Yehovah​—A Gado di e taki san o pasa èn di e du san a taki

1, 2. (a) Fu san ede son sma ben kan feni taki a situwâsi na grontapu takru srefisrefi? (b) Fa den 12 profeiti e tyari den fasi fu Yehovah kon na krin?

FURU sma feni taki a libi fu den no e waka bun srefisrefi èn den no man du noti fu kenki en. Den sani di den leisi na ini koranti e gi den a firi tu taki a situwâsi na grontapu e kon moro ogri dei fu dei. A gersi leki a muiti di sma e du fu lusu den problema fu grontapu, e meki a situwâsi kon moro takru srefi. A bun fu sabi taki sonwan fu den 12 profeiti di wi e taki fu den ben kisi fu du tu nanga muilek situwâsi, èn den ben e meki boskopu bekènti di ben e gi sma howpu. Wi srefi kan kisi wini fu den boskopu dati èn wi kan gebroiki den fu trowstu tra sma.​—Mika 3:1-3; Habakuk 1:1-4.

² Wan prenspari sani di yu o leisi na ini den profeiti buku disi, na taki Yehovah, a Moro Hei Tiriman fu hemel nanga grontapu, abi a makti fu meki den afersi fu libisma waka soleki fa en wani, èn a wani trutru taki sani waka bun nanga wi. Fu taki en leti, ibriwan fu wi kan taki: „A wani taki sani waka bun nanga mi.” Den 12 profeiti e fruteri wi moi sani fu „Yehovah di e tiri den legre”. Gado kan fasi wan kondre nomo, dan a e „smèlter” kaba, ma toku a e gi en pipel a dyaranti disi: „A sma di e fasi unu e fasi a popki fu mi ai” (Sakaria 2:8; Amos 4:13; 9:5). Yu no e kisi deki-ati te yu e leisi pisi na ini Bijbel di e taki fa Gado sori lobi nanga sari-ati gi libisma, èn fa a lobi fu gi sma pardon? (Hosea 6:1-3; Yoèl 2:12-14) A no de fu taki dati den buku fu den profeiti disi no e taki finifini fu ibriwan fu den fasi fu Gado. Wi o abi fu ondrosuku ala den 66 buku fu Bijbel fu kon sabi ibriwan fu den fasi dati. Ma toku den 12 buku disi e yepi wi heri bun fu kon sabi den moi fasi fu Gado èn fu si fa a e handri nanga libisma.

3. Fa den 12 profeiti e tyari kon na krin taki Yehovah na wan Gado di e du san a abi na prakseri?

³ Den buku fu den 12 profeiti kan tranga a frutrow di wi abi taki Yehovah man taki san o pasa na ini a ten di e kon èn taki ala ten a man du san a abi na prakseri. Den buku disi e sori taki te fu kaba Gado o kenki grontapu kon tron wan paradijs di en srefi o tiri (Mika 4:1-4). Sonwan fu den profeiti dati ben taki fa Yehovah ben sreka a pasi gi a Mesias èn fa a sorgu gi wan lusu-paiman di ben o frulusu libisma fu sondu nanga dede (Maleaki 3:1; 4:5). Fu san ede a prenspari taki wi sabi ala den sani disi?

WAN LOBI-ATI TIRIMAN DI MAN MEKI SANI WAKA SOLEKI FA EN WANI

4, 5. (a) Na sortu prenspari tru tori fu Gado den 12 profeiti e poti prakseri? (b) Fa yu feni en taki Yehovah na a Almakti Gado?

⁴ Soleki fa wi ben si na ini a kapitel na fesi, dan Satan ben fruteri wan lei taki Gado no abi a reti fu tiri. Son engel na hemel ben opo densrefi teige Yehovah èn den ben e tweifri efu a ben abi a bun fu sma na prakseri. A sani disi meki taki den trangayesi Gado èn den tyari wan lo bruya kon na grontapu. Sobun, a de krin taki sma musu lespeki a reti di Yehovah abi fu tiri èn den musu saka densrefi na en ondro. Na dati wawan kan meki taki sani waka bun na grontapu èn taki freide de na mindri libisma. Dati meki Yehovah abi leti fu sori taki na en abi a reti fu tiri ala sani. Meki wi go luku fa den 12 profeiti buku kan yepi wi fu kon frustan a tori dati moro krin.

