Abi persoonlijk belangstelling gi trawan
„Aladi yu e hori ay no fu persoonlijk belang ede tapu soso yu eygi afersi,ma so srefi fu persoonlijk belangstelling ede tapu di fu den trawan.” — FILIPI SMA 2:4.
1, 2. San na wantu reyde fu abi persoonlijk belangstelling gi tra sma?
WI abi bun reyde fu abi persoonlijk belangstelling gi tra sma. Fu kari wan sani, wi musu abi belangstelling gi tra sma bika wi kenki fu makandra. Na genetis materiaal fu den cel fu wi skin abi wan blauwdruk fu wan lo eygifasi di wi kisi fu wi ppa nanga mma. Na blauwdruk disi de so aparti, taki sma di e feti ogridu ben poti na genetis ’finga afdruk’ go na den furu teknik fu den fu kan kon sabi wan sma.
2 Tra sani de ete fu san-ede wi kenki fu makandra èn e meki wi de sma di tra sma abi belangstelling gi. Fu sensi na ten di wi mma ben hori bere fu wi, dan wi ben kon ondro na krakti fu na birti fu wi. Furu buweysi de taki nyunyun pikin di no koboru ete e du sani tapu san e psa dorosey fu na muru. Dan, baka te wi kon na ini grontapu leki sma ofu sili di e hari bro èn di de tapu den srefi, dan den yeyefasi nanga du fu wi ppa nanga mma e wroko tapu wi. Te wi e gro kon bigi, dan wi kan de na wan enkri pikin ofu wi e kisi pikin brada nanga sisa èn wi abi wan prati kande fu sorgu gi den. Fu abi ofu no abi na sortu fu demakandra disi abi krakti tapu fa wi e gro kon de. San wi e leysi, e kisi fu leri na skoro, èn e si na telefisi, abi so srefi krakti tapu wi denki nanga du.
3. Sortu belangstelling wi musu abi spesrutu gi tra sma ini akruderi nanga Filipi sma 2:4?
3 Sobun, na fasi fa wi kenki fu makandra e wiki na belangstelling fu makandra. Ma na apostru Paulus ben abi na ini prakseri wan moro hey reyde fu abi belangstelling gi trawan. Fu dati-ede a ben taki tranga nanga konpekresten ’fu hori ay no fu persoonlijk belang ede tapu soso yu eygi afersi, ma so srefi fu persoonlijk belangstelling ede tapu di fu den trawan.’ (Filipi sma 2:4) Na presi fu suku wi eygi wini, dan wi musu abi spesrutu belangstelling ini tra sma na yeye fasi. San dan na wan tu fasi fa wi kan abi so wan persoonlijk belangstelling gi trawan?
Belangstelling na yeyefasi èn difrenti na ini na sma di wi de
4. Sortu kenki di Efesiya sma 4:22-24 e taki fu en, e meki wi yeye belangstelling gi tra sma kon moro bigi?
4 Wi belangstelling na yeyefasi gi tra sma e kon moro bigi te wi srefi e poti sabi fu beybri waarheid na ini wi libi èn e leri fu seti wi srefi akruderi na eksenpre fu Yeyses Krestes (1 Petrus 2:21). Leki tru kresten ’wi e puru na owru sma di wi de, èn di e kruderi nanga wi fositen waka nanga libi’ èn wi e wroko fu poti ’na nyun sma di wi de na ini en presi, di ben meki akruderi na wani fu Gado na ini tru regtfardikifasi nanga loyaliteit’ (Efesiya sma 4:22-24). Sobun, den yeyefasi fu prakseri yu srefi nomo e meki presi safrisafri gi wan yeyefasi fu switifasi, pe wi e sori taki wi e hori trawan na prakseri. — Yesaya 65:25.
5. Fu san-ede yu abi na ini na kresten gemeente difrenti na sma ini a sma di den de, san e meki sortu aksi kon?
5 Ma o aparti a mindri Yehovah pipri den kenki mag de tu ini a sma di wi de, toku sondu firi e tan de ete. Srefi Paulus ben piki taki: „Te mi wani fu du san de yoysti, san de takru de na mi” (Romen 7:21). A no de fu taki, taki tra fasi di wi kisi fu wi ppa nanga mma de ete èn den disi e meki sma kon sabi wi. Son sma abi wan koni fu meki moy sani, trawan wan fasi fu luku sani finifini fosi. Aladi son sma de tiri èn e hori den srefi aparti, dan trawan e suku yoysti konpani èn no e syensyen. Fa na wánfasi fu na kresten gemeente kan tan a mindri den sortu difrenti disi di de na ini a sma di wan sma de?
