Sori taki yu wani kon sabi wan sma moro bun

TE WI e prati den tru tori fu Bijbel nanga tra sma, dan wi musu du moro leki fu meki den kon sabi sani nomo. Wi musu pruberi fu doro na ati fu den. Wán fasi fa wi kan du disi, na te wi e sori taki wi e broko wi ede trutru nanga den arkiman fu wi. Wi kan du disi na difrenti fasi.

Poti prakseri na san den arkiman fu yu e denki. Na apostel Paulus ben hori na prakseri pe den arkiman fu en ben komoto èn san den ben denki. A ben tyari kon na krin: „Gi den Dyu mi ben tron leki wan Dyu, so taki mi ben sa kan wini den Dyu; gi den wan di de na ondro a wet mi ben tron wan sma di de na ondro a wet, aladi misrefi no de na ondro a wet, so taki mi ben sa kan wini den wan di de na ondro a wet. Gi den sma di de sondro wet, mi tron leki wan sma di de sondro wet, aladi mi no de sondro wet ini a tori fu Gado, ma na ondro a wet ini a tori fu Krestes, so taki mi ben sa kan wini den sma di de sondro wet. Gi den swakiwan mi ben kon swaki, so taki mi ben sa kan wini den swakiwan. Mi tron ala sani gi ala sortu sma, so taki toku mi ben sa kan frulusu wan tu fu den. Ma mi e du ala sani fu a bun nyunsu ede, so taki mi kan prati en nanga trawan” (1 Kor. 9:20-23). Fa wi kan „tron ala sani gi ala sortu sma” na ini a ten disi?

Efu yu kisi na okasi fu luku fa tra sma de, awansi yu e du dati syatu nomo, dan bifo yu e bigin taki nanga den, yu kan si sani di e sori yu san den lobi èn fa a situwâsi fu den de. Yu man sabi sortu wroko den e du? Yu man si sani di e sori yu krinkrin san den e bribi? Yu e si wan sani di e sori yu fa a situwâsi fu den de na ini den osofamiri? Te yu man si wan sani, dan yu denki taki yu kan kenki a sani di yu ben o taki, so taki den sa wani arki yu nanga moro prisiri?

Efu trutru yu wani taki den sma arki yu nanga moro prisiri, dan yu musu prakseri na fesi fa yu sa taki nanga den sma di yu sa miti na ini a kontren fu yu. Na wan tu presi, dan disi wani taki dati yu sa musu prakseri den trakondre-sma di froisi kon libi na ini yu birti. Efu den sortu sma disi e tan na ini yu birti, dan yu feni wan bun fasi kaba fu preiki gi den? Fu di Gado wani, taki „ala sortu sma musu kisi frulusu èn kon sabi a waarheid soifri”, dati meki yu musu meki muiti fu pristeri a Kownukondre boskopu na wan fasi di e hari a prakseri fu ala den sma di yu e miti.​—1 Tim. 2:4.

Arki heri bun. Aladi Yehovah sabi ala sani, toku a e arki trawan. A profeiti Mikaya ben kisi wan fisyun pe a ben si fa Yehovah ben gi den engel deki-ati fu taki san den o du na ini wan spesrutu sortu situwâsi. Baka dati, Gado ben gi wan fu den engel dati na okasi fu du san na engel disi ben taki (1 Kow. 22:19-22). Di Abraham ben taki dati a ben broko en ede nanga a krutustrafu di Yehovah ben o tyari kon tapu a foto Sodom, dan na wan switi fasi Yehovah ben meki Abraham taki fa a ben firi fu disi (Gen. 18:23-33). Sobun, Yehovah na wan eksempre fu wan Sma di e arki. Dan fa wi kan teki na eksempre disi na ini wi preikiwroko?

Gi tra sma deki-ati fu taki san den e denki. Aksi wan sani di fiti, èn wakti langa nofo fu gi den na okasi fu piki na aksi fu yu. Arki trutru san den e taki. Te yu e arki den bun, dan dati sa gi den deki-ati fu taki ala sani di den wani taki. Efu den sani di den e taki e sori yu sortu sani den lobi, dan poti moro aksi fu a sani dati, ma du dati nanga koni èn na wan switi fasi. Sondro fu aksi tumusi furu sani, yu musu suku fu kon sabi yu arkiman moro bun. Prèise den na wan opregti fasi, fu di den ben wani taki san den prakseri. Srefi efu yu no e agri nanga san sma e taki, toku yu musu de nanga switifasi te yu e taigi den taki yu e frustan san den e taki.​—Kol. 4:6.