⁵ Den profeiti di ben de boskopuman fu Yehovah, ben e taki furu fu a hei posisi di Yehovah abi. Fu sori taki a nen fu en prenspari srefisrefi èn taki na en abi a reti fu tiri, dan Amos e gebroiki a nen „Moro Hei Masra”, 21 leisi. Disi e sori taki a tru Gado makti pasa marki èn taki noti no de di a no man du. (Amos 9:2-5; luku a faki „Yehovah na Almaktiwan”.) Yehovah na a wan-enkri Gado di abi a reti fu tiri hemel nanga grontapu, èn a hei omeni tron moro den falsi gado di no abi libi (Mika 1:7; Habakuk 2:18-20; Sefanya 2:11). Fu di Yehovah na a Mekiman fu ala sani, meki na en wawan abi a reti fu tiri ala sani (Amos 4:13; 5:8, 9; 9:6). Fu san ede a sani dati prenspari gi yu?

6. Fa ala sma o man kisi wini te Gado o du san a abi na prakseri?

⁶ Kande yu ondrofeni kaba wan leisi taki sma desko yu, taki den no handri bun nanga yu, noso taki den denki takru fu yu. Efu dati de so, dan meki a de wan trowstu gi yu taki a Moro Hei Tiriman lobi ala sma. Yehovah ben abi wan bun matifasi nanga wán pipel fu owruten, ma toku a taki dati a ben o du bun gi sma fu ala pipel nanga ala tongo. A de „a tru Masra fu heri grontapu” (Mika 4:13). Gado pramisi taki ’sma o abi bigi lespeki gi en nen’ (Maleaki 1:11). Fu di wi hemel Tata e gi ala sma okasi fu kon sabi en, meki sma fu „ala den pipel di e taki difrenti tongo” e teki a kari fu tron anbegiman fu en.​—Sakaria 8:23.

7. Fu san ede a prenspari fu sabi san a nen fu Yehovah wani taki?

⁷ Fu man sabi fa Gado de èn san a o du, dan a prenspari fu sabi san a nen fu en wani taki (Psalm 9:10). Na ini a ten fu Mika, Yehovah kisi porinen fu di furu fu den sma di ben e tyari en nen ben trangayesi kefalek. Nanga yepi fu santa yeye a profeiti sori o prenspari „a nen fu Yehovah” de, èn a taki sosrefi taki „den koni sma o lespeki [Gado] nen” (Mika 5:4; 6:9). Fu san ede? A nen disi di wani taki „A e meki kon tron”, e gi wi a dyaranti taki sani o waka bun na ini a ten di e kon. Leisi Yoèl 2:26 èn prakseri a grani di yu abi fu tyari a nen fu Gado èn fu fruteri trawan fu a wan-enkri Gado di kan tron iniwan sani di de fanowdu fu a bun fu ala den sani di a meki. Gado sori taki en na a sma di abi a krakti fu du iniwan sani di de fanowdu. Yu kan feni buweisi fu dati te yu e luku fa den someni difrenti profeititori fu den 12 profeiti kon tru.

8. Fa a nen fu Yehovah gi yu deki-ati?

⁸ Milyunmilyun sma kisi deki-ati di den kon sabi taki Yehovah abi a makti fu du iniwan sani di a wani. Yoèl ben tyari disi kon na krin, èn den skrifiman fu den Kresten Griki Buku fu Bijbel ben taki a srefi sani dati: „Ibri sma di e kari a nen fu Yehovah o kisi frulusu” (Yoèl 2:32; Tori fu den apostel 2:21; Romesma 10:13). Wi o abi a srefi denki leki Mika? A ben taki: „Fu ala ten wi o tyari a nen fu Yehovah wi Gado èn wi o du san a wani. Iya, fu têgo wi o du dati” (Mika 4:5). Sobun, te wi e kisi frufolgu noso te wi e firi brokosaka, dan wi no musu draidrai fu „suku kibri na a nen fu Yehovah”.​—Sefanya 3:9, 12; Nahum 1:7.

