Meki muiti fu doro na ati

BOITI taki yu musu gi sma kotoigi, dan yu musu du muiti tu fu doro na ati fu den. Furu tron te Bijbel e taki fu na ati, dan a e sori go na wan heri tra sani leki san wan sma gersi fu de na dorosei. Te Bijbel no e taki fu a trutru ati fu wan sma, dan a e sori go na a fasi fa wan sma de na inisei. A e sori fa a sma e firi, ala den sani di a e prakseri, fu san ede a e prakseri na so wan fasi, èn fa den sani di a e prakseri abi krakti tapu den sani di a e du. Na ini so wan sortu agersi ati a siri fu waarheid e sai (Mat. 13:19). Èn te wan sma e leri fu gi yesi na Gado, dan a musu du dati nanga en heri ati.​—Odo 3:1; Rom. 6:17.

Efu yu wani taki a leri di yu e gi, e go so dipi taki a e doro na ati fu den sma, dan hori den dri sani disi na prakseri: (1) Kon frustan san na a sani di de kaba na ini na ati fu yu arkiman. (2) Poti krakti tapu bun fasi, soleki lobi nanga a frede di wan sma musu frede Gado. (3) Gi yu arkiman deki-ati fu a go ondrosuku san de na ini en ati, so taki a kan sabi san a musu du fu plisi Yehovah moro bun.

Abi a koni fu man si sani krin. Difrenti sani de fu san ede sma no teki a waarheid ete. Te yu e hori wan oso-bijbelstudie, dan kande yu musu puru wan fowtu prakseri di a studenti abi. Kande yu musu sori en fa a tori de trutru, so taki a kon frustan taki san a ben denki fosi, no bun. Noso kande yu no abi fu du noti moro leki fu gi buweisi nomo. Aksi yusrefi: ’A sma disi e frustan taki leki libisma a abi Gado fanowdu? O furu sani a e bribi kaba? San na den sani di a no e bribi? San meki taki a kon bribi den sani dati? A de so taki a abi yepi fanowdu, so taki a kan puru den takru lostu di a abi èn di e hori en na baka fu du den sani di wan sma musu du te a kon sabi a waarheid?’

A no de wan makriki sani ala leisi fu kon sabi fu san ede sma e bribi son sani. Odo 20:5 e taki: „Rai na ini na ati fu wan man de leki dipi watra, ma a man di abi a koni fu man si sani krin, na a wan di sa hari a sani dati kon na tapusei.” Efu wan sma abi a koni fu man si sani krin, dan a man frustan sani di trawan no kan si ete. Efu yu wani de so wan sma, dan yu musu luku sma bun èn yu musu wani yepi den.

A no ala ten a de so dati yu musu taki nanga wan tra sma fu frustan en trutru. Te yu e taki fu wan spesrutu tori, dan yu kan si kande taki a studenti en fesi e kenki, noso yu kan yere taki a fasi fa a e taki sani, de tra fasi now. Efu yu na wan papa noso wan mama, dan seiker yu e frustan taki te yu e si yu pikin e bigin du tra fasi leki fa a ben gwenti, dan dati kan sori yu taki wan tra sani abi krakti tapu en libi nownowde. No du leki yu no e si den sani disi. Den sani disi na pikinpikin sani di e sori yu san de na ini na ati fu wan sma.

Efu yu e poti bun aksi, dan dati kan yepi yu fu kon sabi san de na ini wan sma ati. Kande yu kan aksi a sma: „Fa yu e firi fu . . . ?” „San e meki taki yu e bribi taki . . . ?” „San yu ben o du efu . . . ?” Ma luku bun taki den aksi di yu e poti, no e meki a sma firi neleki wan skowtu e ondrosuku en. Kande a ben o moro bun efu yu e aksi en fosi: „Yu no e feni en fruferi efu mi e aksi yu . . . ?” Fu kon sabi san de na ini wan sma ati, na wan sani di e teki ten èn yu musu luku bun fu no hati sma. Furu tron dan wan pisi ten musu pasa bifo a sma e bigin frutrow yu nanga den tori fu en èn bifo a wani fruteri yu san de na ini en ati trutru. Ma srefi efu a sma e du dati, dan toku yu musu luku bun taki yu no e aksi en sani di e meki a firi taki yu e bumui na ini en libi.​—1 Petr. 4:15.

