Sori persoonlijke belangstelling gi trawan
1 A belanstelling foe Jehovah gi trawan de krin foe si srefisrefi. A no de so taki a ben sorgoe nanga boen-ati foe den skin fanowdoe foe en mekisani? (Gen. 1:29, 30; 2:16, 17; Mat. 5:45; teki gersi Lukas 6:35.) San moro prenspari, a no de so taki a ben sori persoonlijke belanstelling gi wi foe di a seti sani foe meki wi kon fri foe sondoe nanga dede?—Joh. 3:16.
2 Di Jesus ben de na grontapoe, a ben waka na baka a volmaakti eksempel foe en Tata tapoe a kontren foe persoonlijke belangstelling gi trawan (Mat. 11:28-30; 1 Petr. 2:21). Di wan serjoesoe gwasiman ben taigi Jesus: „Masra, soso efoe joe wani, joe kan meki mi krin”, Jesus ben piki: „Mi wani dati”, èn a ben dresi a man (Mat. 8:2, 3). Di Jesus ben kon krosibei foe a foto Naïn, a ben si wan lo sma di ben e go beri, den ben e tjari wan jongoeman, na wan enkri manpikin foe wan weduwe, go na a beripe, èn nanga sari-ati Jesus ben wiki en poeroe foe dede (Luk. 7:11-15). Sondro foe aksi Jesus ben sori persoonlijke belangstelling gi trawan. Srefi gi pikin-nengre a ben feni warti foe gi en ten èn prakseri, èn noiti a ben abi en toemoesi druk foe trowstoe trawan èn gi den deki-ati—Mat. 20:31-34; Mark. 10:13-16.
FAMIRI NANGA MATI
3 Wi moesoe meki moeiti foe de neleki Jehovah nanga Jesus, foe di wi e soekoe pasi foe sori trawan persoonlijke belangstelling. Meki foe dati-ede wi go loekoe wan toe okasi foe doe dati.
4 A de fanowdoe srefisrefi taki den brada e sori wan opregti persoonlijke belanstelling gi den eigi osofamiri memre èn no abi wan mi-no-kefasi nanga a jejefasi foe na osofamiri foe den. Gi disi wan doronomo osofamiri studie de fanowdoe. A de so taki, ini joe osofamiri studie joe e loekoe a materiaal na so wan fasi taki a de boen èn abi praktis waarde? Joe e meki disi doro en kaba krinkrin foe di doronomo joe e wroko ini a velddienst nanga ibri memre foe joe osofamiri? Te joe e doe disi a de wan switi ten dan? Joe e bow na ini joe pikin na angri foe jepi tra sma, èn joe e sori na so fasi kresten lobi gi joe birti sma? Efoe joe trow èn joe no abi pikin na oso, a de so dan taki tokoe joe abi wan osofamiri studie?
5 Efoe a kan, wi wani gi ibri sma jepi na jejefasi. Ma wi e frigiti ini wi druk libi foe sori persoonlijke belangstelling gi memre foe a gemeente di abi spesroetoe fanowdoe? (Odo 3:27; Gal. 6:10) Ini a kresten gemeente boi de di no abi papa, owroe sma, weduwe, swakiwan, brokoskin wan, den sma di kisi mankeri na den skin èn trawan nanga spesroetoe fanowdoe. Te wi e waka baka Jehovah nanga en Manpikin Jesus Krestes, dan wi no moesoe misi foe sori persoonlijke belangstelling gi ala wi brada nanga sisa. —1 Kor. 10:24; Fil. 2:4; Hebr. 13:16.
SMA INI A VELDDIENST DI JOE KAN TEKI GERSI NANGA SKAPOE
6 Fa wi kan sori persoonlijke belangstelling gi sma di abi wan osobijbelstudie? Foeroe foe den kon si taki den no moesoe abi demakandra nanga grontapoe sma di den sabi. Wi e sori, awasi wi abi en druk, persoonlijke belangstelling gi den sortoe bijbelstudenti disi èn wi e gi sma di tjari kenki kon a firi taki den de welkom leki njoen mati foe wi? Wi de wan peti foe deki-ati gi den, awasi wi a no den sma di e studeri nanga den?— Teki gersi Markus 10:28-30.
7 Joe kan abi wan moro bigi prati ini a sori foe opregti persoonlijke belangstelling gi sma di wani arki na a boen njoensoe? Joe sa proeberi foe jepi den foe di joe e sorgoe gi den fanowdoe foe den na jejefasi? San joe kan doe joesrefi foe abi wan moro bigi prati na a velddienst? No hari go nanga baka efoe now joe de ini a posisi foe abi wan moro bigi prati na dati. — Luk. 9:60-62.
8 Wi moesoe waka baka Jehovah nanga Jesus foe di wi e sori persoonlijke belangstelling gi trawan. Wi moesoe abi sari-ati èn moesoe wani jepi trawan nanga prisiri, leki fa Jesus ben doe ini a tori foe a man di ben abi wan serjoesoe gwasi siki. Ija, ala ten wi moesoe de na ai foe feni fasi fa wi kan sori persoonlijke belangstelling na trawan.