„Dede moesoe tjari kon na wan kaba”
„Leki a lasti feanti, dede moesoe tjari kon na wan kaba.” — 1 KORENTESMA 15:26.
1, 2. (a) Sortoe howpoe na apostel Paulus ben abi gi den dedewan? (b) Sortoe aksi di abi foe doe nanga na opobaka, Paulus ben poti?
„MI E bribi na ini . . . na opobaka foe a skin, èn libi foe têgo.” Na so a Belijdenis foe den Apostel e taki. Katoliksma nanga protestantsma toe e taki en leki wan plekti, ala di den no e froestan taki den bribi foe den gersi a Griki filosofia moro leki iniwan sani di den apostel oiti ben bribi. Ma na apostel Paulus ben weigri foe teki den Griki filosofia èn no ben e bribi na ini wan sili di no man dede. Tokoe, a ben bribi tranga na ini wan libi na ini a ten di e kon èn a ben skrifi na ondro a krakti foe Gado santa jeje: „Leki a lasti feanti, dede moesoe tjari kon na wan kaba” (1 Korentesma 15:26). San dati wani taki gi libisma di e dede?
2 Foe feni a piki dati, meki wi go baka na a takimakandra foe Paulus foe na opobaka, di skrifi na ini 1 Korentesma kapitel 15. Joe sa memre taki na ini den bigin vers, Paulus ben boeweisi taki na opobaka de wan toemoesi prenspari pisi foe a kresten leri. Now a e poti wan spesroetoe aksi: „Ma tokoe wan sma sa taki: ’Fa den dedewan e kisi wan opobaka? Ija, nanga sortoe skin den e kon?’ ” — 1 Korentesma 15:35.
Sortoe skin?
3. Foe san ede son sma no ben e bribi na ini na opobaka?
3 Di Paulus ben poti na aksi disi dan kande a ben wani taki wan sani teige a krakti foe a filosofia foe Plato. Plato ben e leri taki sma abi wan sili di no man dede èn di e tan na libi te a skin dede. Gi den sma di ben kweki nanga so wan sortoe idea, a kresten leri foe na opobaka seiker ben sori foe de wan sani di no de fanowdoe. Efoe a sili e tan libi, dan foe san ede na opobaka de fanowdoe? Boiti dati, soleki fa a sori, na opobaka no de wan logis sani. Te a skin kon tron doti kaba, dan fa wan opobaka kan de dan? Wan man di e gi komentaar tapoe bijbel, Heinrich Meyer, e taki dati a feantifasi foe son kresten abi en gron kande „tapoe a filosofia reide taki a no kan taki a materiaal nanga san a skin meki kan kon boen baka”.
4, 5. (a) Foe san ede den froeklari foe den sma di no ben abi bribi no ben de logis? (b) Froeklari Paulus en agersitori foe a „soso siri”. (c) Sortoe skin Gado gi den salfoewan di kisi wan opobaka?
4 Paulus e tjari a donfasi foe a denki foe den kon na krin: „Joe onreidelek sma! A sani di joe e sai no e kon na libi boiti te a dede fosi; èn foe a sani di joe e sai, a no a skin di sa gro joe e sai, ma wan siri nomo a de, foe tarwe noso foe iniwan tra sortoe [siri-njanjan]; ma Gado e gi en wan skin neleki fa a e plisi en, èn ibriwan foe den siri a e gi en eigi skin” (1 Korentesma 15:36-38). Gado no ben o opo den skin di sma ben abi di den ben de na grontapoe ete. Na presi foe dati, wan kenki ben sa de.
5 Paulus e teki na opobaka gersi nanga a sproiti di wan siri e sproiti. Wan pikin karoe siri no gersi a bon srefisrefi di sa gro komoto na en. The World Book Encyclopedia e taki: „Te wan siri e bigin sproiti dan a e soigi wan lo watra. A watra e meki foeroe chemis kenki e pasa na ini a siri. A e meki so srefi den inisei tetei foe a siri e sweri èn e broko pasa a boeba foe a siri.” Foe taki en leti, a siri e dede leki wan siri èn e tron wan bon di e gro. „Gado e gi en wan skin”, na a fasi disi taki a ben poti sabidensi wet di e sorgoe taki a e gro, èn ibri siri e kisi wan skin akroederi en eigi sortoe (Genesis 1:11). Na a srefi fasi, den salfoe kresten e dede fosi leki libisma. Dan, na tapoe a fasti ten foe Gado, a e tjari den kon na libi baka na ini heri njoen skin. Soleki fa Paulus ben taigi den Filipisma, „Jesus Krestes . . . sa kenki a skin foe wi di lagi, foe meki a kon a srefi fasi leki a glori skin foe en” (Filipisma 3:20, 21; 2 Korentesma 5:1, 2). Den e kisi opobaka na ini jeje skin èn e libi na ini jeje kondre. — 1 Johanes 3:2.
