San yu kan feni tapu a website fu wi?

Yesus Krestes taigi den bakaman fu en: „Meki un leti skèin gi sma tu. Dan den kan si den bun di unu e du èn den kan gi glori na un Tata di de na hemel” (Mateyus 5:16). Fu man du dati, wi e gebroiki na Internet. Tapu a website fu wi, jw.org, yu kan feni tori fu Yehovah Kotoigi di abi fu du nanga den sani di wi e bribi èn den sani di wi e du. San de tapu a website disi?

Piki di Bijbel e gi tapu aksi di furu sma abi. Yu kan feni den piki tapu den moro prenspari aksi di sma poti. Fu eksempre, den traktaat Pina o kaba wan dei? nanga Sma di dede o man libi baka trutru? de na ini moro leki 600 tongo tapu a website fu wi. Yu kan feni a Nyun-Grontapuvertaling na ini moro leki 130 tongo èn furu buku di e yepi wi frustan Bijbel, soleki a buku San Bijbel kan leri wi?, nanga den nyun Waktitoren nanga Ontwaakt! Tapu Internet yu kan leisi noso arki furu fu den sani disi noso yu kan download den fu arki, èn yu kan download den leki mp3, PDF, noso EPUB. Efu wan sma wani sabi moro, dan yu kan print wan tu bladzijde srefi na ini a tongo fu en! Felem de tu na ini furu dofusma-tongo. Yu kan download pisi fu Bijbel di leisi na wan moi fasi, Bijbel drama, nanga moi poku.

Tori di abi fu du nanga Yehovah Kotoigi. Yu kan feni nyunsu nanga syatu felem di e taki fu a wroko di wi e du na heri grontapu, sani di pasa nanga Yehovah Kotoigi, èn yepi di wi e gi te rampu pasa. Yu kan luku o ten den kongres o hori èn den adres fu den bijkantoro.

Na a fasi disi wi e meki a leti fu den tru tori fu Bijbel skèin go na den moro farawe presi na grontapu. Sma na ala sei e kisi wini fu den sani disi, srefi den sma na a moro kowru èn fara presi fu grontapu di nen Antarctica. Wi e begi taki „a wortu fu Yehovah kan panya esi-esi” go na heri grontapu so taki Gado kan kisi glori.​—2 Tesalonikasma 3:1.

• Fa a website jw.org e yepi moro sma fu kon sabi den tru tori fu Bijbel?

• San yu ben o wani go suku tapu a website fu wi?