Agersitori fu sani di sma sabi

A NO de fu taki, dati awansi sortu agersitori yu e fruteri den arkiman, a de prenspari taki a de wan agersitori di e fiti na a tori di yu e taki. Ma efu yu wani taki den agersitori abi krakti tapu den arkiman, dan a de prenspari taki den fiti na den arkiman sosrefi.

Efu yu sabi sortu sma e arki yu, dan fa dati kan yepi yu fu feni den yoisti agersitori fu fruteri den? San Yesus Krestes ben du? Awansi Yesus ben taki nanga heri ipi sma, noso nanga den disipel fu en, toku noiti a ben gebroiki eksempre di ben sori fa sma ben libi na ini den kondre dorosei fu Israel. Nanga so wan eksempre, den arkiman no ben o frustan san a e taki. Fu eksempre, Yesus no ben fruteri fu a fasi fa den kownu ben libi na ini Egepte, noso fa a kerki libi ben de na ini India. Ma toku Yesus ben fruteri agersitori fu sani di sma ben sabi na ini ala kondre. A ben fruteri fu sani soleki fu nai krosi, fu du bisnis, fu lasi wan diri sani, èn fu go na trowfesa. A ben frustan fa sma e denki èn san den e du na ini ala sortu situwâsi, èn fu dati ede a ben kan gebroiki disi fu fruteri den agersitori fu en (Mark. 2:21; Luk. 14:7-11; 15:8, 9; 19:15-23). Fu di Yesus ben preiki spesrutu gi a pipel fu Israel, dati meki furu tron den agersitori fu en ben taki fu sani di den sma ben sabi èn sani di den ben du na ini na aladei libi fu den. Sobun, Yesus ben fruteri fu sani soleki wroko na gron, den sani di skapu ben du te den skapuman ben kari den, èn a gebroiki di sma ben gebroiki buba fu meti fu kibri win (Mark. 2:22; 4:2-9; Yoh. 10:1-5). A ben fruteri fositen tori sosrefi di den sma ben sabi heri bun. Wan tu eksempre fu dati na a meki di Gado ben meki den fosi tu libisma, a Frudu na ini a ten fu Noa, a pori di Sodom nanga Gomora ben pori gowe, èn a dede di Lot en wefi dede (Mat. 10:15; 19:4-6; 24:37-39; Luk. 17:32). Yu e du dati tu? Yu e luku finifini san yu arkiman gwenti fu si ala dei fosi yu e teki wan agersitori fu fruteri? Yu e luku sosrefi fu sortu kondre den komoto fosi yu e teki yu agersitori fu fruteri den?

Efu yu no e taki nanga wan bigi grupu fu sma, ma yu e taki nanga wán sma noso wan tu sma nomo, dan san yu kan du dan? Du muiti fu suku wan agersitori di fiti spesrutu na a pikin grupu dati fu arkiman. Di Yesus ben preiki gi wan Samaria uma na wan peti na Sikar, dan a ben taki fu „libi watra”, „watra no sa kiri en noiti moro”, èn ’wan watrafonten pe watra e komopo fu gi sma têgo libi’. Ala den sani disi ben abi fu du wantewante nanga a wroko di na uma dati ben du (Yoh. 4:7-15). Sosrefi di Yesus ben taki nanga mansma di ben wasi den fisinèt fu den, dan a ben fruteri agersitori di ben abi fu du nanga a fisiwroko (Luk. 5:2-11). Yesus ben kan fruteri na uma nanga den fisiman wan agersitori fu sma di e wroko na gron, fu di den sma na ini a kontren drape ben gwenti fu go na den gron fu prani. Ma a no ben du dati, a ben fruteri agersitori di ben abi fu du nanga a wroko fu den sma disi. So fasi den ben kan frustan wantewante san a ben taki! Yu e meki muiti fu du a srefi sani disi?

Yesus ben poti prakseri na „den lasi skapu fu na oso fu Israel”. Na a tra sei, Gado no ben seni na apostel Paulus na den sma na ini Israel wawan, ma Paulus ben musu go sosrefi na den trakondre sma (Mat. 15:24; Tori. 9:15). Disi ben meki taki Paulus ben taki tra fasi? Iya. Di Paulus ben skrifi den Kresten na Korente, dan a ben skrifi fu streilon, fu a nyan di sma ben nyan na ini den afkodrei tempel, èn sosrefi fu den prodo-waka di sma ben waka te den ben wini wan strei. Disi ben de sani di den trakondre sma ben sabi heri bun.​—1 Kor. 8:1-10; 9:24, 25; 2 Kor. 2:14-16.

Yu e du a srefi sani leki Yesus nanga Paulus? Yu e broko yu ede tu fu feni bun agersitori nanga eksempre di yu kan gebroiki te yu e gi leri? Yu e prakseri san den sma e miti na ini den libi èn san den e du ala dei? A no de fu taki, dati grontapu kenki sensi a fosi yarihondro. Furu sma kan luku nyunsu tapu telefisi èn si san e pasa na ini a grontapu. Sobun, furu tron den sabi san e pasa na ini tra kondre. Efu dati de so na ini a presi pe yu e libi, dan yu kan teki yu agersitori fu den sani disi. Ma toku a de so taki den sani di e naki den sma ati trutru, na den sani di abi fu du nanga den aladei libi. Dati na sani di abi fu du nanga den oso, den famiriman, den wroko, a nyan di den e nyan, èn a weer na ini a kontren fu den.

Efu yu musu fruteri yu arkiman tumusi furu sani bifo den frustan na agersitori fu yu, dan kande yu e fruteri den arkiman wan sani di den no sabi. So wan agersitori kan meki taki den arkiman no e si so krin san na a sani di yu wani leri den. Dati kan meki taki den arkiman sa memre na agersitori fu yu, ma den no sa memre a tru tori fu Bijbel di yu ben wani meki den frustan.

Yesus no ben fruteri muilek agersitori, ma na presi fu dati a ben fruteri makriki tori fu sani di ben pasa ala dei. A ben teki pikin sani fu meki den sma frustan bigi sani, èn a ben teki makriki sani fu meki den arkiman frustan den muilek sani. Yesus ben gebroiki sani fu ibri dei te a ben taki fu den tru tori fu Bijbel. Fu di a ben du dati, meki a ben yepi den sma fu frustan den tru tori fu Bijbel moro bun so taki den no frigiti den sani disi. Dati na trutru wan moi eksempre gi wi!