6. Foe san ede a de logis foe bribi taki Gado kan gi den sma di kisi wan opobaka wan jeje skin di e fiti?
6 Disi de toemoesi moeilek foe bribi? Nôno. Paulus e taki dati meti abi difrenti sortoe skin. Boiti dati, a e poti hemel engel kontrari foe libisma di meki foe meti nanga broedoe, di a ben taki: „Skin foe hemel de, èn skin foe grontapoe de.” Wan bigi difrenti de toe na mindri den kriatoeroe di no abi libi. „A glori foe den stari na wan tra sortoe”, Paulus ben taki langa ten bifo sabidensi ben bigin si den sortoe hemelskin disi soleki den blaw stari, boen bigi redi stari, nanga pikin weti stari. Nanga disi na prakseri, a no de reidelek dan taki Gado kan gi jeje skin di e fiti gi den salfoewan di kisi wan opobaka? — 1 Korentesma 15:39-41.
7. San a wani taki foe no pori? èn san a wani taki foe no man dede?
7 Dan Paulus e taki: „Na so na opobaka foe den dedewan de toe. A e sai ini a fasi taki a kan pori, èn a e opo baka na wan fasi di no kan pori” (1 Korentesma 15:42). Srefi te a libisma skin de volmaakti, tokoe a kan pori. Wan sma kan kiri en. Foe eksempre, Paulus ben taki dati Jesus di ben kisi wan opobaka „no [ben o] drai go baka na a pori” (Tori foe den Apostel 13:34). Noiti moro a ben sa kon baka na ini wan libi di ben kan pori, srefi na ini wan volmaakti libisma skin. Den skin di Gado e gi den salfoewan di kisi wan opobaka, no kan pori — den no man dede noso pori. Paulus e taki moro fara: „A sai ini wan fasi di no abi grani èn a opo baka ini glori. A e sai ini swakifasi, a e opo baka ini krakti. A e sai ini libisma skin, a e opo baka ini wan jeje skin” (1 Korentesma 15:43, 44). Boiti dati, Paulus e taki: „A sani di man dede, moesoe weri a fasi foe no man dede.” A dede di wan sma no man dede wani taki libi sondro kaba èn sondro taki a kan pori (1 Korentesma 15:53; Hebrewsma 7:16). Na a fasi disi den sma di kisi wan opobaka e tjari ’a prenki foe a wan di de foe hemel’, Jesus, di ben meki na opobaka kon de. — 1 Korentesma 15:45-49.
8. (a) Fa wi doe sabi taki den sma di kisi wan opobaka de den srefi sma di ben libi na grontapoe? (b) Sortoe profeititori e kon troe te na opobaka e bigin?
8 Ala di a kenki disi sa feni presi, tokoe den sma di kisi wan opobaka de den srefi sma ete di den ben de bifo den ben dede. Den sa opo nanga a srefi froestan èn den srefi heri boen kresten eigifasi (Maleaki 3:3; Openbaring 21:10, 18). Na a fasi disi den gersi Jesus Krestes. A ben kenki leki jeje go na a fasi foe libisma. Dan a ben dede èn ben opo baka leki wan jeje. Tokoe „Jesus Krestes de a srefi esde èn tide èn foe têgo” (Hebrewsma 13:8). Dati na wan kefalek moi grani di den salfoewan abi! Paulus e taki: „Ma te a sani disi di kan pori e weri a sani di no kan pori èn], a sani disi di kan dede e weri a sani di no kan dede, dan a wortoe di skrifi sa feni presi: „Den swari dede foe têgo.” ’Dede pe joe fektori de? Dede, pe joe maka de?’ ” — 1 Korentesma 15:54, 55; Jesaja 25:8; Hosea 13:14.
Wan opobaka na grontapoe?
9, 10. (a) Na ini a kontekst foe 1 Korentesma 15:24, san na „a kaba”, èn san e feni presi na a kaba? (b) San moesoe feni presi fosi so taki dede kan kon na wan kaba?
9 Wan tamara de gi den foeroe miljoen sma di no abi a howpoe foe abi jeje libi na ini hemel sondro foe dede? Ija, a de! Baka di Paulus ben e froeklari taki a hemel opobaka e feni presi na ini a denoja foe Krestes, dan Paulus e kari sani di sa pasa baka makandra, di a ben e taki: „Baka dati a kaba, te a e gi a kownoekondre abra na en Gado nanga Tata, te a meki ala tiri nanga ala makti nanga ala krakti kon tron noti.” — 1 Korentesma 15:23, 24.