9. San Gado man du srefi nanga den tiriman fu grontapu?

⁹ Te yu e leisi den profeiti buku disi, dan yu kan tranga a bribi di yu abi taki Yehovah abi a makti fu sorgu taki srefi den tiriman fu grontapu noso tra makti sma du sani soleki fa en wani (Odo 21:1). Luku a tori fu Darius a Bigiwan fu Persia. Feanti fu a tru anbegi ben go suku yepi na en fu di den no ben wani taki a pipel bow a tempel fu Yehovah baka na Yerusalem. Ma sani waka heri tra fasi! Na a ten fu a yari 520 Fosi Krestes, Darius gebroiki a wèt di Sirus ben meki èn a horibaka gi den Dyu fu bow a tempel. Di den Dyu ben e kisi moro gens, dan Gado taigi a Dyu Granman Serubabel: „’A no nanga yepi fu wan legre, noso wan makti, ma nanga yepi fu mi yeye ala den sani disi o pasa,’ na so Yehovah di e tiri den legre taki. Awinsi wan problema kon di bigi leki wan bergi, a o kon de leki wan plata kontren gi Serubabel” (Sakaria 4:6, 7). Noti no o man tapu pasi gi Yehovah te a o pori na ogri sistema disi èn te a o seti wan paradijs pe den anbegiman fu en kan tan.​—Yesaya 65:21-23.

10. O furu makti Gado abi, èn fu san ede a bun fu sabi dati?

¹⁰ Luku sosrefi taki Yehovah e basi den krakti fu a naturu, di a man gebroiki fu pori den feanti fu en efu a wani (Nahum 1:3-6). Sakaria e taki sani na agersi fasi fu sori taki Yehovah man kibri a pipel fu en: „A o de krin fu si taki Yehovah de nanga den. En peiri o frei esi-esi leki faya di e koti na hemel. A Moro Hei Masra Yehovah o bro wan tutu èn leki den bigi winti fu zuidsei a o hari go feti nanga den feanti” (Sakaria 9:14). Yu denki taki a o muilek gi Gado fu sori den ogri pipel fu a ten disi taki na en na a moro Heiwan? Kwetikweti!​—Amos 1:3-5; 2:1-3.

ALA TEN A E DU SAN A PRAMISI

11, 12. (a) Fu san ede sma ben denki taki nowan feanti ben o man teki Ninefei abra? (b) Fa sani waka nanga Ninefei, soleki fa a profeiti wortu fu Gado ben taki?

¹¹ Kon meki wi taki dati yu ben e libi na a ten fu a di fu neigi yarihondro Fosi Krestes, na ini a kontren di sma sabi now leki a Mindri Owstusei. Fu sortu bigi foto yu ben o yere? A no de fu taki dati yu ben o yere fu Ninefei, wan prenspari foto fu Asiria. A foto disi ben de na a owstusei syoro fu Tigris-liba, sowan 900 kilometer moro fara na a noord-owstusei fu Yerusalem. Kande yu ben o yere fa a foto disi bigi. A ben e teki sowan 100 kilometer fu lontu a heri foto! Sma di ben e go na Ninefei ben taki dati a foto disi ben moi neleki Babilon, fu di a ben abi kownu-oso, tempel, bradi strati, bigi dyari pe sma ben kan go koiri, nanga wan prenspari buku-oso. Boiti dati, koni fetiman ben taki dati a foto disi ben abi bigi deki skotu di ben e meki en muilek gi feanti fu broko kon na ini.