6. Fa wi musu si den difrenti na sma ini a sma di den de èn fa yu kan sori disi nanga wan eksenpre?
6 Efu wi wani sori belangstelling gi trawan na yeyefasi èn kibri na kresten wánfasi, dan wi musu luku sani leki fa den de trutru èn sori taki wi e frustan wan trawan. Fu di Gado no e aksi volmaaktifasi fu wi, dan wi no musu aksi dati tu fu wi krestenkonpe. Boyti fu dati, Yehovah no e fruwakti fu ala en futuboy de precies a srefi. Wi alamala abi wan presi na ini na kresten gemeente èn wi kan kobroyki den koni di wi kisi fu Gado fu meki na wroko fu en go a fesi (1 Korente sma 12:12-26). Efu wi e tan abi furu fu du ondro na tiri fu na Edeman fu na gemeente, Yeyses Krestes, dan wi no sa abi ten fu luku na makandra na wan fasi fu feni fowtu (1 Korente sma 4:1-4). Neleki fa wan anuwrokoman sabi, dan ibri wrokosani meki fu du wan seyker wroko. Wan amra kan meki na fini olo di wan boro e meki? Wan bèytel di den e kobroyki fu wroko udu kon moy kan kobroyki fu dray wan skrufu bun? Nôno, bika ibri wrokosani abi en yoysti fasi fa fu kobroyki en.
7. Te wi e teki prati makandra na ini na Kownukondre dienst, san wi musu hori moro furu na prakseri?
7 O tru den wortu fu na Kownukondresingi de „Prisiri diniwroko”! Na singi disi e gi wi tranga: „Mek nanga prisiri we dini Gado. Poti ibri koni ini en wroko.” A de tru, taki kande wi no abi aparti koni. Ma toku ete, na wroko di wi kisi leki Yehovah Kotoygi e teki na ini wi frustan na moro prenspari presi èn wi e gi wi srefi na dati abra nanga wi heri ati. Na singi e go moro fara: „Wins fa wi wroko pkin, ai sor alaten, dat wi ati de fu en èn lobi en.” — Singi èn tya un srefi nanga poku ini unu ati, singi 58. (Na ini na nyun singibuku, singi 130.)
Si trawan moro hey
8. Fa wánfasi e go a fesi te wi e poti na ini wi libi san Paulus e taki na Filipi sma 2:1-3?
8 Wánfasi e go a fesi so srefi tu te wi e si trawan moro hey leki wi srefi. Paulus ben skrifi: „Efu dan iniwan deki-ati de na ini Krestes, efu iniwan trowstu fu lobi de, efu iniwan prati fu yeye de, efu iniwan safu firi fu lobi nanga sari-ati de, meki dan mi prisiri kon de reti dorodoro, fu di yu de a srefi ini memre èn abi na srefi lobi, fugu kon na wan ini sili, e hori na wán sani na ini prakseri.” Luku pikinso, taki Paulus e taki moro fara: „No e du noti fu a lobi fu strey ede ofu fu denki yu srefi nomo, ma nanga sakafasi fu memre e si den trawan moro hey leki yu srefi.” — Filipi sma 2:1-3.
9. San a wani taki fu lobi strey èn fu denki na yu srefi nomo, èn fa wi kan tan farawe fu den fasi disi?
9 Fu di wan sma di lobi fu strey no e si wan trawan moro hey, meki a e sori „nofotron wan tranga-ede nanga weri-ede fasi fu meki trobi nanga kesekese” (Webster’s New Collegiate Dictionary). Na fasi disi kan sori en srefi na ini „strey fu wortu” (1 Timoteyus 6:4). Seyker, wi musu broko wi ede moro furu nanga na yeye baka den wortu èn den prakseri di den e tyari kon abra. So bun tan farawe fu poti prakseri tumusi furu na bepaalde wortu di e taki nanga mofo ofu di e skrifi tapu papira. Ma fa a de efu wan tra fasi fu si sani fu wan bepaalde punt fu bribi a e tyari kon na yu? Hori loyaal na den beybri bodoy di Gado gi nanga yepi fu „na kotrow èn koni srafu” (Mateyus 24:45-47). Te yu luku en bun, dan na so wi ben leri na waarheid ini na fosi presi. Te wi e èrkèn disi dan a sa yepi wi fu no denki na wi srefi wwan, dati wani taki, fu abi wan firi psa marki taki wi de prenspari.