10 „A kaba” na a kaba foe a Doesoen Jari Tiri foe Krestes, te Jesus nanga sakafasi èn na wan loyaal fasi e gi a Kownoekondre baka na en Gado èn Tata (Openbaring 20:4). A prakseri foe Gado „foe tjari ala sani kon na makandra baka na ini Krestes”, sa kon troe kaba (Efeisesma 1:9, 10). Ma fosi, Krestes sa pori „ala tiri nanga ala makti nanga ala krakti” di ben gens a Soeverein wani foe Gado. Disi wani taki moro leki a pori di sa feni presi na Armagedon (Openbaring 16:16; 19:11-21). Paulus e taki: „[Krestes] moesoe tiri leki kownoe te leki Gado poti ala feanti na ondro en foetoe. Leki a lasti feanti, dede moesoe tjari kon na wan kaba” (1 Korentesma 15:25, 26). Ija, ala den marki foe a sondoe nanga dede foe Adam sa poeroe gowe. A sa de fanowdoe dan taki Gado sa leigi den „memre grebi” te a sa tjari ala den dedesma kon na libi baka. — Johanes 5:28.
11. (a) Fa wi doe sabi taki Gado kan kria dede sili baka? (b) Sortoe skin den sma di kisi wan opobaka na grontapoe sa kisi?
11 Disi wani taki dati a moesoe kria den libisma sili baka. Dati no kan? Ija, a kan bika Psalm 104:29, 30 e gi wi a djaranti taki Gado kan doe dati: „Efoe joe poeroe a jeje foe den, dan den e hari a lasti bro, èn den e drai go baka na a doti foe den. Efoe joe e seni a jeje foe joe go, dan den e kria.” Ala di den sma di kisi wan opobaka sa de densrefi sma di den ben de bifo den ben dede, tokoe den no abi foe kisi a srefi skin. Leki den sma di ben kisi wan opo go na hemel, Gado sa gi den wan skin leki fa En wani dati. Seiker a njoen skin foe den sa de gosontoe na skinfasi èn sa gersi a fosi skin foe den so taki den lobiwan foe den sa sabi soema na den.
12. O ten na opobaka na grontapoe sa feni presi?
12 O ten na opobaka na grontapoe sa feni presi? Marta ben taki foe a dede brada foe en, Lasarus: „Mi sabi taki a sa opo baka na a opobaka na a lasti dei” (Johanes 11:24). Fa a ben sabi dati? Na opobaka ben de wan streipenti na ini a ten foe en, foe di den Fariseiman ben e bribi na ini na opobaka, ma den Sadoeseiman no ben e bribi na ini (Tori foe den Apostel 23:8). Tokoe Marta ben moesoe sabi foe den kotoigi bifo a ten foe den kresten di ben e howpoe na ini na opobaka (Hebrewsma 11:35). A ben kan froestan so srefi foe Danièl 12:13 taki na opobaka sa feni presi na ini a lasti dei. Kande Jesus srefi leri en disi (Johanes 6:39). A „lasti dei” dati e fadon na ini a Doesoen Jari Tiri foe Krestes (Openbaring 20:6). Prakseri foe a bigi prisiri di sa de na a „dei” dati te a bigi sani disi e feni presi! — Teki gersi Lukas 24:41.
Soema e kon baka?
13. Sortoe fisjoen foe na opobaka skrifi na Openbaring 20:12-14?
13 Na Openbaring 20:12-14 a fisjoen foe Johanes skrifi foe na opobaka na grontapoe: „Èn mi ben si den dedewan, den bigiwan nanga den pikinwan, e tanapoe na fesi a kownoestoeroe, èn boekoelolo ben opo. Ma wan tra boekoelolo ben opo; a de a boekoelolo foe libi. Èn den dedewan ben kisi kroetoe tapoe a gron foe den sani di ben skrifi na ini den boekoelolo, akroederi den doe foe den. Èn a se ben gi den dedewan abra di ben de na en ini, èn dede nanga Hades ben gi den dedewan abra di ben de na den ini, èn den ben kroetoe ibriwan foe den aparti akroederi den doe foe den. Èn dede nanga Hades ben fringi go na ini a se foe faja. Disi wani taki a di foe toe dede: a se foe faja.”