Ma aladi wi wani sori taki wi wani kon sabi den moro bun, toku wi musu luku bun taki wi no e go so fara taki wi e du wan sani di no fiti. Te wi e broko wi ede nanga trawan, dan dati no e gi wi primisi fu go bumui na ini a libi fu den (1 Petr. 4:15). Te yu leki brada de nanga switifasi fu kon sabi wan umasma moro bun, dan yu musu luku bun taki na umasma no sa prakseri taki yu wani wan tra sani tu. Na a srefi fasi, yu leki sisa musu luku bun te yu e pruberi fu de nanga switifasi fu kon sabi wan mansma moro bun. Fu di ibri kondre, èn srefi ibri sma, abi en eigi denki fu san fiti te wan sma wani kon sabi wan trawan moro bun, dati meki wi musu abi a koni fu man si krin san fiti.​—Luk. 6:31.

Efu yu e sreka yusrefi bun, dan dati kan yepi yu fu de wan bun arkiman. Te wi sabi krinkrin sortu boskopu wi abi gi sma, dan dati e yepi wi fu no broko wi ede tumusi nanga den sani di wi o taki, èn wi sa man arki trutru san sma e taki. Disi e meki sma firi bun èn dati kan meki taki den sa wani taki nanga wi.

Wi e sori lespeki gi tra sma fu di wi e arki den (Rom. 12:10). Nanga dati wi e sori taki den sani di den e prakseri nanga den sani di den e firi, warti gi wi. Disi kan meki srefi taki den sa wani arki wi moro bun fu yere san wi abi fu taki. Dati meki wi kan frustan fu san ede Gado Wortu e gi wi leki rai fu ’de esi fu yere, ma fu no de esi fu taki’.​—Yak. 1:19.

Yepi trawan fu go na fesi. Efu wi e broko wi ede nanga sma, dan wi sa tan prakseri den wan di wani sabi moro fu Bijbel, èn wi sa go baka na den fu fruteri den tru Bijbel tori di sa gi den san den abi fanowdu. Te yu e prakseri san yu sa du a tra leisi te yu o go na den, dan prakseri san yu ben kon sabi fu den a lasti leisi di yu ben fisiti den. Sreka yusrefi tapu wan tori di den e broko den ede nanga dati. Poti krakti tapu o warti a tori de di yu e taki nanga den, fu di yu e yepi den fu si fa den kan kisi wini fu den sani di den e leri.​—Yes. 48:17.

Efu yu arkiman e taki fu wan situwâsi noso fu wan problema di e trobi en, dan si disi leki wan spesrutu okasi fu prati a bun nyunsu nanga en. Waka baka na eksempre fu Yesus, di ala ten ben de klariklari fu trowstu den wan di ben brokosaka (Mark. 6:31-34). Kande yu wani sori a sma wantewante fa a kan lusu a problema, noso yu wani taigi en frafra san a kan du. Ma luku bun, bika efu yu ben o du dati, dan a sma kan denki taki yu no wani yepi en trutru. Na presi fu dati, dan yu musu pruberi fu firi san a e firi (1 Petr. 3:8). Baka dati, dan go ondrosuku a tori na ini den buku fu wi di e sori san Bijbel e taki, èn fruteri a sma sani di kan gi en deki-ati so taki a kan sabi san fu du nanga a sani di e miti en. A no de fu taki, dati efu yu e broko yu ede na wan lobi-ati fasi nanga a sma, dan yu no sa fruteri inibere tori di a sma fruteri yu fu ensrefi, boiti efu wan sani de fu san ede yu sa musu taki fu dati.​—Odo 25:9.

Wi musu sori spesrutu den wan nanga suma wi e hori bijbelstudie, taki wi wani kon sabi den moro bun. Te yu e prakseri san ibriwan fu den studenti abi fanowdu, dan poti dati na ini begi. Baka dati yu musu sreka yusrefi gi a studie nanga den sani disi na prakseri. Aksi yusrefi: ’San a sma musu du now so taki a kan tan go na fesi na yeye fasi?’ Nanga lobi yu musu yepi a studenti fu frustan san a Bijbel nanga den buku fu „a getrow èn koni srafu” e taki fu a tori disi (Mat. 24:45). Sontron a no nofo fu sori nomo fu san ede wan sani de so. Kande yu sa musu sori a studenti fa a musu fiti wan spesrutu Bijbel leri na ini en eigi libi; kande yu musu du wan sani makandra nanga a studenti fu sori en fa a kan du dati.​—Yoh. 13:1-15.

