Taki-go-taki-kon nanga sma

WI DE nanga tangi na ati taki Gado en Wortu meki wi kenki wi libi, èn wi wani taki trawan feni den srefi winimarki disi tu. Boiti dati, wi e frustan taki a fasi fa sma e piki tapu a bun nyunsu, sa abi krakti tapu a fasi fa den libi sa waka (Mat. 7:13, 14; Yoh. 12:48). Trutru wi wani taki den sma disi musu teki a waarheid. Ma boiti taki wi musu abi wan tranga bribi èn wi musu de nanga faya, toku wi musu wroko nanga koni tu efu wi wani taki sani waka bun.

Efu yu e sori wan sma wantewante taki a bribi di a lobi na wan fowtu sani, dan furu tron sani no sa waka bun. A srefi sani sa pasa tu awansi yu o kari wan lo bijbeltekst fu sori taki yu abi leti. Fu eksempre, efu yu e krutu wan pôpi fesa di sma e hori, fu di yu e sori den taki a fesa disi komoto fu den heiden, dan a kan taki yu no sa man kenki a fasi fa den sma e firi fu a fesa disi. Furu tron, sani sa waka moro bun efu yu man fiti yusrefi makriki na a sma. Ma san a wani taki, fu man fiti yusrefi makriki na a sma?

Den Buku fu Bijbel e fruteri wi taki „a koni fu tapusei . . . lobi vrede, a e fiti ensrefi” (Yak. 3:17). Wan tu tra Bijbel vertaal a pisi disi nanga ’hori tra sma firi na prakseri’, ’de switi’, noso ’hori yusrefi’. Luku taki a tekst e sori taki te wan sma e fiti ensrefi makriki na trawan, dan so wan sma lobi vrede tu. Titus 3:2 e taki fu a fiti di wan sma musu man fiti ensrefi na trawan, makandra nanga safri-atifasi, èn dati de heri tra fasi leki te wan sma lobi strei. Filipisma 4:5 e gi wi a deki-ati taki trawan musu sabi wi leki sma di e ’fiti densrefi makriki na trawan’. Wan sma di e fiti ensrefi makriki na trawan, na wan sma di te a e taki nanga wan trawan, e hori na prakseri fa a sma kweki, san e miti a sma dati, èn fa a sma dati e firi. So wan sma de klariklari fu fiti ensrefi na a tra sma, solanga a kan du dati. Efu wi e handri na so wan fasi nanga trawan, dan dati kan yepi wi fu opo a frustan nanga na ati fu den sma disi, so taki den sa wani arki wi èn teki den sani di wi e sori den te wi e taki-go-taki-kon nanga den fu den sani di skrifi na ini Bijbel.

Nanga san yu musu bigin. A historia skrifiman Lukas skrifi taki di na apostel Paulus ben de na Tesalonika, a ben gebroiki den Buku fu Bijbel fu ’fruklari èn fu buweisi nanga yepi fu sani di ben skrifi kaba taki a ben de fanowdu taki Krestes ben musu pina èn taki a ben musu opo baka na dede’ (Tori. 17:2, 3). A de moi fu si taki Paulus du disi na ini wan snoga fu den Dyu. Den sma nanga suma a ben taki, ben teki den Hebrew Buku fu Bijbel leki tru buku. A ben fiti srefisrefi fu bigin a takimakandra nanga wan sani di den ben teki leki tru tori.

Di Paulus ben taki nanga Grikisma na tapu na Areopagus na ini Ateine, dan a no ben bigin fu sori tapu den Buku fu Bijbel. Na presi fu dati a ben bigin nanga sani di den ben sabi èn di den ben teki leki tru tori. A ben gebroiki den sani disi fu meki den sma go prakseri fu a Mekiman nanga fu den sani di A abi na prakseri.​—Tori. 17:22-31.

Na ini a ten disi, dan bun furu sma no e teki Bijbel leki wan buku di kan sori den san den musu du nanga den libi. Ma bun furu sma e kisi fu du nanga problema na ini den libi na ini a grontapu noyaso. Libisma e suku wan moro betre libi. Efu yu e sori den fosi taki yu e broko yu ede nanga den sani di e bruya den, èn baka dati yu e sori den fa Bijbel e sori san fu du, dan na so wan fasi yu kan meki taki den sa arki san Bijbel e taki fu den sani di Gado abi na prakseri nanga libisma.