¹² „Nowan feanti o man teki en abra!” A ben musu fu de so taki na dati sma ben e taki fu Ninefei. Ma son profeiti fu a pikin foto Yuda ben e hori nomo taki Yehovah ben o pori „a foto dati di e kiri sma”. Fu di a pipel dati ben gi yesi na a boskopu fu Yona, meki Gado no pori a foto moro. Ma den Ninefeisma bigin du ogri baka leki fa den ben gwenti du fosi. Nahum ben taki: „Ninefei . . . , sma o kiri yu nanga feti-owru . . . Noti o man tapu a rampu di o kon na yu tapu” (Nahum 3:1, 7, 15, 19; Yona 3:5-10). Pikinmoro na a srefi ten dati, Gado taigi Sefanya fu meki bekènti taki Ninefei ben o tron wan brokopresi (Sefanya 2:13). A makti kondre fu a ten dati ben o kisi pori neleki fa Yehovah ben taki? A sani dati pasa na a ten fu a yari 632 Fosi Krestes, di den Babilonsma, den Skitsma, nanga den Mediasma lontu Ninefei. Frudu di ben kon wantronso, swaki den skotu, èn na so den feanti ben man broko kon na ini a foto (Nahum 2:6-8). Ninefei di ben makti fosi, heri esi kon tron wan brokopresi èn te na a dei fu tide, a tan wan brokopresi.a „A kefalek foto” disi no ben man tapu pasi gi a wortu fu Gado fu kon tru!​—Sefanya 2:15.

13. Sortu buweisi de taki profeititori na ini den 12 profeiti buku kon tru?

¹³ A sani di pasa nanga Ninefei na wán eksempre nomo fu wan profeititori di kon tru. Luku wan karta fu a Mindri Owstusei fu a ten disi. Yu man feni Amon, Asiria, Babilonia, Edom, noso Moab? Kwetikweti! Aladi wan ten ben de taki den kondre dati ben makti srefisrefi, toku den 12 profeiti taki dati den ben o kisi pori (Amos 2:1-3; Obadya 1, 8; Nahum 3:18; Sefanya 2:8-11; Sakaria 2:7-9). Wan-fru-wan den pipel dati lasi gowe. Yehovah ben taki dati den no ben o de moro, èn na dati pasa tu! A sani di den profeiti ben taki dati den Dyu ben o komoto na ini katibo na Babilon, kon tru. Iya, a pasa leti so!

14. Fu san ede yu kan frutrow den pramisi fu Yehovah?

¹⁴ Te yu e luku den buweisi dati di e sori taki Yehovah man taki na fesi san o pasa, dan fa dati abi krakti na tapu a bribi fu yu? Yu kan abi a dyaranti taki Yehovah o du san a pramisi fu di a de a Gado „di no man lei” (Titus 1:2). Boiti dati, nanga yepi fu a Wortu fu en, Gado e taigi wi den sani di wi musu sabi. Sobun, yu kan libi na wan fasi di e sori taki a wani fu Yehovah prenspari gi yu èn taki yu e bribi na ini den profeititori fu en. Den profeititori na ini den 12 buku no e sori wi nomo sortu sani kon tru na ini a ten di pasa. Furu fu den profeititori e kon tru now, noso den o kon tru heri esi. Sobun, den 12 buku disi kan tranga a bribi di yu abi taki profeititori di abi fu du nanga a ten fu wi èn nanga a ten di e kon o kon tru. Poti prakseri na den profeititori disi.

WAN PAPA DI E BROKO EN EDE NANGA SMA

15. Te yu abi problema, dan fa den sani di Mika ondrofeni kan de wan yepi gi yu?

¹⁵ Ma den sani di o pasa nanga den pipel fu grontapu, a no den wan-enkri sani di e sori taki Gado de fu frutrow. Te Yehovah e taki san o pasa èn te a e du san a taki, dan a e du dati na wan fasi di kan abi krakti na yu tapu. Fa so? We, kande yu no sabi fa fu lusu den problema fu yu son leisi. Yu sabi taki te yu feni wan sma di man frustan fa yu e firi, dan dati a no ala ete. Yu musu feni wan sma di yu kan frutrow èn di man yepi yu. Na ini a di fu aiti yarihondro Fosi Krestes, a ben musu fu de so taki Mika ben e firi leki a ben de en wawan di a ben musu tyari boskopu gi den heimemre sma fu Yuda. Kande a ben gersi leki a ben de a lasti reti-ati sma na grontapu èn taki a no ben man frutrow srefi en eigi famiri. Iniwan presi pe a ben e go a ben e miti sma di ben e suku fu kiri trawan, di ben e bedrigi trawan, èn di ben e du kruktudu. Toku Mika ben bribi taki Gado ben o sorgu gi den sma di ben e tan gi yesi na en, awansi san trawan ben e du. Meki a sani dati de wan trowstu gi yu tu, spesrutu te yu leki anbegiman fu Yehovah e firi taki yu de yu wawan, fu di yu de na mindri sma di no e gi grani na Gado.​—Mika 7:2-9.