Yu musu abi a koni fu man si krin san yu e du te yu yere san a sma e taigi yu. Memre taki yu e poti aksi fu kan frustan sma, so taki yu sabi sortu tori fu Bijbel sa man gi den deki-ati trutru. Efu yu e kisi a firi fu sori a sma wantewante tapu wan fowtu sani di a e taki, dan du furu muiti fu hori yusrefi. Na presi fu dati, dan meki muiti fu si fu san ede a sma e taki a sani dati. Dan yu sa sabi san yu kan taigi en; èn fu di yu studenti si taki yu sabi fa a e firi, dan furu tron a sa wani go denki seryusu fu a sani di yu e taigi en.​—Odo 16:23.

Srefi efu yu e taki nanga wan bigi grupu fu sma, toku na a wan noso tra fasi, yu kan gi sma deki-ati. Luku den arkiman fu yu te yu e taki, luku fa den e poti den fesi, èn poti aksi di den no abi fu piki. Efu yu e du dati, dan yu kan kon sabi fa yu arkiman e firi fu den sani di yu e taigi den. Efu yu sabi den arkiman fu yu heri bun, dan sori den dati yu e frustan a situwâsi fu den. Hori na prakseri fa a heri gemeente e tyari ensrefi, te yu e taki-go-taki-kon nanga den fu den sani di skrifi na ini Gado Wortu.​—Gal. 6:18.

Wiki bun firi na ini den arkiman. Te yu e kon frustan pikinso san wan sma e bribi, san a no e bribi, èn fu san ede a e bribi so, dan yu sa man gebroiki dati fu taki go doro nanga a sma. Baka di Yesus opo baka, a ben doro na ati fu den disipel fu en fu di a ben ’meki den frustan ala den Buku finifini’, èn fu di a ben fruklari den sani di ben pasa paspas (Luk. 24:32). Yusrefi musu pruberi tu fu meki wan sma kon si san den sani di a e leri fu Gado Wortu abi fu du nanga den sani di e miti en na ini en libi nanga den sani di a wani srefisrefi. Yu sa doro na ati fu wan studenti heri bun, te a e frustan krinkrin taki: „Disi na A WAARHEID!”

Te yu e poti krakti tapu Yehovah en switifasi, a lobi fu en, a bun-ati fu en, nanga den reti pasi fu en, dan yu kan yepi den wan di yu e gi leri, fu den kon lobi Gado. Te yu e teki yu ten fu sori yu arkiman taki Gado e si den moi fasi di den abi leki libisma, dan yu e sori den fu san ede den kan bribi taki den kan tron mati nanga Gado. Yu kan du disi, fu di yu e poti den prakseri na bijbeltekst soleki Psalm 139:1-3, Lukas 21:1-4, nanga Yohanes 6:44, èn sosrefi fu di yu e yepi yu arkiman fu frustan o furu Yehovah lobi den getrow futuboi fu en (Rom. 8:38, 39). Tyari kon na krin taki Yehovah no e luku wawan sortu fowtu wi e meki, ma a e si wi heri libi nanga waka tu, a faya di wi abi gi a soifri anbegi, èn a lobi di wi lobi en nen (2 Kron. 19:2, 3; Hebr. 6:10). A e memre srefi ibri pikin sani fu wi leki libisma, èn na wan kefalek moi fasi a sa gi libi baka na „ala den sma di de na ini den grebi” èn di a no frigiti (Yoh. 5:28, 29; Luk. 12:6, 7). Fu di libisma meki leki wan prenki fu Gado, dati meki te wi e taki nanga sma fu a fasi fa Gado de, dan furu tron disi sa naki na ati fu den fu densrefi du wan sani tu.​—Gen. 1:27.

