Doe boen na den sma di abi spesroetoe jepi fanowdoe
1 Kristensma kisi na komando foe lobi makandra èn foe sori opregti belangstelling gi tra sma nanga na tan boen foe den (Joh. 13:34; Rom. 15:1, 2). Solanga ’a ten de boen ete’ dan wi wani doe boen spesroetoe gi den sma di abi na srefi leki wi (Gal. 6:10). Na rai foe santa jeje e taki: „No hori na boen na baka foe den sma di abi reti a tapoe, te a de ini na makti foe joe anoe foe doe en”. — Odo 3:27.
2 Ini na kristen gemeente joe abi boi di no abi papa nanga mama, owroesma, weduwe, sma di de swaki, sma di lasi ati ofoe sma di de malengri èn trawan di abi spesroetoe jepi fanowdoe. Famiriman nanga tra sma di de krosibé famiri dus foe den sma disi ini na fosi presi moe sorgoe dati den sortoe sma disi kisi jepi. Te wi e waka baka Jehovah nanga Jezus Kristus, alamala kan broko wi ede nanga disi. — 1 Tim. 5:4, 8; Ezech. 34:16; Matt. 9:36.
San wi kan doe?
3 San wi kan doe foe gi jepi? Ini son geval wan sjatoe fisiti ofoe wan switi takimakandra kan meki den firi switi. Ofoe kande wi kan teki den tjari ini wi oto go na den komakandra, kari den foe go ini na velddienst nanga wi, ofoe aksi den ofoe den wani wi hori wan bijbelstudie nanga den. Wan owroe sisa ofoe wan boi sondro papa wi kan kari foe teki prati na wi osofamiri studie èn ofoe kon foe njan. Ala sma ini na gemeente kan abi wan prati na ini dati den sma di abi spesroetoe fanowdoe e kisi asisteri. Tini nanga jongoe pikin kan gi jepi te den e doe boskopoe èn doe ala sortoe wroko. Jongoesma di soso wan papa ofoe mama foe den de ini waarheid, kan bigin nanga a boen wroko disi te den e gi a jepi disi na a oso foe den. Foeroe fasi de fa wi kan sori èn moesoe sori opregti kristen lobi. — Tori foe den Apostel 9:39; 1 Petr. 4:8-10.
4 A no de wan ongewoon sani dati den sma di densrefi abi jepi fanowdoe de den fosiwan di e soekoe foe doe wan sani gi na fanowdoe foe trawan. Ia, foeroe foe den ben feni fasi pe den ben kan jepi densrefi. Jepi joesrefi kan de wan toemsi prenspari sani foe abi wan kolokoe kristen libi di e meki froktoe. Hondro hondro pionier de di siki na skinfasi, ma di abi foeroe foe doe ini na prékiwroko. Son foeroeten wrokoman breni, dofoe ofoe sidon ini wan lolo-stoeroe. Foeroe njoen pionier di den poti leki pionier de owroe brada nanga sisa foe soema sonwan foe den e siki èn e libi den wawan. Na presi dati den poti densrefi aparti èn leki wan kragi na den srefi e hori densrefi bezig nanga densrefi, den abi wan boen loekoe, tapoe sani èn a belangstelling foe den e go na tra sma. Den e wroko fajafaja foe prati na boskopoe foe na Kownoekondre nanga trawan (Tori foe den Apostel 18:5). Disi wi kan taki sosrefi toe foe den foeroe boi sondro papa di de ini na pionierdienst nanga na zendingsdienst ofoe di kon wroko tapoe Bethel. A no de foe taki dati foeroe foe den di abi spesroetoe fanowdoe no de ini wan positie foe teki na foeroeten dienst na den tapoe. Ma ete den eksempre di gi e poti krakti a tapoe na jeje di wi alamala moe abi èn na den blesi di de leki a baka pisi foe dati. — Mark. 10:28-30.
5 Foeroe sani de di ibriwan foe wi kan doe foe de kolokoe èn tan loekoe sani na wan boen fasi. Wi kan lèsi alaten na bijbel, den tijdschrift, nanga den tra boekoe foe na Genootschap, arki na den bijbelboekoe tapoe cassette-lolo èn meki na waarheid foeroe wi ati. Sosrefi toe wi kan naki konkroetité go na sikiwan ofoe sma di lasi ati èn gi den dek-ati. Wi kan skrifi brifi èn teki fesi foe sori belangstelling gi makandra. Boiti dati, wi kan poti marki na wi fesi soleki na opo foe wan bijbelstudie ofoe na jepi pionierdienst ofoe wi ben sa kan feti na baka foe leri sabi den brada nanga sisa moro boen te wi e kari den kon na wi oso ofoe go soekoe den na den oso. Wi kan tjari kenki kon ini wi diniwroko èn ini wi leri èn ini wi koni foe taki te wi meki den skrifi wi nen tapoe na Theocratis Diniwroko skoro. Brada kan feti baka na grani foe de wan dinari (1 Tim. 3:1) O moro wi e sori faja foe doe sani gi trawan èn gi wisrefi o moro kolokoe wi sa de. — Tori foe den Apostel 20:35.
6 Wi alamala moe weri leki wi krosi lobi nanga sakafasi wans fa na fanowdoe foe wi de. Efoe wi abi spesroetoe jepi fanowdoe, ma wi moe loekoe boen foe no sjensjen ofoe gi pasi dati bigimemre tjari wi so fara foe no teki na lobi jepi foe wi brada nanga sisa. Efoe wi e gi jepi dan wi moe gebroiki wan boen powa foe si sani boen èn foe no hati na égi respeki ofoe na wartifasi foe trawan. No wan sma foe wi moe meki na fowtoe dati a de gebroiki na lobi foe wi brada nanga sisa tapoe wan fowtoe fasi ofoe foe njan boen foe en tapoe wan fowtoe fasi. Wi moe sori wan positief jejefasi, de redelek èn abi jejefasi, èn foe prisiri ini a howpoe foe wi (Fil. 4:4-9). Na rai foe lobi ’wi brada nanga wi heri ati’ de gi ALA kristen, foe di ALAMALA abi fanowdoe foe kisi lobi. Foe dat-ede meki wi ALAMALA moe si na gi foe lobi leki wi spesroetoe kontren foe jepi. — 1 Petr. 1:22.