Poti bun aksi

TE YU e poti aksi, dan yu wani sma fu piki na aksi, awansi den e du dati nanga wortu noso fu di den e prakseri san na a piki tapu na aksi. Nanga disi yu e yepi yu arkiman fu abi wan prati na a takimakandra tu. Te yu e poti aksi, dan dati kan yepi yu fu bigin taki nanga wan sma èn fu abi wan moi takimakandra nanga en. Leki takiman nanga leriman, yu kan poti aksi so taki sma sa wani sabi moro fu den sani di yu o taki. Yu kan poti aksi tu fu yepi wan sma denki fu wan tori, noso fu poti krakti tapu san yu e taki. Te yu e poti bun aksi, dan yu e gi tra sma deki-ati fu densrefi denki bun tu fu san yu e taki, na presi fu den arki yu nomo. Yu musu abi wan sani na prakseri di yu wani doro, èn poti aksi na so wan fasi taki yu sa man doro a sani disi.

Gi trawan deki-ati fu taki nanga yu. Te yu de na ini a preikiwroko, dan yu musu de na ai gi den okasi di yu abi fu meki sma taki san densrefi e denki, efu den wani du dati.

Furu Kotoigi e bigin wan moi takimakandra, fu di den e aksi nomo: „Oiti yu aksi yusrefi . . . ?” Te den Kotoigi disi e poti wan aksi fu wan sani di furu sma e prakseri trutru, dan seiker den sa abi wan prisiri ten na ini a preikiwroko. Srefi efu a sma no yere so wan aksi ete, toku dati kan meki taki a wani yere moro fu a tori. Yu kan bigin taki fu furu sani te yu e bigin nanga aksi soleki „San yu e prakseri . . . ?”, „Fa yu e firi fu . . . ?”, èn „Yu e bribi taki . . . ?”

Leki wan preikiman fu a bun nyunsu, Filipus ben waka miti wan tiriman fu a kownu-oso fu Etiopia. A tiriman disi ben leisi a profeititori fu Yesaya nanga wan tranga sten. Di Filipus waka miti na Etiopiasma disi, dan a wan-enkri sani di a aksi en ben de: „Trutru yu sabi [noso trutru yu e frustan] san yu e leisi?” (Tori. 8:30) Na aksi disi ben gi Filipus na okasi fu fruteri a man disi den tru tori fu Yesus Krestes. Fu di wan tu Kotoigi na ini a ten disi ben poti wan srefi sortu aksi neleki Filipus, dati meki den ben kan feni sma di trutru ben wani frustan den tru tori fu Bijbel moro krin.

O moro yu e gi sma na okasi fu taki san densrefi e denki, o moro den sa wani arki yu. Baka te yu poti wan aksi gi den, dan arki bun te den e gi piki. No go suku fowtu na den sani di a sma e taki, ma na presi fu dati, sori en na wan switi fasi taki yu frustan san a e taki. Prèise a sma te yu kan du dati trutru. Na wan okasi, di wan leriman fu wet „ben piki bun”, dan Yesus ben prèise en nanga den wortu: „Yu no de fara fu a Kownukondre fu Gado” (Mark. 12:34). Srefi efu yu no abi a srefi denki leki a tra sma, toku yu kan taki en tangi fu di a ben wani taigi yu san en e denki. San a e taki, kan meki yu kon sabi san yu musu hori na prakseri te yu e prati den tru tori fu Bijbel nanga en.

Te yu wani bigin taki nanga wan sma fu wan prenspari sani. Te yu e taki nanga wan grupu fu sma noso te yu e taki nanga wán sma nomo, dan pruberi fu poti aksi so taki yu kan tyari den go tapu wan prenspari sani di yu wani taki. Sorgu taki den aksi di yu e poti abi fu du nanga afersi di yu arkiman musu sabi trutru. Yu kan poti aksi tu di e meki taki den wani sabi san yu o taki fu di den no sabi a piki tapu na aksi dati wantewante. Efu yu e wakti pikinso baka te yu poti wan aksi, dan den arkiman sa kan poti moro prakseri na san yu o taki.