14. Soema sa de den sma di sa kisi wan opobaka toe?
14 Na opobaka sa de so srefi foe „den bigiwan nanga den pikinwan”, prenspari sma nanga sma di no de so prenspari èn di ben libi èn dede. Ija, srefi beibi sa de na ini na opobaka! (Jeremia 31:15, 16) Na Tori foe den Apostel 24:15 wan tra prenspari tori e kon na krin: „Wan opobaka o de foe den regtfardikiwan nanga den onregtfardikiwan.” Den prenspari sma di sa de na mindri „den regtfardikiwan” sa de getrow man nanga getrow oema foe owroeten, soleki Abel, Heinok, Noa, Abraham, Sara, nanga Rakab (Hebrewsma 11:1-40). Prakseri fa a sa de te joe o man taki nanga den sortoe sma disi èn sa man kisi finifini verslag foe sma di si nanga den eigi ai sani di pasa langa ten kaba! „Den regtfardikiwan” sa de so srefi den foeroe doesoen sma di abi frede gi Gado èn di dede no so langa pasa èn di no ben abi wan hemel howpoe. Joe abi famiriman noso wan lobiwan di ben sa kan de na mindri den sma disi? A e gi foeroe trowstoe srefisrefi foe sabi taki joe kan si den baka! Ma soema na den „onregtfardikiwan” di sa kon baka toe? Den na den foeroe miljoen sma, kande srefi miljard sma di ben dede sondro foe kisi na okasi foe kon sabi èn gebroiki bijbel waarheid.
15. San a wani taki dati den sma di kon baka sa kisi „kroetoe tapoe a gron foe den sani di ben skrifi na ini den boekoelolo”?
15 Ma fa den sma di sa kon baka sa „kisi kroetoe tapoe a gron foe den sani di ben skrifi na ini den boekoelolo, akroederi den doe foe den”? Den boekoelolo disi a no tori di skrifi foe den fositen sani di den ben doe; di den ben dede den ben kon fri foe den sondoe foe den di den ben doe di den ben de na libi ete (Romesma 6:7, 23). Ma den sma di kisi wan opobaka sa de na ondro a sondoe foe Adam ete. A moesoe de na a ten dati dan taki den boekoelolo disi sa gi moro bodoi di e kon foe Gado, di ala sma moesoe waka na baka so taki den kan abi wini dorodoro foe na ofrandi foe Jesus Krestes. Te a lasti pisi foe a sondoe foe Adam poeroe kaba, dan ’dede moesoe tjari kon na wan kaba’. Na a kaba foe den doesoen jari dan Gado sa „de ala sani gi ibriwan sma” (1 Korentesma 15:28). Sma no sa abi a jepi moro fanowdoe foe wan Granpriester noso foe wan Loesoe-paiman. Ala libisma sa kon volmaakti baka neleki fa Adam ben de na a bigin.
Wan opobaka na wan orde fasi
16. (a) Foe san ede a de logis foe bribi taki na opobaka sa feni presi na wan orde fasi? (b) Soleki fa a sori, soema sa de den fosiwan di sa komoto baka na dede?
16 Foe di na opobaka foe go na hemel e feni presi na wan orde fasi, „ibriwan na ini en eigi posisi”, dan a de krin taki na opobaka na grontapoe no sa meki libisma na grontapoe kon moro foeroe wantronso pasamarki na wan broeja fasi (1 Korentesma 15:23). Wi kan froestan taki sma sa moesoe sorgoe gi den njoen sma di kisi wan opobaka. (Teki gersi Lukas 8:55.) Den sa abi sani fanowdoe di kan jepi den na skinfasi — èn moro prenspari srefi — jepi na jejefasi foe kisi a sabi foe Jehovah Gado nanga Jesus Krestes di kan gi libi (Johanes 17:3). Efoe ala sma ben sa kon baka na libi na a srefi ten, dan wi no ben sa man sorgoe boen gi den alamala. A de reidelek foe denki taki na opobaka sa feni presi safrisafri. Getrow kresten di dede sjatoe bifo a kaba foe a sistema foe Satan, soleki fa a sori, sa de den fosiwan di sa opo. Wi kan froewakti so srefi wan froekoe opobaka na grontapoe gi den getrow man foe fositen di sa dini leki „granman”. — Psalm 45:16.
17. San na wan toe tori di abi foe doe nanga na opobaka èn di bijbel no e gi piki foe den, èn foe san ede kresten no moesoe broko den ede toemoesi nanga den sortoe afersi disi?