A kan taki wan bijbelstudenti teki sani abra di en papa nanga mama ben bribi èn di den ben gwenti fu du. Now a studenti e leri taki den sani di a ben bribi èn di a ben gwenti fu du, no e plisi Gado, èn fu dati ede a no e du den sani dati moro, ma a e du san Bijbel e leri. Fa a studenti kan tyari dati kon na krin gi en papa nanga mama? Kande den o firi taki fu di a no wani hori ensrefi moro na den sani di den e bribi, dan a no wani den moro tu leki papa nanga mama. Fu dati ede a bijbelstudenti kan teki a bosroiti taki a sa musu gi en papa nanga mama a dyaranti taki a lobi den èn taki a e lespeki den, bifo a e pruberi fu sori den na ini Bijbel fu san ede a teki so wan bosroiti.

O ten yu musu fiti yusrefi na trawan. Aladi Yehovah abi ala makti fu gi komando, toku a e sori taki a e fiti ensrefi na trawan. Di den engel fu Yehovah ben frulusu Lot nanga en osofamiri fu Sodom, dan den engel ben taigi Lot: „Lowe go na den bergi presi, so taki yu no lasi gowe!” Toku, Lot opo fu taki: „Grantangi Yehovah, no meki dati pasa!” A ben begi fu lowe go na Soar. Yehovah ben hori Lot na prakseri fu di a ben meki a lon go na Soar. Sobun, di den tra foto pori gowe, dan Soar ben tan abra ete. Ma bakaten, dan Lot ben du san Yehovah taigi en fu du na ini a bigin, èn a ben go na den bergi presi (Gen. 19:17-30). Yehovah ben sabi taki a fasi fu en ben reti, ma a ben hori Lot na prakseri èn a ben abi pasensi nanga en, teleki Lot ben kon frustan taki a fasi fu Yehovah moro bun.

Efu wi wani taki sani waka bun te wi e taki nanga tra sma, dan wi tu musu man fiti wisrefi makriki na trawan. Wi kan abi na overtoigi taki wan sma fowtu, èn wi kan abi krakti buweisi fu sori en dati. Ma sontron a moro bun fu no sori a sma nomonomo tapu a fowtu di a e meki. Efu yu e fiti yusrefi makriki na trawan, dan dati no wani taki dati yu e skoifi den markitiki fu Yehovah go na wan sei. A ben o moro bun fu taki a sma tangi dati a ben wani taigi yu fa a e denki. Noso a kan moro bun fu no gi piki tapu ala fowtu sani di a e tyari kon na fesi. Na so fasi, yu kan poti prakseri na wan sani di kan meki a takimakandra waka moro bun. Srefi efu a sma e krutu a bribi fu yu, toku yu no musu kisi atibron noso lasi yusrefi. Kande yu kan aksi en fu san ede a e denki so. Arki bun te a e piki yu. Disi sa yepi yu fu frustan fa a e denki. Disi kan gi yu na okasi sosrefi fu man taki bun nanga en na wan tra ten.​—Odo 16:23; 19:11.

Yehovah meki libisma na so wan fasi taki densrefi kan bosroiti san den o du. A e gi den na okasi fu densrefi teki den eigi bosroiti, aladi a no ala ten den e teki koni bosroiti. Leki wan takiman fu Yehovah, dan Yosua ben fruteri finifini fa Gado ben handri nanga Israel. Ma dan Yosua ben taki: „Efu a no bun now na ini un ai fu dini Yehovah, dan teki a bosroiti now gi unsrefi suma unu sa dini, efu a de den gado di un fositen tata di ben de na a tra sei fu a Liba ben dini, noso den gado fu den Amorietsma na ini suma kondre unu e tan. Ma mi nanga mi osofamiri, wi sa dini Yehovah” (Yos. 24:15). A wroko di wi kisi na ini a ten disi, na fu gi „kotoigi”, èn wi e taki nanga overtoigi, ma wi no e pruberi fu dwengi trawan fu teki a bribi (Mat. 24:14). Den musu teki den eigi bosroiti, èn wi no e teki a reti dati puru na den.

Poti aksi. Yesus ben gi wan kefalek moi eksempre leki wan sma di ben sabi taki-go-taki-kon nanga tra sma. A ben hori na prakseri sortu sani ben miti den na ini den libi èn a ben gebroiki agersitori di den ben man frustan wantewante. A ben poti bun aksi tu. Disi ben meki taki trawan ben kisi na okasi fu taki san den denki èn fu taki san de tapu den ati. Disi ben meki tu taki den ben kan go denki fu a tori di Yesus ben taki nanga den.