Kweki gi tra sma persoonlijk belangstelling
10. Fa Filipi sma 2:4 musu tyari kon tapu na gemeente?
10 Prakseri pikinso taki Paulus e taki tranga nanga wi ’no fu hori ay fu persoonlijk belang ede tapu wi eygi afersi ma fu persoonlijk belangstelling ede tapu di fu den trawan’ (Filipi sma 2:4). San disi wani taki? Neleki fa na man di wi man fu si sani fu a kontren fu wi gawgaw e yepi wi na ini a velddienst, na so na abi fu belangstelling gi na tanbun fu trawan ini na gemeente sa gi wi okasi fu tranga na banti fu lobi di e tay wi makandra. Spesrutu den owruman abi wan frantiwortu fu sori broko-ede gi konpebribiman, bika wan odo e taki: „Yu musu sabi seyker fa yu pikin meti tan” (Odo 27:23). A no de fu taki taki wi alamala kan èn musu de nanga opo ay gi den fanowdu fu wi konpebribiman. — 1 Petrus 2:17.
11. Fu san-ede wi musu de nanga opo yesi te wi yeye brada nanga sisa e taki?
11 Wan tra fasi fu meki wánfasi go na fesi èn fu kweki belangstelling gi trawan de fu teki ten fu abi kommunikâsi nanga yu yeye brada nanga sisa. Kon sabi san den e prakseri. Disi kan du te yu e fisiti den na den oso, na ini na Kownukondrezaal fosi èn baka konmakandra, èn te wi e teki bro na tapu den bigi konmakandra fu wi. Èn arki bun san den e taki. Disi kan wani taki taki wi sa yere fu den muylekhèyt pe den tanapu a fesi, ma dan kande wi kan yepi tyari na lay fu den èn na so fasi du na wèti fu Krestes (Galasiya sma 6:2). Toku ete yu abi wan sani moro leki taki nanga brada nanga sisa di sa kibri na wánfasi fu na gemeente. San na dati?
Sori taki yu e firi nanga den
12. Fu san-ede wi musu sori taki wi e firi nanga tra sma?
12 Firi nanga tra sma so srefi e meki kresten wánfasi go na fesi. Aladi na druk fu na libi dey fu dey e kon moro tranga, toku wi alamala musu sori na eygifasi disi. Meki noyti wi poti wi prakseri so tapu sani di wi wani fu du, taki wi e misi fu sori taki wi e firi nanga trawan. Fu gi wan eksenpre: Leti di wan brada di ben sa abi wan prati na a dienstkonmakandra ben doro, dan wan owruman ben taki esi-esi nanga en fu wan afersi di ben musu meki bekènti. Leki wan fruwondru sani èn leki wan syen gi na owruman na seyker brada disi ben luku en èn ben lafu switi èn ben taki: „Ini na fosi presi brada, kuneti!” Den ben taki nanga makandra san ben musu meki bekènti bakadi den ben gi makandra switi odi èn na brada ben firi en srefi switi. Fa na owruman ben leri wan leri! No de gaw tumusi so taki yu e poti manirifasi na wan sey di e meki na demakandra nanga tra sma de wan switiwan.
13. Firi nanga tra sma e buweygi owruman fu du san na ini na demakandra fu den nanga krestenkonpe?
13 Firi nanga trawan e buweygi owruman fu sori sari-ati nanga tra tumusi moy eygifasi. Sontron den man disi musu de so safu èn nanga switifasi leki „te wan mma di e gi pikin bobi e boboy en eygi pikin” (1 Tesalonika sma 1:7). Na yepi fu bepaalde sma e aksi furu pasensi nanga yepi na wan lobi fasi. Den sma di ’libi na lobi di den ben abi fosi’ kande musu kisi deki-ati fu du moro bigi aktiviteit èn abi kande yepi fanowdu fu frustan na tranga fanowdu fu na ten (Openbaring 2:4; 2 Timoteyus 4:2; Hebrew sma 6:11, 12). Neleki Paulus, na so owruman abi „safu firi fu lobi” gi krestenkonpe, aladi den e frumane èn e gi deki-ati na den, ’so taki den e go doro fu waka na wan fasi di de warti na Gado’ — 1 Tesalonika sma 2:8, 11, 12.