17 Ma tokoe wi no moesoe proeberi foe taki soifri fa sani sa de na ini den sortoe afersi disi. Na ini foeroe tori bijbel no e gi wan piki. A no e taki krinkrin fa, o ten, noso pe na opobaka foe ibri sma sa feni presi. A no e taigi wi fa den sma di sa kon baka sa kisi tanpresi, njanjan, nanga krosi. Èn wi no kan taki seiker san Jehovah sa doe foe kweki èn sorgoe gi pikin di kisi wan opobaka noso fa a sa sorgoe gi son situwâsi di ben sa kan abi foe doe nanga wi mati nanga wi lobiwan. A troe taki a de wan normaal sani foe proeberi foe prakseri foe den sortoe sani disi; ma a no ben sa de wan koni sani foe gebroiki ten foe piki den aksi di wi no man pikin nownow. Wi moesoe poti wi prakseri foe tan dini Jehovah na wan getrow fasi èn foe kisi têgo libi. Den salfoe kresten e poti den howpoe na tapoe wan kefalek moi opobaka go na ini hemel (2 Petrus 1:10, 11). Den „tra skapoe” e howpoe foe kisi wan têgo erfenis na a grontapoe kontren di de na ondro Gado Kownoekondre (Johanes 10:16; Mateus 25:33, 34). Efoe wi wani sabi den foeroe finifini tori foe na opobaka di wi no sabi, dan wi moesoe froetrow nomo tapoe Jehovah. A kolokoe foe wi na ini a ten di e kon e didon boen na ini na anoe foe a Sma di kan „meki den lostoe foe ala libisani kon troe”. — Psalm 145:16; Jeremia 17:7.
18. (a) Sortoe fektori Paulus e tjari kon na krin? (b) Foe san ede wi abi wan tranga froetrow na ini a howpoe foe na opobaka?
18 Paulus e tapoe a taki foe en foe di a e taki tranga: „Tangi foe Gado, bika a e gi wi a fektori nanga jepi foe wi Masra Jesus Krestes!” (1 Korentesma 15:57). Ija, fektori wini a dede foe Adam nanga jepi foe a froeloesoe-ofrandi foe Jesus Krestes, èn den salfoewan nanga so srefi den „tra skapoe” abi wan prati na a fektori dati. Foe troe, „den tra skapoe” di de na libi na ini a ten disi abi wan howpoe di de toemoesi aparti na ini a geslakti disi. Leki wan pisi foe a „bigi ipi” di e kon foeroe moro nanga moro, den kan libi pasa a „bigi banawtoe” di e kon èn noiti den abi foe dede na skinfasi moro! (Openbaring 7:9, 14) Ma srefi den sma di e dede bika foe „ten nanga sani di e pasa èn di sma no sabi na fesi” noso di e dede na den anoe foe den wrokoman foe Satan kan poti den froetrow na ini a howpoe foe na opobaka. — Preikiman 9:11.
19. Na sortoe froemane ala kresten na ini a ten disi moesoe gi jesi?
19 Foe dati ede, wi e wakti a glori dei dati te dede sa tjari kon na wan kaba, fajafaja. A tranga froetrow foe wi na ini a pramisi foe Jehovah foe na opobaka e meki wi denki foe sani na a fasi fa den de troetroe. Awansi san e pasa nanga wi na ini a libi disi — srefi efoe wi ben sa dede — tokoe noti kan poeroe a pai di Jehovah pramisi wi. So boen, a lasti froemane foe Paulus gi den Korentesma e fiti a srefi fasi na ini a ten disi leki fa a ben de toe doesoen jari pasa kaba: „Dati meki, mi lobi brada, kon de kánkan, no beifi, abi ala ten foeroe foe doe na ini a wroko foe Masra, foe di oenoe sabi taki a wroko foe oenoe no de foe soso ini a tori foe Masra.” — 1 Korentesma 15:58.
Joe kan tjari disi kon na krin?
◻ Fa Paulus ben piki na aksi foe sortoe skin den salfoewan sa abi te den kisi wan opobaka?
◻ Fa èn o ten dede sa tjari kon na wan kaba te foe kaba?
◻ Soema sa de den sma di sa kisi wan opobaka na grontapoe toe?
◻ Fa wi moesoe denki foe den afersi di bijbel no e gi piki na tapoe?
[Prenki na tapoe bladzijde 20]
Wan siri „e dede” te a e kenki na wan kefalek aparti fasi
[Prenki na tapoe bladzijde 23]
Getrow man nanga oema foe owroeten, soleki Noa, Abraham, Sara, nanga Rakab sa de na mindri den sma di sa kisi wan opobaka
[Prenki na tapoe bladzijde 24]
Na opobaka sa de wan pisi ten foe bigi prisiri!