Wan leisi, a profeiti Mika ben poti wan tu aksi. Baka di Mika ben aksi san Gado e fruwakti fu den wan di e anbegi en, dan a profeiti ben poti fo tra aksi, èn den arkiman ben kan piki ibriwan fu den aksi leki fa den wani. Ma ala den aksi dati e yepi den sma di e leisi a buku fu en, fu sreka densrefi tapu a koni piki di a e gi na a kaba fu a takimakandra fu en (Mika 6:6-8). Yu kan du so wan sani te yu e gi leri? Pruberi fu du en.

Fu taki-go-taki-kon fu wan tori. Te yu e poti aksi, dan yu kan yepi trawan fu frustan fu san ede wan sani de so. Na disi Yehovah ben du di a ben taki wan seryusu tori nanga Israel, soleki fa dati de fu si na Maleaki 1:2-10. Na a fosi presi, Yehovah taigi den: „Mi ben lobi unu.” Ma den no ben warderi a lobi dati. Ne Yehovah aksi den: „Esau no ben de a brada fu Yakob?” Dan Yehovah sori go na Edom, pe nowan sma ben libi moro na ini. Disi ben pasa fu di den sma drape ben du ogri èn fu dati ede Gado no ben lobi den. Baka dati Yehovah fruteri wan tu agersitori, èn wanwan leisi a poti aksi gi den fu poti krakti tapu a misi di Israel misi fu warderi a lobi fu en. Yehovah ben poti wan tu aksi na so wan fasi taki a ben gersi neleki na den ogri priester ben poti den aksi. Ma tra aksi baka, na aksi di Yehovah srefi ben poti gi den priester. A fasi disi fa Yehovah ben taki nanga den, e naki wi ati trutru, èn a e hari wi prakseri gi a tori. Den buweisi de so krin, taki nowan sma kan taki dati den no tru èn a boskopu na wan di wi no man frigiti.

Wan tu takiman e poti bun aksi na a srefi fasi disi. Aladi a takiman no e fruwakti taki den arkiman o piki en, toku a de neleki den e taki nanga makandra, fu di den arkiman e piki den aksi na ini den prakseri.

Te wi e hori oso-bijbelstudie, dan wi e du dati na so wan fasi taki a studenti kan abi wan prati tu. A no de fu taki, dati a moro bun efu a studenti e piki den aksi nanga en eigi wortu. Poti tra aksi tu fu taki-go-taki-kon nanga a studenti, ma du dati na wan switi fasi. Te yu e taki fu wan prenspari pisi, dan gi a studenti deki-ati fu a gebroiki Bijbel fu piki na aksi. Kande yu kan aksi en tu: „Fa a sani di wi e taki now, abi fu du nanga a tra sani di wi ben studeri? Fu san ede a de prenspari? Fa a musu abi krakti tapu wi libi?” A fasi disi fu poti aksi, moro bun leki te yusrefi ben o sori nomonomo fa yu de seiker fu a tori, noso te yusrefi ben o taki tumusi furu fu tyari a tori kon na krin. Na a fasi disi, yu e yepi a studenti fu gebroiki en ’krakti fu denki’ fu anbegi Gado.​—Rom. 12:1.

Efu wan studenti no e frustan wan sani, dan abi pasensi. Kande a e pruberi fu si fa den sani di yu e taki, abi fu du nanga den sani di a bribi so furu yari kaba. Kande efu yu o taki fu a srefi tori na wan tra fasi, dan dati kan yepi en fu frustan a tori moro bun. Ma sontron, dan yu sa abi fu taki-go-taki-kon nanga en. Gebroiki Bijbel furu te yu e du dati. Gebroiki agersitori tu. Makandra nanga den sani disi, dan yu musu poti aksi tu di no muilek, so taki a sma kan go denki fu den buweisi di yu e tyari kon na fesi.

Fu kon sabi fa a sma e firi trutru. Te sma e gi piki tapu aksi, dan a no ala ten den e sori trawan fa den e firi trutru. Kande den sa gi piki soifri leki fa yu wani yere dati. Dan yu sa abi fu si krin san yu kan du (Odo 20:5). Neleki Yesus, dan yu kan aksi: „Yu e bribi disi?”​—Yoh. 11:26.