14. Fa Paulus ben sori taki a ben firi nanga tra sma?
14 Paulus ben gi owruman wan tumusi moy eksenpre fa fu sori taki den e broko ede nanga na tanbun fu yeye brada nanga sisa. A ben skrifi: „Boyti den sani dati di de fu dorosey, dan dey fu dey na sorgu gi ala den gemeente e lon kon tapu mi.” Fu di Paulus ben firi so wan broko-ede, meki a ben kan aksi: „Suma swaki èn mi no swaki? Suma ben naki futu èn mi no e kisi atibron?” Efu yu de wan owruman, yu abi dan someni firi gi trawan? — 2 Korente sma 11:28, 29.
Wini yu brada
15. Sortu ray fu Yeyses na ini Mateyus 18:15 wi musu waka na en baka te seryusu muylekheid kon a mindri brada, èn san musu de na ini disi na marki?
15 Na sori di yu e sori taki yu e firi gi trawan e meki wánfasi go a fesi a mindri Yehovah futuboy. Ma na wan tu okasi persoonlijk trobi e opo ede kon. Te a e go fu seryusu afersi, dan kresten sma musu waka baka na ray fu Yeyses di skrifi na ini Mateyus 18:15-17. Luku pikinso na fosi stap. Go taki nanga yu brada yu wwan fu ’tyari en fowtu kon a krin’. San musu de na marki fu yu? Iya, ’fu wini yu brada’! Ma Yeyses ben taki: „Efu a e yere yu, dan yu wini yu brada.” Koloku taki na takimakandra wwan nofotron de ala sani di de fanowdu fu meki na vrede èn matifasi mindri yu nanga yu konpe-anbegiman fu Yehovah kon bun baka.
16. San musu du efu yu si taki yu brada abi wan sani nanga yu?
16 Efu yu si taki yu brada abi wan sani nanga yu, waka na baka na ray fu Yeyses fu ’meki vrede nanga yu brada’ (Mateyus 5:24). Taki na problema na ini wan tiri nanga switifasi, aladi unu e pruberi fu frustan na fasi fa unu e si na tori. Tapu na fasi disi nofotron na afersi kan lusu èn na vrede fu na gemeente kan tan.
Wini sma di no de na bribi
17, 18. Sortu ray Petrus ben gi kresten uma na ini wan osofamiri di prati ini fasi fu anbegi?
17 Wan fu den moro muylek situwâsi fu poti beybri gronprakseri na ini wi libi de na ini wan osofamiri di prati ini na fasi fu anbegi. Furu kresten e tan du muyti futru, aladi den e kaka futu gi brokosaka nanga problema di e kon fu wan mankeri fu yeye wánfasi na ini den trowlibi. Fa den kan kisi yepi?
18 Fu di owruman e abi persoonlijk belangstelling gi tra sma meki nanga ala prisiri den e gi yepi na yeyefasi na den sma di e libi na ini osofamiri di prati na ini a fasi fu anbegi. Fu eksenpre, na prakseri kan poti tapu Petrus ray di e go fu na waka nanga libi fu kresten uma na ini na situwâsi disi. A e taygi den fu saka den srefi na ondro den masra fu den, srefi efu den disi no de na bribi èn „no e gi yesi na a wortu”. Fu san-ede den musu saka den srefi? „So taki. . .sondro wortu den kan wini den nanga yepi fu na waka nanga libi fu den uma fu den” (1 Petrus 3:1). Ma o bun na poti fu na ray disi na ini wi libi de?
