Teki a bun eksempre fu den profeiti—Nahum
1. San wi e leri fu a buku Nahum?
1 Den broko skotu di tan abra fu na owruten foto Ninefei e sori taki neleki fa Nahum ben taki na fesi, Yehovah e strafu den feanti fu en. Den e sori tu taki srefi den moro tranga fetiman no man feti nanga Yehovah (Nah. 1:2, 6). Te wi e luku a profeititori fu Nahum moro fini, dan wi o leri wan tu sani di wi kan gebroiki na ini wi diniwroko.
2. Sortu boskopu wi e tyari gi sma?
2 Trowstu sma èn gi den howpu: Te yu luku en frafra, dan a gersi leki a buku Nahum abi noti moro leki wan krutuboskopu gi Ninefei, a bigi foto fu owruten Asiria (Nah. 1:1; 3:7). Ma a krutuboskopu disi ben de bun nyunsu gi Yehovah en pipel. A nen Nahum wani taki „trowstuman” èn Nahum ben gi en pipel a dyaranti taki heri esi den feanti fu den no ben o de moro! Nahum taki tu dati Yehovah na „wan fortresi na ini ten fu banawtu” (Nah. 1:7). Te wi e preiki wi e fruteri bun nyunsu tu èn wi e gi sma deki-ati fu suku kibri na Yehovah.—Nah. 1:15.
3. Fa wi kan gebroiki eksempre nanga agersitori neleki Nahum?
3 Gebroiki eksempre nanga agersitori: Yehovah meki Nahum agersi a pori di Ninefei ben o kisi nanga a di fu a foto Teibes (No-amon) fu Egepte. Asiria ben pori a foto dati wan pisi ten na fesi (Nah. 3:8-10). Te wi e taki nanga sma fu a kaba fu na ogri grontapu disi, wi kan taki fu profeititori na ini Bijbel di e sori taki Yehovah e du soifri soleki fa a taki na fesi. Fu eksempre, di den Babilonsma nanga den Mediasma go feti nanga a foto Ninefei na ini a yari 632 Fosi Krestes, dan hebi alen meki Tigris-liba frudu èn a watra meki taki wan pisi fu den bigi skotu fu Ninefei fadon broko. Baka dati a foto kisi pori esi-esi neleki fa Yehovah ben taki na fesi.—Nah. 1:8; 2:6.
4. Fa wi kan sorgu taki den sma na ini a preikiwroko e frustan a boskopu fu wi?
4 Taki krin: Nahum skrifi sani soleki fa den ben pasa èn a span fu leisi a buku fu en. A boskopu fu en ben de krin fu frustan (Nah. 1:14; 3:1). Wi musu taki sani tu di makriki fu frustan (1 Kor. 14:9). A fosi leisi te yu e go preiki gi wan sma, taigi en krin fu san ede yu kon na en oso. Te yu e studeri Bijbel nanga sma, dan yepi den fu kon kisi bribi na ini Yehovah nanga en Wortu èn yepi den fu frustan fa den kan fiti den sani di den e leri.—Rom. 10:14.
5. Sortu dyaranti a profeititori fu Nahum e gi wi?
5 Nahum ben abi a frutrow taki san Yehovah ben taki ben o kon tru seiker èn dati de krin fu si na ini a buku Nahum. Aladi a kaba fu a grontapu fu Satan e kon moro krosibei, wi e kisi trowstu fu a sani disi di Yehovah taki: „Banawtu no o kon ete wan leisi.”—Nah. 1:9.