Yu kan doro na ati fu wan sma tu te yu e leri wan sma fu si trawan neleki fa Yehovah e si den tra sma disi. A no de fu taki dati efu a Gado fu wi e sori lobi gi ibriwan fu wi, dan a e sori a srefi switi firi disi gi tra sma tu, awansi fa den kweki, fu sortu kondre den de, noso sortu ras den de (Tori. 10:34, 35). Na a momenti taki wan sma frustan a sani disi bun, dan Bijbel sa man yepi en heri bun fu puru ala bita-ati èn sosrefi ala fowtu denki di a abi fu trawan. Disi sa yepi en fu man libi na ini vrede nanga tra sma, te a e go doro fu leri fa fu du a wani fu Gado.

Frede gi Gado na wan tra firi di yu musu yepi trawan fu kisi (Ps. 111:10; Openb. 14:6, 7). So wan lespeki gi Gado, noso wan frede gi Gado, kan gi wan sma deki-ati fu du sani di ensrefi no man du nanga en eigi krakti. Efu yu e taki fu den bigi sani di Yehovah du di e meki taki wi e lespeki èn e frede en, èn efu yu e taki fu a tumusi aparti lobi bun-ati di a e sori wi, dan yu kan yepi trawan fu kisi wan yoisti frede gi Gado di sa yepi den fu no du sani di Gado no lobi.​—Ps. 66:5; Yer. 32:40.

Sorgu taki yu arkiman frustan taki a fasi fa den e tyari densrefi de prenspari gi Yehovah. Yehovah abi firi, èn den sani di wi e du te a e gi wi rai, kan meki en firi sari noso kan meki en firi prisiri (Ps. 78:40-42). Sori sma fu san ede a fasi fa den e tyari densrefi de prenspari fu man gi wan piki tapu a tyalensi di Satan e tyalensi Gado.​—Odo 27:11.

Yepi yu arkiman fu si taki den sa feni winimarki te den e du san Gado e aksi fu den (Yes. 48:17). Wan fasi fa yu kan du disi, na fu sori den san kan pasa nanga den na skin sei èn nanga den firi fu den te den e weigri fu teki a koni fu Gado, srefi efu den e weigri dati fu wan syatu pisi ten nomo. Tyari kon na krin taki efu wi e sondu, dan dati e prati wi fu Gado, a e meki taki trawan e lasi na okasi fu leri waarheid fu wi, èn a e meki tu taki wi e teki san trawan abi reti na tapu (1 Tes. 4:6). Yepi yu arkiman fu si den blesi di den e kisi kaba fu Gado èn fu si den blesi disi leki wan bigi gudu, èn yepi den fu si taki den blesi disi e kon fu di den e hori densrefi na den wet fu Gado. Yepi den fu kisi moro warderi fu di yu e sori den fa a waka di den e waka den reti pasi fu Yehovah, meki taki den e wai pasi gi furu ogri. Te wan sma e bribi taki a de wan koni sani fu waka den pasi fu Gado, dan a sa de teige ala den sani di Gado no e feni bun (Ps. 119:104). So wan sma sa feni taki a no hebi fu gi yesi na Gado, ma a de wan fasi fu sori taki a lobi Yehovah trutru.

Yepi trawan fu ondrosuku densrefi. Efu sma wani gro kon tranga na ini a bribi, dan den sa musu sabi soifri san de na ini den ati. Sori den fa Bijbel kan yepi den fu du disi.

Yepi yu arkiman fu frustan taki Bijbel a no soso wan buku nanga komando, rai, sani di pasa fositen, nanga profeititori. Bijbel e sori wi fa Gado e denki. Na Yakobus 1:22-25, a skrifiman e gersi Gado Wortu nanga wan spigri. Na den sani di wi e du nanga san Bijbel e taki, èn a fasi fa wi e si den sani di Yehovah e du, kan sori wi san de na ini wi ati. Na so fasi Bijbel e sori wi fa Gado leki „a sma di e ondrosuku na ati”, e si wi (Odo 17:3). Gi yu arkiman deki-ati fu hori disi na prakseri. Gi den deki-ati fu go sidon denki fu den sani di Gado meki sma skrifi gi wi na ini Bijbel èn meki den prakseri tu sortu kenki den musu tyari kon na ini den libi so taki den kan du den sani di Gado lobi. Yepi den fu si taki a leisi di den e leisi Bijbel, na wan fasi fa den kan kon sabi fa Yehovah e denki fu ’den sani di de na ini na ati èn di na ati abi na prakseri’. Na so fasi den kan wroko makandra nanga Gado fu tyari kenki kon pe dati de fanowdu.​—Hebr. 4:12; Rom. 15:4.