Te yu e yepi trawan fu libi wan libi soifri leki fa Yehovah wani, dan yu musu man si krin san yu kan du fu yepi den. Sma komoto fu difrenti presi, den abi den eigi sani di den man du bun, èn a wan sma e go na fesi moro esi leki a trawan. Yu no musu fruwakti fu trawan taki den du sani di den no man du (Fil. 4:5). No dwengi den fu tyari kenki kon na ini den libi. Meki a de so, taki a Wortu fu Gado nanga a yeye fu en e gi den deki-ati fu kenki. Yehovah wani taki sma musu dini en fu di den e firi na ini den ati fu du so, èn no fu di A e dwengi den (Ps. 110:3). Luku bun taki yu no e fruteri trawan san yusrefi e denki fu wan sani di densrefi musu du, èn srefi efu den e aksi yu fu taigi den san den musu du, dan toku yu musu luku bun taki yu no teki bosroiti gi den.​—Gal. 6:5.

Yepi den na wan bun fasi. Aladi na a fosi presi, Yesus ben broko en ede nanga a yeye tanbun fu den arkiman fu en, toku a ben sabi heri bun o ten den ben abi tra sani fanowdu tu (Mat. 15:32). Srefi efu wisrefi no abi so furu gudu, toku furu bun fasi de fa wi kan yepi trawan.

Te wi e broko wi ede nanga trawan, dan wi sa hori na prakseri san moro bun gi den. Fu gi wan eksempre, efu alen e fadon tumusi tranga so taki yu arkiman no man arki yu so bun, dan go na wan tra presi, noso taigi en taki yu sa kon baka na en fu go doro tapu wan tra ten. Efu yu kon na en tapu wan ten di no fiti kwetikweti gi en, dan taigi en taki yu wani kon baka moro lati. Efu wan birtisma noso wan tra sma di wani sabi moro fu a boskopu e siki noso a de na ini ati-oso, dan sori taki yu e broko yu ede nanga a sma fu di yu e seni en wan karta noso wan syatu brifi, noso fu di yu e go luku en srefi. Efu a fiti, dan kande yu kan seni pikinso nyanyan gi en, noso kande yu kan du wan tra bun sani gi en.

Te den bijbelstudenti e go na fesi, dan den kan firi taki den e misi wan sani fu di den no kan de so furu moro nanga den mati fu den di den ben abi fosi. Sobun, tron wan mati fu den studenti fu yu. Teki yu ten fu taki nanga den baka a bijbelstudie èn na tra ten. Gi den deki-ati fu suku bun mati (Odo 13:20). Yepi den fu go na den Kresten konmakandra. Sidon nanga den na tapu den konmakandra disi, èn yepi den nanga den pikin so taki den alamala kan nyan bun fu a programa.

Sori trawan nanga yu heri ati taki yu wani kon sabi den moro bun. Fu sori trawan taki yu wani kon sabi den moro bun, a no wan sortu les di yu musu leri, ma a de wan sani di e komoto fu na ati. Sma sa man si efu trutru wi wani kon sabi den moro bun, te den luku den sani di wi e du. A sa de fu si na a fasi fa wi e arki èn na den sani di wi e taki. A sa de fu si tu na a switifasi di wi e sori trawan èn na a fasi fa wi e hori den na prakseri. Srefi te wi no e taki noti noso wi no e du nowan sani, toku a sa de krin fu si na a fasi fa wi e tyari wisrefi èn na a fasi fa wi e poti wi fesi. Efu trutru wi e broko wi ede nanga trawan, dan sondro misi den sa man si dati.

A moro prenspari sani fu san ede wi wani kon sabi trawan moro bun, na taki efu wi e du dati, dan wi e sori a srefi lobi nanga sari-ati di wi hemel Tata e sori. Disi e yepi den arkiman fu wi, fu den kon moro krosibei na Yehovah èn fu teki a boskopu di A gi wi fu prati. Fu dati ede, te yu e prati a bun nyunsu nanga trawan, dan meki muiti fu no ’denki yusrefi wawan èn luku yu eigi tori nomo, ma denki trawan tu èn luku fa a de nanga den’.​—Fil. 2:4.