Di furu fu den disipel fu Yesus ben atibron fu wan sani di a taki èn den ben gowe libi en, dan Yesus ben gi den apostel fu en a kari fu densrefi taki fa den firi fu a sani dati. A ben aksi den: „Unu no wani gowe tu?” Petrus ben sori fa den apostel disi ben firi di a taki: „Masra, na suma wi musu go? Yu e taki sani di e gi sma têgo libi; wi bribi èn wi kon sabi taki yu na a Santawan fu Gado” (Yoh. 6:67-69). Na wan tra okasi, Yesus ben aksi den disipel fu en: „Suma na a Manpikin fu libisma soleki fa den sma e taki?” Dan a go doro fu poti wan aksi gi den so taki densrefi ben kan taki san ben de na ini den ati. A aksi den: „Ma san unu e taki fu mi?” Ne Petrus piki en taki: „Yu na Krestes, a Manpikin fu a libi Gado.”​—Mat. 16:13-16.

Te yu e hori wan oso-bijbelstudie, dan kande yu sa si taki a bun fu du wan srefi sortu sani tu te yu e taki fu spesrutu tori. Kande yu kan aksi a studenti: „Fa den mati fu yu na skoro (noso na wrokope) e denki fu a tori disi?” Baka dati yu kan aksi en: „Ma fa yu e firi fu a tori disi?” Te yu sabi fa wan sma e firi trutru, dan dati kan yepi yu leki leriman fu gi a sma moro bun leri.

Fu poti krakti tapu sani. Yu kan poti aksi tu fu poti krakti tapu sani di yu wani tyari kon na fesi. Dati na san na apostel Paulus ben du, soleki fa a skrifi na Romesma 8:31, 32: „Efu Gado de nanga wi, dan suma sa de teige wi? En di no ben kibri en eigi Manpikin srefi, ma di ben gi en abra gi wi alamala, dan fu san ede makandra nanga en a no sa gi wi ala tra sani na wan switi fasi?” Luku taki ibri aksi di na apostel poti dyaso, e taki finifini fu a sani di a taki na fesi.

Baka di a profeiti Yesaya ben skrifi den krutu boskopu fu Yehovah teige a kownu fu Babilon, dan Yesaya ben sori taki a ben bribi trutru taki a krutu dati ben o kon tru, di a skrifi: „Yehovah fu den legre srefi teki a bosroiti, èn suma kan tapu en? Na anu fu en na a wan di a langa, èn suma kan meki en drai baka?” (Yes. 14:27) Den sortu aksi disi e sori taki nowan sma kan taki dati a no tru. Wan sma no abi fu piki so wan aksi moro, bika efu yu luku en bun, dan a piki gi kaba na a fasi fa na aksi poti.

Fu sori taki sma abi wan fowtu denki. Te yu prakseri bun, fosi yu poti wan aksi, dan dati kan yepi yu heri bun fu tyari wan fowtu denki fu wan sma kon na krin. Bifo Yesus ben dresi wan man, dan a aksi den Fariseiman nanga wan tu tra sabiman fu a Wet: „A fiti fu meki wan sma kon betre na wan sabadei?” Baka di Yesus meki a man kon betre, dan a poti wan tra aksi gi den: „Te un manpikin, noso mankaw e fadon go na ini wan peti na wan sabadei, dan suma fu unu no o hari en puru wantewante?” (Luk. 14:1-6) Nowan fu den ben abi fu piki na aksi dati, èn den no ben du dati tu. Den aksi dati ben sori den taki den ben abi wan fowtu denki.

Sontron, dan sosrefi tru Kresten kan kisi wan fowtu denki. Na ini a fosi yarihondro, dan wan tu fu den Kresten na ini Korente ben tyari den brada go na krutu fu lusu problema di den ben abi nanga den. Te yu e luku en bun, dan den ben musu man lusu den problema na mindri densrefi. San na apostel Paulus ben du na ini na afersi disi? A ben poti wan tu prenspari aksi gi den, di ben sori den taki den ben musu kenki a denki fu den.​—1 Kor. 6:1-8.

Te yu tan e pruberi fu poti bun aksi, dan te fu kaba yu sa leri fu poti bun aksi. Ma toku, no frigiti fu sori lespeki, spesrutu te yu e taki nanga owru sma, sma di yu no sabi, èn nanga sma di abi makti. Poti aksi so taki yu kan pristeri den tru tori fu Bijbel na wan switi fasi.