Fa wi kan doro na ati fu den sma di wi e gi leri
1. Sortu krakti den leri fu Yesus ben abi tapu den sma di ben arki en?
1 Yesus Krestes ben doro na ati fu den sma di ben arki en. Fu eksempre, di Yesus ben e fruteri den disipel fu en finifini san skrifi na ini Bijbel, a sani dati naki den ati trutru (Luk. 24:32). Fu di sma musu gi yesi na Gado nanga den heri ati, meki wi musu suku fu doro na ati fu den wan di wi e gi leri so taki den tyari kenki kon na ini den libi. Fa wi kan du dati?—Rom. 6:17.
2. San o yepi wi fu doro wan sma en ati?
2 Abi a koni fu man si sani krin èn sori lespeki: Furu sma no o wani kenki soso fu di wi taigi den san bun èn san no bun. Fu taki en leti, efu wi e leisi wan lo Bijbeltekst gi den fu sori taki a bribi fu den no bun, dan dati kan meki srefi taki den no wani arki moro. Efu wi wani yepi wan sma, dan wi musu frustan fosi fu san ede a e bribi son sani èn fu san ede a e du den. Na wan lespeki fasi wi musu poti bun aksi gi en so taki a o wani fruteri san de tapu en ati (Odo 20:5). Dan fosi wi o sabi sortu tekst na ini Gado Wortu kan naki en ati. Dati meki wi musu sori taki wi e broko wi ede nanga a sma èn wi musu abi pasensi (Odo 25:15). Hori na prakseri taki a no ala sma e go na fesi na a srefi fasi. Meki nofo ten pasa so taki Yehovah en santa yeye kan abi krakti tapu a fasi fa a e denki èn den sani di a e du.—Mark. 4:26-29.
3. Fa wi kan yepi den sma di wi e gi leri fu kon abi bun fasi?
3 Yepi den fu abi bun fasi: Bijbel tori di e sori a bun-ati nanga a lobi fu Yehovah, kan yepi den sma di wi e gi leri fu kon abi bun fasi. Wi kan gebroiki Bijbeltekst soleki Psalm 139:1-4 noso Lukas 12:6, 7 fu sori taki Gado e broko en ede nanga ibriwan fu wi. Te wan sma de nanga tangi gi a bun-ati fu Yehovah, dan a o kisi moro lobi gi en èn a o wani dini en nanga en heri ati (Rom. 5:6-8; 1 Yoh. 4:19). Boiti dati, te a e leri taki a fasi fa a e tyari ensrefi abi krakti tapu Yehovah, dan a sani dati kan meki a du sani di Yehovah feni bun èn di e gi en grani.—Ps. 78:40, 41; Odo 23:15.
4. Fa wi kan sori taki wi no e dwengi sma fu dini Gado?
4 Yehovah no e dwengi nowan sma fu gi yesi na den wet fu en. Na presi fu dati a e sori den sortu wini den o kisi te den teki a rai fu en (Yes. 48:17, 18). Wi e teki Yehovah eksempre te wi e gi leri na wan fasi di e yepi sma so taki densrefi kon frustan san den musu du. Te sma srefi e kon si taki den musu tyari kenki kon na ini den libi, dan dati o abi bun bakapisi (Rom. 12:2). Den o kon moro krosibei tu na Yehovah, „a sma di e ondrosuku sma ati”.—Odo 17:3.