Wan man di ben sabi a Wet heri bun, ben aksi Yesus: „Leriman, san mi musu du fu kisi têgo libi?” Yesus ben kan piki a man langalanga. Ma toku a ben aksi a man fu ensrefi taki san a denki. Yesus aksi a man: „San skrifi na ini a Wet? San yu leisi?” A man ben gi a soifri piki tapu den aksi. Ma Yesus ben kaba di a man gi den yoisti piki? Kwetikweti. Yesus ben meki a man taki go doro, èn wan aksi di a man srefi poti, ben sori taki a ben pruberi fu sori taki a de regtfardiki. A man ben aksi: „Suma na den tra sma di mi musu lobi leki misrefi?” Yesus ben kan go fruteri soifri san den wortu dati wani taki. Ma dati ben kan meki a man go haritaki nanga Yesus fu di den Dyu ben abi wan tra denki fu den tra pipel èn fu den Samariasma. Sobun, Yesus ben fruteri a man wan agersitori fu meki ensrefi go denki fu a tori. Na agersitori dati ben taki fu wan Samariasma di ben lobi tra sma, èn di ben yepi wan man di ben teki waka go na wan presi. Trawan ben fufuru a man disi, èn den ben naki en trowe. A Samariasma ben yepi a man disi, ma wan priester nanga wan Leifisma ben waka pasa sondro fu yepi en. Te fu kaba, Yesus ben aksi a man wan pikin sani ete, soso fu sorgu taki a man frustan na agersitori di a ben fruteri en. A fasi fa Yesus taki-go-taki-kon nanga a man ben meki taki a man ben kon frustan den wortu „tra sma” na wan heri tra fasi (Luk. 10:25-37). Disi na trutru wan moi eksempre di wisrefi kan teki abra! No meki a de so taki yu wawan e taki, noso, te yu e luku en bun, taki yu e go denki gi na ososma. Ma na presi fu yu du dati, dan leri fa yu kan poti bun aksi èn fa yu kan fruteri agersitori so taki yu e gi yu arkiman deki-ati fu ensrefi go denki fu a tori.

Sori yu arkiman fu san ede wan sani de so. Di na apostel Paulus ben taki na ini a snoga na Tesalonika, dan a ben du moro leki fu leisi nomo fu wan bukulolo di den arkiman fu en ben si leki tru tori. Lukas e skrifi taki Paulus ben tyari kon na krin san a ben leisi, a ben buweisi taki na so a sani de, èn a ben sori den arkiman fu en fa den ben kan gebroiki a sani di a leisi. Fu dati ede, „sonwan fu den ben tron bribiman èn ben moksi densrefi nanga Paulus èn nanga Silas”.​—Tori. 17:1-4.

Awansi suma e arki yu, toku efu yu e taki-go-taki-kon nanga den neleki fa Paulus ben du dati, dan dati kan tyari winimarki kon. Disi de so te yu e preiki gi wan famiriman, te yu e taki nanga wan mati na wrokope noso nanga wan skoromati, te yu e preiki gi sma di yu no sabi, te yu e hori bijbelstudie, noso te yu e hori lezing na ini a gemeente. Te yu e leisi wan bijbeltekst, dan kande yu e frustan krinkrin san a tekst wani taki, ma a kan taki wan tra sma no e frustan dati so krin. A fasi fa yu e fruklari a tekst noso a fasi fa yu e sori a sma fa a kan gebroiki a tekst, kan gersi leki yu sabi ala sani kaba. Yu denki taki a ben o de wan yepi fu puru spesrutu pisi fu a tekst fosi, èn baka dati fruklari wan tu wortu fu den pisi disi? Yu kan tyari tra buweisi kon, kande fu den vers lontu a tekst? Noso kande fu wan tra tekst di e taki fu a srefi tori? Wan agersitori kan yepi yu arkiman fu frustan san yu e taki? Yu ben sa kan poti aksi fu yepi den arkiman fu go denki fu a tori? Te yu e taki-go-taki-kon na so wan fasi nanga sma, dan trawan sa abi prisiri fu taki nanga yu, èn den sa abi furu sani fu san den kan go denki.