16. Fu san ede yu kan de seiker taki Gado e si te sma e du kruktudu èn taki a o frulusu reti-ati sma?

¹⁶ Neleki fa a de na ini a ten disi, na so gudu sma nanga makti sma na ini Yuda nanga Israel ben kon gridi èn den bigin du kruktudu. Den ben e aksi tumusi furu belasting èn den ben e fufuru sma gron. A sani disi meki taki den ben e dwengi trawan fu tron srafu. Den no ben e firi gi den pôtiwan, èn den ben e du ogri srefi nanga den (Amos 2:6; 5:11, 12; Mika 2:1, 2; 3:9-12; Habakuk 1:4). Nanga yepi fu den boskopuman fu en, Gado sori krin taki a no feni en bun taki sma e du kruktudu èn taki den e kwinsi trawan. A sori tu taki a o strafu sma di e tan du ogri (Habakuk 2:3, 6-16). A taki dati a o „seti sani kon reti gi tranga pipel” èn taki futuboi fu en di a feni bun „o sidon na ondro en eigi droifibon nanga en eigi figabon. Nowan sma o meki den frede” (Mika 4:3, 4). Prakseri fa a sani dati o de wan trowstu gi sma! Gado ben taki fu furu tra sani di ben o pasa èn den sani dati pasa tu. A sani disi no e gi yu a dyaranti taki a pramisi disi sosrefi o kon tru?

17, 18. (a) Fa Gado e sori taki howpu de gi wi? (b) Fa wi musu si a piri-ai di Yehovah e gi?

¹⁷ Yehovah no e du san a pramisi soso fu di a wani sori sma taki a abi a makti fu du den sani dati. A e du den sani dati fu di a abi lobi, bika „Gado na lobi” (1 Yohanes 4:8). Prakseri a tori fu Hosea di ben e libi na ini a di fu aiti yarihondro Fosi Krestes. Neleki fa Gomer, a wefi fu Hosea, ben waka gi en, na so den Israelsma ben gowe libi Yehovah fu go anbegi falsi gado. A sani dati ben de neleki den ben waka gi Yehovah. Den ben moksi a tru anbegi fu Yehovah nanga a Bâal anbegi, èn na agersi fasi den ben „du hurudu” nanga Asiria èn nanga Egepte. San Yehovah ben o du? Luku san a ben taigi Hosea fu du: Hosea ben musu go suku a wefi fu en tyari kon baka. Na so Yehovah go suku a pipel fu en fu di a ben lobi den. „Nanga titei fu libisma, iya, nanga titei fu lobi mi ben e tyari mi pipel. . . . Na wan switi fasi mi tyari nyanyan gi ibriwan fu den” (Hosea 2:5; 11:4). Efu den ben o sori trutru berow, dan Gado ben o gi den pardon so taki den ben kan meki en bun baka nanga en (Hosea 1:3, 4; 2:16, 23; 6:1-3; 14:4). A no e naki yu ati te yu e si a lobi di Yehovah abi? Aksi yusrefi: ’Efu Yehovah ben sori so furu lobi na ini a ten di pasa, dan mi no musu bribi tu taki a o tan sori lobi gi mi?’​—Hosea 11:8.

¹⁸ Den 12 profeiti buku kan yepi yu tu fu kon si taki son leisi Gado e piri-ai gi sma fu di a lobi den. Yehovah ben pramisi a trangayesi pipel fu en taki a „no ben o kiri” a heri pipel (Amos 9:8). Te a ben de fanowdu taki a pipel ben musu kisi strafu, dan Gado ben e strafu den. Ma a ben musu fu de wan frulekti gi den fu sabi taki Gado no ben o strafu den fu ala ten! Maleaki 1:6 e agersi Yehovah nanga wan lobi-ati papa. Yu sabi taki son leisi wan papa e piri-ai gi den pikin fu en fu di a lobi den (Nahum 1:3; Hebrewsma 12:6). Toku a lobi di wi Papa na hemel abi, e meki taki a no e atibron esi-esi. Maleaki 3:10, 16 e sori tu taki a o blesi den futuboi fu en bogobogo.