A kan taki wan tu bijbelstudenti wani du san den e leri, ma toku den e hati den ede nanga san tra sma sa denki fu den. Kande den e feti nanga wan tu tranga lostu fu a skin. Noso den kan abi a denki taki den kan du wan tu sani fu dini Gado, ma na a srefi ten den kan tan hori densrefi na wan tu grontapu sani. Sori den a kefar te den no man teki wan bosroiti fu san den musu du trutru (1 Kow. 18:21). Gi den deki-ati fu begi Gado so taki a kan ondrosuku èn krin na ati fu den.​—Ps. 26:2; 139:23, 24.

Sori den taki Yehovah e frustan nanga san den musu feti, èn taki Bijbel e fruteri san e pasa trutru nanga den (Rom. 7:22, 23). Yepi den fu luku bun nanga na onvolmaakti ati fu den, so taki na ati disi no e basi den.​—Odo 3:5, 6; 28:26; Yer. 17:9, 10.

Gi iniwan fu yu bijbelstudenti deki-ati fu ondrosuku fu san ede den e du sani. Leri den fu aksi densrefi: ’Fu san ede mi wani du a sani disi? A sani disi sori Yehovah taki trutru mi e warderi ala sani di a du gi mi?’ Tan du muiti fu yepi den kisi na overtoigi taki a moro bun sani di wan sma kan du, na fu tron wan bun mati fu Yehovah.

Yepi yu arkiman fu frustan o prenspari a de fu dini Yehovah nanga den „heri ati” (Luk. 10:27). Disi wani taki dati ala den firi di den abi, ala den sani di den wani, èn ala sani di e pusu den fu du wan sani, musu kruderi nanga den pasi fu Yehovah. Sobun, leri yu arkiman fu ondrosuku no wawan san de e du, ma sosrefi fa den e firi fu den sani di Gado e aksi fu den, èn fu san ede den e dini en (Ps. 37:4). Te yu studenti e si sani di den musu du moro bun, dan gi den deki-ati fu begi Yehovah: „Meki mi ati kon de wán fu man frede yu nen.”​—Ps. 86:11.

Te wan studenti e tron wan mati fu Yehovah, dan a sa gi yesi na Yehovah fu di a e bribi, èn no wawan fu di yu gi en a deki-ati fu du dati. Dan fu en sei, a studenti srefi sa „tan ondrosuku fu sabi san Masra e feni bun” (Ef. 5:10; Fil. 2:12). Te wan sma e gi yesi na Yehovah nanga en heri ati na so wan fasi, dan dati e prisiri Yehovah trutru.​—Odo 23:15.

Hori na prakseri taki Yehovah na a sma di e ondrosuku na ati, èn na en e hari sma fu tron en mati (Odo 21:2; Yoh. 6:44). A sani di wi musu du na fu wroko makandra nanga en (1 Kor. 3:9). A de „neleki Gado e gebroiki wi fu begi trawan” (2 Kor. 5:20; Tori. 16:14). Yehovah no e dwengi nowan sma fu teki a waarheid, ma te wi e gebroiki den Buku fu Bijbel, dan a kan meki wi arkiman frustan taki san den e yere na a piki tapu san den ben aksi densrefi, noso tapu san den ben begi Gado. No frigiti disi ibri tron te yu abi na okasi fu leri wan trawan, èn aksi Yehovah fayafaya fu a yepi yu nanga disi.​—1 Kron. 29:18, 19; Ef. 1:16-18.