusrefi. Si disi leki wan okasi fu kon sabi san a sma e denki. Kande yu kan taki en tangi fu di a taigi yu fa a e denki. San yu kan du efu wantronso a e taki: „Mi abi mi eigi bribi”? Kande yu kan aksi en na wan koni fasi: „Na yu heri libi kaba yu de wan kerkisma?” Baka dati, te a piki yu, dan yu kan taki moro fara: „Yu denki taki oiti ala libisma sa abi wán bribi nomo?” Disi kan meki taki yu nanga a sma sa man taki moro fara.

Te wi abi wan yoisti denki fu wisrefi, dan dati kan yepi wi fu luku bun san wi e taki èn fa wi e taki en. Wi abi wan tranga bribi taki den fasi fu Yehovah bun èn taki a Wortu fu en na tru. Wi e taki nanga overtoigi te wi e taki fu den sani disi. Ma wi no abi reti fu go denki fu wisrefi taki wi bun moro tra sma (Preik. 7:15, 16). Wi de nanga tangi na ati taki wi sabi a waarheid èn taki wi kan nyan bun fu den blesi fu Yehovah, ma wi sabi heri bun taki Gado feni wi bun fu di a abi bun-ati èn fu di wi abi bribi na ini Krestes, èn no fu di wi bun moro tra sma (Ef. 2:8, 9). Wi sabi taki a de fanowdu fu ’tan luku efu wi de na ini bribi, èn fu tan ondrosuku wisrefi fu kon sabi dati’ (2 Kor. 13:5). Sobun te wi e taki nanga sma taki a de fanowdu fu den du san Gado e aksi, dan wi e saka wisrefi tu fu du den srefi sani disi di Bijbel e gi leki rai. Wi no abi a reti fu krutu tra libisma. Yehovah „meki a Manpikin du ala a wroko fu krutu sma”, èn na fesi a krutusturu disi wi sa musu gi frantwortu fu ala sani di wi e du.​—Yoh. 5:22; 2 Kor. 5:10.

Te yu de nanga famiriman nanga tra Kresten. A no soso na ini a preikiwroko wi musu luku bun san wi e taki èn fa wi e taki dati. Ma wi musu du disi tu te wi de na oso nanga den famiriman fu wi. Disi de so, fu di te wi e luku bun san wi e taki èn fa wi e taki en, dan dati na wan fasi fu sori a froktu fu Gado yeye. Lobi sa meki taki wi e broko wi ede nanga fa trawan e firi. A masra fu na uma-kownu Ester no ben de wan anbegiman fu Yehovah, ma toku Ester ben abi lespeki gi en èn a ben sori koni tu di a ben fruteri en masra fu afersi di ben abi fu du nanga den futuboi fu Yehovah (Ester, kapitel 3-8). Sontron, te wi wani hori den firi na prakseri fu famiriman di no de Kotoigi, dan a moro bun fu wi luku fa wi e tyari wisrefi fu sori den san a waarheid e taki, na presi fu wi go fruteri den san wi e bribi.​—1 Petr. 3:1, 2.

Na so a de tu nanga den sma na ini a gemeente. A no de so taki fu di wi sabi den bun, dan dati wani taki dati wi kan de grofu nanga den. Wi no musu denki taki fu di den lepi kaba, dan den musu man teki wi nomo leki fa wi de. Sosrefi wi no musu gi wisrefi pardon fu di wi e taki: „We, na so mi tan.” Efu wi e si taki trawan e kisi atibron nanga a fasi fa wi e taki nanga den, dan trutru wi musu wani kenki a fasi fa wi e taki. A „tranga lobi” di wi abi „gi makandra” musu gi wi deki-ati fu „du bun . . . gi den wan di de na ini a srefi bribi leki wi”.​—1 Petr. 4:8, 15; Gal. 6:10.

Te wi e taki nanga wan grupu fu arkiman. Den sma di de na tapu wan podium fu taki, musu luku bun tu san den e taki èn fa den e taki dati. Den arkiman komoto fu difrenti presi èn ibriwan fu den e miti nanga tra sani na ini a libi. A no alamala abi a srefi tranga bribi ete. Kande wan tu fu den kon na a Kownukondre zaal gi a fosi leisi. Trawan baka abi en kefalek muilek na ini den libi nownowde èn a takiman no sabi dati. San kan yepi wan takiman fu no taki sani di kan hati den arkiman fu en?

Soleki fa na apostel Paulus ben gi Titus leki rai, dan meki muiti fu no ’taki ogri fu nowan sma èn fu de wan sma di e fiti ensrefi makriki na trawan, èn abi trutru safri-ati gi ala sma’ (Tit. 3:2). Luku bun fu no teki wortu abra di sma na ini a grontapu e gebroiki fu lagi trawan di de fu wan tra ras, di e taki wan tra tongo, noso di de fu wan tra kondre (Openb. 7:9, 10). Taki na wan opregti fasi fu den sani di Yehovah e aksi fu wi, èn sori sma o koni a de fu du den sani disi. Ma luku bun fu no taki sani fu lagi den sma di no e waka den pasi fu Yehovah so bun ete. Na presi fu dati, yu musu gi ala sma deki-ati fu man si krin san Gado wani èn fu du san e plisi en. Te yu musu gi rai, dan du dati na wan switi fasi èn prèise a sma trutru. Sori a brada-lobi di wi alamala musu abi gi makandra, èn meki dati de fu yere na a fasi fa yu e taki èn a fasi fa yu e poti yu sten.​—1 Tes. 4:1-12; 1 Petr. 3:8.