19. Sortu sani yu musu aksi yusrefi?

¹⁹ Maleaki e bigin a buku fu en nanga a dyaranti disi: „Yehovah taki: ‘Mi lobi unu’” (Maleaki 1:2). Te yu e prakseri a sani dati di Gado taigi Israel, dan aksi yusrefi: ’Mi e du wan sani di kan meki taki Gado no lobi mi moro? Na sortu tra fasi mi kan kisi wini fu a lobi fu Gado?’ O moro yu e kon frustan fa Gado e sori lobi, o moro yu sa bribi taki a sa tan lobi yu.

WI KAN KISI FRULUSU FU DI GADO E GI SMA PARDON

20. Fa a du kon taki sma man kisi frulusu?

²⁰ Te yu e leisi den profeiti buku disi, dan yu o si taki son leisi Yehovah ben e taki dati rampu ben o pasa. Fu san ede? Nofo tron na fu gi a pipel deki-ati fu sori berow. Dati meki a gi pasi taki trakondre sma pori Samaria na ini 740 Fosi Krestes èn Yerusalem na ini 607 Fosi Krestes. Sani waka soleki fa Gado ben taki, ma bakaten a gi pasi taki sma di ben sori berow ben kan drai go baka na a kondre fu den. Iya, den buku disi e sori krin taki Gado e gi pardon nanga en heri ati èn taki a e teki sma baka te den e tapu fu du sondu (Habakuk 3:13; Sefanya 2:2, 3). Nanga yepi fu santa yeye, Mika ben taki: „Sortu gado de leki yu? Yu e gi yu pipel di tan abra, pardon fu den sondu èn yu no e tan prakseri a fowtu di den meki. Noiti yu o tan nanga atibron fu ala ten, bika yu lobi fu du bun” (Mika 7:18; Yoèl 2:13; Sakaria 1:4). Den profeititori di kon tru e sori dati.

21. (a) San den 12 profeiti ben taki fu a Mesias? (b) Sortu profeititori fu a Mesias yu feni moi?

²¹ Fu sorgu taki sma kan kisi pardon fu ala ten, dan Yehovah taki dati a Mesias ben o kon di ben o gi en libi leki „wan paiman di fiti fu bai” sondu libisma kon fri (1 Timoteyus 2:6). Amos ben taki dati a Mesias, a manpikin fu David, ben o seti sani kon bun baka (Amos 9:11, 12; Tori fu den apostel 15:15-19). Mika ben taki srefi pe Yesus ben o gebore. Ala sma di ben o poti bribi na ini na ofrandi fu en ben o kisi frulusu (Mika 5:2). Sakaria ben taki fu a „Pransun”, Yesus, di ben o „sidon na tapu en kownusturu fu tiri leki kownu” (Sakaria 3:8; 6:12, 13; Lukas 1:32, 33). Yu kan de seiker taki a bribi fu yu o kon moro tranga te yu e ondrosuku den sortu profeititori disi.​—Luku a faki „Prenspari profeititori di abi fu du nanga a Mesias”.

22. Fa den sani di den 12 profeiti taki fu Yehovah e tranga a bribi fu yu?

²² Te yu e leisi den boskopu fu den 12 profeiti, dan yu o kon abi wan moro tranga bribi taki Gado o wini a lasti feti. Yehovah na wi fetiman èn a sa tyari trutru retidu kon. San Gado taki sa tan fu ala ten. A no e frigiti den sani di a pramisi en pipel, a e sorgu gi den futuboi fu en èn a e frulusu den fu sma di e kwinsi den (Mika 7:8-10; Sefanya 2:6, 7). Yehovah no kenki (Maleaki 3:6). A e gi wi deki-ati fu sabi taki noti no man tapu pasi gi Gado fu du san a pramisi! Te a e taki dati a krutudei fu en o kon, dan a o kon. Fu dati ede, tan fruwakti a dei fu Yehovah! „Yehovah o tron kownu fu heri grontapu. Na a ten dati, sma o sabi Yehovah wawan leki Gado èn den o kari en nen nomo” (Sakaria 14:9). A taki san o du èn a o du en tu.