Gebroiki bijbel fu piki wan sma

TE SMA e aksi wi san wi e bribi, fa wi e libi, san wi e prakseri fu den sani di e pasa nownowde, èn sortu howpu wi abi gi a tamara, dan wi e meki muiti fu gebroiki Bijbel fu piki den. Fu san ede? Fu di Bijbel na a Wortu fu Gado. Na fu Bijbel wi e puru den sani di wi e bribi. Wi e libi soleki fa a skrifi na ini Bijbel. Bijbel e yepi wi fu frustan den sani di e pasa na grontapu. Neleki wan bon di rutu dipi, na so a howpu di wi abi gi a tamara, rutu dipi na ini den pramisi fu Gado soleki fa dati skrifi na ini Bijbel.​—2 Tim. 3:16, 17.

Wi e frustan heri bun san na a frantwortu di wi abi fu di wi e tyari a nen Yehovah Kotoigi. Wi na Kotoigi fu Yehovah (Yes. 43:12). Sobun, te sma e aksi wi wan sani, dan wi no e taigi den san libisma e denki, ma wi e taigi den san Yehovah e taki na ini a Wortu fu en. A tru taki, leki libisma wi abi wi eigi denki fu sani. Ma toku wi e meki Gado Wortu abi krakti tapu a denki fu wi, bika wi e bribi srefisrefi taki disi na a waarheid. A no de fu taki, dati Bijbel e gi wi na okasi fu luku san wisrefi wani du na ini furu afersi. Sobun, na presi fu sori tra sma san wi e feni bun, dan wi wani leri sma den gronprakseri di skrifi na ini den Buku fu Bijbel. Na so wan fasi wi wani gi den arkiman fu wi na okasi fu teki den eigi bosroiti tu, neleki fa wi man du dati. Neleki na apostel Paulus, dan wi e suku „fu meki sma gi yesi nanga yepi fu bribi”.​—Rom. 16:26.

Openbaring 3:14 e taki fu Yesus Krestes leki „a getrow èn tru kotoigi”. Fa a ben piki sma te den ben poti aksi gi en? San a ben du nanga den sani di ben miti en? Sontron a ben fruteri agersitori so taki den sma srefi ben kan denki fu a tori. Tra leisi baka, dan Yesus ben aksi a sma di ben poti na aksi gi en, san ensrefi e frustan fu a tekst. Ma furu tron, Yesus ben taki san skrifi na ini wan bijbeltekst, a ben kari pisi fu wan tekst, noso a ben taki sani di ben sori go na wan tekst (Mat. 4:3-10; 12:1-8; Luk. 10:25-28; 17:32). Na ini a fosi yarihondro, dan furu tron den ben kibri den bukulolo fu Bijbel na ini den snoga. Buweisi no de taki Yesus srefi ben abi so wan lolo. Ma a ben sabi den Buku fu Bijbel heri bun èn furu tron a ben sori go na san skrifi drape te a ben gi trawan leri (Luk. 24:27, 44-47). Fu tru, Yesus ben kan taki nanga reti, taki den sani di a ben leri den sma no ben kon fu ensrefi. A ben taki sani di a ben yere fu en Tata.​—Yoh. 8:26.

Wi wani waka trutru baka na eksempre di Yesus gi. Wisrefi no yere fa Gado taki, soleki fa Yesus yere dati. Ma Bijbel na a Wortu fu Gado. Efu wi e gebroiki Bijbel fu gi sma wan piki, dan wi e sorgu taki sma no e poti prakseri na wi. Wi no e taki sani di libisma e taki, fu di libisma no de volmaakti. Ma na presi fu dati, wi abi a fasti bosroiti fu meki Gado taki san tru.​—Yoh. 7:18; Rom. 3:4.

A no de fu taki, dati wi no e gebroiki Bijbel soso fu di wi musu du dati, ma wi wani gebroiki Bijbel na so wan fasi taki a sma di e arki wi, kan kisi wini fu dati. Wi wani taki a sma musu arki wi trutru. Efu yu kon sabi fa a sma e prakseri fu sani, dan bifo yu bigin fruteri en sani fu Bijbel, yu kan aksi en: „Yu no feni taki a moro prenspari sani na san Gado e taki?” Noso yu kan aksi en: „Yu sabi taki Bijbel e taki soifri fu na aksi di yu poti?” Efu yu e taki nanga wan sma di no abi lespeki gi Bijbel, dan kande yu sa musu bigin wan tra fasi. Kande yu kan taki: „Meki mi fruteri yu fu a profeititori disi fu fositen.” Noso yu kan taki: „A buku di prati na heri grontapu, moro leki iniwan tra buku na ini a libisma historia, e taki a sani disi . . . ”

Sontron a kan de so, taki yu wani fruteri san wan tekst e taki, sondro fu leisi a tekst srefi. Ma efu a kan, dan a moro bun fu opo yu Bijbel èn leisi san skrifi drape. Sori a sma pe a tekst skrifi na ini en eigi Bijbel, efu a kan. Te yu e leisi langalanga komoto fu a Bijbel, dan furu tron dati abi wan bun krakti tapu sma.​—Hebr. 4:12.

Kresten owruman abi wan spesrutu frantwortu fu gebroiki Bijbel te den e piki den aksi di sma poti. Wan fu den markitiki gi wan brada di e dini leki owruman de taki a ’musu sori nanga a fasi fa a e gi leri, taki a e hori tranga na a tru wortu’ (Tit. 1:9). Wan sma na ini a gemeente kan teki wan seryusu bosroiti na ini en libi, baka te wan owruman gi en rai. Dati meki a de kefalek prenspari taki a rai disi trutru musu komoto fu Bijbel! Te wan owruman e gi wan bun eksempre na ini a tori disi, dan furu tra sma kan teki na eksempre disi abra te den e gi leri.