19. Gi wan eksenpre di e sori o bun a de fu poti 1 Petrus 3:1 na ini wi libi?
19 Wan uma di nen Vera, e piki taki di a ben tron wan kresten, a ben taki doronomo nanga en man fu na beybri waarheid èn na man ben kon fruferi fu dati. „Di mi waka na baka na ray fu na beybri di mi ben kisi fu wan owruman,” so a e go moro fara, „mi ben bosroyti taki a ben de moro bun fu ben sori takt èn fu wakti tapu moro bun okasi fu sori den srefi.” Te yu luku en bun, dan Vera ben kobroyki 1 Petrus 3:1, aladi a ben teki fesi fu tyari en masra, Barry, so fara fu taki fu beybri gronprakseri. A man ben fruteri bakaten: „Ini den yari di psa mi ben si uitgave fu Ontwaakt! [wan sisatijdschrift fu Na Waktitoren] na ala sortu presi na ini na oso. Na tijdschrift ben abi tori fu afersi di ben de praktis èn son tron ben de a fesi a nyunsu.” A bakapisi ben de taki baka twenti yari sondro fu abi wánfasi, Barry nanga Vera tyari kon na ini wan koloku wánfasi na ini Yehovah dienst.
20. Sortu yepi owruman kan gi na kresten masra na ini osofamiri di prati na ini fasi fu anbegi?
20 Wan masra di de na bribi abi en tumusi muylek efu en uma de teyge na tru krestendom èn e pompu den pikin fu den fu de teyge en. Owruman di abi persoonlijk belangstelling gi so wan man, kan poti prakseri tapu bun beybri ray. Na so fu eksenpre den kan sori na tapu taki aladi a uma e gens, toku en na a ede fu na osofamiri èn musu gi en pikin leri na ini na beybri (Efesiya sma 6:4). A kan kisi deki-ati fu libi na en uma „akruderi sabi”, aladi a e sori belangstelling gi san na uma e du èn e yepi na uma nanga na osowroko èn e sorgu gi den pikin (1 Petrus 3:7). Moro furu na masra di de na bribi èn di de ppa musu kisi deki-ati fu hori na kommunikâsi opo, so taki a kan kon sabi san e libi na ini na ati fu ibriwan fu den memre fu en osofamiri. Den owruman kan gi en so srefi deki-ati fu du muyti doro fu yepi en uma nanga wortu di ’de nanga sowtu’, pe a e kobroyki bun momenti fu taki nanga takt fu na waarheid fu na beybri. — Kolose sma 4:6.
21. Fa wan uma di no de na bribi kan kisi yepi fu kisi belangstelling gi na waarheid?
21 Sori belangstelling gi famiriman fu kresten sma na ini wan osofamiri di prati ini fasi fu anbegi sontron e meki den teki faya fu arki na Kownukondreboskopu. Luku wan eksenpre fu disi: Wan kresten man ben lasi ati fu di en uma difrenti yari kba ben gens en srefisrefi. Wan owruman ben pristeri fu kon na en oso èn fu gi yepi nanga wan beybri takimakandra. Di na owruman doro na oso, a ben taki na uma odi tapu wan switi fasi èn ben aksi: „Yu e firi fu kon sidon tu?” Na switi kari disi ben wroko so bun tapu na uma, taki nanga ala prisiri a ben teki prati na a takimakandra. Heri esi a ben teki na waarheid èn a ben bigin preyki gi tra sma.
22. Fu san-ede yu wani abi persoonlijk belangstelling gi makandra?
22 Meki fu dati-ede wi leki Yehovah Kotoygi ’du ala sani fu na bun fu na bun nyunsu’ (1 Korente sma 9:23). Iya, ’so langa a ten bun ete gi wi, meki wi du bun gi ala sma, ma spesrutu gi den di de nanga wi na a srefi bribi’ (Galasiya sma 6:10). Meki wi abi persoonlijk belangstelling gi makandra so taki furu lobi mag de na ini wi bradafasi na a heri grontapu.
Fa yu ben sa piki?
◻ Fu san-ede spesrutu wi musu abi belangstelling na ini tra sma?
◻ Fa wi kan kweki persoonlijk belangstelling gi konpebribiman?
◻ Fa owruman kan sori taki den e firi nanga trawan?
◻ San kan de a bakapisi te wi sori belangstelling gi sma di no de na bribi?
[Prenki na tapu bladzijde 13, 14]
So leki ibri wrokosani meki fu du wan seyker wroko, na so alasma na ini na kresten gemeente kan kobroyki den koni di den kisi fu Gado fu meki a wroko fu Gado go a fesi
Meki kresten wánfasi go a fesi fu di yu e sori persoonlijk belangstelling gi trawan
[Prenki na tapu bladzijde 15]
Paulus ben gi owruman wan tumusi moy eksenpre fa fu sori taki den e broko-ede na wan lobifasi gi konpebribiman